Kapitulo 24
Anak nga Babaye ni Jairo Gibanhaw gikan sa Patay
Usa ka adlaw niana si Jairo, usa ka pangulo sa sinagoga, mihapa sa tiilan sa Manluluwas.
Si Jairo miingon nga ang iyang 12 anyos nga anak nga babaye grabe ang sakit. Siya nangamuyo kang Jesus sa pag-adto ug sa pagpanalangin kaniya. Siya mituo nga si Jesus makaayo kaniya.
Si Jesus misugod sa pagsunod kang Jairo sa balay, apan Siya mihunong aron sa pag-ayo sa usa ka babaye. Samtang Siya nakigsulti kaniya, usa ka tawo ang miabut aron sa pagsulti kang Jairo nga ulahi na kaayo—ang iyang anak nga babaye patay na.
Si Jesus nakadungog sa unsay gisulti. Iyang giingnan si Jairo nga dili mahadlok apan mosalig lamang Kaniya.
Dayon si Jesus mikuyog kang Jairo ngadto sa balay ni Jairo. Ang balay puno sa mga tawo kinsa nanaghilak tungod sa pagkamatay sa batang babaye.
Si Jesus miingon kanila nga ang batang babaye wala mamatay apan natulog. Gikataw-an Siya sa mga tawo. Nakasiguro sila nga ang batang babaye patay na.
Gipagawas sa Manluluwas ang tanan sa balay gawas sa Iyang mga disipulo, si Jairo, ug asawa ni Jairo. Sila misulod sa kwarto diin ang batang babaye naghigda.
Gigunitan ni Jesus ang kamot sa batang babaye. Siya misugo kaniya sa pagbangon. Siya mibangon ug milakaw. Ang iyang mga ginikanan nahibulong. Si Jesus miingon kanila nga dili mosulti ni bisan kinsa sa unsay nahitabo. Dayon Iyang gisugo ang iyang mga ginikanan sa paghatag og makaon sa batang babaye.