« អេលីយ៉ា និង ពួកសង្ឃព្រះបាល » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« អេលីយ៉ា និង ពួកសង្ឃព្រះបាល » ដំណើររឿងព្រះគម្ពីរសញ្ញាចាស់
ពង្សាវតារក្សត្រ ទី១ ១៨
អេលីយ៉ា និង ពួកសង្ឃព្រះបាល
ព្យាការីរបស់ព្រះអម្ចាស់ តទល់នឹងពួកសង្ឃក្លែងក្លាយ
នគរអ៊ីស្រាអែលបានបន្តរងទុក្ខដោយកង្វះទឹក ។ ស្តេច អ័ហាប់ បានមានបន្ទូលទៅប្រជារាស្រ្តឲ្យធ្វើតាមព្រះក្លែងក្លាយហៅថា ព្រះបាល ។
ពង្សាវតារក្សត្រ ទី ១ ១៨:១–២, ១៧–១៨
ព្រះអម្ចាស់បានបញ្ជូនអេលីយ៉ា ជាព្យាការីឲ្យទៅចូលគាល់ ស្តេច អ័ហាប់ ។ អេលីយ៉ា បានអញ្ជើញមនុស្សទាំងអស់ឲ្យឡើងទៅកំពូលភ្នំមួយ ។ លោកបានយាងស្តេច និងពួកសង្ឃរបស់ទ្រង់ឲ្យមើលការសាកល្បងថាតើព្រះអម្ចាស់ ឬព្រះបាលដែលជាព្រះពិតប្រាកដ ។
អេលីយ៉ា បានពន្យល់ពីការសាកល្បងនេះ ។ លោក និងពួកសង្ឃនឹងបូជាសត្វគោនៅលើអាសនា ប៉ុន្តែពួកលោកនឹងមិនបង្កាត់ភ្លើងដោយខ្លួនពួកលោកផ្ទាល់ឡើយ ។ ផ្ទុយទៅវិញ ពួកសង្ឃនឹងអធិស្ឋានទៅព្រះបាលដើម្បីឲ្យភ្លើងឆេះ ។ បន្ទាប់មក អេលីយ៉ានឹងអធិស្ឋានទៅកាន់ព្រះអម្ចាស់ដើម្បីបង្កាត់ភ្លើង ។ អេលីយ៉ាបានដឹងថា មានតែព្រះពិតប្រាកដប៉ុណ្ណោះទើបធ្វើឲ្យភ្លើងឆេះបាន ។
ពួកសង្ឃនៃព្រះបាលបានអធិស្ឋានទៅកាន់ព្រះរបស់ពួកគេតាំងពីព្រឹករហូតដល់ថ្ងៃត្រង់ ប៉ុន្តែគ្មានអ្វីបានកើតឡើងឡើយ ។ អេលីយ៉ាបានលេងសើចនឹងពួកបុរសទាំងនោះ ហើយបានពោលពាក្យថា ព្រះបាលរបស់ពួកគេប្រហែលជាដេកលក់ហើយ ។
ពួកសង្ឃខឹងយ៉ាងខ្លាំង បានលោតឡើងលើអាសនា ហើយបានស្រែកនៅល្ងាចនោះ ។ ពួកគេសង្ឃឹមថា ព្រះរបស់ពួកគេនឹងឆ្លើយតប ប៉ុន្តែភ្លើងនៅតែមិនឆេះ ។
បន្ទាប់មកក៏ដល់វេនរបស់អេលីយ៉ា ។ លោកបានធ្វើអាសនាថ្វាយដល់ព្រះអម្ចាស់ មានប្រឡាយព័ទ្ធជុំវិញអាសនា ហើយបានរៀបចំការបូជា ។
អេលីយ៉ា បានសុំប្រជាជនឲ្យដងទឹកពេញបួនធុង ហើយចាក់វានៅលើឈើដែលជាអាសនារបស់លោកចំនួនបីដង ។ ឈើ ហើយនិងអាសនាបានសើមទឹកជោគ ។ ទឹកបានពេញប្រឡាយទាំងមូល ។
អេលីយ៉ា បានអធិស្ឋានទៅកាន់ព្រះអម្ចាស់ដើម្បីបង្ហាញព្រះចេស្តាពិតប្រាកដរបស់ព្រះ ។ ភ្លើងរបស់ព្រះអម្ចាស់បានឆេះឡើង ហើយលេបយកការបូជា ទាំងឈើ ថ្ម និងទឹក ។ ប្រជាជនបានដឹងថា ព្រះរបស់អេលីយ៉ាគឺជាព្រះពិតប្រាកដ ។ អេលីយ៉ា បានអធិស្ឋានសូមឲ្យភាពរាំងស្ងួតនឹងបញ្ចប់ ហើយព្រះអម្ចាស់បានប្រទានទឹកភ្លៀងមក ។