« សាំយូអែលជាព្យាការី » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« សាំយូអែលជាព្យាការី » ដំណើររឿងព្រះគម្ពីរសញ្ញាចាស់
សាំយូអែល ទី១ ២–៣
សាំយូអែលជាព្យាការី
ក្មេងប្រុសម្នាក់ត្រូវបានហៅដោយព្រះអម្ចាស់
អស់រយៈពេលជាយូរមកហើយ សាសន៏អ៊ីស្រាអែលមិនបានមានព្យាការីនៃព្រះអម្ចាស់ដើម្បីដឹកនាំពួកគេទេ ។ ផ្ទុយទៅវិញ ពួកចៅក្រមបានគ្រប់គ្រងនៅអ៊ីស្រាអែលអស់ជាច្រើនឆ្នាំ ។ នៅអំឡុងពេលនេះ ហាណា បាននាំកូនប្រុសតូចរបស់នាង សាំយូអែល ឲ្យទៅនៅជាមួយអេលី ដែលជាសង្ឃ និងជាចៅក្រមនៃអ៊ីស្រាអែល ។ សាំយូអែល បានជួយអេលីនៅក្នុងព្រះវិហារបរិសុទ្ធ ។
សាំយូអែល ទី១ ២:១១, ១៨, ២៦; ៣:១
កូនប្រុសរបស់ អេលី ពីរនាក់ក៏បានបម្រើនៅក្នុងព្រះវិហារបរិសុទ្ធផងដែរ ប៉ុន្តែពួកគេបានលួចដង្វាយដែលថ្វាយដល់ព្រះអម្ចាស់ ។ មានមនុស្សខ្លះបានមករអ៊ូប្រាប់អេលី ប៉ុន្តែ អេលី មិនបានដាក់ទោសពួកគេឡើយ ។
នៅល្ងាចមួយ សាំយូអែល បានឮសំឡេងហៅលោក ។ លោកស្មានថាតែជា អេលី ដូច្នេះ សាំយូអែល បានទៅជួបគាត់ ។ ប៉ុន្តែ អេលី មិនបានហៅលោកឡើយ ។ អេលី បានប្រាប់ទៅសាំយូអែល ឲ្យត្រឡប់ទៅសម្រាន្តវិញ ។
សាំយូអែល បានឮសំឡេងស្រែកហៅលោកជាលើកទីពីរ ។ លោកបានទៅជួបនឹង អេលី ហើយបានសួរថាតើ អេលីចង់បានអ្វី ។ ប៉ុន្តែ អេលី មិនបានហៅលោកឡើយ ។ អេលី បានប្រាប់ទៅសាំយូអែល ឲ្យត្រឡប់ទៅសម្រាន្តវិញ ។
សាំយូអែល បានឮសំឡេងហៅលោកជាលើកទីបី ។ លោកបានទៅជួបនឹង អេលី ម្តងទៀត ហើយបានសួរថាតើ អេលីចង់បានអ្វី ។ លើកនេះ អេលី បានដឹងថា សំឡេងហៅនោះគឺជាព្រះអម្ចាស់ ដែលបានមានបន្ទូលទៅកាន់ សាំយូអែល ។ អេលី បានប្រាប់ទៅសាំយូអែល ឲ្យត្រឡប់ទៅសម្រាន្តវិញ ។ អេលី បាននិយាយថាប្រសិនបើព្រះអម្ចាស់ហៅម្តងទៀត សាំយូអែល គួរតែស្តាប់ ។
សាំយូអែល បានឮសំឡេងហៅលោកម្តងទៀត ។ លើកនេះ សាំយូអែល បានទូលសួរទៅព្រះអម្ចាស់ឲ្យមានបន្ទូល ហើយថាលោកនឹងស្តាប់ ។ ព្រះអម្ចាស់បានមានបន្ទូលទៅសាំយូអែល ថាវាជារឿងខុសឆ្គងដែល អេលី ឲ្យកូនប្រុសទុច្ចរិតរបស់គាត់បម្រើនៅក្នុងព្រះវិហារបរិសុទ្ធ ។ ក្រុមគ្រួសារអេលី នឹងមិនអនុញ្ញាតឲ្យបម្រើនៅក្នុងព្រះវិហារបរិសុទ្ធទៀតនោះទេ ។
នៅថ្ងៃស្អែក អេលី បានសួរសាំយូអែល ពីអ្វីដែលព្រះអម្ចាស់បានមានបន្ទូល ។ សាំយូអែល បានប្រាប់គាត់ ។ អេលី បានដឹងថាព្រះអម្ចាស់បានមានបន្ទូលតាមរយៈ សាំយូអែល ។
ព័ត៌មាននេះបានលេចឮពេញដែនដីនៃអ៊ីស្រាអែល ។ ប្រជាជនបានដឹងថា ព្រះអម្ចាស់បានជ្រើសរើស សាំយូអែល ឲ្យធ្វើជាព្យាការីរបស់ទ្រង់ ។