Ko Hoku Fakavaʻé: Fakaʻaongaʻi Fakapotopoto ʻa e Taimí

Taimi Lōloa Tahá: Miniti ʻe 20

Fakalaulauloto:

Ko e hā ʻoku hoko ai e taimí ko ha taha ʻo e ngaahi meʻafoaki maʻongoʻonga taha ʻa e ʻOtuá?

Mamataʻi:

“The Gift of Time,” ʻoku maʻu ʻi he srs.lds.org/videos (ʻIkai ha vitiō? Lau e fakamatala ʻi he fakaʻosinga ʻo e konga ko ʻení.)

Aleaʻi:

Ko e hā naʻá ke ako meia Sisitā Penikasí?

Lau:

ʻAlamā 34:32 mo e lea ʻa Palesiteni Pilikihami ʻIongí.

ʻAlamā 34:32

“He vakai, ko e moʻuí ni ko e taimi ia ki he tangatá ke teuteu ai ke feʻiloaki mo e ʻOtua; ʻio, vakai ko e ʻaho ʻo e moʻui ní ko e ʻaho ia ke fai ai ʻe he kakaí ʻa ʻenau ngaahi ngāué.”

Pilikihami ʻIongi

“Ko e taimí ko e kotoa ia ʻo e sitoka ʻi māmaní … kapau ʻe fakaʻaongaʻi totonu, te ne ʻomi ʻa e meʻa te ne tānaki atu ki hoʻo nongá, faingamālié, mo e fiemālié. Tau fakakaukau ki heni, ʻo ʻoua te tau kei nofo pē ʻo kūnima mo maumauʻi ʻa e taimí.”

ʻI he Discourses of Brigham Young, sel. John A. Widtsoe (1954), 214

ʻEkitivitī (miniti ʻe 5)

Sitepu 1: Lau mo haʻo hoa ʻa e sitepu ʻe nima ko ʻeni te mou lava ʻo fakahoko ʻi he ʻaho takitaha ke fakaʻaongaʻi lelei homou taimí.

1. Lisi ʻo e Ngaahi Meʻa ke Faí	2. Lotu	3. Fokotuʻu ʻa e Ngaahi Meʻa Ke Fakamuʻomuʻá	4. Fokotuʻu ha ngaahi Taumuʻa, Ngāue	5. Lipooti
ʻAi ha lisi ʻi he pongipongi kotoa pē ʻo e ngaahi meʻa ke faí. Tānaki atu mo e hingoa ʻo e kakai ke tokoniʻí.	Lotua ha fakahinohino. Toe vakaiʻi hoʻo lisi ngāué. Fakafanongo. Tukupā ke fai ho lelei tahá.	ʻI hoʻo lisi ngāué, fokotuʻu ʻa e 1 he tafaʻaki ʻo e meʻa mahuʻinga tahá, pea 2 ʻi he meʻa fika ua hono mahuʻingá, pea pehē hifo ai pē.	Fakafanongo ki he Laumālié. Fokotuʻu ha ngaahi taumuʻa. Ngāue Mālohi. Kamata ʻaki e ngāue mahuʻinga tahá pea toki hokohoko hifo ai ʻi he lisí.	Lipooti ki he Tamai Hēvaní ʻi he lotu, he pō kotoa pē. Fai ha ngaahi fehuʻi. Fakafanongo. Fakatomala. Ongoi ʻa ʻEne ʻofá.

Sitepu 2: Lisi fakatāutaha hoʻo ngaahi ngāue fakaʻahó pe fakauiké, ʻi ha laʻi pepa. ʻOku totonu ko ha ngaahi meʻa mahuʻinga ʻeni ki hoʻo ngāué, akó, lotú pe ngāue ʻofa faka-fāmilí—ʻo ʻikai ko ha ngaahi ngāue fakaʻaho angamaheni pē. Fokotuʻutuʻu hoʻo lisí fakatatau mo honau mahuʻingá pea lotua.

Sitepu 3: Kamata ʻapongipongi, fokotuʻu ha ngaahi taumuʻa, ngāueʻi, mo lipooti ki he Tamai Hēvaní e founga hoʻo fakaʻaongaʻi ho taimí.

Tukupā:

Tukupā ke fakahoko ʻa e ngaahi ngāue ko ʻení he lolotonga ʻo e uiké.

• Akoako fakahoko ʻa e ngaahi sitepu ko ʻení ʻe nima he aho kotoa pē ke fakaʻaongaʻi fakapotopoto ange ho taimí. Lipooti ki he Tamai Hēvaní ʻi hoʻo lotú ʻi he pō kotoa pē.

• Vahevahe mo ho familí pe ngaahi kaungāmeʻá e meʻa kuó ke ako he ʻahó ni fekauʻaki mo hono fakaʻaongaʻi fakapotopoto e taimí.

Ko e Meʻafoaki ʻo e Taimí

Kapau ʻoku ʻikai ke mou lava ʻo mamata ʻi he foʻi vitioó, fili ha mēmipa ʻo e kulupú ke ne lau ʻa e fakamatala ko ʻení.

ʻOku ʻOmi ʻe he Talangofuá ʻa e Ngaahi Tāpuakí

Kofi: Mālō e lelei, Sisitā Penikasi. Fēfē hake?

