“Mose i luga o le Mauga o Sinai,” Tala o le Feagaiga Tuai (2022)
“Mose i luga o le Mauga o Sinai,” Tala o le Feagaiga Tuai
Esoto 19–20; 24; 31–34; Teuteronome 4–7
Mose i luga o le Mauga o Sinai
Fesoasoani i tagata ia manatua le Alii
Sa malaga Mose ma Isaraelu i le vao. Sa latou o mai i se mauga e ta‘ua o le Mauga o Sinai.
Sa alu a’e Mose i le mauga e talanoa ma le Alii. Sa ta‘u atu e le Alii ia Mose e finagalo o Ia e talanoa faafesagai ma Isaraelu.
Na o mai Isaraelu i lalo o le Mauga o Sinai, ma sa faia e le Alii se ao o le asu e siomia ai le mauga. Sa i ai le Alii i le ao. Sa Ia fetalai atu ia Isaraelu ma tuu atu ia i latou poloaiga. Sa luluina le mauga a o Ia fetalai.
Esoto 19:16–19; 20:1–17; Teuteronome 4:12–13, 33; 5:4–5
Sa fefefe tagata Isaraelu. Sa latou fai atu ia Mose e talanoa ma le Alii ina ia mafai ona ta‘u atu e Mose ia i latou le mea e finagalo ai le Alii.
Sa ave e Mose ia Arona ma toeaina o Isaraelu e 70 i le mauga e maua ai nisi aoaoga a le Alii. Sa afio atu le Alii ia i latou.
Ona ta‘u atu lea e le Alii ia Mose e tuua toeaina ma alu ia maualuga atu i luga o le mauga. Sa usitai Mose. Sa faaaoga e le Alii Lona tamatamaiaao e tusi ai Lana tulafono ma poloaiga i luga o papamaa. Mo aso e 40, na aoao atu ai e le Alii ia Mose i le tele o mea.
A o i ai Mose i luga o le Mauga o Sinai, sa le lavava le nuu o Isaraelu i le faatalitali mo ia. Sa latou fai atu ia Arona e fai ni faatagata mo i latou e tapuai ai e pei ona sa latou faia i Aikupito. Sa aoina e Arona a latou auro uma ma fai se faatagata o se tamai povi.
Sa tapuai Isaraelu i le tamai povi auro ma osi atu ai taulaga. Sa latou fai mai o le tamai povi auro, ae le o le Alii, na faasaolotoina i latou mai Aikupito.
Sa silafia e le Alii sa tapuai Isaraelu i se tupua ma faagaloina o Ia. Sa Ia poloaiina Mose e toe foi atu ma ta‘u atu i tagata ia salamo.
Na sau Mose i lalo mai le Mauga o Sinai ma vaaia Isaraelu o tapuai i le tamai povi auro. Sa matuai le fiafia o ia. Sa lei saunia tagata e usitai i le tulafono ma poloaiga na tusia e le Alii. Sa taei e Mose ia papamaa ma faatamaia le tamai povi auro. Sa ia fesoasoani ia Isaraelu ia salamo ma manatua lo latou Atua moni.
Sa ole atu Mose i le Alii e faamagalo Isaraelu ma toe faia ni folafolaga faatasi ma i latou. Na folafola atu Mose e taitai ma aoao i latou.
Sa fetalai atu le Alii ia Mose e fatu ni papamaa fou ma toe foi i le Mauga o Sinai. Sa faia e le Alii se folafolaga fou ma Isaraelu ma tuu atu ia i latou Ana Poloaiga e Sefulu.