« អំពីព្រះគម្ពីរសញ្ញាចាស់ » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« អំពីព្រះគម្ពីរសញ្ញាចាស់ » ដំណើររឿងព្រះគម្ពីរសញ្ញាចាស់
អំពីព្រះគម្ពីរសញ្ញាចាស់
ការសន្យារបស់ព្រះវរបិតាសួគ៌ចំពោះបុត្រាបុត្រីរបស់ទ្រង់តាំងពីយូរលង់មកហើយ
ផ្នែកដំបូងនៃព្រះគម្ពីរប៊ីបគឺជាព្រះគម្ពីរសញ្ញាចាស់ ។ បទគម្ពីរទាំងនេះត្រូវបានកត់ត្រាទុកជាយូរលង់ណាស់មកហើយ មុនពេលព្រះយេស៊ូវគ្រីស្ទបានប្រសូតមកទៅទៀត ។ វាមានដំណើររឿងជាច្រើន ដែលជួយយើងឲ្យមានសេចក្ដីជំនឿទៅលើទ្រង់ ។ វាបង្រៀនយើងថា បុគ្គលម្នាក់ៗនៅលើផែនដីនេះគឺជាផ្នែកមួយនៃគ្រួសាររបស់ព្រះវរបិតាសួគ៌ ហើយថាទ្រង់ស្រឡាញ់បុត្រាបុត្រីរបស់ទ្រង់ ។
ចោទិយកថា ៧:៧–៩; អេសាយ ៤៥:១០–១២
នៅក្នុងព្រះគម្ពីរសញ្ញាចាស់ ព្រះយេស៊ូវគ្រីស្ទត្រូវបានគេហៅថាព្រះយេហូវ៉ា ឬព្រះអម្ចាស់ ។ ទ្រង់ធ្វើតាមការណែនាំរបស់ព្រះវរបិតាសួគ៌ ។ តាំងពីជំនាន់របស់លោកអ័ដាម និងនាងអេវ៉ាមក ព្រះវរបិតាសួគ៌បានបញ្ជូនព្រះអម្ចាស់ព្រះយេស៊ូវគ្រីស្ទឲ្យមានបន្ទូលទៅកាន់ព្យាការីរបស់ទ្រង់ ។ ព្រះវរបិតាសួគ៌បញ្ជូនព្រះវិញ្ញាណបរិសុទ្ធមកជួយយើងឲ្យដឹងថា ពាក្យសម្ដីរបស់ព្យាការីគឺជាការពិត ។
និក្ខមនំ ៦:២–៣; របាក្សត្រ ទី២ ២០:២០; អេម៉ុស ៣:៧; ពេត្រុស ទី២ ១:២១; ម៉ូសេ ២:១
ព្រះអម្ចាស់បានសន្យានឹងព្យាការីអ័ប្រាហាំ និងភរិយារបស់លោក សារ៉ាយ ថា គ្រួសាររបស់ពួកលោកនឹងមានចំនួនច្រើនឡើង ហើយផ្ដល់ពរជ័យដល់ផែនដីទាំងមូល ។ ចៅប្រុសរបស់ពួកលោក យ៉ាកុប បានមានគ្រួសារដ៏ធំមួយដែលក្លាយជាប្រជាជាតិមួយ ។ ពួកគេត្រូវបានហៅថាជាវង្សអ៊ីស្រាអែល ឬពួកសាសន៍អ៊ីស្រាអែល ។ ព្យាការីបានបង្រៀនពួកគេឲ្យទន្ទឹងរង់ចាំពេលដែលព្រះយេស៊ូវគ្រីស្ទនឹងយាងមក ។
លោកុប្បត្តិ ១៥:៥–៦; ១៧:១–៨; ចោទិយកថា ១៨:១៥; អេសាយ ៧:១៤
ដំណើររឿងជាច្រើននៅក្នុងព្រះគម្ពីរសញ្ញាចាស់បង្ហាញពីរបៀប ដែលព្រះអម្ចាស់បានរក្សាការសន្យារបស់ទ្រង់ជាមួយនឹងពួកសាសន៍អ៊ីស្រាអែល ។
លោកុប្បត្តិ ៩:១៣–១៧; យេរេមា ១១:៤–៥; ហេព្រើរ ១១:១–៣៥
នៅពេលដែលពួកសាសន៍អ៊ីស្រាអែលបានស្ដាប់តាមព្យាការី ហើយកាន់តាមបទបញ្ញត្តិទាំងឡាយ នោះព្រះអម្ចាស់បានជួយដល់ពួកគេ ។ នៅពេលពួកគេមិនគោរពតាមទេ នោះទ្រង់មិនអាចជួយពួកគេបានទេ ។
ចោទិយកថា ១១:២៦–២៨; យ៉ូប ៣៦:១១–១២
ប្អូនៗគឺជាផ្នែកមួយនៃគ្រួសាររបស់ព្រះវរបិតាសួគ៌ ។ ព្រះវរបិតាសួគ៌មានព្រះទ័យល្អ ហើយទ្រង់ស្រឡាញ់ប្អូនៗ ។ ទ្រង់មានផែនការមួយសម្រាប់ប្អូនៗ ។ ដោយសារតែព្រះអម្ចាស់ព្រះយេស៊ូវគ្រីស្ទ នោះប្អូនៗអាចត្រឡប់ទៅរស់នៅជាមួយនឹងព្រះវរបិតាសួគ៌ម្ដងទៀតបាន ។ គឺដូចជាអ្វីដែលពួកសាសន៍អ៊ីស្រាអែលត្រូវបានបង្រៀនដែរ នោះប្អូនៗអាចជ្រើសរើសដើម្បីមានសេចក្តីជំនឿនៅលើព្រះអម្ចាស់ និងកាន់តាមបទបញ្ញត្តិទាំងឡាយរបស់ទ្រង់ ។