“Iosefa ma le Oge,” Tala o le Feagaiga Tuai (2022)
“Iosefa ma le Oge,” Tala o le Feagaiga Tuai
Iosefa ma le Oge
O le avanoa mo se uso e tuufaatasia ai lona aiga
Sa fiaaai le aiga o Iakopo ona o se oge. O lea na auina atu ai e Iakopo ona atalii i Aikupito e faatau ni meaai. Sa ia tuua lona atalii laitiiti, o Peniamina, i le fale. Sa fefe o ia nei oti Peniamina e pei o lona atalii o Iosefa i le tele o tausaga ua mavae. Na te lei iloa na faatau atu e ona atalii matutua ia Iosefa o se pologa.
E oo atu i le taimi lea, ua avea Iosefa o se taitai maoae i Aikupito. Sa nafa o ia ma le faatauina atu o meaai i le taimi o le oge. Sa feiloai le au uso ma Iosefa ma fesili atu ia te ia mo ni meaai. Latou te lei iloaina o ia.
Sa iloa e Iosefa i latou, ae sa ia faafoliga e le iloa i latou. Sa ia fesili atu e uiga i lo latou aiga e vaai pe o ola lona tama ma lona uso o Peniamina.
Ona avatu lea e Iosefa meaai i ona uso. Sa ia tau atu ia i latou e aua nei toe foi mai mo nisi meaai sei vagana ua latou aumaia lo latou uso laitiiti, o Peniamina, faatasi ma i latou.
Ina ua toe leai ni meaai a le aiga, sa iloa e Iakopo e tatau ona ia toe auina atu Peniamina ma isi ona atalii i Aikupito. Sa fefe pea Iakopo i le faatagaina o Peniamina e alu. Ae sa folafola atu e Iuta, o se tasi o uso, o le a ia tausia le saogalemu o Peniamina.
Ina ua toe foi atu le auuso i Aikupito, sa faia e Iosefa ia foliga mai na gaoi e Peniamina se ipu siliva. Sa manao o ia e vaai pe ua suia ona uso matutua. Sa aioi atu Iuta ia Iosefa e aua nei faasalaina Peniamina ae ia faasalaina Iuta.
Sa fiafia Iosefa i le vaai ua suia ona uso. Sa lava lo latou alolofa ia Peniamina e puipuia ai o ia. O lea la, mulimuli ane, sa ta‘u atu e Iosefa ia i latou po o ai o ia.
Sa faamagalo e Iosefa ona uso mo le faatauina atu o ia e avea ma pologa. Na fai atu Iosefa o le ala lea a le Alii e fesoasoani ai i lo latou aiga ia sao mai le oge.
Na toe foi uso o Iosefa i lo latou tama, o Iakopo, ma tau atu ia te ia mea uma na tutupu. Na siitia atu e Iakopo lona aiga atoa i Aikupito.
Sa faafeiloai e Farao le aiga o Iakopo. Sa ia avatu ia i latou fanua ma manu ina ia mafai ona tele a latou meaai. Sa nonofo le aiga o Iakopo i le filemu mo se taimi umi lava.