« ហោរាស្រី ដេបូរ៉ា » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« ហោរាស្រី ដេបូរ៉ា » ដំណើររឿងព្រះគម្ពីរសញ្ញាចាស់
ហោរាស្រី ដេបូរ៉ា
អ្នកដឹកនាំដែលបានជួយអ៊ីស្រាអែលឲ្យទុកចិត្តលើព្រះអម្ចាស់
ដេបូរ៉ា គឺជាហោរាស្រីម្នាក់ ជាអ្នកដឹកនាំដ៏ស្មោះត្រង់ម្នាក់ដែលត្រូវបានបំផុសគំនិតដោយព្រះអម្ចាស់ ។ ប្រជាជនរបស់នាងបានឈប់កាន់តាមបទបញ្ញត្តិទាំងឡាយរបស់ព្រះអម្ចាស់ ហើយពួកសាសន៍កាណានបានគ្រប់គ្រងលើពួកគេ ។ ម្ភៃឆ្នាំក្រោយមក ពួកសាសន៍អ៊ីស្រាអែលបានចាប់ផ្ដើមអធិស្ឋានសូមជំនួយពីព្រះអម្ចាស់ ។
ព្រះអម្ចាស់បានស្តាប់ឮការអធិស្ឋានរបស់ពួកគេ ។ ទ្រង់បានមានបន្ទូលឲ្យ ដេបូរ៉ា កេណ្ឌកងទ័ពអ៊ីស្រាអែល ដើម្បីប្រយុទ្ធប្រឆាំងនឹងពួកសាសន៍កាណាន ។
កងទ័ពសាសន៍កាណានមានទាហាន និងរទេះចម្បាំងជាច្រើន ។ ការណ៍នេះធ្វើឲ្យកងទ័ពសាសន៍អ៊ីស្រាអែលភ័យខ្លាច ប៉ុន្ដែដេបូរ៉ា មិនខ្លាចសោះឡើយ ។ នាងបានដឹងថា ព្រះអម្ចាស់នឹងជួយពួកគេ ។
បារ៉ាក គឺជាមេទ័ពនៃកងទ័ពអ៊ីស្រាអែល ។ គាត់មិនចង់ទៅច្បាំងឡើយ ។ ប៉ុន្ដែគាត់បានគិតថា ប្រសិនបើ ដេបូរ៉ា ទៅជាមួយនឹងកងទ័ព នោះព្រះអម្ចាស់នឹងការពារពួកគាត់ ។ ដេបូរ៉ា បានយល់ព្រមទៅជាមួយ ។ នាងបានព្យាករថា ស្ដ្រីម្នាក់នឹងបង្ក្រាប ស៊ីសេរ៉ា ដែលជាមេទ័ពសាសន៍កាណាន ។
កងទ័ពសាសន៍អ៊ីស្រាអែលបានប្រមូលផ្ដុំគ្នានៅលើភ្នំមួយ ហើយទ័ពសាសន៍កាណានប្រមូលផ្ដុំគ្នានៅឯជ្រលងភ្នំ ។ ដេបូរ៉ា បានប្រាប់ឲ្យ បារ៉ាក ចុះពីលើភ្នំ ។ នាងបានសន្យាថា ព្រះអម្ចាស់នឹងគង់នៅជាមួយនឹងពួកគេ ។
ព្រះអម្ចាស់បានបញ្ជូនភ្លៀងមក ហើយរទេះចម្បាំងរបស់ពួកសាសន៍កាណានត្រូវលិចលង់នៅក្នុងទឹក ។ ពួកសាសន៍កាណានជាច្រើនបានលង់ទឹកទន្លេនោះ ប៉ុន្ដែ ស៊ីសេរ៉ា បានរត់គេចខ្លួន ។
ពួកចៅហ្វាយ ៤:១៥, ១៧; ៥:៤–៥, ១៩–២២
ស្ដ្រីម្នាក់ឈ្មោះ យ៉ាអែល បានរស់នៅក្នុងត្រសាលមួយនៅក្បែរនោះ ។ នាងបានឃើញ ស៊ីសេរ៉ាកំពុងរត់ ហើយបានប្រាប់គាត់ឲ្យទៅលាក់ខ្លួននៅក្នុងត្រសាលរបស់នាង ។ យ៉ាអែល បានដឹងថា គាត់គឺជាមេទ័ពសាសន៍កាណាន ហើយនាងបានសម្លាប់គាត់ ដើម្បីកុំឲ្យគាត់ទៅធ្វើបាបមនុស្សជាច្រើនទៀត ។
ការព្យាកររបស់ ដេបូរ៉ា បានក្លាយជាការពិត ។ ស៊ីសេរ៉ា ត្រូវបានបង្ក្រាបដោយវីរនារីម្នាក់ ។ ដេបូរ៉ា បានច្រៀងចម្រៀងមួយបទ ដើម្បីជួយពួកសាសន៍អ៊ីស្រាអែលឲ្យចងចាំពីរបៀបដែលព្រះអម្ចាស់បានសង្គ្រោះពួកគេ ។ ពួកសាសន៍អ៊ីស្រាអែលបានកាន់តាមបទបញ្ញត្តិទាំងឡាយ ហើយបានរស់នៅក្នុងសេចក្ដីសុខសាន្ដអស់រយៈពេល ៤០ ឆ្នាំ ។