“O Miti Musuia a Iosefa,” Tala o le Feagaiga Tuai (2022)
“O Miti Musuia a Iosefa,” Tala o le Feagaiga Tuai
O Miti Musuia a Iosefa
O se tauiviga a le aiga ia alofa le tasi i le isi
Na tatalo Rasela ma Iakopo mo le tele o tausaga ia maua se tama. Sa tali mai le Alii i a latou tatalo ina ua fanau mai Iosefa. O Iosefa o le atalii e sili ona fiafia i ai Iakopo, ma sa ia tuuina atu ia Iosefa se ofutele faapitoa. Sa lotoleaga atalii matutua e toa 10 a Iakopo.
Ina ua tusa ma le 17 tausaga o Iosefa, sa ia faia se miti musuia faapea sa ia fusifusia fusi saito i fanua faatasi ma ona uso. Sa tu i luga le fusi saito a Iosefa. Ae o fusi saito a ona uso sa ifo i lalo i le fusi saito a Iosefa. Ina ua ta‘u atu e Iosefa i ona uso e uiga i le miti, sa latou feitai ia te ia.
Mulimuli ane, sa i ai se isi miti musuia a Iosefa. I lenei miti, sa ifo mai le la, le masina, ma fetu e 11 ia te ia. Sa ta‘u atu e Iosefa i lona aiga e uiga i le miti. O lenei miti na foliga mai o le a pulea e Iosefa le aiga. Sa oo ina feita atili ai uso o Iosefa ia te ia. Sa latou le fiafia i ana miti.
I se tasi aso sa o ese ai uso o Iosefa mai le fale e fafaga mamoe. Na auina atu e Iakopo ia Iosefa e asi i latou.
Sa mananao nisi o uso o Iosefa e fasioti o ia. Sa latou aveina le ofutele o Iosefa ma lafo o ia i totonu o se lua.
A o i ai Iosefa i le lua, sa vaai ona uso i ni tagata o malaga atu i Aikupito. Sa filifili le au uso e faatau atu Iosefa o se pologa i tagata malaga mo tupe siliva e 20.
Ona tuu lea e uso o Iosefa le toto o le oti i luga o lona ofutele. Sa o atu le au uso i lo latou tama, o Iakopo, ma faaali atu ia te ia le ofutele. Sa latou pepelo ia Iakopo ma ta‘u atu ia te ia ua aina o ia e manu feai.
Sa tagi Iakopo ona sa manatu o ia ua oti Iosefa.
Ae sa ola pea Iosefa. Sa mamao ese o ia mai le aiga i Aikupito, ma sa ola o se pologa.