Kapitulo 18
Jesus Mipili sa Iyang mga Apostoles
Si Pedro ug ang iyang mga higala nangisda sa tibuok gabii nga wala makakuha og bisan unsa nga isda. Human sa pagtudlo ni Jesus, Siya misugo kang Pedro sa pagdala sa sakayan ngadto sa lawod. Dayon Iyang gisugo si Pedro ug ang iyang mga higala nga itaktak ang ilang mga pukot ngadto sa tubig.
Sila nakakuha og daghan kaayong isda nga ang ilang mga pukot nagsugod og kagisi.
Gitawag ni Pedro ang iyang mga higala nga didto sa laing sakayan sa pagduol ug pagtabang . Puno kaayo sa isda ang duha ka mga sakayan nga nagsugod sila og kaunlod.
Si Pedro ug ang iyang mga higala nahibulong. Sila nasayud nga si Jesukristo ang nagbuhat nga mahitabo kini.
Si Pedro miluhod sa tiilan sa Manluluwas. Siya miingon nga dili siya angayan nga maduol kang Jesus. Si Jesus miingon kang Pedro nga dili mahadlok.
Duha sa mga higala ni Pedro, si Santiago ug si Juan, managsuon. Si Jesus miingon ni Pedro, Santiago, ug Juan sa pagsunod Kaniya ug mahimo nga “mga mangingisda og tawo.” Gibiyaan sa mga lalaki ang tanan nilang butang ug mikuyog kang Jesus. Ang Manluluwas mihangyo usab sa uban pa nga mga tawo sa pagkuyog Kaniya.
Si Jesus mipili og napulog duha ka mga Apostoles aron mangulo sa Iyang Simbahan. Siya nag-ampo sa tibuok gabii aron makapili Siya og matarung nga mga lalaki. Pagkasunod buntag Siya mipili ug mi-orden sa napulog duha ka mga lalaki, naghatag kanila sa priesthood ug sa awtoridad nga mahimong mga Apostoles.
Ang mga Apostoles mibiyahe ngadto sa daghan nga mga siyudad. Ilang gitudlo ang ebanghelyo ug giayo ang mga tawo. Sila mipauli aron sa pagsulti kang Jesus unsay ilang nahimo.