Human sa Bag-ong Tugon
Ang mga pangulo sa Simbahan naningkamot og maayo sa pagtudlo sa mga tawo mahitungod ni Jesukristo. Sila mibisita sa mga Santos ug misulat kanila. Ang mga tawo sa daghang mga dapit mipasakop sa Simbahan. Ang dautang mga tawo dili gusto nga ang mga tawo motuo kang Jesukristo.
Ang dautang mga tawo gusto nga mousab sa mga sugo. Ang uban nga mga Santos naminaw kanila. Daghan ang wala na motuo ni Jesus ug wala na mosunod sa Iyang mga sugo.
Ang mga Apostoles ug daghang mga Santos gipamatay. Wala nay nahabilin nga modumala sa Simbahan. Ang mga yawe sa priesthood gikuha gikan sa yuta. Wala nay mga propeta nga mogiya sa mga tawo. Ang Simbahan ni Jesukristo wala na dinhi sa yuta. Ang mga Apostoles nga si Pedro ug si Pablo miingon nga kini mahitabo gayud.
Mateo 23:34; 24:8–10; Mga Taga-Roma 8:36; 1 Mga Taga-Corinto 4:9–13; 1 Pedro 4:12; Jesus the Christ, 745–46
Gatusan ka mga katuigan ang milabay. Aduna nay nagkalain-lain nga mga simbahan. Walay usa niini ang adunay mga Apostoles o priesthood sa Dios. Wala diha sa mga simbahan ang Simbahan ni Jesukristo. Apan ang mga propeta miingon nga human sa daghang mga katuigan ang Simbahan ni Jesukristo mobalik og usab dinhi sa yuta.
Niadtong 1820 usa ka batang lalaki nga ginganlan og Joseph Smith gusto nga masayud kon hain nga simbahan ang Simbahan ni Jesukristo. Miadto siya sa kakahoyan duol sa iyang panimalay ug nag-ampo. Nangayo siya sa Dios nga sultihan siya hain nga simbahan ang husto .
Ang Langitnong Amahan ug si Jesukristo mipakita kang Joseph Smith. Ang Manluluwas misulti kang Joseph nga dili mopasakop sa bisan unsa nga simbahan tungod kay wala niini ang Iyang Simbahan.
Ang Dios mipili nga pinaagi ni Joseph Smith mahibalik og usab ang Simbahan ni Jesukristo dinhi sa yuta. Ang Dios mipadala og mga anghel aron paghatag ni Joseph Smith sa priesthood. Siya mitabang kang Joseph sa paghubad sa Basahon ni Mormon. Pagka Abril 6, 1830, ang Simbahan ni Jesukristo natukod og usab dinhi sa yuta.
Sama nga si Jesus mipili og Napulog Duha ka mga Apostoles sa dihang dinhi pa Siya sa yuta, ang Dios mitabang kang Joseph Smith sa pagpili og Napulog Duha ka mga Apostoles nga motabang kaniya sa pagpangulo sa Simbahan. Kining mga tawhana gihatagan og gahum sa pagtudlo sa ebanghelyo ug sa paghimo og mga milagro.
Si Jesus gusto nga ang tanan masayud mahitungod sa Iyang Simbahan. Iyang gisugo si Joseph Smith nga magpadala og mga misyonaryo aron motudlo sa tanang mga katawhan mahitungod sa Ang Simbahan ni Jesukristo sa mga Santos sa Ulahing mga Adlaw.
Ang Simbahan ni Jesukristo sa mga Santos sa Ulahing mga Adlaw mao gihapon ang simbahan nga gitukod ni Jesus sa dihang mipuyo pa Siya dinhi sa yuta.