មេរៀនទី ២៤ ៖ ទ្រង់មានព្រះជន្មរស់ !

មេរៀនទី ២៤

ទ្រង់មានព្រះជន្មរស់ !

សេចក្ដីផ្ដើម

ព្យាការី យ៉ូសែប ស្ម៊ីធ បានប្រកាស អំពីព្រះអង្គសង្គ្រោះព្រះយេស៊ូវគ្រីស្ទ ៖ « ហើយឥឡូវនេះ បន្ទាប់ពីទីបន្ទាល់ជាច្រើនដែលបានថ្លែងអំពីទ្រង់ នោះគឺជាទីបន្ទាល់ចុងក្រោយបង្អស់ដែលយើងខ្ញុំសូមថ្លែងអំពីទ្រង់ ៖ គឺថាទ្រង់មានព្រះជន្មរស់នៅ ! » ( គ និង ស ៧៦:២២ ) ។ គោលបំណងនៃមេរៀននេះគឺដើម្បីជួយដល់សិស្សឲ្យយល់ថា ព្រះអង្គសង្គ្រោះមានព្រះជន្មរស់នៅនាពេលនេះ ថាទ្រង់គឺជាអ្នកគាំទ្ររបស់យើងជាមួយនឹងព្រះវរបិតា ហើយថាតាមរយៈសេចក្ដីជំនឿទៅលើទ្រង់ នោះយើងនឹងក្លាយជា « បុត្រាបុត្រីបង្កើតចំពោះព្រះ » ( គ និង ស ៧៦:២៤; សូមមើលផងដែរ កាឡាទី ៣:២៦ ) ។

យោបល់សម្រាប់ការបង្រៀន

គោលលទ្ធិ និង សេចក្ដីសញ្ញា ២៥:១; ៧៦:១៩-២៤; ១១០:១–៤

ព្រះយេស៊ូវគ្រីស្ទមានព្រះជន្មរស់ថ្ងៃនេះ

សូមអានដំណើររឿងខាងក្រោមឮៗជាបទពិសោធន៍មួយរបស់ប្រធាន ឡូរែនសូ ស្នូ ( ១៨១៤–១៩០១ ) ដូចដែលបានទាក់ទងដោយចៅស្រីរបស់លោកឈ្មោះ អាលីស ផន ៖

រូបភាព
ប្រធាន ឡូរែនសូ ស្នូ

« ‹ នៅក្នុងច្រកចូលដ៏ធំមួយនាំទៅក្នុងបន្ទប់សេឡេស្ទាល ខ្ញុំបានដើរបួនប្រាំជំហាន ពីមុខជីតា នៅពេលដែលគាត់បានហៅខ្ញុំឲ្យឈប់ ហើយនិយាយ ៖ « ចាំមួយភ្លែត អាលី តាចង់ប្រាប់ចៅរឿងមួយ ។ វាគឺនៅទីនេះដែលព្រះអម្ចាស់ ព្រះយេស៊ូវគ្រីស្ទ បានលេចមកឯតានៅពេលប្រធាន វូឌដ្រុព្វ ស្លាប់ ។ ទ្រង់បានប្រាប់តាឲ្យទៅមុខទ្រង់ ហើយរៀបចំគណៈប្រធានទីមួយនៃសាសនាចក្រជាថ្មីតែម្ដង ហើយមិនត្រូវរង់ចាំដល់ក្រោយពីការស្លាប់របស់ប្រធានពីមុនៗនោះឡើយ ហើយថាតាត្រូវតែបន្ដវេនប្រធាន វូឌដ្រុព្វ » ។

« ‹ បន្ទាប់មក លោកតាបានឈានមួយជំហានមកក្បែរ ហើយបោះដៃខាងឆ្វេងលោកមក ហើយបានមានប្រសាសន៍ ៖ « ទ្រង់បានឈរនៅត្រង់នេះ ប្រហែលជាបីហ្វ៊តពីលើកម្រាល ។ វាមើលទៅដូចជាទ្រង់បានឈរនៅលើបន្ទះមាសរឹងមួយ ។

