ព្រះយេហូវ៉ា និង ការបម្រើក្នុងជីវិតមុនជីវិតនៅលើផែនដីរបស់ទ្រង់

សេចក្ដីផ្ដើម

យោងតាមព្យាការីសម័យទំនើប ព្រះយេស៊ូវគ្រីស្ទ « បានបង្រៀនពីសេចក្ដីពិតនៃភាពអស់កល្ប ពីភាពជាក់ស្តែងនៃជីវិតរបស់យើង ដែលមានមុនផែនដី ពីគោលបំណងនៃជីវិតរបស់យើងនៅលើផែនដី និងពីសក្តានុពលចំពោះបុត្រា និងបុត្រីទាំងឡាយនៃព្រះនៅក្នុងជីវិតខាងមុខ » ( « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » Ensign ឬ លីអាហូណា ខែ មេសា ឆ្នាំ ២០០០ ទំព័រ ២ ) ។ នៅក្នុងមេរៀននេះ សិស្សនឹងរៀនថា នៅក្នុងជីវិតមុនផែនដី សេចក្ដីជំនឿរបស់ពួកគេថា ព្រះយេហូវ៉ា ( ព្រះយេស៊ូវគ្រីស្ទ ) នឹងអនុវត្តនូវដង្វាយធួនដែលអាចឲ្យពួកគេយកឈ្នះលើសាតាំង នៅក្នុងសង្គ្រាមនៅលើស្ថានសួគ៌បាន ។ សិស្សក៏នឹងមើលឃើញថា នៅក្នុងពិភពនៃជីវិតមុនផែនដី ព្រះយេហូវ៉ាខ្លាំងពូកែច្រើនជាងកូនចៅរបស់ព្រះទាំងអស់ នៅក្នុងគ្រប់លក្ខណៈសម្បត្តិដ៏ទេវភាពទាំងឡាយ ។

ការអានពីសាវតា

រីឆាដ ជី ស្កត « Jesus Christ, Our Redeemer » Ensign, ខែ ឧសភា ឆ្នាំ ១៩៩៧ ទំព័រ ៥៣–៥៤, ៥៩ ។
« The Father and the Son: A Doctrinal Exposition by the First Presidency and the Quorum of the Twelve Apostles » Ensign, ខែ មេសា ឆ្នាំ ២០០២ ទំព័រ ១៣–១៨ ។

យោបល់សម្រាប់ការបង្រៀន

វិវរណៈ ១២:៧–១១; ម៉ូសេ ៤:៣

តួនាទីរបស់ព្រះយេហូវ៉ានៅក្នុងសង្គ្រាមនៅលើស្ថានសួគ៌

សូមសរសេរពាក្យ សង្គ្រាម នៅលើក្ដារខៀន ហើយសូមសួរសិស្សថា តើរូបភាពអ្វីដែលផុសមកក្នុងគំនិត នៅពេលពួកគេគិតអំពីសង្រា្គម ។ បន្ទាប់មក សូមឲ្យសិស្សអានត្រួសៗក្នុង វិវរណៈ ១២:៧,៩ ហើយរកមើលអ្វីដែលបានរៀបរាប់ពីសង្គ្រាម( ចំបាំងនៅលើមេឃ ) ។ សូមឲ្យសិស្សពន្យល់ពីការយល់ដឹងរបស់ពួកគេថាមានអ្វីបានកើតឡើងនៅក្នុងសង្គ្រាមនោះ ។

សូមបង្ហាញនូវសេចក្ដីថ្លែងការណ៍ខាងក្រោមដោយអែលឌើរ ប្រ៊ូស អ័រ ម៉ាក់ខន់ឃី ( ឆ្នាំ ១៩១៥–៨៥ ) នៃកូរ៉ុមនៃពួកសាវកដប់ពីរនាក់ ហើយសូមឲ្យសិស្សម្នាក់អានវាឮៗ ៖

រូបភាព
អែលឌើរ ប្រ៊ូស អរ ម៉ាក់ខនឃី

« តើ [ ចំបាំងនៅលើមេឃ ] ជាប្រភេទចំបាំងអ្វី ? វាជាសង្គ្រាមដូចគ្នានេះ ដែលមានជ័យជំនះនៅលើផែនដី គឺជាសង្គ្រាមតែមួយគត់ ដែលសាតាំង និងពួកវិញ្ញាណទាំងឡាយអាចធ្វើ—គឺសង្គ្រាមនៃពាក្យសម្ដី ការចលាចលនៃគំនិតនានា វិបត្តនៃមនោគមវិជ្ជា ជាសង្គ្រាមមួយរវាងសេចក្ដីពិត និងកំហុសឆ្គង » ( Doctrinal New Testament Commentary វ៉ុលទី ៣ [ ឆ្នាំ ១៩៦៥–៧៣ ], ៣:៥១៨ ) ។

