« គ្រោះកាចនៅស្រុកអេស៊ីព្ទ » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« គ្រោះកាចនៅស្រុកអេស៊ីព្ទ » ដំណើររឿងព្រះគម្ពីរសញ្ញាចាស់
និក្ខមនំ ៤–៥; ៧–១២
គ្រោះកាចនៅស្រុកអេស៊ីព្ទ
ជម្រើសរបស់ស្តេចផារ៉ោនជំទាស់នឹងព្រះអម្ចាស់
ម៉ូសេ បានដាក់ទីទុកចិត្តលើព្រះអម្ចាស់ ហើយត្រឡប់ទៅស្រុកអេស៊ីព្ទវិញ ។ ម៉ូសេ និង អើរ៉ុន បងប្រុសរបស់លោកបានទៅគាល់ស្តេចផារ៉ោន ហើយបានទូលទ្រង់ឲ្យដោះលែងសាសន៍អ៊ីស្រាអែលឲ្យមានសេរីភាព និងចាកចេញពីស្រុកអេស៊ីព្ទ ។ ស្តេចផារ៉ោន បានខ្ញាល់ ហើយបានបដិសេធ ។ ទ្រង់ថែមទាំងបង្ខំឲ្យសាសន៍អ៊ីស្រាអែលធ្វើការកាន់តែខ្លាំងឡើងទៀតផង ។
ពីព្រោះ ស្តេចផារ៉ោន មិនបានស្តាប់តាមព្រះអម្ចាស់ នោះសាសន៍អេស៊ីព្ទ បានជួបគ្រោះកាចយ៉ាងខ្លាំង ។ ដំបូង ទឹកនៅស្រុកអេស៊ីព្ទទាំងអស់ប្រែទៅជាឈាម ។ ម៉ូសេ បានទូលទៅ ស្តេចផារ៉ោន ជាថ្មីម្តងទៀតឲ្យដោះលែងសាសន៍អ៊ីស្រាអែល ប៉ុន្តែ ស្តេចផារ៉ោន បានបដិសេធ ។
បន្ទាប់មក ព្រះអម្ចាស់បានធ្វើឲ្យមានសត្វកង្កែបពេញស្រុកអេស៊ីព្ទ ។ វាមានពាសពេញនៅគ្រប់ទីកន្លែងទាំងអស់ ។ ស្តេចផារ៉ោន មានបន្ទូលថានឹងដោះលែងសាសន៍អ៊ីស្រាអែលឲ្យចេញទៅ ប្រសិនបើសត្វកង្កែបបាត់អស់ ។ ព្រះអម្ចាស់បានដកយកសត្វកង្កែបទាំងអស់ចេញ ប៉ុន្តែ ស្តេចផារ៉ោន មិនដោះលែងសាសន៍អ៊ីស្រាអែលឲ្យចេញទៅទេ ។ បន្ទាប់មក ព្រះអម្ចាស់បានធ្វើឲ្យមានសត្វចៃ និង រុយ ។
បន្ទាប់មក សត្វពាហៈនៈក្នុងកសិដ្ឋានរបស់ពួកសាសន៍អេស៊ីព្ទទាំងអស់បានងាប់ ប៉ុន្តែសត្វពាហៈនៈរបស់សាសន៍អ៊ីស្រាអែលមិនបានងាប់ឡើយ ។ បន្ទាប់មក សាសន៍អេស៊ីព្ទបានឈឺចុកចាប់ពេញរាងកាយ ។
ខ្យល់ព្យុះព្រិល និងភ្លើងដ៏កំណាចក៏បានបោកបក់មកស្រុកអេស៊ីព្ទដែរ ។ ហេតុការណ៍នេះបណ្តាលឲ្យមានការខូចខាតយ៉ាងខ្លាំង ។
ស្តេចផារ៉ោន នៅតែមិនដោះលែងសាសន៍អ៊ីស្រាអែលឲ្យចេញទៅ ។ បន្ទាប់មក ព្រះអម្ចាស់បានធ្វើឲ្យមានសត្វកណ្តូបមក ហើយវាស៊ីអាហាររបស់ប្រជាជនទាំងអស់ ។
បន្ទាប់មក មានយប់ងងឹតរយៈពេលបីថ្ងៃ ។ នៅអំឡុងពេលនៃគ្រោះកាចទាំងនេះ ស្តេចផារ៉ោន បានសន្យាថានឹងដោះលែងសាសន៍អ៊ីស្រាអែលឲ្យចេញទៅ ប្រសិនបើគ្រោះកាចនេះនឹងឈប់ ប៉ុន្តែទ្រង់បានកុហកគ្រប់ពេល ។
បន្ទាប់ពីគ្រោះកាចចំនួនប្រាំបួនខុសៗគ្នាបានកើតឡើង ស្តេចផារ៉ោន នៅតែមិនដោះលែងសាសន៍អ៊ីស្រាអែលឲ្យទៅដដែល ។ ព្រះអម្ចាស់បានមានបន្ទូលប្រាប់ម៉ូសេថា គ្រោះកាចដ៏ខ្លាំងមួយទៀតនឹងកើតមាន ។ ព្រះអម្ចាស់បានដឹកនាំ និងការពារសាសន៍អ៊ីស្រាអែល នៅពេលដែលពួកគេរង់ចាំសម្រាប់សេរីភាពរបស់ពួកគេ ។