Kapitulo 34
Ang Batang Lalaki nga may Dautang Espiritu
Usa ka adlaw niana usa ka tawo mihangyo sa Manluluwas nga tabangan ang iyang anak nga lalaki. Ang batang lalaki adunay dautang espiritu diha kaniya. Ang mga disipulo misulay na sa pag-ayo sa iyang anak nga lalaki, apan sila wala makahimo.
Gipadala ni Jesus sa tawo ang iyang anak nga lalaki ngadto Kaniya. Pag-abut sa batang lalaki, ang dautang espiritu mipatumba kaniya sa yuta.
Ang Manluluwas nangutana kon unsa na kadugay diha sa batang lalaki ang dautang espiritu. Ang amahan miingon nga anaa na kini kaniya sukad sa gamay pa siyang bata.
Si Jesus miingon nga Siya makaayo sa anak nga lalaki kon ang amahan adunay hugot nga pagtuo. Ang amahan misugod sa paghilak. Siya miingon nga siya adunay hugot nga pagtuo. Apan siya mihangyo kang Jesus sa pagtabang kaniya nga makabaton og labaw pa nga hugot nga pagtuo.
Gimandoan ni Jesus ang dautang espiritu sa paggawas gikan sa batang lalaki ug dili na gayud mobalik kaniya og usab. Ang dautang espiritu nasuko. Gipasakitan niini og usab ang batang lalaki. Dayon misunod kini kang Jesus ug mibiya.
Ang batang lalaki hilum kaayo nga daghang mga tawo ang miingon nga patay na siya. Apan gigunitan ni Jesus ang iyang kamot ug gitabangan siya nga mobarug. Naayo ang batang lalaki. Ang dautang espiritu wala na.
Pagkataud-taud ang mga disipulo nangutana kang Jesus kon nganong wala sila makahimo sa pagpapahawa sa dautang espiritu diha sa batang lalaki. Si Jesus miingon kanila nga usahay kinahanglan sila nga magpuasa ug mag-ampo aron mamaayo ang usa ka tawo.