សូមសួរសិស្ស ៖

ស្របតាមអែលឌើរ ម៉ាក់ខនឃី តើចំបាំងនៅលើមេឃ ស្រដៀងគ្នាទៅនឹងសង្គ្រាមដែលសាតាំងធ្វើ ប្រឆាំងទាស់នឹងកូនចៅរបស់ព្រះនៅក្នុងជីវិតរមែងស្លាប់ដោយរបៀបណា ?

សូមអញ្ជើញសិស្សម្នាក់ឲ្យអាន វិវរណៈ ១២:១០ ឮៗ ហើយសិស្សម្នាក់ទៀតអាន ម៉ូសេ ៤:៣ ឮៗ ។ អ្នកអាចស្នើថា សិស្សធ្វើសេចក្តីយោងវគ្គបទគម្ពីរទាំងពីរដោយសរសេរ ម៉ូសេ ៤:៣ នៅគែមនៃព្រះគម្ពីររបស់ពួកគេ នៅក្បែរ វិវរណៈ ១២:១០ និងសរសេរក្បែរវិវរណៈ នូវខគម្ពីរនៃម៉ូសេវិញ ។ សូមពន្យល់ថា « អានោះដែលចោទប្រកាន់ពីពួកបងប្អូនយើងរាល់គ្នា » (វិវរណៈ ១២:១០) គឺជាសាតាំង ។ បន្ទាប់មក សូមសួរ ៖

យោងតាម ម៉ូសេ ៤:៣តើសាតាំងត្រូវបានបណ្ដេញចេញពីពិភពមុនផែនដីនេះដោយរបៀបណា ?

សូមឲ្យសិស្សអាន វិវរណៈ ១២:១១ ដោយស្ងាត់ស្ងៀម ។ សូមជួយពួកគេឲ្យនិយាយពីគោលការណ៍មួយ ដែលត្រូវបានបង្រៀននៅក្នុងខគម្ពីរនេះ ដោយការសួរសំណួរខាងក្រោម ៖

តើអ្នកនឹងសង្ខេបអ្វីដែលនៅក្នុង ខទី ១១ ដែលបង្រៀនអំពីឥទ្ធិពលនៃដង្វាយធួនរបស់ព្រះយេស៊ូវគ្រីស្ទយ៉ាងដូចម្ដេច ? ( សិស្សគួររកឃើញនូវសេចក្ដីពិតដូចខាងក្រោម ៖ ដោយសារតែវាជាក់ច្បាស់ណាស់ថា ព្រះយេស៊ូវគ្រីស្ទ នឹងបញ្ចប់ដង្វាយធួន នោះឥទ្ធិពលនៃការពលីនេះ ត្រូវបានរៀបចំរួចស្រេចហើយ នៅក្នុងពិភពមុនផែនដីនេះ ។ ហេតុដូច្នេះ ទ្រង់ត្រូវបានរាប់ទុកថាជា « កូនចៀមដែលត្រូវគេសម្លាប់ តាំងពីកំណើតលោកិយមក » [ វិវរណៈ ១៣:៨; សូមមើលផងដែរ ម៉ូសាយ ៤:៧; ម៉ូសេ ៧:៤៧ ] ) ។
តើអ្នកអាចប្រើអ្វីដែលត្រូវបានកត់ត្រានៅក្នុង វិវរណៈ ១២:១១ ដើម្បីជួយអ្នកក្នុងសង្គ្រាមផ្ទាល់ខ្លួនអ្នកប្រឆាំងនឹងសាតាំងនៅក្នុងជីវិតនេះបានដោយរបៀបណា ? ( ក្រោយពីសិស្សឆ្លើយហើយ សូមសរសេរគោលការណ៍ខាងក្រោមនេះនៅលើក្ដារខៀន ៖ យើងអាចយកឈ្នះលើសាតាំងបានដោយ ការពឹងផ្អែកទៅលើព្រះយេស៊ូវគ្រីស្ទ ដែលបានធ្វើនូវដង្វាយធួន ហើយដោយបានរងទុក្ខ និងស្មោះត្រង់ចំពោះទីបន្ទាល់របស់យើង ) ។

