“Ko Hono Kumi ʻo e Kau Kasitomaá” Ko Hono Kamata mo Hono Fakatupulaki ʻEku Pisinisí ke Moʻui Fakafalala pē Kiate Aú (2017)
“Ko Hono Kumi ʻo e Kau Kasitomaá”
Ako
Taimi Lōloa Tahá: Miniti ʻe 65
1. Ko Hono Mahuʻinga ʻo e Kau Kasitomaá
Lau:
Kuo pau ke hoko ʻa e kau kasitomaá ko e meʻa ke fakamuʻomuʻa ʻi hoʻo pisinisí. ʻE meimei ke fakafuofua e lelei hoʻo pisinisí ʻi he meʻa te nau foua aí. Fakatefito e ngaahi tapa kotoa hoʻo pisinisí ʻi he feau ʻo ʻenau ngaahi fiemaʻú. Te ke fie maʻu ke nau loto vēkeveke ʻi he ngaahi aʻusia te nau maʻu ʻi hoʻo pisinisí.
2. Ko Hai ʻEku Kasitomá?
Lau:
ʻI hoʻo hoko ko e taha maʻu pisinisí, ʻoku totonu ke ke maʻu ha mahino fakaʻāuliliki ki he faʻahinga kakai, kulupu, pe ngaahi kautaha ʻoku ngalingali te nau fakatau hoʻo ngāué pe koloá. Ko e lahi ange mahino kiate koe hoʻo kau kasitomá, ko e pau mo e mahino ange ia ʻo e ngaahi pōpoaki, aʻusia, pea mo e poupou ʻe lava ke fai kiate kinautolú. ʻOku kau ʻeni ʻi he ngaahi meʻa ʻe lava ʻo tokoni ke ke ʻilo e kau kasitomā ʻoku fie maʻú:
-
Fakatemokalafi: taʻú, tangata pe fefine, tuʻunga malí, ngāue maʻuʻanga moʻuí, tuʻunga ʻo e paʻanga hū maí
-
Fakafaʻunga: kakaí pe sekitoa tāutaha, pōto fakangāue pe palofesinale, lalahi pe fakamovetevete
-
Fakasiokālafi: feituʻú, lahi ʻo e kakaí
-
Fakaeʻatamaí: fakafoʻituitui, tōʻonga moʻui, mahuʻingaʻia, fakaeloto, fakakaukau
-
Fakaʻulungāngá: tōʻonga ʻo e fakataú, sīpinga ʻo e mateakí, ngaahi monūʻia ʻoku kumí
3. Ko Hono Fakamahino e Pōpoaki ʻEku Pisinisí
Lau:
Ka hili hoʻo fakamahino hoʻo kau kasitomā ʻoku fakataumuʻa ki aí, ʻoku mahuʻinga ke fakahoko kiate kinautolu e ʻuhinga ʻoku totonu ke nau mahuʻingaʻia ai ʻi he ngāue pe koloa ʻoku fakatau ʻe hoʻo pisinisí. Ke tokoni ʻi hono fakahoko ʻení, faʻu ha pōpoaki fakapisinisi nounou te ne tuʻuaki vave pea mo fakafaikehekeheʻi e ngaahi meʻa ʻoku fakatau ʻe hoʻo pisinisí. ʻOku totonu ke kau ai ha konga mahuʻinga ʻe tolu:
-
Hingoa hoʻo pisinisí.
-
Ko hoʻo ngāué pe koloá.
-
Ngaahi ʻuhinga ʻoku kehe pe sai ange ai hoʻo ngāué pe koloá. (Vakai ki hoʻo Palani Pisinisi Fakafoʻituituí ke vakaiʻi e ngaahi ʻuhinga ʻoku kehe pe lelei ange ai hoʻo ngāué pe koloá.)
Ko ha sīpinga ʻeni ʻo ha pōpoaki nounou fakapisinisi:
“Mālō e lelei, ko Teli au. ʻOku ou kamata ha pisinisi ʻa ia ʻui ko e Hidden Fields Catering. ʻOku mau teuteu ha meʻakai fakatupumoʻui lelei ki he ngaahi meʻa fakapisinisí, fakataha fakafāmilí, mo ha ngaahi kulupu kehe. ʻOku mau fakaʻaongaʻi pē ʻa e ngaahi meʻa foʻou tahá ʻi heʻemau meʻatokoní. ʻOku mau tokanga ke fakafiefiaʻi e kakai ʻoku tokanga ki he moʻui leleí ʻa ē ʻoku nau fie maʻu e ngaahi meʻakai fakaholo mo ʻikai toe fakaongosiá.”
4. Fakapapauʻi e Ngaahi Founga Fakatau Lelei taha ki Heʻeku Pisinisí.
Lau:
ʻOku mahuʻinga ke kumi e ngaahi founga lelei taha ke fehokotaki ai mo hoʻo kau kasitomaá. ʻOku fakaʻaongaʻi ʻe ha kau maʻu pisinisi lahi ha ngaahi founga fakakomēsiale kehekehe ke fakatau ai mo fetuʻutaki mo ʻenau kau kasitomaá. Neongo ia, ʻe lelei ki he kau maʻu pisinisi foʻoú ke nau nofotaha ki hono fakatupulaki ha founga pē taha pea taha ʻi he komēsiale fakaʻekonōmiká. ʻE lava ke tānaki mai ha ngaahi founga kehe ʻi he taimi ʻe kamata ai ke tupulaki e pisinisí. ʻOku kau ʻi he ngaahi founga angamahení ʻa kinautolu ʻoku lisi atu ʻi laló.