Sisitā Penikasi: Kofi, ʻokú ke sai pē?

Kofi: Siʻi, Sisitā Penikasi. ʻOku ou femoʻuekina lahi. Kuo pau ke u ngāue mo tokoni pea mo tokoniʻi hoku fāmilí … pea mo ʻeku soká, foki. ʻOku ʻikai maʻu haku taimi!

Sisitā P.: Kofi, ʻokú ke maʻu e taimi lahi.

Kofi: Ko e hā?

Sisitā P.: Tamasiʻi, kuo ʻosi foaki mai ʻe he ʻOtuá ha meʻaʻofa maʻongoʻonga—ko hotau taimí. Kuo pau ke tau fakaʻaongaʻi ia ki he mea ʻoku mahuʻinga tahá.

Kofi: ʻO founga fēfē, Sisitā Penikasi? Kuo lahi maʻu pē e meʻa ʻokú ke faí. Kuó ke lavameʻa ʻi ho fāmilí, ʻi hoʻo pisinisí. Kuó ke tokoniʻi mo tāpuakiʻi ha tokolahi, hangē ko aú. ʻIkai ke u ʻilo pe ʻokú ke fakahoko fēfē ia.

Sisitā P.: ʻOkú ke fie ʻiloʻi moʻoni? Kapau te ke tangutu ʻo fanongo, te u tala atu ʻeku fakapulipulí.

ʻOku ou ʻā ʻi he pongipongi kotoa ʻoku teʻeki hopo ʻa e laʻaá. ʻOku ou teuteu, tafitafi hoku matá mo fanofano.

ʻOku ou lau e folofolá. Peá u ʻai leva ha lisi ʻo e ngaahi meʻa ʻoku totonu ke u fai ʻi he ʻaho ko iá.

ʻOku ou fakakaukau ki ha taha te u lava ʻo tokoniʻi. ʻOku ou lotu ke ʻiloʻi e finangalo ʻo e ʻOtuá. Peá u fakafanongo leva.

ʻOku haʻu ki heʻeku fakakaukaú he taimi ʻe niʻihi ʻa e hingoa pe fofonga ʻo e kakaí. ʻOku ou tānaki kinautolu ki heʻeku lisí.

Kofi: Ko e founga ia ʻokú ke ʻiloʻi maʻu ai pē kakai ʻoku nau fie maʻu hoʻo tokoní?

Sisitā P.: Ko ia, Kofi. Pea ʻoku ou lotua ha ivi mo ha poto. ʻOku ou lotua ke hanga ʻe he ʻOtuá ʻo “fakatapui [ʻeku] ngāué.” ʻOku lau ki ai e 2 Nīfai 32

ʻOku ou fakafetaʻi kiate Ia. ʻOku ou palōmesi ke fai hoku lelei tahá. ʻOku ou kole ke Ne fakahoko ʻa e meʻa ʻoku ʻikai ke u lavá.

Peá u sio leva ki heʻeku lisí. ʻOku ou fokotuʻu ha 1 he tafaʻaki ʻo e meʻa ʻoku mahuʻinga tahá, pea hoko ai ha 2.

Kofi: ʻOkú ke ʻiloʻi fēfē ʻa e meʻa ke fakamuʻomuʻá?

Sisitā P.: ʻOku ou fakafanongo ʻi he taimi ʻoku ou lotu aí! Hili ia peá u kamata ngāue leva. ʻOku ou vakai ki he fika 1, peá u feinga ke ʻuluaki fai ia, pea hoko ki he fika 2.

ʻOku feliliuaki ʻi he taimi ʻe niʻihi. ʻOku talamai ʻe he Laumālie Māʻoniʻoní ke fai ha meʻa ʻe taha. ʻOku lelei ia.

ʻOku ou ngāue mālohi, ka ʻoku ou maʻu ha nonga. ʻOku ou ʻiloʻi ʻe tokoniʻi au ʻe he ʻOtuá.

Ko ia, ʻi he maʻu ʻeku lisí mo e Laumālié, Kofi, ʻoku ou fai leva ʻa e meʻa ʻoku mahuʻinga tahá.

Kofi: ʻOku ongo faingofua pea mo toe faingataʻa pē.

Sisitā P.: ʻOkú ke moʻoni! Ko e taimi ʻoku ou mateuteu ai ke mohé, ʻoku ou lotu. ʻOku ou lipooti ki he Tamai Hēvaní. ʻOku ou fakamatala kiate Ia ʻa e meʻa ne hoko ʻi he ʻahó. ʻOku ou fai ha ngaahi fehuʻi. ʻOku ou ʻeke pe ko e hā te u lava ʻo fakahoko lelei angé. ʻOku ou fakafanongo. ʻOku ou faʻa ongoʻi ʻEne ʻofá. ʻOku ou ʻiloʻi ʻokú Ne faitokonia ʻa e meʻa ʻoku ou feinga ke faí. ʻOku ou maʻu leva ha nonga, peá u mohe.

Kofi: Meʻa lelei ia, Sisitā Penikasi. ʻOku ou fie maʻu ʻa e nonga ko ʻení. ʻOku ou fie fakaʻaongaʻi hoku taimí. ʻOku ou fie ngāue mo tokoni lelei ange.