“Samuelu le Perofeta,” Tala o le Feagaiga Tuai (2022)
“Samuelu le Perofeta,” Tala o le Feagaiga Tuai
1 Samuelu 2–3
Samuelu le Perofeta
o se alii talavou na valaauina e le Alii
Mo se taimi umi, o Isaraelu sa leai se perofeta a le Alii e taitaia i latou. Ae sa fai faamasino ma pule ia Isaraelu mo le tele o tausaga. Mai i lena taimi, na avatu ai e Hana lana tama talavou o Samuelu e nonofo ma Eli, o le ositaulaga ma le faamasino o Isaraelu. Sa fesoasoani Samuelu ia Eli i le malumalu.
O atalii e toalua o Eli sa galulue foi i le malumalu, ae sa la gaoia taulaga sa faamoemoe e mo le Alii. Sa i ai tagata sa faitio ia Eli, ae e le’i faasalaina e Eli i la’ua.
I se tasi po sa faalogo ai Samuelu i se leo o valaau mai ia te ia. Sa ia manatu o Eli, o lea na alu ai Samuelu ia te ia. Ae sa le’i valaau Eli ia te ia. Sa fai atu Eli ia Samuelu e toe foi i lona moega.
Sa toe faalogoina faalua e Samuelu le leo o valaau ia te ia. Sa ia alu atu ia Eli ma fesili atu po o le a le mea ua ia manao ai. Ae sa le’i valaau Eli ia te ia. Sa fai atu Eli ia Samuelu e toe foi i lona moega.
Sa toe faalogoina faatolu e Samuelu le leo o valaau ia te ia. Sa ia toe alu atu ia Eli ma fesili atu po o le a le mea ua ia manao ai. O le taimi lea, ua iloa e Eli o le Alii na valaau ia Samuelu. Sa fai atu Eli ia Samuelu e toe foi i lona moega. Ona fai atu lea o Eli a toe valaau mai le Alii, e ao ia Samuelu ona faalogo.
Sa toe faalogoina e Samuelu le leo o valaau ia te ia. O le taimi lea na fai atu ai Samuelu i le Alii e fetalai mai o le a ia faalogo. Sa ta’u atu e le Alii ia Samuelu le sese o loo fai e Eli o le tuu o ona atalii o loo faia le agasala e auauna atu i totonu o le malumalu. Ua le toe faatagaina le aiga o Eli e galulue i totonu o le malumalu.
O le aso na sosoo ai, na fesili atu Eli ia Samuelu po o le a le mea na fai mai ai le Alii. Na ta’u atu e Samuelu ia te ia. Na silafia e Eli o le Alii ua fetalai mai e ala atu ia Samuelu.
Na auina atu le tala fou i le laueleele uma o Isaraelu. Na iloa e tagata ua filifilia Samuelu e le Alii e avea ma Ana perofeta.