“Iosua le Perofeta,” Tala o le Feagaiga Tuai (2022)
“Iosua le perofeta,” Tala o le Feagaiga Tuai
Teuteronome 10; 31; 34; Iosua 1; 3–6; 10–11; 21; 24
Iosua le Perofeta
O se suega faaiu a o lei ulufale atu i le nuu folafolaina
Na valaauina e le Alii ia Iosua e avea ma perofeta fou ina ua uma ona aveina atu Mose i le lagi. A o tolauapi Isaraelu e latalata i le Vaitafe o Ioritana, sa fetalai mai le Alii ua oo i le taimi latou te o atu ai i le nuu folafolaina.
Teuteronome 34:1–9; Iosua 1:1–4; Alema 45:19
O le nuu folafolaina sa i Kanana, ae sa nonofo ai tagata amioleaga iina. Na ta‘u atu e le Alii ia Iosua ia malosi ma ia lototele. Faatasi ai ma le fesoasoani a le Alii, na mafai ai e Isaraelu ona manumalo i le laueleele o Kanana.
Sa faapotopoto e Iosua se autau. Na ta‘u atu e le Alii ia i latou e ave papamaa o Tulafono e Sefulu ma isi tusitusiga paia. Sa amo e ositaulaga nei mea paia i totonu o se pusa na ta‘ua o le atolaau o le feagaiga. Ona sauni lea o le autau e sopoia le Vaitafe o Ioritana. Sa loloto le vaitafe ma sa tatafe malosi.
Teuteronome 10:5; 31:25–26; Iosua 1:10–11; 3:1–11
Sa folafola atu e Iosua ia Isaraelu o le a fesoasoani le Alii ia i latou e sopoia le vaitafe.
Sa fai atu Iosua i faitaulaga e toa 12 e avatu le atolaau o le feagaiga ma savavali i totonu o le vai. O le taimi lava na laa atu ai faitaulaga i le vaitafe, sa vavae ai le vai.
Sa sopoia e Isaraelu le vaitafe i luga o le laueleele matutu. Sa fai atu Iosua ia Isaraelu e ave ni maa se 12 mai le vaitafe matutu. Sa ia faaputuina maa e faamanatu ai ia Isaraelu le vavega a le Alii i lena aso.
Sa taitai atu e Iosua le autau a Isaraelu i le laueleele o Kanana. Sa latou taunuu i se aai e ta‘ua o Ieriko. Sa malosi tele le aai ma sa i ai ni puipui maualuluga. Na ta‘u atu e le Alii ia Iosua le ala e faatoilalo ai Ieriko. Sa ia fai mai e tatau ona savavali faataamilo Isaraelu i Ieriko i aso uma mo aso e ono. Na usitai Iosua i le Alii.
Sa ta‘u atu e Iosua i faitaulaga e tauave le atolaau o le feagaiga i luma o Isaraelu. O aso taitasi, e savavali faataamilo ai le autau i Ieriko, ma sa ili e faitaulaga e toafitu a latou pu. Sa filemu uma isi Isaraelu.
I le aso lona fitu, sa faafitu ona savavali faataamilo le autau i Ieriko. A o ili e faitaulaga a latou pu, sa ta‘u atu e Iosua ia Isaraelu ia alalaga. Sa faafuasei ona solo i lalo pa o Ieriko i le eleele, ma sa ave e le autau a Iosua le aai.
Sa fesoasoani le Alii ia Isaraelu, e pei ona Ia folafola atu. Sa faaauau pea ona manumalo le autau a Iosua i le laueleele o Kanana, ma sa amata ona nonofo ai Isaraelu iina. Sa faamanatu atu e Iosua ia i latou vavega ma folafolaga a le Alii. Sa ia fai atu ia Isaraelu e filifili e auauna atu i le Alii.