Tukupā

Taimi Lōloa Tahá: Miniti ʻe 10

Kiʻi Tohi Pisinisí

Lau:

ʻE fie maʻu ʻe hoʻo pisinisí ha fakaleleiʻi lahi ange ʻi he meʻa ʻokú ke fakakaukauʻí. Ko ha konga mahuʻinga hono fakaleleiʻi hoʻo pisinisí ko hono hiki hoʻo ngaahi fakakaukaú, vakaí, mo e ngaahi ongo fakalaumālié ʻi he ʻaho takitaha. Kamata fakaʻaongaʻi ha kiʻi tohi foʻou pe ha meʻangāue fakaʻilekitulōnika ke lekooti hoʻo ngaahi fakakaukaú mo e fokotuʻutuʻú, ʻi he uiké ni. Ko hoʻo kiʻi tohi pisinisí ʻeni. ʻE kole atu ʻi he uike kahaʻú ke ke fai ha fakamatala pe ko e ʻaho ʻe fiha naʻá ke tohi ai ʻi hoʻo kiʻi tohí. ʻOmi ia ki hoʻomou fakataha fakakulupú ʻi he uike takitaha.

Tukupā Meʻa Fakamaʻu Pepá

Lau:

ʻOku mapuleʻi ʻe he kau maʻu pisinisí kinautolu ke nau fakafeʻiloaki ki ha kakai foʻou ʻi he ʻaho kotoa pé. ʻOku mahuʻinga hono fakahoko e ngaahi fetuʻutaki ko ʻení ki he ola lelei hoʻo pisinisí. ʻI hoʻo kakapa atu mo talanoa ki ha kakai tokolahi angé, ʻe ava ha ngaahi matapā naʻe ʻikai ke ke teitei ʻamanaki ki ai. Kamata ʻi he uiké ni ke talanoa fakaʻaho mo ha kakai foʻou.

ʻE tokoni atu e ʻekitivitī ʻi laló ke ke fakakau mai ha niʻihi kehe, neongo kapau ʻe faingataʻa ʻi he kamataʻangá. ʻE kole atu ʻi he uike kahaʻú ke ke fai ha fakamatala pe ko e ʻaho ʻe fiha naʻá ke talanoa ai mo ha kakai. ʻOku mātuʻaki mahuʻinga ʻi hoʻo kamata ha pisinisí ke ke fakatupulaki ha loto falala ki hoʻo malava ko ia ke fakatupulaki ha fefalalaʻakí, fakalotolahiʻi mo fakalotoa e niʻihi kehé, mo felotoi ʻi ha ngaahi founga ʻoku fakatou ʻaongá.

ʻEkitivitī (miniti ʻe 5)

Ko e taimi ʻokú ke ʻalu ai ki ʻapí, kumi ha meʻa fakamaʻu pepa [paper clip] (pe ko ha toe kiʻi meʻa mahuʻinga siʻisiʻi hangē ko ha kiʻi foʻi tākisi (pushpin) pe lapa peni (rubber band) ke fakaʻaongaʻi ʻi he ʻekitivitī ko ʻení. Kamata ʻaki haʻo fetongi hoʻo kiʻi meʻa fakamaʻu pepá (pe ko e kiʻi meʻa naʻá ke filí) mo ha taha ki ha meʻa ʻoku toe mahuʻinga ange. Toutou fakafetongi pē hoʻo kiʻi meʻá mo e kakaí ki ha meʻa ʻoku toe mahuʻinga angé. Fakafetongi mo e kakai ʻi loto mo tuʻa he fāmilí. Lipooti mai ki he kulupú ʻi he uike kahaʻú hoʻo aʻusia ʻi he fakafetongi ko ʻení pea mo fakaʻaliʻali ʻa e meʻa naʻe fakaiku ki ai hoʻo fakafetongí.

ʻOku tau fai ha ngaahi tukupā ʻi he uike kotoa pē. Ko e taimi te tau fakataha ai ʻi he uike kahaʻú, te tau kamata ʻaki hono lipooti ʻetau ngaahi tukupaá. Fakaʻaongaʻi ʻa e saati ʻo e “Ko Hono Fakafuofuaʻi ʻo ʻEku Ngāué” (ʻi he kamataʻanga ʻo e tohi ngāué) ke vakaiʻi pe ʻe fakaiku ki fē hoʻo muimuiʻi hoʻo ngaahi tukupaá.

Lau mo ho hoa ngāué ʻa e ngaahi tukupā takitaha ʻi laló. ʻE fakautuutu ʻaupito ho ivi ke ikuna ʻi he kamataʻi pe fakatupulaki hoʻo pisinisí, kapau te ke tauhi fakamātoato hoʻo ngaahi tukupā fakauiké. Palōmesi ke tauhi hoʻo ngaahi tukupaá pea toki fakamoʻoni hingoa ʻi lalo.

Ko ʻEku Ngaahi Tukupaá
A. Te u tauhi e ngaahi tukupā ʻi he “Ko Hoku Fakavaʻé” ki he uike ní: Lau e tohi ʻa e Kau Palesitenisī ʻUluakí ʻi he kamataʻanga ʻo e tohi lēsoni ko ʻení, laineʻi ʻa e ngaahi tāpuaki kuo talaʻofa maí, pea mo hiki ʻa e meʻa kuo pau ke u fai ke maʻu ai kinautolú. Vahevahe mo hoku familí pe ngaahi kaungāmeʻá ʻa e meʻa kuó u ako he ʻahó ni fekauʻaki mo e moʻui fakafalala pē kiate kitá.
E. Te u kau ʻi he Tukupā Meʻa Fakamaʻu Pepá mo lipooti ʻeku aʻusiá ʻi he uike kahaʻú.
F. Te u kamata tohi ʻi heʻeku kiʻi tohi pisinisí ʻi he ʻaho kotoa pē mo ʻomi ia ki heʻetau fakataha hokó.
H. Te u to e vakaiʻi ʻeku peesi “Fakalaulaulotó” mo tauhi ʻa e ngaahi tukupaá.
I.Te u fetuʻutaki mo poupou ki hoku hoa ngāué.

Manatuʻi ʻe kole atu ʻi he uike kahaʻú ke ke lipooti ʻa e lahi ʻo e ngaahi ʻaho ne ke talanoa ai mo ha kau kasitomā pea mo tohi ʻi hoʻo kiʻi tohi pisinisí (vakai, saati “Ko Hono Fakafuofuaʻi ʻo ʻEku Ngāué” ʻi he kamataʻanga ʻo e tohí.)

Ko ʻeku fakamoʻoni hingoá

Fakamoʻoni hingoa ʻa e hoa ngāué

Fai ha lotu tuku.