អ័ប្រាហាំ ៣:១៥–២៥; គោលលទ្ធិ និង សេចក្ដីសញ្ញា ១៣៨:៥៥–៥៦

ព្រះយេហូវ៉ា ខ្លាំងពូកែជាងយើងក្នុងគ្រប់ការណ៍ទាំងអស់

សូមប្រាប់សិស្សថា នៅក្នុងជីវិតមុនផែនដីនេះ យើងបានរៀបចំដើម្បីចុះមកផែនដី ។ សូមបង្ហាញនូវសេចក្ដីថ្លែងការណ៍ខាងក្រោមដោយព្យាការី យ៉ូសែប ស្ម៊ីធ ( ឆ្នាំ ១៨០៥–៤៤ ) ហើយសូមឲ្យសិស្សម្នាក់អានវាឮៗ ៖

រូបភាព
ព្យាការី យ៉ូសែប ស្ម៊ីធ

« ដោយឃើញថាទ្រង់ស្ថិតនៅក្នុងចំណោមពួកវិញ្ញាណ និង សិរីល្អ ដោយសារទ្រង់មានបញ្ញាច្រើនជាងពួកគេ នោះព្រះអង្គទ្រង់ផ្ទាល់បានទតឃើញថាត្រឹមត្រូវដើម្បីបង្កើតច្បាប់ ដែលកូនចៅវិញ្ញាណផ្សេងទៀតអាចមានឱកាសបានក្លាយដូចជាទ្រង់ដែរ។ ទំនាក់ទំនង ដែលយើងមានជាមួយនឹងព្រះ បានដាក់យើងនៅក្នុងស្ថានភាពមួយដើម្បីបង្កើនចំណេះដឹងរបស់យើង ។ ទ្រង់មានព្រះចេស្ដាដើម្បីបង្កើតច្បាប់ ស្ដីពីការណែនាំដល់អ្នកចេះដឹងតិចតួច ថាពួកគេអាចត្រូវបានលើកតម្កើងដូចទ្រង់ដែរ » ( ការបង្រៀនរបស់ប្រធានសាសនាចក្រ ៖ យ៉ូសែប ស៊្មីធ [ ឆ្នាំ ២០០៧ ] ទំព័រ ២១០ ) ។

សូមតាមដាន ដោយការសួរសំណួរខាងក្រោម ៖

តើអ្នករៀនបានអ្វីខ្លះពីសេចក្ដីថ្លែងការណ៍របស់ យ៉ូសែប ស្ម៊ីធ អំពីព្រះបំណងរបស់ព្រះវរបិតាសួគ៌សម្រាប់យើង ? ( ព្រះវរបិតាសួគ៌សព្វព្រះទ័យឲ្យយើងបង្កើន និងអភិវឌ្ឍខាងវិញ្ញាណ—ដើម្បីក្លាយជាដូចទ្រង់ ) ។

សូមសរសេរសំណួរខាងក្រោមនេះនៅលើក្ដារខៀន ហើយសូមឲ្យសិស្សសិក្សា អ័ប្រាហាំ ៣:២៣–២៤ ដើម្បីស្វែងរកនូវចម្លើយ ៖

តើនរណាជា « ម្នាក់ឈរក្នុងចំណោមពួកគេ ដែលមើលទៅដូចជាព្រះ » ? ( ខទី ២៤ ) ។
តើទ្រង់មានតួនាទីអ្វី ?
តើទ្រង់បានមានបន្ទូលដូចម្តេច អំពីគោលបំណងមួយនៃជីវិតរមែងស្លាប់នោះ ?

ក្រោយពីមានពេលគ្រប់គ្រាន់ហើយ សូមឲ្យសិស្សចែកចាយចម្លើយរបស់គេដល់សិស្សក្នុងថ្នាក់ ។ បន្ទាប់មក សូមអញ្ជើញឲ្យសិស្សស្រាវជ្រាវក្នុង គោលលទ្ធិ និងសេចក្ដីសញ្ញា ១៣៨:៥៥–៥៦ រកមើលការយល់ដឹងពីអ្វីដែលបានធ្វើឡើង ដើម្បីរៀបចំកូនចៅរបស់ព្រះ ឲ្យបានជ័យជំនះនៅក្នុងជីវិតរមែងស្លាប់នេះ ។ ដើម្បីជួយសិស្សឲ្យប្រៀបធៀបវគ្គគម្ពីរនេះទៅនឹងខ្លួនគេ សូមសួរ ៖

ស្របតាមខគម្ពីរទាំងនេះ តើយើងបានរៀបចំដើម្បីចុះមកផែនដីនេះដោយរបៀបណា ?

