“Tavita ma Koliata,” Tala o le Feagaiga Tuai (2022)
“Tavita ma Koliata,” Tala o le Feagaiga Tuai
1 Samuelu 17
Tavita ma Koliata
Feagai ma se luitau faasau’ai
Sa osofai e Filisitia ia Isaraelu. O taeao uma e lu’i ai e se Filisitia sau’ai e igoa ia Koliata soo se Isaraelu la te tau. O Koliata o se tagata tino ese toe maualuga nai lo tagata uma, ma sa matautia. Sa ia ofuina se ufifatafata mamafa ma tauave se pelu, tao ma se talita lapoa. Sa leai se tasi na fia tau ma ia.
O Tavita o se tama talavou leoleo mamoe e tumu i le faatuatua i le Alii. O ona uso matutua o ni fitafita a le autau a Isaraelu. I se tasi aso, na alu ai Tavita e ave meaai ma ona uso. Ina ua ia taunuu i le mea o loo api ai le autau, na ia faalogo ai i le lu’i a Koliata.
Na fesili atu Tavita i fitafita pe aisea ua leai ai se tasi e puipuia Isaraelu. Sa feita ona uso ma fai atu ia te ia e alu e vaai faalelei mamoe. Ae na iloa e Tavita o le a puipuia e le Alii ia Isaraelu.
Na silafia e le tupu o Saulo le faatuatua o Tavita, ona ia fai atu lea e fia vaai ia Tavita. Na fai atu Tavita ia Saulo e le fefe o ia e tau ma Koliata. Na faamatala atu e Tavita se tasi taimi a o ia vaavaaia ana mamoe, na ia faaumatia ai le leona ma le urosa. Sa laveaiina a’u e le Alii iina, ma na iloa e Tavita o le a laveai foi le Alii i lea taimi.
Sa tuuina atu e Saulo ia Tavita lana ufifatafata. Ae sa le fetaui, ona aveese lea e Tavita. Sa ia filifili e tau e aunoa ma le ufifatafata.
Na filifili mai e Tavita ni maa lamolemole se lima, ma tuu i le taga. Na ia ave lana maata ma le tootoo leoleo mamoe ma alu e faafesagai ma Koliata.
Ina ua vaai atu Koliata ia Tavita, na ia alaga atu ma taufaifai ia te ia. Sa fai mai o ia o se tamaitiiti leoleo mamoe na te le mafai ona fasia o ia. Na alaga atu Tavita o ia e talitonu i le Alii e laveai ia te ia! Na fai atu Tavita na te mafai ona fasia Koliata e faailoa ai le silisiliese o le Alii.
Na tamoe atu Tavita agai ia Koliata. Sa faavave ona ia lia’i atu le maa mai lana maata. Sa tau tonu le maa i le muaulu o Koliata, ona pa’û ai lea o le sau’ai tele i le eleele. Sa fesoasoani le Alii ia Tavita e faatoilalo Koliata e aunoa ma se pelu ma se ufifatafata.
Ina ua vaaia e Filisitia ua oti Koliata, sa latou sosola ese i le fefefe. Sa manumalo Isaraelu i le taua. Sa faatuatuaina e Tavita le Alii, ma na laveai e le Alii Isaraelu.