“Aperaamo ma Sara,” Tala o le Feagaiga Tuai (2022)
“Aperaamo ma Sara,” Tala o le Feagaiga Tuai
Kenese 11–15; 17; Aperaamo 1–2
Aperaamo ma Sara
O se folafolaga e faamanuia le aiga o tagata
Sa nofo Aperaamo i le aai o Uro. Sa mananao faitaulaga amioleaga e osi ia te ia le taulaga i o latou tupua. Na tatalo Aperaamo, ma sa laveaina o ia e le Alii.
Ona poloaiina lea e le Alii ia Aperaamo ma lana ava o Sara e tuua Uro ae malaga i se laueleele mamao atu. Na Ia folafola atu e faamanuia i la’ua i la la’ua malaga.
Sa faatuatuaina e Aperaamo ma Sara le Alii ma tuua loa Uro. Ae sa la lagona le faanoanoa ona sa le mafai ona la maua se fanau. Sa faamafanafanaina i laua e le Alii. Sa Ia folafola atu o le a la maua se tama.
Kenese 11:30–31; 15:1–6; 17:2–16; Aperaamo 2:6–9
Na tatalo Aperaamo i le Alii e aoao atili e uiga ia te Ia. Na asiasi mai le Alii ia Aperaamo ma ta’u mai o Ia lava o Ieova. Na osia e Ieova se feagaiga ma Aperaamo. Sa Ia folafola atu o le a maua e Aperaamo le perisitua. Na Ia folafola atu foi e ala mai i le aiga o Aperaamo, o le a faamanuiaina ai aiga uma i le laueleele.
A o malaga Aperaamo ma Sara, sa la manaomia le mauaina o ni meaai. Sa la’ua taumafai e nonofo i le nuu ua igoa ia Kanana. Sa leai se meaai iina, o lea sa tatau ai ona la o i Aikupito. Ae o le nonofo ai i Aikupito sa mata’utia mo i la’ua.
Kenese 12:10–20; Aperaamo 2:21–25
Ua tuua e Aperaamo ma Sara Aikupito ma toe foi atu e nonofo i Kanana. Sa latou aumaia meaai ma manu mai Aikupito. O Kanana o se vaega o le laueleele na folafola atu e le Alii ia i latou.
Kenese 13:1–4, 12; Aperaamo 2:19
Ma sa tausia foi e le Alii Lana folafolaga o le a maua e Aperaamo le perisitua. Sa feiloai Aperaamo ma Sara i se tasi aso ma le tupu amiotonu o lona igoa o Mekisateko Sa totogi atu e Aperaamo ia te ia le sefuluai.
Na maua e Aperaamo le perisitua mai ia Mekisateko. O le perisitua lava lea e tasi sa maua e perofeta o Atamu ma Noa.
Faaliliuga a Iosefa Samita, Kenese 14:36–40; Aperaamo 1:2–4; Mataupu Faavae ma Feagaiga 84:14
Sa fiafia Aperaamo ma Sara i Kanana, ae sa i ai pea le popole ona sa le’i maua lava se la tama. Ae ao ona la faatuatuaina le folafolaga a le Alii o le a i ai se aso o le a faatupuina lona aiga ma manuia ai le laueleele uma.