« ‹ លោកតាបានប្រាប់ខ្ញុំពីតួអង្គដ៏រុងរឿងរបស់ព្រះអង្គសង្គ្រោះ និងបានរៀបរាប់ពីព្រះហស្ដរបស់ទ្រង់ ព្រះបាទ ព្រះភ័ក្ត្រ និងអាវដ៏សក្បុសស្រស់ស្អាត ដែលអ្វីទាំងអស់នេះគឺជាសិរីល្អដ៏សច្បាស់ និងភ្លឺចែងចាំង ដែលលោកស្ទើរតែមិនអាចសំឡឹងមើលទៅទ្រង់បាន ។

« ‹ បន្ទាប់មក [ លោកតា ] បានឈានមួយជំហានទៀតមកកាន់តែក្បែរ ហើយបានដាក់ដៃស្ដាំរបស់លោកលើក្បាលរបស់ខ្ញុំ ហើយបានមានប្រសាសន៍ ៖ « ឥឡូវនេះ ចៅស្រី តាចង់ឲ្យចៅចាំថា នេះគឺជាទីបន្ទាល់របស់លោកតារបស់ឯង ថាគាត់បានប្រាប់ចៅដោយបបូរមាត់ផ្ទាល់របស់លោក ថាលោកពិតជាបានឃើញព្រះអង្គសង្គ្រោះមែន នៅទីនេះនៅក្នុងព្រះវិហារបរិសុទ្ធនេះ ហើយបាននិយាយជាមួយនឹងទ្រង់ទល់មុខគ្នា › » [ Alice Pond, in LeRoi C. Snow, « An Experience of My Father’s » Improvement Era, ខែ កញ្ញា ឆ្នាំ ១៩៣៣ ទំព័រ ៦៧៧ ] » ( Teachings of Presidents of the Church: Lorenzo Snow [ ឆ្នាំ ២០១២ ], ទំព័រ ២៣៨–៣៩ ) ។

តើអ្នកមានគំនិតដូចម្តេចខ្លះ នៅពេលអ្នកស្ដាប់ដំណើររឿងនេះ ?

សូមប្រាប់សិស្សថា គោលលទ្ធិ និងសេចក្ដីសញ្ញា រួមមាននូវដំណើររឿងពីរនៃការលេចចេញមករបស់ព្រះអង្គសង្គ្រោះដល់មនុស្សនៅក្នុងថ្ងៃចុងក្រោយ ៖ ការលេចមករបស់ទ្រង់ម្ដងនោះដល់ យ៉ូសែប ស្ម៊ីធ និងស៊ីដនី រីហ្គដន នៅក្នុងទីក្រុងហៃរ៉ា រដ្ឋ អូហៃអូ ( សូមមើល គ និង ស ៧៦ ) ហើយម្ដងទៀតនោះដល់ យ៉ូសែប ស្ម៊ីធ និងអូលីវើរ ខៅឌើររី នៅក្នុងព្រះវិហារបរិសុទ្ធខឺតឡង់ ( សូមមើល គ និង ស ១១០ ) ។ សូមសរសេរសំណួរបីខាងក្រោមនៅលើក្ដារខៀន ៖

តើពួកលោកបានឃើញអ្វី ? តើពួកលោកបានឮអ្វី ? តើពួកលោកបានរៀនអ្វីខ្លះ?

សូមអញ្ជើញឲ្យសិស្សក្នុងថ្នាក់រកមើលចម្លើយចំពោះសំណួរទាំងនេះនៅក្នុងព្រះគម្ពីរ ។ សូមប្រាប់ឲ្យសិស្សពាក់កណ្ដាលថ្នាក់អាន គោលលទ្ធិ និងសេចក្ដីសញ្ញា ៧៦:១៩–២៤ ហើយសុំឲ្យសិស្សផ្សេងទៀតអាន គោលលទ្ធិ និងសេចក្តីសញ្ញា ១១០:១–៤ ។ ក្រោយពីទុកពេលគ្រប់គ្រាន់ហើយ សូមប្រាប់ឲ្យសិស្សចែកចាយអ្វីដែលពួកគេបានរកឃើញ ។ សូមសរសេរអ្វីដែលគេរកឃើញនៅលើក្ដារខៀន នៅខាងក្រោមសំណួរសមរម្យទាំងឡាយ ។ បន្ទាប់មក សូមសួរ ៖

