O le Alema 36–39 o loo i ai le apoapoaiga mulimuli a Alema i ona atalii e toatolu: O Helamana, Sepulona, ma Korianetona. O le apoapoaiga na tuuina atu ia Helamana ma Sepulona faamaoni, sa matua ese mai le apoapoaiga na tuuina atu ia Korianetona lotomaaa. I se faalautelega mautinoa tatou te iloa ai le ituaiga fautuaga tatou te ono maua i o tatou olaga e ala lea i lo tatou faamaoni i fautuaga ua uma ona tuuina mai ia i tatou (tagai Alema 12:9–11).
O le tala i le liua o Alema ua aumaia ai se tasi o faataitaiga sili ona manino o le auala e mafai ai ona tatou iloa pe ua faamagaloina a tatou agasala. O le apoapoaiga a Alema ia Sepulona, tatou te iloa ai le mana ma le taua o le tumau i o tatou olaga. Ma le mea mulimuli, o le apoapoaiga matuitui na tuuina atu ia Korianetona ua aoao mai ai le matuia ma le faafanoina o le agasala faalefeusuaiga.
Fefulisa’iga, o nisi taimi e ta’ua ai o se paralela ua feūa’i i luga ma lalo, o se tusiga faa-Eperu lea e fetuunai ai upu po o manatu i se faatulagaga patino ma toe fai lea i se faatulagaga e feūa’i. O le toe fai ma toe fai e faamamafa mai ai le taua o manatu ma upu. E le gata i lea, a o le manatu autu o le tusitala e masani ona maua i le totonugalemu o le fefulisa’iga.
Sa faaaogaina e Alema le fefulisa’iga e faamatala ai le tala o lona liua i lona atalii o Helamana. O le i ai o ituaiga o tusiga faaAikupito e pei o le fefulisa’iga i le Tusi a Mamona o se molimau mai fafo lea o le tusi e pei ona aoao mai e le Perofeta o Iosefa Samita e faapea o le tusi lava lea: o se faaliliuga o se tusitusiga anamua na tusiaina i se gagana Sasae Tutotonu.
O le siata o loo i lalo o le a fesoasoani ia te oe e iloa ai le fefulisa’iga i le Alema 36. Mo le talafeagai ai, ua mamanuina ia tulaga i le siata mai le ituagavale i le itu taumatau, e amata mai i le mataitusi A ma faamaeaina i le mataitusi P. O le mea lea, o le manatu ua faailoa mai i le fuaiupu amata o le fefulisa’iga, Alema 36:1 (tulaga ua faailogaina A), o loo toe taua i le fuaiupu mulimuli o le fefulisa’iga, Alema 36:30 (o loo i ai foi i le tulaga A). O le manatu o loo i leAlema 36:2 (tulaga ua faailogaina D) o loo toe ta’ua i le fuaiupu 29 (o loo i ai foi i le tulaga D), ma faasolo ai lava faapena.
Ia matau le savali autu o le fefulisa’iga o loo taulai atu i le taimi o le olaga o Alema ina ua ia aafia i tiga ma faanoanoaga e tele ma liliu atu ai ia Iesu Keriso mo se toomaga (tagai Alema 36:17–18).
Alema 36:2–3. Manatuaina o le Alofa Tunoa o le Atua
Alema 36:2–3 o loo faaauau ai se autu o loo faamamafaina i le Tusi a Mamona atoa lava. Na amata le tala a Nifae i lona faapea mai o le a ia faailoa mai ia te i tatou “le alofa mutimutivale o le Atua e i ai ia i latou uma o e ua ia filifilia ona o lo latou faatuatua, e faamalolosi ai i latou e oo lava i le mana o le faaolaina” (1 Nifae 1:20). I le Alema 36, sa aoao e Alema ona atalii ina ia manatua le tafeaga a o latou tama ma le auala na laveaiina ai e le Atua i latou o e faalagolago ia te Ia (tagai Alema 36:2–3, 29).
Mulimuli ane, sa apoapoai mai Moronae ia te i tatou ina ia “manatua le finagalo alofa o le Atua i le fanauga a tagata, e afua i le faiga o Atamu” (Moronae 10:3). Atonu e sili atu ona faamamafaina i le tauina mai e Alema le Itiiti: “O lenei foi, faauta, ou te fai atu ia te outou, ou uso e, o outou ua i lenei ekalesia, po ua outou manatua e pei ona tatau ai le faapologaina o outou tama? Ioe, po ua outou manatua e pei ona tatau ai lona alofa ma le faapalepale pea ia te i latou? Ma lea foi, po ua outou manatua e pei ona tatau ai ua laveaiina e ia o latou agaga ai seoli?” (Alema 5:6).
