Moʻui Fakafalala a Pē Kiate Kitá
1: Ko Hono Kamatá


“Ko ʻEku Mateuteu ke Ola Lelei e Pisinisí: Ko Hono Kamatá,” Ko Hono Kamata mo Hono Fakatupulaki ʻEku Pisinisí ke Moʻui Fakafalala pē Kiate Aú (2017)

“Ko ʻEku Mateuteu ke Ola Lelei e Pisinisí: Ko Hono Kamatá”

Ko Hono Kamatá

Taimi Lōloa Tahá: Miniti ʻe 20

Fai ha fua lotu.

Fakafeʻiloaki kimoutolu. Mou takitaha fakaʻaongaʻi ha miniti ʻe taha ke fakahā ho hingoá mo ha meʻa fekauʻaki mo koe.

ʻOku talitali lelei kimoutolu ki he kulupu moʻui fakafalala pē kiate kitá!

Lau:

Te tau ngāue fakataha ko e kulupu ʻo fetokoniʻaki ke kamataʻi mo fakatupulaki ʻetau ngaahi pisinisí. ʻOku ʻi ai foki mo haʻatau taumuʻa maʻongoʻonga ange: ke hoko ʻo moʻui fakafalala lahi ange kiate kitautolu ka tau lava ʻo tokoniʻi lelei ange ʻa e niʻihi kehé.

ʻOku founga fēfē ʻeni?

Lau:

ʻOku ngāue ʻa e ngaahi kulupu moʻui fakafalala pē kiate kitá ʻo hangē ha fakataha alēleá. ʻOku ʻikai ke ʻi ai ha faiako ia pe mataotao. Ka, te tau muimui pē ki he ngaahi fakamatalaá ʻo hangē ko hono tohí. ʻI he fakahinohino ʻa e Laumālié, te tau fetokoniʻaki ʻo hangē ko ʻení:

  • Tokoni tatau ʻi he ngaahi fealēleaʻakí mo e ngaahi ʻekitivitií. ʻOku ʻikai totonu ke maʻu pē ʻe ha taha ia ʻa e taimí ʻi he pōtalanoá, tautautefito ki he tokotaha tokoní.

  • Feʻofaʻaki mo fepoupouaki. Fakahaaʻi ʻokú ke mahuʻingaʻia, ʻeke ha ngaahi fehuʻi, mo ʻai ke mou feʻilongaki. Fakaʻapaʻapaʻi e ngaahi ongó, fokotuʻu ha ʻātakai ʻoku malu ʻe lava ke ongoʻi fiemālie ai e taha kotoa ke vahevahe.

  • ʻOua naʻa fakahāhāholo ʻa e ngaahi fakakaukaú.

  • Vahevahe ha ngaahi fakamatala lelei mo ʻaonga.

  • Fakahoko mo tauhi ʻa e ngaahi tukupaá.

Naʻe akoʻi ʻe ʻEletā M. Lāsolo Palati, “ʻOku ʻikai ke ʻi ai ha palopalema ia ʻi ha fāmili, uooti pe siteiki ʻe taʻe-malava ʻo fakaleleiʻi kapau te tau fekumi ki ai ʻi he founga ʻa e ʻEikí ʻi he fealēleaʻaki—ʻo fealēleaʻaki moʻoni—mo e niʻihi kehé” (Counseling with Our Councils,rev. ed. [2012], 4).

Mamataʻi:

“My Self-Reliance Group,” ʻoku maʻu ʻi he srs.lds.org/videos

Aleaʻi:

Ko e hā kuó ke ako mei he ngaahi fakataha alēlea kehé ʻe tokoni ke fakapapauʻi ʻoku ʻi ai haʻatau kulupu ʻoku lelei?

Ka ʻikai ke ʻi ai ha faiako, te tau ʻilo fēfē leva ʻa e meʻa ke faí?

Lau:

ʻOku faingofua pē. Muimui pē ki he fakamatalá. ʻOku ʻi ai ha sitepu ʻe ono ki he vahe takitaha ʻi hoʻo tohi ngāué:

Lipōtí:Fakamatalaʻi e fakalakalaka ne ke fakahoko ʻi he lolotonga ʻo e uiké ʻi hoʻo ngaahi tukupaá.

Ko Hoku Fakavaʻé:Toe fakamanatu ha tefitoʻi moʻoni ʻo e ongoongoleleí ʻe fakaiku ki ha moʻui fakafalala fakalaumālie lahi ange kiate koe.

Ako:Ako fakahoko ha ngaahi pōtoʻi ngāue ʻe fakaiku ki ha tuʻunga moʻui fakafalala fakatuʻasino lahi ange kiate koé.

Fakalaulauloto:Fakafanongo ki he Laumālie Māʻoniʻoní ke ne ʻoatu ha tataki fakalaumālie.

Tukupā:Palōmesi ke ke ngāueʻi e ngaahi tukupā ʻe tokoni ki hoʻo fakalakalaká, he lolotonga ʻo e uiké.

Ngāue: Fakahoko e meʻa naʻá ke akó.

Founga fakaʻaongaʻi ʻo e tohi ngāue ko ʻení.

Ko hoʻo mamata pē ki heni, muimui ki he ngaahi fakahinohino ko ʻení:

Lau

Mamataʻi

Aleaʻi

Fakalaulauloto

ʻEkitivitií

Lau leʻolahi ʻe ha taha maʻá e kulupú fakakātoa.

Mamataʻi ʻe he kulupú kotoa ʻa e foʻi vitioó.

Fevahevaheʻaki ʻe he kau mēmipa ʻo e kulupú ʻa e ngaahi fakakaukaú ʻi ha miniti ʻe ua ki he fā.

Takitaha fakakaukau fakalongolongo, fakalaulauloto, mo tohi.

Ngāue fakafoʻituitui ʻa e kau mēmipa ʻo e kulupú pe mo ha niʻihi kehe, ʻi ha vahaʻa taimi pau.