Kapitulo 57
Dautang mga Tawo Mipatay kang Esteban
Mao kini ang nakapasuko sa daghang mga pangulo sa mga Judeo. Ilang gibilanggo si Pedro ug si Juan. Gipapatay ni Hari Herodes Agripa si Apostol Santiago.
Ang mga Apostoles mitawag og pito ka tawo aron motabang sa pagpangulo sa Simbahan. Ang usa mao ang matarung nga tawo nga ginganlan og Esteban. Iyang gitudlo ang ebanghelyo ngadto sa daghang mga tawo. Ang pipila ka dautang mga tawo namakak ug miingon nga si Esteban namulong batok sa balaod sa Judeo. Sila midakop kaniya aron pagahusayon sa mga pangulo sa Judeo.
Si Esteban misulti sa mga pangulo nga sila mga dautan. Siya miingon nga ilang gipatay si Jesukristo, ang Anak sa Dios.
Dayon si Esteban mihangad sa langit ug nakakita sa Langitnong Amahan ug ni Jesukristo. Sa dihang iyang gisultihan ang mga pangulo sa unsay iyang nakita, sila nasuko kaayo.
Ilang gidala si Esteban sa gawas sa siyudad aron siya patyon pinaagi sa paglabay og mga bato kaniya. Ilang gipahiluna ang ilang mga saput diha sa tiilan sa usa ka batan-ong lalaki nga ginganlan og Saulo. Samtang si Esteban himatyon , siya mihangyo sa Dios sa pagdala sa iyang espiritu ngadto sa langit. Siya mihangyo usab sa Dios nga pasayloon kadtong kinsa mipatay kaniya. Dayon siya namatay.