Ko Hoku Fakavaʻé: Ko e Moʻui Fakafalala Pē Kiate Kitá ko ha Tefitoʻi Moʻoni ia ʻo e Fakamoʻuí.

Taimi Lōloa Tahá: Miniti ʻe 20

Fakalaulauloto:

Sione 10:10

Sione 10:10

“Kuó u haʻu au ke nau maʻu ʻa e moʻuí, pea ke nau maʻu ia ʻo lahi ʻaupito.”

Aleaʻi:

Ko e hā ʻa e moʻui mohu tāpuekina?

Mamata:

“He Polished My Toe,” ʻoku maʻu ʻi he srs.lds.org/videos (ʻIkai ha vitiō? Vakai ki he fakamatala ʻi he fakaʻosinga ʻo e konga ko ʻení.)

Aleaʻi:

ʻOkú ke tui ʻoku ʻi ai ha tali ki hoʻo ngaahi palopalemá? Te tau lava fēfē ʻo taau ke tokoniʻi ʻe he mālohi ʻo e ʻEikí?

Lau:

Fakamatala ʻi he Tohi Tuʻutuʻuni Fika 2 pea mo e lea ne fai ʻe ʻEletā Tālini H. Oakesi.

Tohi Tuʻutuʻuni Fika 2: Ko Hono Puleʻi ʻo e Siasí

“Ko e moʻui fakafalala pē kiate kitá ko e malava ia, mo e tukupā, pea mo e feinga ke tokonaki ʻa e ngaahi fiemaʻu fakalaumālie mo fakatuʻasino ʻo e moʻuí maʻata pea mo e fāmilí. Ko e lava ko ia ʻa e kāingalotú ke moʻui fakafalala pē kiate kinautolú, ʻoku nau toe lava lelei ange ai ke tokoni mo tauhi ha niʻihi kehe.”

(2010), 6.1.1

ʻEletā Tāleni H. ʻOakesi

“Ko e hā pē ha meʻa ʻokú ne ʻai ke tau fakafalala ki ha taha kehe ʻi he ngaahi fili pe ngaahi maʻuʻanga tokoni te tau lava ʻo tokonaki maʻatautolú, ʻokú ne fakavaivaiʻi fakalaumālie kitautolu mo fakatuaiʻi ʻetau tupulaki ki he meʻa ʻoku taumuʻa e palani ʻo e ongoongoleleí ke tau aʻusiá.”

“Fakatomala mo Liliu,” Ensign pe Liahona, Nōvema 2003, 40

ʻOku ʻikai ʻuhinga ʻa e moʻui fakafalala pē kiate kitá te tau lava ʻo fai pe maʻu ha faʻahinga meʻa pē ʻoku tau fakakaukau ki ai. Ka, ko e tui ia te tau lava ʻo maʻu e ngaahi fiemaʻu fakalaumālie mo fakatuʻasino kotoa ʻo e moʻuí ʻoku tau fiemaʻu mo hotau fāmilí, ʻo tuʻunga ʻi he ʻaloʻofa, pe mālohi fakaivia ʻo Sīsū Kalaisí mo ʻetau ngāué. Ko e moʻui fakafalala pē kiate kitá ko ha fakamoʻoni ia ʻo ʻetau falala pe tui ki he mālohi ʻo e ʻOtuá ke fakahoko ha ngaahi mana ʻi heʻetau moʻuí pea ʻomi kiate kitautolu ha mālohi ke ikunaʻi e ngaahi ʻahiʻahí mo e ngaahi faingataʻá.

Aleaʻi:

Kuo tokoniʻi fēfē koe ʻe he ʻaloʻofa ʻa Kalaisí ke ke maʻu ʻa e ngaahi fiemaʻu fakalaumālie mo fakatuʻasino ʻo e moʻuí?

ʻEkitivitī (miniti ʻe 5)

Sitepu 1: Fili ha hoa ngāue pea lau ʻa e tefitoʻi moʻoni takitaha ʻi laló.

Ngaahi Tefitoʻi Moʻoni Fakatokāteline ʻo e Moʻui Fakafalala Pē Kiate Kitá
1. Ko e moʻui fakafalala pē kiate kitá ko ha fekau ia.	“ʻOku fekau ʻe he ʻEikí ki he Siasí mo hono kāingalotú ke nau moʻui tauʻatāina mo fakafalala pē kiate kinautolu” (Ngaahi Akonaki ʻa e Kau Palesiteni ʻo e Siasí: Sipenisā W. Kimipolo [2006], 144).
2. ʻE malava pea ʻe tofa ʻe he ʻOtuá ha hala maʻa ʻEne fānau angatonú ke nau moʻui fakafalala pē kiate kinautolu.	“Pea ko ʻeku taumuʻá ke tauhi ʻa ʻeku kau māʻoniʻoní, he ʻoku ʻaʻaku ʻa e ngaahi meʻa kotoa pē” (T&F 104:15).
3. ʻOku taha pē ʻa e fakatuʻasinó mo e fakalaumālié ki he ʻOtuá.	“Ko ia, ko e moʻoni ʻoku ou pehē kiate kimoutolu, ʻoku fakalaumālie kiate au ʻa e ngaahi meʻa kotoa pē” (T&F 29:34).

Sitepu 2: Aleaʻi mo hoʻo hoá ʻa e ʻuhinga ʻe lava ai ʻo tokoniʻi koe ʻe he tui ki he ngaahi moʻoni ko ʻení ke ke moʻui fakafalala lahi ange ai kiate koe.

