“Ko Hono Pukepuke ʻo e Kau Kasitomaá: Ako,” Ko Hono Kamata mo Hono Fakatupulaki ʻEku Pisinisí ke Moʻui Fakafalala pē Kiate Aú (2017)
“Ko Hono Pukepuke ʻo e Kau Kasitomaá: Ako”
Ako
Taimi Lōloa Tahá: Miniti ʻe 60
1. Ko Hono Fakatupulaki e Mateaki ‘a e Kasitomaá.
Lau:
ʻI he taimi ní, ʻoku totonu ke ʻi ai haʻo kasitomā ʻe taha pe lahi ange. Kapau ʻoku ʻikai, tokanga ke maʻu haʻo kasitomā ʻi he vave tahá.
Ko ʻene ʻi ai pē haʻo kau kasitomā, ʻe fie maʻu leva ke ke ngāue mālohi ke nau mateakiʻi hoʻo pisinisí. Te ke lava ʻo tanumaki e mateakí ʻaki haʻo fakakau hoʻo kau kasitomaá, fakafanongo kiate kinautolu, pea fakatupu ha ngaahi aʻusia lelei maʻa kinautolu. Ko hono kumi haʻo kau kasitomā foʻoú ʻe lava ke mole lahi ange ai hoʻo pisinisí ʻi he meʻa te ke fakamole ke pukepuke e kau kasitomā lolotongá.
Aleaʻi:
Tau pehē ʻokú ke fakaava ha fale ngaahi ʻulu ʻi homou feituʻú. Ko ha tokolahi ʻo e kau kasitomaá ʻoku nau tokanga ki he totongí pea te nau ō ki he fale ngaahi ʻulu ʻoku maʻamaʻa tahá pe foaki ha kiuponi pe fakamaʻamaʻa.
-
Ko e hā ha ngaahi meʻa te ke lava ʻo fai ke tanumaki hano mateakiʻi ho fale ngaahi ʻulú ke omi ʻa e kau kasitomaá neongo he ʻikai te ke fakamaʻamaʻa e totongí?
-
Ko e hā ha ngaahi meʻa te ke lava ʻo fai te ne ʻai ke ke lava ai ʻo ʻai ke totongi feʻunga pē?
2. Ko Hono Fakakau ʻEku Kau Kasitomaá
Lau:
Ko hono fakakau ʻo e kau kasitomaá ʻoku mahulu hake ia ʻi he ʻai ke nau fakatokangaʻi pē hoʻo pisinisí. ʻOku ʻuhinga ia ke fakakau maʻu pē kinautolu pea mo fakalotolahiʻi ke nau kau ai. ʻI hoʻo fakakau ko ia e kau kasitomaá, te nau fakatupulaki leva ha fepikitaki fakaeloto ki hoʻo pisinisí mo ongoʻi ʻoku nau maʻu ha konga. ʻOku ngalingali foki te nau mateakiʻi hoʻo ngāué pe koloá pea mo tuʻuaki hoʻo pisinisí ki ha niʻihi kehe.
Kumi maʻu pē ha ngaahi founga ke fakakau ai hoʻo kau kasitomaá. ʻOku nau fie fakahā ʻenau fakakaukaú, vahevahe ʻenau aʻusiá, pea aʻu ʻo nau fakamatala ha ngaahi fakakaukau foʻou ki ha ngāue pe koloa foʻou. Te ke lava ʻo fakakau hangatonu e kasitomaá, ʻo fakafou ʻi he ngaahi aʻusiá pea mo e tekinolosiá. Ko e mītia fakasōsialé mo e ʻī-meilí ko ha ongo sīpinga ia ʻo e founga ke fakakau ai e kau kasitomaá ʻo fou ʻi he tekinolosiá.
Aleaʻi:
Fakakaukau ki ha pisinisi ʻokú ne fakakau koe ko ha kasitomā. ʻOku tokoni fēfē ʻeni ki hoʻo fetuʻutaki mo e pisinisí?
Lau:
Fakapapauʻi, ʻi hoʻo hoko ko e taha maʻu pisinisí, ke ke fakakau hoʻo kau kasitomaá ʻi ha ngaahi founga kuo fakakaukauʻi mo fakaʻatuʻi. Hangē ko ʻení, ʻe lava ke hoko e fetuʻutaki ʻi he ʻī-meilí ko ha meʻangāue lelei. Neongo ia, kapau ʻe fuʻu lahi e ʻī-meili ʻokú ke ʻavé, pe faʻahinga ʻī-meili hala, te ke ala fakatupu ʻita ki hoʻo kau kasitomaá pe uesia ʻenau falalá. ʻOku totonu ke muʻomuʻa taha e meʻa ʻoku foua ʻe hoʻo kau kasitomaá.
