« ព្យាការីយ៉ូស្វេ » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« ព្យាការីយ៉ូស្វេ » ដំណើររឿងព្រះគម្ពីរសញ្ញាចាស់
ចោទិយកថា ១០; ៣១; ៣៤; យ៉ូសេ្វ ១; ៣–៦; ១០–១១; ២១; ២៤
ព្យាការីយ៉ូស្វេ
ការសាកល្បងចុងក្រោយមួយ មុនពេលចូលទៅកាន់ដែនដីសន្យា
ព្រះអម្ចាស់បានហៅយ៉ូស្វេឲ្យធ្វើជាព្យាការីថ្មី បន្ទាប់ពីព្យាការីម៉ូសេត្រូវបានយកឡើងទៅស្ថានសួគ៌ ។ ខណៈដែលពួកសាសន៍អ៊ីស្រាអែលបានបោះជំរំនៅក្បែរទន្លេយ័រដាន់ នោះព្រះអម្ចាស់បានមានបន្ទូលថា ដល់ពេលដែលពួកគេត្រូវចេញទៅដែនដីសន្យាហើយ ។
ចោទិយកថា ៣៤:១–៩; យ៉ូស្វេ ១:១–៤; អាលម៉ា ៤៥:១៩
ដែនដីសន្យាគឺនៅក្នុងស្រុកកាណាន ប៉ុន្ដែពួកមនុស្សទុច្ចរិតបានរស់នៅទីនោះ ។ ព្រះអម្ចាស់បានមានបន្ទូលឲ្យយ៉ូស្វេរឹងមាំឡើង និងមានសេចក្ដីក្លាហាន ។ ដោយមានជំនួយពីព្រះអម្ចាស់ នោះពួកសាសន៍អ៊ីស្រាអែលអាចដណ្ដើមយកដែនដីកាណានបាន ។
យ៉ូស្វេបានកេណ្ឌកងទ័ព ។ ព្រះអម្ចាស់បានមានបន្ទូលឲ្យពួកគេសែងបន្ទះថ្មក្រឹត្យវិន័យដប់ប្រការ និងព្រះគម្ពីរផ្សេងទៀត ។ ពួកសង្ឃបានសែងវត្ថុដ៏ពិសិដ្ឋទាំងនេះនៅក្នុងហិបមួយ ដែលហៅថាហិបនៃសេចក្តីសញ្ញា ។ បន្ទាប់មក កងទ័ពបានរៀបចំខ្លួនឆ្លងទន្លេយ័រដាន់ ។ ទន្លេនោះជ្រៅ ហើយហូរលឿនណាស់ ។
ចោទិយកថា ១០:៥; ៣១:២៥–២៦; យ៉ូស្វេ ១:១០–១១; ៣:១–១១
យ៉ូស្វេបានសន្យានឹងពួកសាសន៍អ៊ីស្រាអែលថា ព្រះអម្ចាស់នឹងជួយពួកគេឲ្យឆ្លងទន្លេនេះ ។
យ៉ូស្វេបានសូមឲ្យសង្ឃចំនួន ១២ នាក់លើកហិបនៃសេចក្ដីសញ្ញា ហើយដើរទៅក្នុងទឹកនោះ ។ នៅពេលដែលពួកសង្ឃបោះជំហានទៅក្នុងទន្លេភ្លាម នោះទឹកបានញែកចេញ ។
ពួកសាសន៍អ៊ីស្រាអែលបានឆ្លងទន្លេនោះនៅលើដីគោក ។ យ៉ូស្វេបានសូមឲ្យពួកសាសន៍អ៊ីស្រាអែលរើសថ្មចំនួន ១២ ពីដីគោកបាតទន្លេនោះ ។ លោកបានដាក់ថ្មទាំងនោះតម្រួតលើគ្នា ដើម្បីរំឭកពួកសាសន៍អ៊ីស្រាអែលពីអព្ភូតហេតុរបស់ព្រះអម្ចាស់នៅថ្ងៃនោះ ។
យ៉ូស្វេបានដឹកនាំកងទ័ពសាសន៍អ៊ីស្រាអែលទៅកាន់ដែនដីកាណាន ។ ពួកគេបានទៅដល់ទីក្រុងមួយដែលមានឈ្មោះថា ក្រុងយេរីខូរ ។ ទីក្រុងនោះរឹងមាំខ្លាំងណាស់ ហើយមានកំផែងយ៉ាងខ្ពស់ ។ ព្រះអម្ចាស់បានមានបន្ទូលប្រាប់យ៉ូស្វេ អំពីរបៀបច្បាំងដណ្ដើមយកទីក្រុងយេរីខូរ ។ ទ្រង់បានមានព្រះបន្ទូលថា ពួកសាសន៍អ៊ីស្រាអែលគួរតែដើរជាក្បួនជុំវិញទីក្រុងយេរីខូរជារៀងរាល់ថ្ងៃរយៈពេលប្រាំមួយថ្ងៃ ។ យ៉ូស្វេបានគោរពតាមព្រះអម្ចាស់ ។
យ៉ូស្វេបានប្រាប់ពួកសង្ឃឲ្យសែងហិបនៃសេចក្ដីសញ្ញាដើរនៅពីមុខពួកសាសន៍អ៊ីស្រាអែល ។ ជារៀងរាល់ថ្ងៃ កងទ័ពនោះបានដើរជាក្បួនជុំវិញទីក្រុងយេរីខូរ ហើយសង្ឃប្រាំពីរនាក់បានផ្លុំត្រែ ។ ពួកសាសន៍អ៊ីស្រាអែលដទៃទៀតទាំងប៉ុន្មានត្រូវនៅស្ងៀម ។
នៅថ្ងៃទីប្រាំពីរ កងទ័ពនោះបានដើរជាក្បួនជុំវិញទីក្រុងយេរីខូរចំនួនប្រាំពីរជុំ ។ នៅពេលពួកសង្ឃបានផ្លុំត្រែ នោះយ៉ូស្វេបានប្រាប់ពួកសាសន៍អ៊ីស្រាអែលឲ្យស្រែក ។ ស្រាប់តែភ្លាមនោះ កំផែងក្រុងយេរីខូរក៏បានរលំដួលទៅលើដី ហើយកងទ័ពរបស់យ៉ូស្វេបានវាយយកទីក្រុងនេះបាន ។
ព្រះអម្ចាស់បានជួយដល់ពួកសាសន៍អ៊ីស្រាអែល ដូចដែលទ្រង់បានសន្យា ។ កងទ័ពរបស់យ៉ូស្វេបានបន្ដច្បាំងដណ្ដើមយកដែនដីកាណាន ហើយពួកសាសន៍អ៊ីស្រាអែលបានចាប់ផ្ដើមរស់នៅទីនោះ ។ យ៉ូស្វេបានរំឭកពួកគេអំពីអព្ភូតហេតុ និងការសន្យារបស់ព្រះអម្ចាស់ ។ លោកបានសូមឲ្យពួកសាសន៍អ៊ីស្រាអែលជ្រើសរើសដើម្បីបម្រើដល់ព្រះអម្ចាស់ ។