Kapitulo 50
Uban pang mga Pagtulun-an sa Katapusang Panihapon
Siya miingon nga kon ang mga Apostoles nahigugma Kaniya, sila motuman sa Iyang mga sugo. Siya misaad kanila sa gasa sa Espiritu Santo. Ang Espiritu Santo motudlo kanila sa tanan nga gikinahanglan nila nga masayran. Ang Espiritu Santo motabang sa mga Apostoles nga mahinumduman ang mga butang nga gitudlo ni Jesus kanila.
Si Jesus miingon nga Siya sama sa usa ka tanom nga parras. Ang Iyang mga disipulo sama sa mga sanga sa tanom nga parras. Ang sanga lamang nga lig-ong nakakupot ngadto sa tanom ang makapamunga og maayong mga bunga.
Si Jesus misaad sa Iyang mga Apostoles nga kon sila mosunod sa ebanghelyo, ang ilang bunga (ilang mga buhat) mahimo nga maayo. Kon sila dili mosunod Kaniya, sila mahisama sa mga sanga nga giputol gikan sa tanom ug dili makapamunga.
Si Jesukristo nag-ampo nga ang Iyang mga Apostoles magkahiusa. Gusto Siya nga sila motudlo sa mga tawo aron motuo Kaniya ug aron masayud nga ang Langitnong Amahan nahigugma kanila.
Dayon si Jesus ug ang mga Apostoles nanganta og usa ka himno ug mibiya sa lawak.