3. Ko e Fanongo ki Heʻeku Kau Kasitomaá
Lau:
Ko ha founga ʻe taha ke tanumaki ai e mateakí ko e fakafanongo ki hoʻo kau kasitomaá. ʻI hoʻo fakafanongó, “ngāue ʻaki [ho] lotó [ke] ke ʻilo” (Lea Fakatātā 2:2). ʻOku faʻa ʻoatu ʻe hoʻo kau kasitomaá ha ngaahi fakamatala ʻaonga ʻoku fakaiku ki ha ngaahi fakakaukau foʻou, ʻo fakaleleiʻi ai hono fakahoko ʻo e ngaahi meʻá, pea lelei mo e ngāué. ʻE lava ke fakafanongo ʻa e kau maʻu pisinisí ki heʻenau kau kasitomá ʻi ha ngaahi founga kehekehe, hangē ko ia ʻi laló.
|
Ngaahi Founga ʻOku Fetuʻutaki ai e Kau Kasitomaá mo e Ngaahi Pisinisí | |||
|---|---|---|---|
|
ʻĪmisi Fakaʻilonga Fakamatala Tonú Ngaahi Fakamatala Tonu ʻOku fai ʻe he kau kasitomá ʻa e fakamatalá ki he taha maʻu pisinisí pe ki ha taha ngāue. |
ʻĪmisi Fakaʻilonga lea ʻo-e-ngutú Ngaahi fakamatala lea-ʻo-e-ngutú ʻOku fai ʻe he kau kasitomá e fakamatalá ki honau ngaahi kaumeʻá pe kau kasitomá kehe. |
ʻĪmisi Fakaʻilonga ʻo e ngaahi lāungá Ngaahi lāunga ʻOku ʻave ʻe he kau kasitomá ʻa e fakamatalá ke fai ha tokanga pe ngāue. |
ʻĪmisi Fakaʻilonga ʻo e Vakaiʻí mo e Fakafuofuaʻí Vakaiʻi mo e fakafuofuaʻi ʻOku fakamaaka e mahuʻinga ʻo e pisinisí mo e ngāué ʻe he kau kasitomaá (ʻi he ʻinitanetí). |
|
ʻĪmisi Fakaʻilonga ʻo e ngaahi saveá Ngaahi saveá ʻOku kole ʻe ha pisinisi ʻa e fakamatalá mei he kau kasitomá. |
ʻĪmisi Fakaʻilonga ʻo e mītia fakasōsialé Mītia fakasōsialé ʻOku fakaʻaongaʻi ʻe he kau kasitomá ʻa e ngaahi meʻangāue he ʻinitanetí ke tufaki e fakamatalá mo ha kakai ʻoku tokolahi ange. |
ʻĪmisi Fakaʻilonga ʻo e ngaahi fili ke fakataú Ngaahi fili ke fakataú ʻOku fakahaaʻi ʻe he kau kasitomaá ʻenau filí mo e meʻa ʻoku nau mahuʻingaʻia aí ʻi he meʻa ʻoku nau fili ke fakatau pe ʻikai fakataú. |
ʻĪmisi Fakaʻilonga ʻo e fakalāngilangí mo e ngaahi palé Ngaahi fakalāngilangí mo e ngaahi palé ʻOku maʻu ʻe ha pisinisi ha fakalāngilangi mo ha pale tuʻunga ʻi heʻene leleí pe ngāué. |
4. Ko e Liliu ki he Liliu ʻo e Māketí
Lau:
ʻI hoʻo fakakau mo fakafanongo ki hoʻo kau kasitomá, te ke ala fakatokangaʻi ai ha ngaahi huʻunga pe ngaahi liliu foʻou ʻa ia ʻe fie maʻu ai ke ke liliu hoʻo pisinisí. Mahalo ko ha ngaahi liliu pē ʻeni ʻi he ngaahi fiemaʻu ʻa e kasitomaá, natulá, tekinolosiá, pe feʻauʻauhí.
Mamataʻi:
“Adjusting to Market Change,” ʻoku maʻu ʻi he srs.lds.org/videos. (ʻIkai ha vitiō? Lau e fakamatala ʻi he fakaʻosinga ʻo e konga ko ʻení.)
Aleaʻi:
Ko e hā ha ngaahi huʻunga pe liliu te ne ala uesia hoʻo pisinisí? Ko e hā ha ngaahi founga te ke ala fakahoko?
5. Ko Hono Tanumaki ha Aʻusia Lelei ki he Kasitomaá
Lau:
Ko e kau maʻu pisinisi leleí ʻoku nau kumi ha ngaahi founga ke fiefia ai ʻe kau kasitomaá ʻaki hano ʻai ke laka ange ʻi he meʻa ʻoku nau ʻamanaki ki aí. ʻOku fie maʻu ʻe he kau kasitomá ʻenau aʻusiá ke faingofua, faingamālie, pea mo fakahoko ʻi ha founga makehe. ʻOku to e fakamahuʻingaʻi lahi foki ʻe he kau kasitomaá ha pisinisi ʻokú ne tauhi ʻene ngaahi palōmesí mo maluʻi ʻene ngāué pe koloá. ʻOku toki ʻaonga hono ʻai ke lelei mo fakangalongataʻa e aʻusia ʻa e kasitomaá ʻi he taimi ʻoku fakatau hangatonu aí pea mo e lahi ange ʻo e mateakí.