Aleaʻi:

Lau e kupuʻi lea ʻa Palesiteni Melioni G. Lomenií. ʻE founga fēfē haʻo ʻiloʻi ʻoku fakaʻau ke ke moʻui fakafalala lahi ange kiate koe?

Palesiteni Melioni G. Lomenī

“Kapau ʻoku ʻikai moʻui fakafalala ha taha kiate ia pē, he ʻikai te ne lava ʻo fakahoko ʻa e ngaahi holi ko ʻeni ʻo e lotó ke tokoní. Te tau lava fēfē ke foaki kapau ʻoku ʻikai ke tau maʻu ha meʻa? He ʻikai ke lava ʻo maʻu ha meʻakai maʻá e fiekaiá mei ha ngaahi laupapa ʻoku hala ha meʻakai ai. He ʻikai ke lava ʻo maʻu ha paʻanga ke tokoniʻi ʻaki e masivá mei ha peesi ʻoku ngeʻesi. He ʻikai ke lava ʻo maʻu ha tokoni mo ha loto mahino meiate kinautolu fiekaia fakaelotó. He ʻikai ke lava ʻo maʻu ha fakahinohino meiate kinautolu ʻoku ʻikai akó. Pea ko e mahuʻinga tahá, he ʻikai ke lava ʻo maʻu ha fakahinohino fakalaumāllie mei he taha ʻoku vaivai fakalaumālié.”

“The Celestial Nature of Self-Reliance,” Ensign, Nov. 1982, 93

Tukupā:

Tukupā ke fakahoko ʻa e ngaahi meʻa ko ʻení he lolotonga ʻo e uiké.

• Lau e Tohi ʻa e Kau Palesitenisī ʻUluakí ʻi he kamataʻanga ʻo e tohi lēsoni ko ʻení pea mo kumi e ngaahi tāpuaki ne talaʻofa maí. Ko e hā kuo pau ke ke fai ke maʻu ai kinautolu? Hiki hoʻo ngaahi fakakaukaú ʻi lalo.

• Vahevahe mo ho fāmilí pe ngaahi kaungāmeʻá ʻa e meʻa ne ke ako ʻi he ʻahó ni fekauʻaki mo e moʻui fakafalala pē kiate kitá.

He Polished My Toe

Kapau ʻoku ʻikai ke mou lava ʻo mamata ʻi he foʻi vitioó, fili ha mēmipa ʻo e kulupú ke ne lau ʻa e fakamatala ko ʻení.

He Polished My Toe

ʻEletā ʻEniliki R. Falapela:

Naʻe ʻikai ke mau maʻu ha meʻa fēfē ʻi heʻeku kei tupu haké. ʻOku ou manatuʻi ha ʻaho ʻe taha naʻá ku lea ange ai ki heʻeku tangataʻeikí ʻo pehē, “Papā, ʻoku ou fie maʻu haʻaku sū foʻou. Ko e sū motuʻá ni kuo fuʻu motuʻa.” Naʻe tuʻu ʻo ne vakai ki hoku suú peá ne fakatokangaʻi ʻoku moʻoni ʻaupito. Peá ne pehē mai, “ʻOku ou tui ko e meʻa ʻeni te ta lava pē ʻo fakaleleiʻi.” Naʻá ne toʻo ha kiʻi meʻi palākeni ʻo palākeniʻi hoku suú, ʻo ngingila mo fakaʻofoʻofa. Naʻe pehē mai leva, “Foha, kuo sai.” Peá u tali ange, “ʻIkai, teʻeki ai. Te ke kei lava pē ʻo sio ki he ʻasi hake hoku motuʻa vaʻé ʻi hoku suú.” Pea pehē mai, “Te ta lava pē ʻo fakaleleiʻi mo ia!” Naʻá ne toe toʻo ha meʻi palākieni ʻo palākeniʻi hoku motuʻa vaʻé.

Naʻá ku ako ʻi he ʻaho ko iá ʻoku ʻi ai ha founga fakaleleiʻi ʻo e palopalema kotoa pē. ʻOku ou tui ko e tefitoʻi moʻoni mo e polokalama ko ʻeni ʻo e moʻui fakafalala pē kiate kitá ko ha founga ia ke fakavaveʻi ai e ngāue ʻa e ʻEikí. Ko ha konga ia ʻo e ngāue ʻo e fakamoʻuí.

Te tau lava kotoa ke toe lelei ange ʻi hotau tuʻunga lolotongá. Kuo pau ke ke tukuange ʻa e fakafiefiemālié. ʻOku tau fakahōhōloto he taimi lahi, pea ʻoku fakaʻauha ʻe he meʻá ni ʻetau fakalakalaká. Te u lava ʻo fakalakalaka ʻi he ʻaho kotoa pē ʻo kapau te u fili ke fai ha meʻa kehe ke fakaleleiʻi e meʻa ne ʻikai ke u fakahoko lelei ʻi he kuo hilí. Kapau te ke fai ia ʻi he tui, ʻo ngāue ʻaki hoʻo tui mo e ʻamanaki lelei kia Kalaisí te Ne tokoniʻi koe, te ke ʻilo e founga ke fakalakalaka ai ʻi he ngaahi meʻa fakatuʻasinó mo fakalaumālié. ʻOku hoko ʻeni koeʻuhí ʻoku moʻui ʻa e ʻOtuá pea ko Hono foha pe ʻofefine koe.