សូមអញ្ជើញពួកគេឲ្យសញ្ជឹងគិតមួយភ្លែត ពីលក្ខណៈដែលព្រះអង្គសង្គ្រោះបានមាននៅក្នុងពិភពមុនជីវិតផែនដី ។ សូមឲ្យសិស្សម្នាក់អាន អ័ប្រាហាំ ៣:១៩,២១ ឮៗ ។ សូមឲ្យសិស្សក្នុងថ្នាក់មើលតាម ដោយរកមើលអ្វីដែលត្រូវបានបង្រៀនអំពីព្រះយេស៊ូវគ្រីស្ទ ។ ក្រោយពីសិស្សឆ្លើយហើយ សូមចែកឲ្យសិស្សម្នាក់នូវសេចក្ដីថ្លែងការណ៍ខាងក្រោមមួយច្បាប់ដោយអែលឌើរ នែល អេ ម៉ាក់ស្វែល ( ឆ្នាំ ១៩២៦–២០០៤ ) និងអែលឌើរ ប្រ៊ូស អ័រ ម៉ាក់ខនឃី ( ឆ្នាំ ១៩១៥–៨៥ ) នៃកូរ៉ុមនៃពួកសាវកដប់ពីរនាក់ ។ សូមឲ្យពួកគេអានសេចក្ដីថ្លែងការណ៍នេះ និង គូសចំណាំពាក្យ និង ឃ្លាទាំងឡាយដែលបង្រៀនអំពីព្រះអង្គសង្គ្រោះ ។

រូបភាព
អែលឌើរ នែល អេ ម៉ាក់ស្វែល

« នៅក្នុង បញ្ញា និង ការធ្វើកិច្ចការ [ ព្រះយេស៊ូវគ្រីស្ទ ] បានមានលើសពីបុគ្គលទាំងឡាយ និងសមត្ថភាព រួមផ្សំទាំងឡាយ និង ស្នាដៃនានា ដែលមនុស្សទាំងអស់ធ្លាប់បានរស់នៅ រស់នៅនាពេលនេះ និងរៀបនឹងមករស់នៅ ! ( សូមមើល អ័ប្រាហាំ ៣:១៩ ។ » ) ( នែល អេ ម៉ាក់ ស្វែល « O, Divine Redeemer » Ensign, ខែ វិច្ឆិកា ឆ្នាំ ១៩៨១ ទំព័រ ៨ ) ។

រូបភាព
អែលឌើរ ប្រ៊ូស អ័រ ម៉ាក់ខនឃី

« ការគោរពចំពោះច្បាប់ និងការមានសិទ្ធិជ្រើសរើសរបស់ពួកគេ នោះធ្វើឲ្យវិញ្ញាណនៃមនុស្សទាំងអស់បានអភិវឌ្ឍនូវសម្បទា ទេពកោសល្យ សមត្ថភាព និងលទ្ធភាពគ្រប់បែប គ្រប់យ៉ាង និងគ្រប់កម្រិត ពេលនៅក្នុងវត្តមានដ៏អស់កល្ប ។ គឺក្នុងអំឡុងពេលដ៏យូរអង្វែងនៃជីវិតនោះហើយ ដែលជាពេលនៃភាពខុសគ្នាដ៏និរន្ដរ៍នៃទេពកោសល្យ និងលទ្ធភាព ដែលលេចចេញជារូបរាងមក ។ …