Ngaahi Founga Fakatau Mahení (Physical Channels)
-
Fakatau Hangatonu: Te ke fakatau hangatonu pe ko hoʻo taha fai-fakataú ki he kau kasitomaá ʻi ha fetuʻutaki hangatonu.
-
Taha Tufakí pe fakatau lahí: Te ke fakatau ki ha taha tufaki pe fakatau lahi, ʻokú ne fakatau lahi hoʻo koloá peá ne toe fakatau atu ia ki ha ngaahi pisinisi fakamovetevete.
-
Fakatau fakamovetevete: ʻOkú ke fakatau ki ha ngaahi pisinisi fakatau fakamovetevete, pea nau toki fakatau ki he kau kasitomaá.
Ngaahi Founga Fakatau Fakaʻilekitulōnika (E-Commerce)
-
Uepisaiti: ʻOku fakahoko pē fakataú ʻi hoʻo uepisaití.
-
Falekoloa ʻi he ʻinitanetí: ʻOku fakahoko e fakataú ʻi ha falekoloa uepisaiti he ʻinitanetí, kae ʻikai ʻi hoʻo uepisaiti ʻaʻaú.
-
Polokalama mobile app: ʻOku fakahoko e fakataú ʻi ha mobile app.
5. Ko Hono Tohoakiʻi ʻo e Kau Kasitomaá … ʻaki e Hā?
Lau:
He ʻikai ke tohoakiʻi leva ʻe hoʻo pisinisí ha kau kasitomá. ʻOku fie maʻu ke ke tukuatu e ngaahi meʻa ʻoku nau fie maʻú pea mo nau tui ʻe ʻaonga kiate kinautolú. Fakapapauʻi ʻoku fekauʻaki hoʻo pōpoaki fakapisinisí mo e ngaahi meʻa ʻoku fie maʻu ʻe kinautolu ʻe hoko ko hoʻo kau kasitomaá. ʻAi koe ki he tuʻunga ʻo hoʻo kasitomaá peá ke fehuʻi, “ʻOku ou fie fakatau e ngāue pe koloa ʻoku tuʻuaki ʻe he pisinisi ko ʻení? Ko e hā hono ʻuhingá?
ʻOku mohu founga e kau maʻu pisinisi leleí ke maʻu e tokanga ʻa ʻenau kau kasitomaá. ʻOku lisi atu ʻi lalo ha niʻihi ʻo e ngaahi founga ke maʻu ai e tokanga ʻa e kau kasitomaá.
|
ʻĪmisi Fakaʻilonga Tuku Atu ʻo e Fakamatalá Ko Hono Tukuatu ʻo e Fakamatalá mo e ngaahi ʻiló ʻi he vitioó, blogs, tohi fanongonongó, ngaahi fakamatalá mo e ngaahi fakaʻaliʻali fakafetauʻakí. |
|
ʻĪmisi Fakaʻilonga ʻo e fakatataú Ko e fakatatau mo e ngaahi meʻa ʻoku saiʻia ai e kau kasitomaá mo e ngaahi meʻa fakasosialé, hangē ko hano fakalele ha ngaahi polokalama. |
|
ʻĪmisi Fakaʻilonga ʻo e fakaʻataá Ko hono fakaʻatā ʻo ha kasitomā ke ne maaʻusia e ngāue pe koloa ʻi ha kiʻi totongi pe taʻetotongi, hangē ko hano foaki ha ngaahi sīpinga pe ngaahi kiuponi. |
|
ʻĪmisi Fakaʻilonga ʻo e loto falalá Ko hono tōkaki ʻo e loto falalá ʻi he ongoongo ʻo e kautahá pea mo e tuʻunga lelei ʻo ʻene ngāué pe koloá ʻo fou ʻi he ngaahi vakaiʻi ʻo e kasitomaá, ngaahi fakalangilangí, pe ngaahi fakapapauʻi kehe ʻo e tuʻunga leleí. |
|
ʻĪmisi Fakaʻilonga ʻo hono fai ha fakafiemālié ʻE lava ke tokoni mo ʻai ke faingofua ange ke maʻu hoʻo pisinisí ʻi he ʻinitanetí ‘aki hano ‘ai ke faingofua mo ‘ikai fakamole taimi. |
|
ʻĪmisi Fakaʻilonga ʻo e Kaungā-ngāué Ko e kaungā-ngāue mohu founga mo ha pisinisi ʻiloa ʻoku ʻikai ke mo feʻauʻauhi, ka ʻokú mo ngāue ki he kau kasitomā tatau. |
6. Ko Hono Fuatatau e Lelei ʻo e Fetuʻutaki mo e Kau Kasitomaá
Lau:
ʻOku mahuʻinga ke fuatautau pe ʻoku tohoakiʻi mai ʻe hoʻo ngaahi fetuʻutakí e tokanga ʻa e kau kasitomaá, ʻo tokoni ke lahi ange fakataú, mo fakalahi e tupú. Ke fai ʻeni, ʻe fie maʻu ke ke fuatautau:
-
Ha founga pau ʻokú ke fetuʻutaki mo hoʻo kau kasitomaá.
-
Ko e hā e ola ʻo e pisinisí.
To e vakaiʻi e ngaahi sīpinga ko ʻení.
Ko e femoʻuekiná ʻoku ʻikai ko ha meʻa tatau ia mo e lavameʻá. Kapau ʻoku ʻikai maʻu ha ola ʻi hoʻo fetuʻutakí, pea ta ʻoku ʻikai ke fakaʻaongaʻi lelei ho taimí. Ko e ʻuhinga ʻeni ʻoku mahuʻinga ai ke ke fuatautau maʻu pē hoʻo ngaahi olá.