“U-Enoke umPhrofethi,” Izindaba zeTestamente eliDala (2022)
“U-Enoke umPhrofethi,” Izindaba zeTestamente eliDala
UGenesise 5; uMose 6–7
U-Enoke umPhrofethi
Ukusindiswa kwedolobha ngokholo eNkosini
INkosi uJesu Kristu yacela u-Enoke ukuthi atshele abantu ukuba baphenduke. Kodwa u-Enoke wayecabanga ukuthi wayengakakwazi ukukhuluma kahle. Wayesaba ukuthi abantu babengeke bamlalele.
INkosi yethembisa ukumqinisa futhi imvikele u-Enoke yize abantu babengakuthandi ayekufundisa.
Isethembiso seNkosi sanika u-Enoke amandla. U-Enoke wayilalela iNkosi futhi wafundisa abantu ngamandla. Wafundisa ngoJesu Kristu, ukuphenduka, umbhabhadiso, kanye noMoya oNgcwele. Abanye abantu bamkholwa u-Enoke futhi bafuna ukuyilandela iNkosi.
U-Enoke wayenegunya elivela kuNkulunkulu lokubhabhadisa. Bonke abantu ababemkholwa u-Enoke babhabhadiswa futhi basondela eNkosini. Akekho owayehlupheka ngoba babenakekelana. Babebizwa ngokuthi iSiyoni ngoba babehlalisene ngothando nangokulunga.
Ngolunye usuku iNkosi yatshengisa u-Enoke umbono wakho konke okwakuyokwenzeka emhlabeni. U-Enoke wabona impilo, ukufa, noVuko kukaJesu Kristu. U-Enoke wafunda ukuthi ngezinsuku zokugcina ivangeli liyobuyiselwa. Wabona futhi ukuZa kwesiBili kukaJesu.
Ngokuhamba kwesikhathi, bonke abantu bedolobha leSiyoni bamkholwa u-Enoke futhi baphenduka. Ngenxa yokuthi babenakekelana futhi behlalisene ngokuthula, iNkosi yabathatha ukuba bayohlala Nayo.