« ព្យាការីយេរេមា » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« ព្យាការីយេរេមា » ដំណើររឿងព្រះគម្ពីរសញ្ញាចាស់
ព្យាការីយេរេមា
ត្រូវបានហៅពីមុនកំណើតរបស់លោក
យេរេមាបានរស់នៅក្នុងក្រុងយេរូសាឡិម នៅពេលលោកនៅក្មេង ។ ថ្ងៃមួយ ព្រះអម្ចាស់បានយាងមកឯយេរេមា ហើយបានហៅលោកឲ្យធ្វើជាព្យាការី ។ ព្រះអម្ចាស់បានមានបន្ទូលទៅយេរេមាថា លោកត្រូវបានជ្រើសរើសឲ្យធ្វើជាព្យាការី ពីមុនលោកបានចាប់កំណើតមកម្ល៉េះ ។ ព្រះអម្ចាស់បានជ្រាបថា ជីវិតរបស់យេរេមានឹងពិបាក ។ ប៉ុន្តែ ទ្រង់បានសន្យានឹងយេរេមាថា ទ្រង់នឹងគង់នៅជាមួយយេរេមាជានិច្ច ។
ប្រជាជននៅក្រុងយេរូសាឡិមមិនបានរក្សាសេចក្ដីសន្យារបស់ពួកគេជាមួយនឹងព្រះអម្ចាស់ឡើយ ។ ដោយសារតែអំពើទុច្ចរិតរបស់ពួកគេ នោះយេរេមាបានព្រមានប្រជាជនថា ពួកគេនឹងត្រូវគេវាយបង្ក្រាប ។ ព្រះអម្ចាស់បានមានបន្ទូលថា ប្រសិនបើពួកគេរក្សាថ្ងៃឈប់សម្រាកឲ្យបរិសុទ្ធ នោះទីក្រុងយេរូសាឡិមនឹងមិនត្រូវបំផ្លាញឡើយ ។ ប៉ុន្ដែ ប្រជាជនមិនស្ដាប់នោះទេ ។
យេរេមាបានបង្រៀនប្រជាជនអស់រយៈពេលជាច្រើនឆ្នាំ ។ ប៉ុន្ដែ ពួកគេមិនបានប្រែចិត្តឡើយ ។ ផ្ទុយទៅវិញ ពួកគេបានធ្វើឲ្យយេរេមាឈឺចាប់ ហើយបានចាប់លោកដាក់គុក ។
យេរេមា ២០:២; ២៦:៨–៩; ៣៧:១៥–១៨; ៣៨:៦
យេរេមាស្រឡាញ់ប្រជាជននេះណាស់ ។ លោកបានយំសោកដោយសារតែអំពើបាបរបស់ពួកគេ ។ គឺដូចជាអ្វីដែលលោកបាននិយាយ ក្រុងយេរូសាឡិមត្រូវបានបំផ្លាញ ហើយប្រជាជនត្រូវគេចាប់ជាឈ្លើយ ។
យេរេមា ៩:១–៨; ២៥:៩–១២; ៥២:១–១០
យេរេមាត្រូវបានគេនាំយកទៅស្រុកអេស៊ីព្ទ ។ ព្រះអម្ចាស់បានមានបន្ទូលឲ្យលោកកត់ត្រានូវការព្យាកររបស់លោកទុក ។ យេរេមាបានគោរពតាមព្រះអម្ចាស់ ទោះបីជានៅពេលពិបាកក្ដី ។ លោកបានបន្ដប្រាប់ប្រជាជនរបស់លោក ឲ្យរក្សាការសន្យារបស់ពួកគេជាមួយនឹងព្រះអម្ចាស់ ។