« ហេណុកជាព្យាការី » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« ហេណុកជាព្យាការី » ដំណើររឿងព្រះគម្ពីរសញ្ញាចាស់
លោកុប្បត្តិ ៥; ម៉ូសេ ៦–៧
ហេណុកជាព្យាការី
របៀបដែលសេចក្តីជំនឿលើព្រះអម្ចាស់បានសង្រ្គោះទីក្រុងមួយ
ព្រះអម្ចាស់បានបង្គាប់ហេណុកឲ្យប្រាប់ទៅប្រជាជនឲ្យប្រែចិត្ត ។ ប៉ុន្តែហេណុកបានគិតថា លោកមិនពូកែនិយាយទេ ។ លោកខ្លាចថាប្រជាជននឹងមិនស្តាប់លោក ។
លោកុប្បត្តិ ៥:២២; ម៉ូសេ ៦:២៦–៣១
ព្រះអម្ចាស់បានសន្យាថានឹងពង្រឹង ហើយការពារហេណុក ទោះបីជាមានមនុស្សខ្លះមិនចូលចិត្តអ្វីដែលហេណុកបានបង្រៀនក៏ដោយ ។
សេចក្តីសន្យារបស់ព្រះអម្ចាស់បានប្រទានសេចក្តីក្លាហានដល់ហេណុក ។ ហេណុកបានគោរពតាមព្រះអម្ចាស់ ហើយបានបង្រៀនមនុស្សដោយព្រះចេស្តា ។ លោកបានបង្រៀនអំពីព្រះយេស៊ូវគ្រីស្ទ ការប្រែចិត្ត ពិធីបុណ្យជ្រមុជទឹក និងព្រះវិញ្ញាណបរិសុទ្ធ ។ មនុស្សមួយចំនួនបានជឿលើហេណុក ហើយចង់ធ្វើតាមព្រះអម្ចាស់ ។
ហេណុកមានសិទ្ធិអំណាចពីព្រះដើម្បីធ្វើបុណ្យជ្រមុជទឹក ។ មនុស្សទាំងអស់ដែលបានជឿលើហេណុក បានទទួលបុណ្យជ្រមុជទឹក ហើយខិតមកកាន់តែជិតព្រះអម្ចាស់ ។ គ្មាននរណាម្នាក់ក្រីក្រឡើយ ពីព្រោះពួកគេថែទាំគ្នាទៅវិញទៅមក ។ ពួកគេត្រូវបានហៅថា ស៊ីយ៉ូន ពីព្រោះពួកគេបានរស់នៅជាមួយគ្នានៅក្នុងសេចក្តីស្រឡាញ់ និងសេចក្តីសុចរិត ។
នៅថ្ងៃមួយ ព្រះអម្ចាស់បានបង្ហាញហេណុកនូវវិរណៈមួយពីអ្វីៗដែលនឹងកើតឡើងនៅលើផែនដីនេះ ។ ហេណុកបានឃើញជីវិតនេះ សេចក្តីស្លាប់ និងការមានព្រះជន្មរស់ឡើងវិញនៃព្រះយេស៊ូវគ្រីស្ទ ។ ហេណុកបានរៀនថា នៅក្នុងថ្ងៃចុងក្រោយ ដំណឹងល្អនឹងត្រូវបានស្តារឡើងវិញ ។ លោកក៏បានឃើញពីការយាងមកជាលើកទីពីររបស់ព្រះយេស៊ូវផងដែរ ។
នៅទីបំផុត មនុស្សទាំងអស់នៅក្នុងទីក្រុងស៊ីយ៉ូនបានជឿលើហេណុក និងបានប្រែចិត្ត ។ ពីព្រោះពួកគេបានថែទាំគ្នាទៅវិញទៅមក ហើយបានរស់នៅក្នុងសេចក្តីសុខសាន្ត នោះព្រះអម្ចាស់បានយកពួកគេទៅរស់នៅជាមួយទ្រង់ ។