Kapitulo 44
Ang Manluluwas Miadto sa Jerusalem
Ang mga Pariseo miplano og paagi aron sa pagpatay kang Jesus. Sila mihulat Kaniya nga moadto alang sa pagsaulog sa Pagpalabay.
Si Jesus miadto sa Jerusalem. Daghang mga tawo ang nakahibalo nga Siya moabut ug miadto aron makakita Kaniya. Si Jesus misakay sa usa ka nating asno paingon sa siyudad. Usa ka propeta ang nagsulat nga ang Anak sa Dios mohimo niini. Daghang mga tawo ang mituo nga si Jesus mao ang Anak sa Dios. Nagbutang sila og mga lukay ug pipila sa ilang mga sinina diha sa yuta aron Iyang tumban. Sila misinggit og hosanna ug miingon nga si Jesus mao ang ilang hari.
Ang mga tawo sa Jerusalem miadto aron sa pagtan-aw kon unsay nahitabo. Sila nangutana kon kinsa si Jesus. Ang mga tawo diha sa panon misulti kanila nga Siya usa ka propeta gikan sa Nazaret.
Nasuko ang mga Pariseo. Dili sila gusto nga ang mga tawo motuo nga si Jesus mao ang Manluluwas. Si Jesus nasayud nga ang mga Pariseo gusto nga mopatay Kaniya.
Si Jesus misulti sa Iyang mga disipulo nga Siya mamatay sa dili madugay. Siya mag-antus alang sa mga sala sa tanang mga katawhan ug dayon mamatay diha sa krus. Siya mao ang Manluluwas sa kalibutan. Mao kini ang hinungdan nga Siya mianhi sa yuta.