តើខគម្ពីរទាំងនេះបង្រៀនអ្វីខ្លះ អំពីព្រះយេស៊ូវគ្រីស្ទ ? ( សិស្សអាចរកឃើញនូវគោលលទ្ធិផ្សេងៗគ្នារួមមានដូចខាងក្រោមនេះ ៖ ព្រះយេស៊ូវគ្រីស្ទ គឺជាអង្គដ៏មានព្រះជន្មរស់ និងដ៏រុងរឿង ព្រះវរបិតាសួគ៌ និងព្រះយេស៊ូវគ្រីស្ទរបស់យើងគឺជាតួអង្គ ដាច់ឡែកពីគ្នា តាមរយៈសេចក្ដីជំនឿទៅលើព្រះយេស៊ូវគ្រីស្ទ និងការទទួលយកដំណឹងល្អរបស់ទ្រង់ នោះយើងអាចក្លាយជាបុត្រាបុត្រីបង្កើតចំពោះព្រះ ហើយព្រះយេស៊ូវគ្រីស្ទ គឺជាអ្នកគាំទ្ររបស់យើងជាមួយនឹងព្រះវរបិតា ) ។

សូមប្រាប់ឲ្យសិស្សមានឱកាសចែកចាយទីបន្ទាល់របស់គេអំពីគោលលទ្ធិទាំងនេះ ដោយការសួរសំណួរខាងក្រោម ៖

តើសេចក្ដីពិតទាំងនេះមួយណាដែលមានអត្ថន័យខ្លាំងចំពោះអ្នក ? ហេតុអ្វី ?

សូមប្រាប់សិស្សថា អ្វីដែលនៅសល់នៅក្នុងមេរៀននេះ នឹងផ្ដោតទៅលើគោលលទ្ធិពីរដែលមាននៅក្នុងវគ្គគម្ពីរដែលពួកគេអាន ៖ « ព្រះយេស៊ូវគ្រីស្ទ គឺជាអ្នកគាំទ្ររបស់យើងជាមួយនឹងព្រះវរបិតា » និង « តាមរយៈសេចក្ដីជំនឿទៅលើព្រះយេស៊ូវគ្រីស្ទ និងការទទួលយកដំណឹងល្អរបស់ទ្រង់ នោះយើងអាចក្លាយជាបុត្រាបុត្រីបង្កើតចំពោះព្រះ » ។

គោលលទ្ធិ និង សេចក្ដីសញ្ញា ២៩:៥; ៣៨:៤; ៤៥:៣-៥; អាលម៉ា ៣៣:៣–១១

ព្រះយេស៊ូវគ្រីស្ទ គឺជាអ្នកគាំទ្ររបស់យើងជាមួយនឹងព្រះវរបិតា

សូមសរសេរពាក្យ អ្នកគាំទ្រ នៅលើក្ដារខៀន ហើយសូមសួរសិស្សថា តើពួកគេ ស្គាល់ពីអត្ថន័យនៃពាក្យនេះទេ ។ ( ប្រសិនបើចាំបាច់ សូមផ្ដល់និយមន័យពាក្យ អ្នកគាំទ្រ ដោយការពន្យល់ថា ពាក្យនោះសំដៅលើបុគ្គលម្នាក់ដែលនិយាយគាំទ្រ ឬទទូចអង្វសម្រាប់បុព្វហេតុរបស់នរណាម្នាក់ផ្សេងទៀត ) ។ សូមប្រាប់ឲ្យសិស្សអាន គោលលទ្ធិ និងសេចក្ដីសញ្ញា ១១០:៤ ដោយស្ងាត់ស្ងៀម ។ បន្ទាប់មក សូមសួរ ៖

តើព្រះអង្គសង្គ្រោះបម្រើជាអ្នកគាំទ្រដោយរបៀបណា ? ( នៅពេលសិស្សចែកចាយពីគំនិតរបស់ពួកគេ សូមរកមើលឱកាសដើម្បីថ្លែងទីបន្ទាល់ថា ព្រះយេស៊ូវគ្រីស្ទ គឺជាអ្នកគាំទ្ររបស់យើងជាមួយនឹងព្រះវរបិតា ) ។

សូមចង្អុលបង្ហាញសំណួរខាងក្រោម ឬសរសេរវានៅលើក្ដារខៀន ៖

តើអ្វីដែលធ្វើឲ្យព្រះយេស៊ូវគ្រីស្ទសមជាអ្នកគាំទ្ររបស់យើង ?

