Tukupā

Taimi Lōloa Tahá: Miniti ʻe 5

Ko e Fakamatala ʻo ʻEku Pisinisí

Lau:

ʻE kole atu ʻi he uike kahaʻú ke ke fai ha fakamatala miniti ʻe nima ki hoʻo pisinisí. ʻOku totonu ke hoko Hoʻo Palani Pisinisi Fakafoʻituituí ko ha maʻuʻanga tokoni lelei ki he tokoniʻi koe ke ke mateuteú.

Tau pehē ʻokú ke fai ʻa e fakamatalá ni ki ha kulupu ʻo ha niʻihi te nau hoko ko e kau ʻinivesitoa. Te ke lava ke fili pe te ke fokotuʻutuʻu mo fakahoko fēfē hoʻo fakamatalá, ka ʻoku fie maʻu ke kau ai ʻa e ngaahi meʻa ko ení:

• Fiemaʻu ʻa e kasitomaá ʻoku ʻikai feau ka te ke lave ki ai

• Ngāue pe koloa te ke tuku atú

• Ko ho faingamāie ʻi he feʻauʻauhí

• Ko hoʻo kau kasitomā ʻokú ke fakataumuʻa ki aí

• Ko hoʻo palani ke maʻu ha kau kasitomaá

• Ngaahi maʻuʻanga tokoni te ke fie maʻu

• Fakamoʻoni ʻe lava ke tupu hoʻo pisinisí

• Ngaahi sitepu hoko ki hoʻo pisinisí

Teuteuʻi ha fakamatala fakapalofesinale, mo lelei ʻaupito, pea akoako fakahoko ke fakapapauʻi ʻoku miniti pē ʻe nima. Teuteu ʻi ha teunga fakapisinisi ke fakahoko hoʻo fakamatalá.

Ko e uike kahaʻú ko ʻetau fakataha fakakulupu fakaʻosí ia. Ka hili ʻetau ngaahi fakamatala fakapisinisí, ʻe tuku leva ha taimi ke tau fakakaukau ai mo fakafiefia. Palani ke houa pē ʻe 2.5 ʻa e fakataha ko ʻení. ʻE lava ke ʻomi ʻe he kau mēmipa ʻo e kulupú ha fakaneifua ke fevahevaheʻaki ʻi he hili ʻo e ngaahi fakamatalá.

Fakahinohino ki he tokotaha tokoní: ʻOku poupouʻi koe ke ke fakaafeʻi ha kau pisinisi palofesinale ʻe toko ua pe toko tolu mei he siteikí pe koló ke kau fakataha mo e kulupú ʻi he uike kahaʻú mo nau lipooti ʻi he ngaahi fakamatala fakapisinisí. Te mou fakafonu mo e kau palofesinale ko ʻení ha ngaahi foomu ke ʻoange ki he kau fakamatalá ʻi heʻene ʻosí pē. ʻOku ʻikai ko e taumuʻa ʻo e ngaahi fōmú ni ke sivisiviʻi ʻa e poto ʻi he fakamatalá ka ke ʻomi ha ngaahi fakakaukau ki hono fakatupulaki pe fakaleleiʻi e ngaahi ʻelemēniti kehekehe ʻo e pisinisi ʻa ha taha. Kimuʻa ʻi he fakataha ʻo e uike kahaʻú, ʻai ha ngaahi tatau ʻo e Foomu Fakamatala ʻi laló. ʻE fie maʻu ke ʻi ai haʻo tatau ʻe tolu pe fā ki he mēmipa takitaha ʻo e kulupú.

Foomu Fakamatalaʻi ʻo e Fakamatalá (feedback)
Hingoa ʻo e Taha Fakamatalá:	Hingoa ʻo e Taha ʻokú Ne Vakaiʻí:
Ngaahi Fakahinohinó: Kātaki ʻo fakafonu ʻa e kiʻi puha ʻe fā ʻi laló he lolotonga e fakamatala ʻa e tokotahá. ʻOange ʻa e fōmú ki he tokotahá ʻi he ʻosi pē ʻene fakamatalá.
Ngaahi natula fakatuʻamelie lelei taha ʻo e foʻi fakakaukau fakapisinisí	Ngaahi hohaʻa ʻe ala hoko fekauʻaki mo e foʻi fakakaukau fakapisinisí
Ngaahi fakakaukau ki hono fakaleleiʻí	Ngaahi fetuʻutaki ʻoku fokotuʻu atú

Lau mo ho hoa ngāué ʻa e ngaahi tukupā takitaha ʻi laló. ʻE fakautuutu ʻaupito ho ivi ke ikuna ʻi he kamataʻi pe fakatupulaki hoʻo pisinisí kapau te ke tauhi fakamātoato hoʻo ngaahi tukupā fakauiké. Palōmesi ke tauhi hoʻo ngaahi tukupaá pea toki fakamoʻoni hingoa ʻi lalo.

Ko ʻEku Ngaahi Tukupaá
A. Te u tauhi e ngaahi tukupā ʻo e “Ko Hoku Fakavaʻé” ki he uike ní: Lotu fakafoʻituitui mo fakafāmili he pongipongi mo e pō kotoa. Vahevahe ʻa e meʻa kuó u ako fekauʻaki mo e fetuʻutaki mo hoku fāmilí pe ngaahi kaungāmeʻá.
E. Te u fakatotolo ki he ngaahi fiemaʻu fakalao mo fakatuʻutuʻuni ki heʻeku pisinisí.
F. Te u teuteu mo ako fakahoko ʻeku fakamatala fakapisinisí.
H. Te u to e vakaiʻi ʻeku peesi “Fakalaulaulotó” mo tauhi ʻeku ngaahi tukupaá.
I. Te u fetuʻutaki mo poupou ki hoku hoa ngāué.

Manatuʻi ʻe kole atu ʻi he uike kahaʻú ke ke lipooti e lahi ʻo e ngaahi ʻaho ne ke talanoa ai mo ha kau kasitomā, tohi ʻi hoʻo kiʻi tohi pisinisí, fakatau, mo lekooti e fakaikiiki ʻo e meʻa fakapaʻangá (vakai ki he saati “Fakafuofuaʻi ʻo ʻEku Ngāué” ʻi he kamataʻanga ʻo e tohí).

Ko ʻeku fakamoʻoni hingoá

Fakamoʻoni hingoa ʻa e hoa ngāué

Fai ha lotu tuku.