Alema 36:6–10. O Alema sa “Pau i le Eleele”—Lua Aso pe Tolu?
“O nisi o le au faitau o le Tusi a Mamona ua faapea mai o loo i ai se eseesega i tala o le liua o Alema e pei ona faamauina i le Mosaea 27:23 ma le Alema 36:10. E moni o le tasi tala o loo ta’ua ai e ‘lua aso ma le lua po’ ma o le isi o loo faapea mai e ‘tolu aso ma le tolu po,’ ae e le o i ai se eseesega tonu ona e le o faatatau tonu i le mea lava lea e tasi. I le tala o loo i le tusi o Mosaea o le taimi o loo faasino manino atu i vaitaimi o anapogi a ositaulaga; e le o faailoa tonu mai foi le umi o le taimi na le malamalama ai Alema. Ia matau auiliiliga tetele o le tala: Ina ua uma ona faafetaia’ia e se Agelu ia Alema ma iloa ai le matautia o ana agasala, ua toetoe lava a oti. Ona aveina atu lea o ia i lona tama i lea tulaga pagatia. Ona faapotopoto mai lea e le tama o Alema o faitaulaga a le ekalesia ma ‘ua oo foi ina ua latou anapogi ma tatalo i ao e lua ma po e lua, ua toe maua i le tino o Alema lona malosi tuai, ma ua tulai o ia.’ (Mosaea 27:22 –23. faaopoopo le faatusilima.) E ui o lea, i le tala i le tusi o Alema, o le fuaiupu ‘e tolu ao ma po e tolu’ ua faasino manino lava i letaimi atoa na le mafai ai e Alema ona tatala lona gutu pe faagaoioi foi ona vae ma lima. (Alema 36:10.)” (Daniel H. Ludlow, A Companion to Your Study of the Book of Mormon [1976], 217–18).
Sa aoao mai e Peresitene Ezra Taft Benson (1899–1994) e uiga i le eseesega i le va o le faanoanoa faalelalolagi ma le faanoanoa loloto e tusa i le Atua lea e tatau ai mo le salamo:
“E le o se mea ua le masani ai le maua o alii ma tamaitai i le lalolagi o ē ua latou lagona le faanoanoa i mea sa sese ona latou fai. O nisi taimi ua oo ia i latou lenei lagona ona ua avea a latou amioga ma mea ua tupu ai lo latou faanoanoa tele ma lo latou puapuaga, po o ē foi e pele ia i latou. O nisi taimi e mafua lo latou faanoanoa ona ua maua i latou ma faasalaina i a latou amioga. O lagona faapena faalelalolagi e le o le ‘faanoanoa lena e tusa i le Atua.’ …
“O le faanoanoa e tusa i le Atua o se meaalofa lea a le Agaga. O le iloa loloto lea o a tatou amioga ua tatou faatausuai ai i lo tatou Tama ma lo tatou Atua. O le iloa ma le mautinoa ua avea a tatou amioga ma mea na mafua ai ona onosaia e le Faaola, o Lē e le agasala, o Lē silisili ese i tagata uma, e onosai i le tiga ma le puapuaga. Na avea a tatou agasala ma mea na tafe mai ai le toto i pu laiti uma lava o Lona tino. O lenei tiga moni faalemafaufau ma faaleagaga o le mea lea o loo faasino i ai tusitusiga paia o le maua o le ‘loto momomo ma le agaga salamo.’ (Tagai 3 Ni. 9:20; Moro. 6:2; MFF 20:37; 59:8; Sal. 34:18; 51:17; Isa. 57:15.) O se agaga faapena o se tulaga tonu lea e muai manaomia mo le salamo moni” (“O Se Liua Maoae o le Loto,” Liahona, Mat. 1990, 4 5).
Sa faamalamalama atili mai e Elder Richard G. Scott o le Korama a Aposetolo e Toasefululua se tasi o mafuaaga mo le faanoanoa e tusa i le Atua: “O taunuuga tiga o le agasala, na tuu lava i ai i le fuafuaga o le fiafia e se Tama agaalofa o i le Lagi, ina ia aua ai nei e mulimuli i lena ala matautia i le olaga. O le tagata agasala e le gata ina pagatia ai i lenei olaga, ae o agasala foi e lei faamagaloina e ala i le salamo moni o le a mafua ai ona mafatia i le isi itu o le veli [tagai MFF 19:4, 15–24]” (i le Conference Report, Oct. 2002, 94; po o le Liahona, Nov. 2002, 87).
