“Atamu ma Eva,” Tala o le Feagaiga Tuai (2022)
“Atamu ma Eva,” Tala o le Feagaiga Tuai
Kenese 2–3; Mose 3–5; Aperaamo 5
Atamu ma Eva
O le mauaina o aafiaga i le faia o filifiliga
O Atamu ma Eva o fanau a le Tama Faalelagi na muai ola i lenei lalolagi. Sa nonofo i le Faatoaga matagofie o Etena, sa siosiomia e ituaiga uma o laau iti ma laau tetele. Sa asiasi atu le Atua le Tama Faalelagi ma le Alii o Iesu Keriso ma talanoa ma i la’ua.
Kenese 2:8–9; 3:8; Mose 3:8–9; Aperaamo 5:8, 14–19
E tasi le laau na le mafai ona la aia ae sa faatagaina i la’ua e aai i fua o laau uma. Afai la te aia le fua o le laau e iloa ai le lelei ma le leaga, o le a aveesea i la’ua mai le faatoaga ma o le a oti lava. Sa pepelo Satani ia Atamu ma Eva. Sa fai atu Satani afai la te aai i le fua o le laau, o le a la iloa le lelei ma le leaga ma o le a le oti i la’ua.
Kenese 2:16–17; 3:1–5; Mose 3:9; 4:6–11; Aperaamo 5:9, 12–13
Sa filifili Eva e ai le fua o le laau.
Sa tuuina atu e Eva se vaega o le fua o le laau ia Atamu. Na ia filifili foi e ai.
Sa asiasi atu le Atua ma le Alii ia i la’ua, ae na lalafi Atamu ma Eva ona ua fefefe. Na fesili atu le Atua pe na la aia le fua o le laau e iloa ai le lelei ma le leaga.
Sa ta’u atu e Atamu ma Eva i le Atua sa la filifili e ai le fua o le laau. Ona o la la’ua filifiliga, ua tatau ai ona tuua e Atamu ma Eva le Faatoaga o Etena. Sa vavaeeseina i la’ua mai le Atua, ae sa i ai Lana fuafuaga mo la’ua. Ua la iloa nei le lelei mai le leaga ma o le a maua ni fanau.
Sa folafola atu e Atamu ma Eva e usitai i poloaiga uma a le Atua. Sa faatonuina i latou e osi atu taulaga i manu. A o la usiusitai, sa la aoao atili e uiga i le Alo o le Atua o Iesu Keriso. Sa la’ua maua le fiafia tele ona o le a Ia fesoasoani i lo la aiga e toe foi atu i le Atua.