តើព្រះយេស៊ូវបាននាំយកមកដាក់នៅចំពោះព្រះសតិការរបស់ព្រះវរបិតា ខណៈពេលពេលទ្រង់អង្វរសុំជំនួសឲ្យយើងនោះ ?

សូមអញ្ជើញឲ្យសិស្សធ្វើការជាដៃគូ ហើយរកមើលចម្លើយចំពោះសំណួរទាំងនេះនៅក្នុង ហេព្រើរ ៤:១៥; គោលលទ្ធិ និងសេចក្ដីសញ្ញា ២៩:៥; ៣៨:៤; និង ៤៥:៣–៥ ។ ក្រោយពីសិស្សបានអានវគ្គគម្ពីរ និងបានពិភាក្សានូវចម្លើយរបស់ពួកគេនៅលើក្ដារខៀនហើយ សូមប្រាប់ឲ្យអ្នកស្មគ្រ័ចិត្តពីរបីនាក់ចែកចាយចម្លើយរបស់ពួកគេជាមួយនឹងសិស្សក្នុងថ្នាក់ ។

នៅពេលសិស្សពន្យល់ពីអ្វីដែលពួកគេបានរៀន សូមធានាថា ពួកគេយល់ពីអ្វីខាងក្រោមនេះ ៖ ព្រះយេស៊ូវគ្រីស្ទ សក្តិសមដើម្បីអង្វរសុំជំនួសយើងចំពោះមុខព្រះវរបិតា ដោយសារទ្រង់គឺសុចរិតឥតខ្ចោះ ហើយដូច្នេះទ្រង់អាចបំពេញតាមតម្រូវការនៃសេចក្ដីយុត្តិធម៌សម្រាប់អំពើបាបរបស់យើង ។ ទ្រង់សក្តិសមនឹងអង្វរសុំសម្រាប់យើង ដោយសារតែគុណសម្បត្តិរបស់ទ្រង់ ជីវិតដ៏ឥតខ្ចោះរបស់ទ្រង់ និងព្រះលោហិតរបស់ទ្រង់ ដែលទ្រង់បានបង្ហូរសម្រាប់យើង ។ យើងគ្មានគុណសម្បត្តិដែលអនុញ្ញតឲ្យយើងអង្វរសុំសម្រាប់ខ្លួនយើងឡើយ ( សូមមើល អាលម៉ា ២២:១៤ ) ។

សូមប្រាប់ឲ្យសិស្សម្នាក់អាន គោលលទ្ធិ និងសេចក្ដីសញ្ញា ៤៥:៣–៥ ឮៗ នៅពេលសិស្សក្នុងថ្នាក់ផ្ទៀងតាម ។ សូមពន្យល់ថា កិច្ចការ និងសិរីល្អរបស់ព្រះវរបិតាសួគ៌ គឺជាភាពតម្កើងនៃកូនចៅរបស់ទ្រង់ ។ ហេតុដូច្នេះហើយ នៅពេលព្រះយេស៊ូវគាំទ្រដល់អស់អ្នកដែលជឿលើទ្រង់ នោះទ្រង់ជួយសម្រេចនូវកិច្ចការរបស់ព្រះវរបិតា ខណៈប្រទានសិរីល្អដល់ព្រះវរបិតាផងដែរ ( សូមមើល ម៉ាថាយ ១០:៣២ ) ។

ដើម្បីជួយសិស្សឲ្យយល់ពីកិច្ចការរបស់ព្រះយេស៊ូវគ្រីស្ទ ក្នុងនាមជាអ្នកគាំទ្ររបស់យើង សូមប្រាប់ឲ្យពួកគេអានពាក្យសម្ដីរបស់ស៊ីណូសនៅក្នុង អាលម៉ា ៣៣:៣-១០ ។ សូមប្រាប់ឲ្យពួកគេរកមើលឃ្លាដែលស៊ីណូស បាននិយាយសារឡើងវិញ ( ការប្រើពាក្យផ្សេងគ្នានៃ « ព្រះអង្គប្រកបដោយសេចក្ដីមេត្តាករុណា » និង « ព្រះអង្គបានឮពាក្យអធិស្ឋានរបស់ទូលបង្គំ » ) ។ បន្ទាប់មក សូមសួរ ៖

តើស៊ីណូសបានរៀនអ្វីខ្លះ អំពីព្រះតាមរយៈបទពិសោធន៍របស់លោកជាមួយនឹងការអធិស្ឋានដ៏ស្មោះត្រង់នេះ ?