« ព្រះអម្ចាស់បានប្រទានដល់យើងនូវសិទ្ធិជ្រើសរើស ទ្រង់បានប្រទានដល់យើងនូវច្បាប់ ដែលនឹងជួយយើងឲ្យលូតលាស់ និងចម្រុងចម្រើងឡើង និងប្រែក្លាយជាមានសមត្ថភាពដូចជាទ្រង់ ហើយទ្រង់បានប្រឹក្សា និងដាស់តឿនយើងឲ្យដើរតាមគន្លងមាគ៌ា ដែលនាំទៅរកសិរីល្អ និងភាពតម្កើងឡើង ។ ព្រះអង្គទ្រង់ផ្ទាល់ គឺជាតំណាង និងបដិរូបនៃគ្រប់ការណ៍ល្អទាំងអស់ ។ រាល់លក្ខណៈសម្បត្តិ និងលក្ខណៈនិស័្សយដែលយើងប្រាថ្នាចង់បាន បានមាននៅក្នុងទ្រង់យ៉ាងពេញលេញ ដ៏អស់កល្ប ។ កូនចៅដែលចេះស្ដាប់បង្គាប់របស់ទ្រង់ទាំងអស់ បានចាប់ផ្ដើមក្លាយដូចជាទ្រង់ តាមរបៀបមួយ ឬក៏របៀបណាផ្សេងទៀត ។ វាមាននូវភាពខុសគ្នាដ៏ធំមួយ និងកម្រិតនៃទេពកោសល្យ ព្រមទាំងលទ្ធភាពនៅក្នុងចំណោមពួកយើងនៅទីនោះ ក៏ដូចជាមាននៅទីនេះដែរ ។ អ្នកខ្លះខ្លាំងខាងម្យ៉ាង អ្នកឯទៀតខ្លាំងខាងអ្វីផ្សេងទៀត ។ បុត្រទីមួយ បានខ្លាំងពូកែលើសពួកយើងរាល់គ្នាទាំងអស់ ក្នុងគ្រប់ការណ៍ទាំងឡាយ » ( ប្រ៊ូស អ័រ ម៉ាក់ខនឃី The Mortal Messiah, វ៉ុលទី ៤ [ ឆ្នាំ ១៩៧៩–៨១ ], ១:២៣ ) ។

សូមតាមដាន ដោយការសួរសិស្សថា តើអ្វីដែលបានលេចធ្លោដល់ពួកគេ ចេញពីសេចក្ដីថ្លែងការណ៍នេះ ។ ប្រសិនបើចាំបាច់ សូមសួរ ៖

តើអ្នកបានរៀនអ្វីពីសាវកទាំងពីររូបនេះ អំពីលក្ខណៈល្អឯករបស់ព្រះយេហូវ៉ា នៅក្នុងពិភពមុនផែនដីនេះ ? ( សិស្សគួរយល់ថា នៅក្នុងពិភពមុនផែនដីនេះ ព្រះយេហូវ៉ា បានមានសមត្ថភាពលើសពីសមត្ថភាពរួមផ្សំ និងស្នាដៃជាច្រើនលើសពីកូនចៅរបស់ព្រះវរបិតាសួគ៌គ្រប់រូប ។ )

សូមទុកពេលឲ្យសិស្សមួយសន្ទុះដើម្បីសញ្ជឹងគិត ពីការបម្រើក្នុងជីវិតមុនផែនដីរបស់ព្រះអង្គសង្គ្រោះ និងសរសេរនូវគំនិត ព្រមទាំងអារម្មណ៍ទាំងឡាយដែលពួកគេមាន ។ សូមអញ្ជើញពួកគេបីបួននាក់ឲ្យចែកចាយដល់សិស្សក្នុងថ្នាក់ នូវអ្វីដែលពួកគេបានសរសេរ ។ សូមបញ្ចប់មេរៀននេះដោយការលើកទឹកចិត្តសិស្សឲ្យគិតអំពី របៀបដែលការដឹងអំពីការបម្រើក្នុងជីវិតមុនផែនដីរបស់ព្រះអង្គសង្គ្រោះ និងលក្ខណៈល្អឯករបស់ទ្រង់ អាចជួយពួកគេឲ្យមានសេចក្ដីស្រឡាញ់ និងសេចក្ដីជំនឿកាន់តែខ្លាំងទៅលើទ្រង់ ។

ការអានរបស់សិស្ស

វិវរណៈ ១២:៧–១១; អ័ប្រាហាំ ៣:១៥–២៥; គោលលទ្ធិ និង សេចក្ដីសញ្ញា 138:55-56 ។
រីឆាដ ជី ស្កត « Jesus Christ, Our Redeemer » Ensign, ខែ ឧសភា ឆ្នាំ ១៩៩៧ ទំព័រ ៥៣–៥៤, ៥៩ ។