“Tepora le Perofeta Fafine,” Tala o le Feagaiga Tuai (2022)
“Tepora le Perofeta Fafine,” Tala o le Feagaiga Tuai
Tepora le Perofeta Fafine
O se taitai na fesoasoani ia Isaraelu ia faalagolago i le Alii
O Tepora o se perofeta fafine, o se taitai faamaoni o Isaraelu sa musuia e le Alii. Sa le toe tausia e ona tagata poloaiga a le Alii, ma sa pulea i latou e sa Kanana. Ina ua mavae le luasefulu tausaga, sa amata ona tatalo Isaraelu mo le fesoasoani a le Alii.
Sa tali le Alii ia latou tatalo. Sa Ia ta‘u atu ia Tepora e faapotopoto se autau a Isaraelu e tau faasaga ia sa Kanana.
Sa tele fitafita ma kariota a le autau a sa Kanana. O lenei mea na fefefe ai le autau a Isaraelu, ae le o Tepora. Sa ia iloa o le a fesoasoani le Alii ia i latou.
O Parako o le taitai o le autau a Isaraelu. Sa le’i manao o ia e tau. Ae sa ia manatu afai e o Tepora ma le autau, o le a puipuia i latou e le Alii. Na malie Tepora e alu. Sa ia valoia o le a faatoilaloina e se fafine ia Sesera, le taitai o le autau a sa Kanana.
Sa faapotopoto le autau a Isaraelu i luga o se mauga, ae sa faapotopoto sa Kanana i le vanu. Sa ta‘u atu e Tepora ia Parako e alu i lalo mai le mauga. Sa ia folafola atu o le a faatasi le Alii ma i latou.
Na auina mai e le Alii le timu, ma sa tafi ese kariota a sa Kanana i le vai. E toatele sa Kanana sa malelemo i le vaitafe, ae sa sola ese Sesera.
Faamasino 4:15, 17; 5:4–5, 19–22
O se fafine e igoa ia Iaeli sa nofo i se faleie lata ane. Sa ia vaaia Sesera o tamoe ane ma fai atu ia te ia e lafi i lona faleie. Na iloa e Iaeli o ia o se taitai o le autau a sa Kanana ma fasiotia o ia ina ia le mafai ona ia faatiga i nisi tagata.
Na moni le valoaga a Tepora. Sa faatoilaloina Sesera e se fafine lototoa. Sa usuina e Tepora se pese e fesoasoani ai ia Isaraelu ia manatua le ala na laveaiina ai i latou e le Alii. Sa tausia e Isaraelu poloaiga ma ola i le filemu mo le 40 tausaga.