សូមប្រាប់ឲ្យសិស្សម្នាក់អាន អាលម៉ា ៣៣:១១ ឮៗ ។ បន្ទាប់មក សូមសួរសិស្ស ៖

តើស៊ីណូសបានប្រគល់កិត្តិយស្តដល់នរណា ចំពោះសេចក្ដីមេត្តាករុណាដ៏សុទ្ធារបស់ព្រះវរបិតាសួគ៌ ?
តើហេតុអ្វីបានជាព្រះ ជាព្រះវរបិតាបង្វែរការជំនុំជំរះរបស់ទ្រង់ចេញពីពួកយើង ?
តើការបង្រៀនរបស់ស៊ីណូសជួយអ្នកឲ្យកាន់តែយល់ និងកាន់តែកោតសរសើរដល់តួនាទីរបស់ព្រះអង្គសង្គ្រោះក្នុងនាមជាអ្នកគាំទ្រនៅក្នុងជីវិតផ្ទាល់របស់អ្នកដោយរបៀបណា ?

សូមចង្អុលបង្ហាញសេចក្ដីថ្លែងការណ៍ខាងក្រោមដោយ អែលឌើរ ឌី ថត គ្រីស្តូហ្វឺសិន នៃកូរ៉ុមនៃពួកសាវកដប់ពីរនាក់ ហើយសូមប្រាប់ឲ្យសិស្សម្នាក់អានវាឮៗ ៖

រូបភាព
អែលឌើរ ឌី ថត គ្រីស្តូហ្វឺសិន

« វាមានសារៈសំខាន់ដ៏ធំដល់ខ្ញុំ ថាខ្ញុំអាចទៅដល់ព្រះបល្ល័ង្កនៃព្រះគុណតាមរយៈការអធិស្ឋានមិនថាពេលណា និងនៅក្នុងកាលៈទេសៈណាទេ ថាព្រះវរបិតាសួគ៌របស់ខ្ញុំនឹងឮការទូលអង្វររបស់ខ្ញុំ ថាអ្នកគាំទ្ររបស់ខ្ញុំ គឺទ្រង់ដែលមិនបានធ្វើបាបសោះ ដែលព្រះលោហិតត្រូវបង្ហូរ ដើម្បីបុព្វហេតុរបស់ខ្ញុំ ។ ( សូមមើល គ និង ស ៤៥:៣–៥ ) » ។ ( « I Know in Whom I Have Trusted » Ensign, ខែ ឧសភា ឆ្នាំ ១៩៩៣ ទំព័រ ៨៣ ) ។

សូមអញ្ជើញសិស្សម្នាក់ពន្យល់ជាសម្ដីរបស់ខ្លួន ពីគោលការណ៍ដែលអែលឌើរ គ្រីស្តូហ្វឺសិន បានបង្រៀន ។ បន្ទាប់មក សូមសួរ ៖

តើការមានទីបន្ទាល់ផ្ទាល់ខ្លួនមួយនៃការបង្រៀននេះ អាចជួយដល់អ្នកក្នុងពេលលំបាកយ៉ាងដូចម្ដេច ?

ម៉ូសាយ ៥:៥–១៥

តាមរយៈសេចក្ដីជំនឿទៅលើព្រះយេស៊ូវគ្រីស្ទ និងការទទួលយកដំណឹងល្អរបស់ទ្រង់ នោះយើងក្លាយជាបុត្រាបុត្រីបង្កើតចំពោះព្រះ ។

សូមអញ្ជើញឲ្យសិស្សម្នាក់អាន គោលលទ្ធិ និងសេចក្ដីសញ្ញា ៧៦:២៤ ឮៗ ហើយសូមប្រាប់ឲ្យសិស្សក្នុងថ្នាក់ផ្ទៀងតាម ។ សូមចង្អុលបង្ហាញពាក្យ « ដោយសារព្រះអង្គ និងតាមរយៈព្រះអង្គ ហើយពីព្រះអង្គ នោះ … [ យើង ] គឺជាបុត្រាបុត្រីបង្កើតចំពោះព្រះ » ។

