Kapitulo 14
Nicodemo
Si Nicodemo sakop sa usa ka grupo sa mga Judeo nga gitawag og mga Pariseo. Siya usa usab ka tigmando sa mga Judeo. Daghang mga Pariseo ang wala motuo nga si Jesukristo gipadala sa Dios. Apan si Nicodemo mituo tungod sa mga milagro nga gibuhat ni Jesus.
Si Nicodemo miabut aron makig-istorya sa Manluluwas usa ka gabii niana. Si Jesus misulti kaniya nga walay usa nga makasulod sa gingharian sa Dios kon dili ipakatawo pag-usab.
Si Nicodemo wala makasabut. Sa unsa nga paagi nga ang usa ka tawo ipakatawo pag-usab? Ang Manluluwas mipasabut nga Siya nagsulti mahitungod sa espirituhanon nga mga butang. Aron matawo pag-usab, ang usa ka tawo kinahanglan gayud nga mabunyagan sa tubig ug modawat sa Espiritu Santo.
Si Jesus mipasabut nga gipadala Siya dinhi sa yuta aron sa pagtabang kanatong tanan nga makabalik ngadto sa Langitnong Amahan. Siya miingon nga Siya mag-antus alang sa atong mga sala ug mamatay sa krus aron kita makabaton og kinabuhing dayon.
Siya miingon nga kita kinahanglan nga motuo Kaniya ug mopili sa matarung. Kon atong buhaton unsay matarung, kita makapuyo sa kahangturan sa gingharian sa Dios.