“Elia le Perofeta,” Tala o le Feagaiga Tuai (2022)
“Elia le perofeta,” Tala o le Feagaiga Tuai
1 Tupu 16–18
Elia le perofeta
O le faatuatua o se tina ma le vavega a le Alii
O le malo o Isaraelu ua le timu lava, ma ua amata ona leai se vai. O le tupu o Aapo ma le Masiofo o Iesepela sa le fiafia i perofeta a le alii. Sa i ai foi ni perofeta na la fasiotia. O le tupu ma le masiofo na tatalo i tupua mo le timu. Ae na ta’u atu e le perofeta o Elia o le a le aumaia e le Alii le timu mo ni tausaga.
Ua le fiafia le tupu ma le masiofo ia Elia. Na lapatai e le Alii ia Elia e lafi ona ua lamatia lona ola.
Sa taitai atu Elia e le Alii i le alia ma auina atu manufelelei e avatu ia te ia meaai. Ae talu ai ua leai se timu, ua matutu ai le alia, ma ua leai se vai mo Elia.
Sa taitai atu Elia e le Alii i se fafine i se aai e mamao atu. Sa fai atu Elia ia te ia mo se vai ma se falaoa. Ae sa na’o se mea lava e lava mo ia ma lana tama mo le aso e tasi.
Sa iloa e Elia ua toe pau lea o le meaai a le tina. Sa folafola atu e Elia afai na te fafaga ia te ia, o le a saunia e le Alii meaai mo lona aiga seia toe oo mai le timu.
Sa faia e le fafine se areto mo Elia. Ona faateleina ai lea o lana suauu ma le falaoamata! Sa lava meaai mo i latou o Elia ma lona aiga mo le tele o aso.
I se tasi aso na ma’i ai le tama a le fafine ma oti ai. Sa ia fesili atu ia Elia pe aisea ua tuu ai e le Alii lenei mea e tupu ia te ia.
Sa i ai le perisitua ia Elia. Sa ia faamanuia le tama a le fafine ma ole atu i le Alii e faataga o ia e toe foi mai i le tino. Sa toe manava le tamaitiiti, ma na iloa ai e le fafine o Elia lava o le perofeta a le Alii.