សូមសួរសិស្ស ៖

តើ « បុត្រាបុត្រីបង្កើតចំពោះព្រះ » មានន័យយ៉ាងណា ? (គ និង ស ៧៦:២៤; សូមមើលផងដែរ គ និង ស ២៥:១ ) ។

សូមប្រាកដថាសិស្សយល់ថា ទោះបីជាពួកយើងទាំងអស់គ្នា គឺជាកូនចៅរបស់ព្រះវរបិតាសួគ៌ខាងវិញ្ញាណក្ដី ក៏ពាក្យ « បុត្រាបុត្រីបង្កើតចំពោះព្រះ » សំដៅជាពិសេសទៅលើអស់អ្នកទាំងឡាយណាដែល « កើតម្ដងទៀត » ។ សូមប្រាប់សិស្សថា ព្រះគម្ពីរមរមនបង្ហាញពីដំណើរការនៃការកើតម្ដងទៀត ។

សូមចង្អុលបង្ហាញតារាងខាងក្រោម ឬចម្លងវាដាក់លើក្ដារខៀន ( សូមកុំបញ្ចូលពាក្យនៅក្នុងវង់ក្រចក ) ៖

តើប្រជាជនរបស់ស្ដេចបេនយ៉ាមីនមានឆន្ទៈនឹងធ្វើអ្វីខ្លះ ?	តើអ្វីជាលទ្ធផលនៃសកម្មភាពរបស់ពួកគេ ?
( ចូលទៅក្នុងសេចក្ដីសញ្ញាដើម្បីគោរពតាមព្រះបញ្ញត្តិទាំងឡាយរបស់ព្រះ ) ( លើកដាក់មកលើខ្លួនគេនូវព្រះនាមនៃព្រះគ្រីស្ទ ) ( អនុវត្តសេចក្ដីជំនឿលើព្រះគ្រីស្ទ )	( ដួងចិត្តរបស់គេបានផ្លាស់ប្ដូរ ) ( ពួកគេបានកើតពីព្រះគ្រីស្ទ ) ( ព្រះគ្រីស្ទបានក្លាយជាព្រះវរបិតានៃសេចក្ដីសញ្ញារបស់ពួកគេ )

តើប្រជាជនរបស់ស្ដេចបេនយ៉ាមីនមានឆន្ទៈនឹងធ្វើអ្វីខ្លះ ?

តើអ្វីជាលទ្ធផលនៃសកម្មភាពរបស់ពួកគេ ?

( ចូលទៅក្នុងសេចក្ដីសញ្ញាដើម្បីគោរពតាមព្រះបញ្ញត្តិទាំងឡាយរបស់ព្រះ )

( លើកដាក់មកលើខ្លួនគេនូវព្រះនាមនៃព្រះគ្រីស្ទ )

( អនុវត្តសេចក្ដីជំនឿលើព្រះគ្រីស្ទ )

( ដួងចិត្តរបស់គេបានផ្លាស់ប្ដូរ )

( ពួកគេបានកើតពីព្រះគ្រីស្ទ )

( ព្រះគ្រីស្ទបានក្លាយជាព្រះវរបិតានៃសេចក្ដីសញ្ញារបស់ពួកគេ )

សូមសង្ខេបដោយខ្លីពីសារលិខិតរបស់ស្ដេចបេនយ៉ាមីននៅក្នុង ម៉ូសាយ ២–៤ ។ បន្ទាប់មក សូមពន្យល់ថា បន្ទូលរបស់ស្ដេចបេនយ៉ាមីន បានមានឥទ្ធិពលដ៏ខ្លាំងមួយទៅលើប្រជាជនរបស់ទ្រង់ ហើយព្រះវិញ្ញាណនៃព្រះអម្ចាស់បានបណ្ដាលឲ្យមាន « ការផ្លាស់ប្ដូរយ៉ាងធំ » កើតឡើងនៅក្នុងចិត្តរបស់ពួកគេ ( សូមមើល ម៉ូសាយ ៥:២ ) ។ សូមអញ្ជើញឲ្យសិស្សសិក្សា ម៉ូសាយ ៥:២–៨, ១៥ ជាដៃគូ ដោយរកមើលចម្លើយចំពោះ សំណួរនៅក្នុងតារាងនេះ ។ ក្រោយពីទុកពេលគ្រប់គ្រាន់ហើយ សូមប្រាប់ឲ្យសិស្សចែកចាយពីអ្វីដែលពួកគេបានរកឃើញ ។ បន្ទាប់មក សូមសួរ ៖

