« បុណ្យរំលង » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« បុណ្យរំលង » ដំណើររឿងព្រះគម្ពីរសញ្ញាចាស់
បុណ្យរំលង
ត្រូវបានការពារដោយព្រះអម្ចាស់
ផារ៉ោនមិនអនុញ្ញាតឲ្យពួកសាសន៍អ៊ីស្រាអែលមានសេរីភាពឡើយ ដូច្នេះព្រះអម្ចាស់បានមានបន្ទូលទៅម៉ូសេថា ទ្រង់នឹងបញ្ចូនគ្រោះកាចចុងក្រោយមួយ ។ កូនច្បងនៃគ្រួសារទាំងអស់នៅក្នុងដែនដីអេស៊ីព្ទនឹងត្រូវស្លាប់ សូម្បីតែកូនច្បងរបស់សត្វក៏ត្រូវស្លាប់ដែរ ។
ព្រះអម្ចាស់បានសន្យាថា ប្រសិនបើពួកសាសន៍អ៊ីស្រាអែលធ្វើតាមការណែនាំរបស់ទ្រង់ នោះគ្រោះកាចនេះនឹងរំលងហួសពួកគេ ហើយមិនធ្វើបាបពួកគេឡើយ ។
ព្រះអម្ចាស់បានមានបន្ទូលថា គ្រួសារសាសន៍អ៊ីស្រាអែលនីមួយៗត្រូវធ្វើពលិកម្មកូនចៀមឈ្មោលដ៏ល្អឥតខ្ចោះមួយ ហើយលាបឈាមកូនចៀមនោះនៅលើធ្នឹម និងក្របទ្វារផ្ទះរបស់ពួកគេ ។
ព្រះអម្ចាស់បានមានបន្ទូលឲ្យពួកសាសន៍អ៊ីស្រាអែលចម្អិនអាហារ ហើយបរិភោគសាច់ចៀមនោះឲ្យលឿន ។ ពេលពួកគេបរិភោគ នោះពួកគេគួរតែស្លៀកពាក់ឲ្យហើយ និងត្រៀមចាកចេញពីផ្ទះរបស់ពួកគេ ។ ព្រះអម្ចាស់បានមានបន្ទូលថា ប្រសិនបើពួកសាសន៍អ៊ីស្រាអែលធ្វើរឿងទាំងនេះ នោះកូនច្បងរបស់ពួកគេនឹងមានសុវត្ថិភាពពីគ្រោះកាចនេះ ។
ដូចជាអ្វីដែលព្រះអម្ចាស់បានព្រមាន នោះគ្រោះកាចបានមកដល់ ។ កូនច្បងនៅស្រុកអេស៊ីព្ទទាំងអស់បានស្លាប់ រួមទាំងបុត្រាច្បងរបស់ផារ៉ោនដែរ ។ ប៉ុន្ដែគ្រោះកាចនេះបានរំលងផ្ទះនីមួយៗ ដែលមានលាបឈាមរបស់កូនចៀមនៅលើធ្នឹម និងក្របទ្វារ ។ កូនច្បងរបស់ពួកសាសន៍អ៊ីស្រាអែលត្រូវបានសង្គ្រោះ ដោយសារពួកគេបានគោរពតាមព្រះអម្ចាស់ ។
នៅពេលផារ៉ោនបានឃើញបុត្រារបស់ទ្រង់ផ្ទាល់សុគតដោយសារតែគ្រោះកាចនេះ នោះទ្រង់បានប្រាប់ម៉ូសេ និងអើរ៉ុនឲ្យនាំពួកសាសន៍អ៊ីស្រាអែលទាំងអស់ចាកចេញពីស្រុកអេស៊ីព្ទ ។
ពួកសាសន៍អ៊ីស្រាអែលបានចាកចេញ ប៉ុន្ដែផារ៉ោនបានក្រោធព្រះទ័យ ។ ទ្រង់បានកេណ្ឌកងទ័ព និងរទេះចម្បាំងរបស់ទ្រង់ ហើយបានដេញតាមពួកសាសន៍អ៊ីស្រាអែល ។
ពួកសាសន៍អ៊ីស្រាអែលបានបោះជំរំនៅឯសមុទ្រក្រហម ។ មិនយូរប៉ុន្មាន ផារ៉ោន និងកងទ័ពរបស់ទ្រង់បានដេញតាមទាន់ពួកគេ ។ នៅពេលពួកសាសន៍អ៊ីស្រាអែលបានឃើញពួកសាសន៍អេស៊ីព្ទមក នោះពួកគេបានភ័យខ្លាច ។ ប៉ុន្ដែ ម៉ូសេបានប្រាប់ពួកសាសន៍អ៊ីស្រាអែលថា ព្រះអម្ចាស់នឹងការពារពួកគេ ។
នៅពេលពួកសាសន៍អេស៊ីព្ទមកដល់កាន់តែកៀក នោះព្រះអម្ចាស់បានមានបន្ទូលឲ្យម៉ូសេលើកដំបងរបស់លោកឡើង ។ ម៉ូសេបានធ្វើតាម ហើយព្រះអម្ចាស់បានញែកទឹកសមុទ្រ ។ ពួកសាសន៍អ៊ីស្រាអែលបានឆ្លងសមុទ្រនោះនៅលើដីគោក ។ ពួកគេបានរត់គេចពីផារ៉ោន និងកងទ័ពរបស់ទ្រង់ ។
កងទ័ពសាសន៍អេស៊ីព្ទបានដេញតាមពួកសាសន៍អ៊ីស្រាអែល ។ នៅពេលពួកសាសន៍អ៊ីស្រាអែលទាំងអស់មានសុវត្ថិភាពនៅម្ខាងទៀតនៃសមុទ្រហើយ នោះព្រះអម្ចាស់បានឲ្យទឹកធ្លាក់ចុះមកវិញ ។ កងទ័ពសាសន៍អេស៊ីព្ទបានលិចលង់នៅក្នុងសមុទ្រនោះ ។
នៅទីបំផុត ពួកសាសន៍អ៊ីស្រាអែលមានសេរីភាពវិញ ។ ពួកគេបានច្រៀងចម្រៀង រាំកម្សាន្ត និងអរព្រះគុណដល់ព្រះអម្ចាស់ ។ ពួកគេតែងតែចងចាំដល់បុណ្យរំលងជានិច្ច ជាពេលដែលព្រះអម្ចាស់បានសង្គ្រោះជីវិតរបស់ពួកគេ ហើយបានដឹកនាំពួកគេឲ្យចេញពីស្រុកអេស៊ីព្ទ ។