Kapitulo 43
Gibuhi og Balik ni Jesus si Lazaro
Usa ka tawo nga ginganlan og Lazaro mipuyo sa Betania uban sa iyang igsoon nga mga babaye nga sila si Maria ug Marta. Pinangga ni Jesus si Lazaro ug ang iyang igsoong mga babaye, ug nahigugma sila kang Jesus.
Si Lazaro nasakit og grabe. Ang Manluluwas didto sa laing lungsod. Si Maria ug si Marta mipahibalo Kaniya nga si Lazaro nasakit.
Ang Manluluwas mihangyo sa Iyang mga disipulo nga mouban Kaniya aron tabangan si Lazaro. Ang mga disipulo nahadlok nga moadto sa Betania. Duol kini sa Jerusalem. Ang ubang mga tawo sa Jerusalem gusto nga mopatay kang Jesus.
Si Jesus misulti sa Iyang mga disipulo nga si Lazaro patay na. Siya miingon nga Iyang buhion siya og balik. Kini nga milagro motabang sa mga disipulo nga masayud nga Siya mao ang Manluluwas. Si Jesus miadto sa Betania. Sa pag-abut Niya didto, si Lazaro patay na sulod sa upat ka adlaw.
Si Marta misulti kang Jesus nga si Lazaro buhi pa unta kon Siya naabut pa dayon. Si Jesus miingon nga si Lazaro mabuhi og balik. Siya nangutana ni Marta kon siya mituo ba Kaniya. Si Marta miingon og oo. Siya nasayud nga si Jesus mao ang Manluluwas.
Si Marta mibiya kang Jesus aron kuhaon ang iyang igsoong babaye, si Maria. Si Maria miadto aron makita usab si Jesus. Daghang mga tawo ang misunod kaniya. Si Maria miluhod, naghilak, diha sa tiilan sa Manluluwas. Ang mga tawo nga kauban niya nanghilak usab. Si Jesus nangutana kon asa ang lawas ni Lazaro.
Si Jesus miadto sa langub nga gilubngan ni Lazaro. Adunay bato sa atubangan niini. Siya misugo sa mga tawo sa pag-irog sa bato.
Si Jesus mihangad. Siya mipasalamat sa Langitnong Amahan sa pagdungog sa Iyang mga pag-ampo.
Unya, sa makusog nga tingog, si Jesus mimando kang Lazaro sa paggawas sa langub. Si Lazaro migawas. Daghan sa mga tawo nga nakakita sa milagro ang mituo na karon nga si Jesus mao ang Manluluwas.