Alema 36:17–21. “Ou Te Le Mafai ona Toe Manatua Ou Tiga ”
Sa ta’ua e Peresitene Spencer W. Kimball (1895–1985) le manaomia o le faalagolago atoa ia Iesu Keriso i le faagasologa o le salamo:
“I le tala ia Alema o le tagata faitau e aafia gofie lagona e mafai i se fuataga ona iloa faatasi ai ma ia, e lagonaina ona tiga, e oo ina lagona le fefe tele pe a iloa le loloto o lana agasala. Ona mafai foi lea e le tagata faitau ona lagonaina le toomaga tele lea na maua e Alema. Sa faapefea ona ia maua lenei toomaga? I le ala lava e tasi e faia ai e tagata agasala uma —e ala i le faaaogaina o le vavega o le faamagalo atu e ala i le salamo faamaoni ma tuuina atu o ia atoa i le alofa mutimutivale o Iesu Keriso. …
“Ua liua nei puapuaga i le olioli, tiga i le toafilemu, pouliuli i le malamalama. Faato’a maua ai ii e Alema le filemu. Sa ia faamamafa atu i lona atalii o Sepulona le punavai o lena filemu.
“‘… Na ou le maua foi le faamagaloina o au agasala, seia uma ona ou tagi atu i le Alii o Iesu Keriso i le alofa. Ae peitai, faauta, na ou tagi atu ia te ia, ona ou maua ai lea le filemu i lou agaga’ (Al. 38:8.)” (Vavega o le Faamagalo Atu [1969], 365–66).
Sa faamalamalama mai e Peresitene Ezra Taft Benson e faapea o le salamo faamaoni e manaomia ai se suia o le loto:
“O le salamo o lona uiga e sili atu nai lo na o se suia o le amio. E toatele alii ma tamaitai i le lalolagi ua latou faaali le loto mafai maoae ma le uiga pulea i le faatoilaloina o mausa leaga ma vaivaiga o le tino. Ae i le taimi lava e tasi ua latou le manatu ai i le Matai, ma o nisi taimi latou te teena ai o Ia i luma o tagata. O na suiga o le amio, e tusa pe o faia i se uiga lelei, e le o le salamo moni lena. …
“… O le salamo e le aofia ai na o se suia o amioga, ae o se liua o le loto” (“O Se Liua Maoae o le Loto,” Liahona, Mat. 1990, 4).
Alema 36:23–24. Faamaoniga o se Tagata ua Toe Fanaufouina
Sa faamatala e Peresitene Ezra Taft Benson le suia lea e avea o se vaega o le fanaufouina: “Pe a tatou oo i lenei liua maoae, lea e na o le faatuatua ia Iesu Keriso ma auala mai i galuega a le Agaga e oo mai ai ia i tatou, e pei lava ua avea ai i tatou ma se tagata fou. O lea, o le liua ua pei ai lava o se fanaufouina. E faitau afe outou ua oo i lenei liua. Ua outou lafoaia olaga agasala, o nisi taimi o ni agasala loloto ma mamafa, ma e ala i le faaaogaina o le toto o Keriso i o outou olaga, ua faamamaina ai outou. Ua le toe i ai so outou manatu e toe foi i o outou ala tuai. O le mea moni ua avea outou ma tagata fou. O le uiga lenei o le liua o le loto” (“O Se Liua Maoae o le Loto,” Liahona, Mat. 1990, 4).
Sa faatatau Alema i se autu o loo taua soo i le Tusi a Mamona o le manuia i le nuu. O le Alema 36:30 o loo tuuina mai ai le uiga fesootai lelei i lena fuaitau. E le o faamoemoeina atoa tagata uma o le a mauoa i mea faaletino i lenei olaga. Nai lo lena, o loo i ai se uiga faaleagaga i le upu manuia. O lenei fuaiupu ua aoao ai i tatou afai tatou te le “tausia ia poloaiga a le Atua,” ona le faamanuiaina lea o i tatou ae e “vavae ese mai lona afioaga.” O le mea lea, o i latou o e faamanuiaina i le nuu o i latou ia ua faamanuiaina i le mauaina o faamanuiaga faaleagaga o le latalata atu i le Alii. Ua latou i ai i se auala lea o le a taitai atu ai e ulufale i le afioaga o le Alii.
