“O Le Autau a Kitiona,” Tala o le Feagaiga Tuai (2022)
“O Le Autau a Kitiona,” Tala o le Feagaiga Tuai
O Le Autau a Kitiona
Faalagolago i le Alii ao i ai i le taua
Sa faamanuiaina tagata o Isaraelu mo le tele o tausaga. Ona latou filifili lea e le usitai i le Alii. Ina ia fesoasoani ia i latou ia manatua pea o Ia, na tuu ai e le Alii o latou fili o sa Mitiana e ave a latou meaai ma manu. Sa matelaina Isaraelu, o lea sa latou manatua ai le Alii ma tatalo atu ia te Ia mo se fesoasoani.
O Kitiona o se alii mai se aiga mativa. Na auina atu e le Alii se agelu e valaau o ia e faasaoloto Isaraelu. Sa mafaufau Kitiona pe aisea na filifilia ai o ia e le Alii.
Na ta‘u atu e le Alii ia Kitiona e faaumatia nofoaga sa tapuai ai Isaraelu i atua ese. Ina ua usitai Kitiona, sa feita tagata.
Sa mananao Isaraelu e fasioti Kitiona. Ae sa faatalitonuina i latou e le tama o Kitiona ia aua nei faatiga ia te ia. Sa saogalemu Kitiona.
Sa lei manatu Kitiona e mafai ona ia faasaolotoina Isaraelu. Sa silia ma le 135,000 fitafita i le autau a sa Mitiana. Ae na tuu atu e le Alii ia Kitiona le atamai ma le malosi.
Sa finagalo le Alii ia iloa e Isaraelu e mafai ona latou manumalo i Lona malosi, ae le o lo latou lava malosi. E ui ina sa na o le 32,000 fitafita a Isaraelu, ae sa poloaiina e le Alii ia Kitiona e auina atu i le fale soo se fitafita sa fefe. Ina ua uma ona o i le fale le 22,000, sa tuua ai Isaraelu ma fitafita e 10,000.
Na fetalai mai le Alii o le 10,000 sa toatele pea fitafita. Sa ia ta‘u atu ia Kitiona e ave le autau i lalo i le vai. O i latou o e inu faō mai le vai ma o latou gutu o le a auina atu i le fale. O i latou na inu etoeto mai o latou lima e mafai ona nonofo. O lea la ua na o le 300 alii na totoe.
Na iu lava, ina ua saunia Isaraelu e tau. Sa faaali atu e le Alii ia Kitiona le ala e faatoilalo ai Mitiana. Sa ta‘u atu e Kitiona i lana autau e faaaoga pu ma lamepa e faafefe ai i latou. O le leo ma moli na fenumiai tele ai Mitiana ma sa amata ai ona latou tau le tasi ma le isi. Ona latou fetagisi lea ma sosola ese.
Ona sa faatuatuaina e Kitiona le Alii, sa faatoilalo e Isaraelu le autau tele a Mitiana i le na o le 300 fitafita. Ua faasaoloto e le Alii le nuu o Isaraelu.