Kapitulo 11
Jesus Gitintal
Si Jesus miadto sa kamingawan aron makig-uban sa Dios. Ang Manluluwas nakigsulti sa Langitnong Amahan. Siya wala mokaon og bisan unsa sulod sa 40 ka adlaw tungod kay nagpuasa Siya.
Ang yawa miduol ug mitintal kang Jesus sa pagmatuod nga Siya Anak sa Dios. Una, siya miingon kang Jesus nga himoong pan ang pipila ka bato. Si Jesus gigutom, apan Siya nasayud nga gamiton lamang Niya ang Iyang gahum sa pagtabang sa ubang mga tawo. Wala Niya buhata ang giingon sa yawa.
Mateo 4:2–4; Jesus the Christ, 128–29
Sunod ang Espiritu Santo midala kang Jesus ngadto sa usa ka taas nga dapit sa templo. Ang yawa mitintal ni Jesus sa ikaduhang higayon, nagsulti Kaniya sa pag-ambak gikan sa templo. Ang yawa miingon nga kon si Jesus mao ang Anak sa Dios, ang mga anghel dili motugot nga masakitan Siya. Si Jesus wala moambak. Siya nasayud nga sayop ang paggamit sa Iyang sagrado nga gahum niini nga paagi.
Dayon ang Espiritu Santo midala kang Jesus ngadto sa tumoy sa bukid. Iyang gipakita kang Jesus ang tanan nga mga gingharian ug mga bahandi sa kalibutan. Ang yawa miingon kang Jesus nga Siya makaangkon sa tanan niining mga butanga kon Siya mosunod kaniya. Si Jesus miingon nga Siya mosunod lamang sa Langitnong Amahan. Siya misulti sa yawa sa pagpahawa. Ang yawa mibiya. Ang mga anghel miabut ug mipanalangin kang Jesus. Si Jesus andam na nga magsugod sa Iyang buhat.