Kapitulo 9
Ang Batang Jesus
Si Jesus midako sa siyudad sa Nazaret. Siya nakakat-on og daghang mga butang ug nahimong “kusgan, … ug ang grasya sa Dios diha kaniya.”
Sa dihang si Jesus nag-edad og 12, Siya mikuyog ni Jose ug ni Maria uban sa grupo sa mga tawo alang sa usa ka kasaulogan didto sa Jerusalem. Didto sila sulod sa pipila ka mga adlaw.
Sa dihang si Jose ug si Maria namauli na, sila nagtuo nga si Jesus mikuyog og balik sa Nazaret uban sa Iyang mga higala. Apan si Jesus nagpabilin sa Jerusalem.
Sa dihang si Jose ug si Maria nangita kang Jesus, sila wala makakita Kaniya. Walay usa diha sa ilang grupo ang nakakita Kaniya. Mao nga si Jose ug si Maria mibalik sa Jerusalem. Ilang gipangita si Jesus sulod sa tulo ka adlaw. Sila naguol kaayo.
Sa katapusan ilang nakit-an si Jesus didto sa templo, nakig-istorya sa pipila ka mga magtutudlo. Siya nagtubag sa ilang mga pangutana. Ang mga magtutudlo nahibulong sa kadaghan sa nahibaloan ni Jesus.
Si Maria misulti kang Jesus nga siya ug si Jose nabalaka kaayo mahitungod Kaniya. Si Jesus mitubag nga Siya naghimo sa buhat sa Iyang Amahan—buhat sa Dios. Si Jose ug si Maria wala makasabut.
Si Jesus mipauli sa Nazaret uban ni Jose ug ni Maria ug mituman kanila.
Si Jesus nakakat-on pa og dugang mahitungod sa buhat sa Iyang Langitnong Amahan.
Siya nagdako nga taas ug kusgan.
Ang mga tawo nahigugma Kaniya. Iyang gibuhat ang unsay gusto sa Dios nga Iyang buhaton.
Ang Dios nahigugma Kaniya.