Tukupā

Taimi Lōloa Tahá: Miniti ʻe 5

Tukupā ke Fakatau Atú

ʻEkitivitī (lolotonga ʻo e uiké)

ʻOku totonu ke ke kamata ʻi he taimí ni ke fakatau e ngāue pe koloa ʻoku ngaohi ʻe hoʻo pisinisí, kapau ʻoku ʻikai ke ke lolotonga fakahoko ia. Lolotonga ʻo e uike kahaʻú, fakahoko ha fakatau ʻe taha pe lahi ange ki ha kasitomā. Mohu-founga ʻi hoʻo feinga ke fakatau atu e ngāué pe koloá.

Mahalo te ke ongoʻi ʻoku teʻeki ai mateuteu hoʻo ngāué pe koloá ke fakatau atu. Neongo ia, ʻe ʻomi ʻe he fakatau atú ha fakaʻaiʻai ke hoko atu hoʻo pisinisí, he te ke fie maʻu ke fakahoko e meʻa kuó ke fakatau atú. ʻE toe ʻoatu foki ʻe he fakatau atú ha fakamatala ki hoʻo ngāué pe koloá. Kapau ʻoku faingataʻa ke ke fakatau atu, ʻe lava ʻo tokoni atu e fakamatala ko ʻení ke fakafeʻungaʻi hoʻo fakakaukau fakapisinisí ke ne feau lelei ange e fiemaʻu ʻa e kasitomaá. Kapau ʻoku puleʻi lelei ʻaupito e faingamālie hoʻo pisinisí, fakapapauʻi ʻokú ke maʻu e laiseni pe ngofua ʻoku fie maʻu ke ke fakatau atu hoʻo ngāué pe koloá.

Fakapapauʻi pe ko e hā e tokolahi ʻo e kau kasitomā te ke fie maʻu ke mou talanoa ke lava ha fakataú—peá ke fakahoko ia. Hangē ko ia ne tau ako meia ʻEletā Tēvita A. Petinā ʻi he vahe 2, “Ko e ngāué ko e fakaʻaongaʻi ia ʻo e tuí.” Te tau lava ʻo fakahaaʻi ʻetau tuí, ʻo hangē ko e fānau ʻo ʻIsilelí, ʻaki haʻatau ngāue mo “[hifo] ki he loto vaitafé.”

ʻE kole atu ʻi he uike ka hokó ke ke lipooti (1) hoʻo aʻusia ʻi haʻo fakatau ki ha kasitomā ʻe tokotaha mo e (2) lahi ʻo e ngaahi ʻaho naʻá ke fakatau atu aí.

Ko Hono Kumi ʻo e Kau Kasitomaá

Lau

Te ke ʻilo ʻi he kamata ke ke fakatau atú ʻa e ngaahi founga lelei taha ke maʻu ai ha kau kasitomā. Loto lelei ke ke ʻahiʻahiʻi ha ngaahi fakakaukau foʻou kae ʻoua kuó ke maʻu ha founga ʻe taha pe lahi ange ʻe tokoni lelei atu ʻi he kumi hoʻo kau kasitomaá.

Fakafonu ‘a e konga ‘o e “Kumí” ʻi he “Te u maʻu fēfē haʻaku kau kasitomaá?” ʻi hoʻo Palani Pisinisi Fakatāutahá.

Lau mo ho hoa ngāué ʻa e ngaahi tukupā takitaha ʻi laló. ʻE fakautuutu ʻaupito ho ivi ke ikuna ʻi he kamataʻi pe fakatupulaki hoʻo pisinisí, kapau te ke tauhi fakamātoato hoʻo ngaahi tukupā fakauiké. Palōmesi ke tauhi hoʻo ngaahi tukupaá pea toki fakamoʻoni hingoa ʻi lalo.

Ko ʻEku Ngaahi Tukupaá
A. Te u tauhi e ngaahi tukupā ʻi he “Ko Hoku Fakavaʻé” ki he uike ní: Talangofua ki he ngaahi fono pe ngaahi tefitoʻi moʻoni naʻá ku fili ʻi he ʻekitivitī ʻo e “Ko hoku fakavaʻé”. Vahevahe mo hoku familí pe ngaahi kaungāmeʻá e meʻa kuó u ako he ʻahó ni fekauʻaki mo e talangofuá.
E. Te u kau ʻi he Tukupā ke Fakatau Atú pea lipooti ʻeku aʻusiá he uike kahaʻú.
F. Te u fakafonu ʻa e konga ʻo e “Kumí” ʻi he “Te u maʻu fēfē mo pukepuke ʻeku kau kasitomaá?” ʻi heʻeku Palani Pisinisi Fakatāutahá.
H. Te u to e vakaiʻi ʻeku peesi “Fakalaulaulotó” mo tauhi ʻa e ngaahi tukupaá.
I. Te u fetuʻutaki mo poupou ki hoku hoa ngāué.

Manatuʻi ʻe kole atu ʻi he uike kahaʻú ke ke lipooti e lahi ʻo e ngaahi ʻaho ne ke talanoa ai mo ha kau kasitomā, tohi ʻi hoʻo kiʻi tohi pisinisí, mo fakatau atu (vakai, saati “Ko Hono Fakafuofuaʻi ʻEku Ngāué” ʻi he kamataʻanga ʻo e tohí)

Ko ʻeku fakamoʻoni hingoá

Fakamoʻoni hingoa ʻa e hoa ngāué

Fai ha lotu tuku.

Ke maʻu ha fakamatala lahi ange ki he ngaahi founga ke maʻu ai ha kau kasitomaá, ʻalu ki he srs.lds.org/sgmbmarketing.