យោងតាមអ្វីដែលអ្នកបានរៀនអំពីប្រជាជនរបស់ស្ដេចបេនយ៉ាមីន តើអ្នកក្លាយជាបុត្រា ឬបុត្រីនៃព្រះគ្រីស្ទបង្កើតដោយរបៀបណា ? ( សិស្សគួរបង្ហាញនូវគោលការណ៍ខាងក្រោមនេះ ៖ នៅពេលយើងទទួលយកព្រះយេស៊ូវគ្រីស្ទ និងធ្វើ និងកាន់តាមសេចក្ដីសញ្ញាដើម្បីគោរពតាមព្រះបញ្ញត្តិរបស់ព្រះ នោះយើងនឹងក្លាយជាបុត្រាបុត្រីបង្កើតចំពោះព្រះគ្រីស្ទ ) ។

នៅពេលសិស្សពិភាក្សាពីខគម្ពីរទាំងនេះ ពួកគេអាចត្រូវការជំនួយដើម្បីយល់ពីគោលលទ្ធិ ថាយើងក្លាយជាបុត្រនៃព្រះគ្រីស្ទ ។ សូមអានឮៗការបង្រៀនខាងក្រោមឮៗដោយប្រធាន យ៉ូសែប ហ៉្វីលឌីង ស៊្មីធ ( ១៨៧៦–១៩៧២ ) ៖

រូបភាព
ប្រធាន យ៉ូសែប ហ៉្វីលឌីង ស៊្មីធ

« ព្រះអង្គសង្គ្រោះក្លាយជាព្រះវរបិតារបស់យើង … ដោយសារទ្រង់បានពលីព្រះជន្មសម្រាប់យើង ព្រះជន្មដ៏នៅអស់កល្បជានិច្ច តាមរយៈដង្វាយធួន ដែលទ្រង់បានធ្វើសម្រាប់យើង ។ …

« … យើងក្លាយជាបុត្រ បុត្រា និងបុត្រីនៃព្រះយេស៊ូវគ្រីស្ទតាមរយៈសេចក្ដីសញ្ញារបស់យើងដើម្បីគោរពតាមទ្រង់ » ( Doctrines of Salvation, comp. Bruce R. McConkie, វ៉ុលទី ៣ [ ១៩៥៤–១៩៥៦ ], ១:២៩ ) ។

យោងតាម ម៉ូសាយ ៥:១៥ តើពរជ័យណាខ្លះ ដែលយើងអាចទទួលបានក្នុងនាមជាបុត្រា ឬបុត្រីរបស់ព្រះយេស៊ូវគ្រីស្ទ ?
តើអ្នកមានគំនិត និងអារម្មណ៍យ៉ាងណាដែរ អំពីការក្លាយជាបុត្រា ឬបុត្រីរបស់ព្រះយេស៊ូវគ្រីស្ទ ?

នៅពេលអ្នកបញ្ចប់មេរៀននេះ សូមលើកទឹកចិត្តសិស្សឲ្យសញ្ជឹងគិតពីរបៀបដែលជីវិតរបស់ពួកគេត្រូវបានប្រទានពរដោយការដឹងថា ព្រះអង្គសង្គ្រោះមានព្រះជន្មនៅរស់ ថាទ្រង់បម្រើជាអ្នកគាំទ្ររបស់យើងជាមួយនឹងព្រះវរបិតា ហើយថាយើងអាចក្លាយជាបុត្រា ឬបុត្រីនៃសេចក្ដីសញ្ញានៃព្រះគ្រីស្ទ ។

ការអានរបស់សិស្ស

ម៉ូសាយ ៥:១–១៥; គោលលទ្ធិ និង សេចក្តីសញ្ញា ៤៥:៣–៥; ៧៦:១៩–២៤; ១១០:១–៤ ។