Ina ia fesoasoani e saunia lona atalii o Helamana e avea ma taitai faaleagaga ma le tausi faamaumauga fou mo le nuu, sa faamamafa atu e Alema le taua o tusitusiga paia. O nisi o mataupu tetele sa ia fai atu ai o le a faasaoina e le Alii ia papatusi apamemea ma faamaumauga a sa Nifae i se auala ofoofogia ae faigofie (tagai Alema 37:1–5). Sa ia poloaiina lona atalii ina ia tausia se tusi a lona nuu ma aoaoina o ia o tusitusiga paia ua mamanuina e faateleina ai lo tatou manatuaina o mea, faailoatino ia i tatou le sese o tatou ala, ma aumaia i tatou i le malamalama o le Atua ma Lana ata o le faaolataga (tagai fuaiupu 8–9). Ona ia faamanatu atu lea i lona atalii ua na o le tagata e tausia poloaiga e agavaa e tusia ia tusitusiga paia (fuaiupu14–16). Sa folafola atili atu e Alema i lona atalii, ma i tatou, o le mulimuli ai i afioga a Keriso o le a “avea i tatou i tala atu o le vanu o puapuaga i le nuu e sili ona lelei ua folafolaina” (fuaiupu 45).
Sa faamatala e Elder David A. Bednar o le Korama a Aposetolo e Toasefululua ia auala e mafai ai ona sili atu mea tatou te maua mai ia tatou suesuega patino o tusitusiga paia: “O tusitusiga paia o loo i ai afioga a Keriso ma o se faatanoa o le vai ola lea ua leva ona tatou mauaina ma lea e mafai ona tatou matuai feinu umi mai ai. O oe ma au e tatau ona vaai atu ma sau ia Keriso, o ia o le ‘puna o le vai ola’ (1 Nifae 11:25; faatusatusa ia Eteru 8:26; 12:28), e ala i le faitau (tagai Mosaea 1:5), suesue (tagai MFF26:1), sailiili (tagai Ioane 5:39; Alema 17:2), ma taumafa (tagai 2 Nifae 32:3) i afioga a Keriso e pei ona i ai i totonu o tusitusiga paia. I le faia o lea mea, e mafai ai ona tatou mauaina le taitaiga ma le puipuiga faaleagaga i le taimi o la tatou malaga faaletino” (“A Reservoir of Living Water” [CES fireside for young adults, Fep. 4, 2007], 1).
Sa aoao mai e Elder M. Russell Ballard o le Korama a Aposetolo e Toasefululua le taua o le faalogo atu i mea iti ma le faatauvaa:
“Ua tatou matauina tele ma matuai malamalama lelei i mea o tutupu i le lalolagi; ae ui i lea, e ao ona tatou manatuaina o faamoemoega o le Alii i o tatou olaga patino i lona aotelega ua faataunuuina e ala i mea iti ma le faatauvaa ae le o mea tetele ma le mataina. …
“Ua foliga mai ua faaosofia i tatou e mea tetele ma le ofoofogia e tutupu, ae ua tatou le gauai atu ai i mea faatauvaa. Ia matau sa galue le Liahona ona o le faatuatua, sa faamatala ai e Alema, ‘E ui lava i lea, ona ua faia nei vavega i mea faatauvaaa, sa faaali ai ia te i latou galuega ofoofogia, sa paie i latou, ua galo ia te i latou e faaaoga lo latou faatuatua ma le filiga, ona iu ai lea o na galuega ofoofogia, na le alualu i luma foi i latou i la latou malaga’(Alema 37:41).
“Pe ua faatelegese ea la tatou faigamalaga i nisi taimi pe a galo ia i tatou le taua o mea faatauvaa? (tagai i le Alema 37:46). Pe o tatou iloaina ea o mea faatauvaa e tutupu ma o filifiliga e iloa ai le itulagi e agai i ai o tatou olaga e pei lava o foeuli laiti e iloa ai le itulagi e folau ai vaa tetele? (tagai Iakopo 3:4; MFF 123:16). …
“… E manaomia ona tatou faia tatalo faaleaiga ma tatalo patino a le tagata lava ia; suesue i tusitusiga paia, aemaise lava le Tusi a Mamona; ia faia afiafi faaleaiga; ia mulimuli i le apoapoaiga a le Faaola ia alofa le tasi i le isi; ma ia manatu le tasi i le isi, ia agalelei, ma agamalu i totonu o le aiga. O mea nei ma isi mea iti ma le faatauvaa, ua tatou maua ai le folafolaga o le a faatumulia o tatou olaga i le filemu ma le olioli” (i le Conference Report, Ape. 1990, 4, 8; po o leLiahona, Iul. 1990, 6, 8).
Sa lisiina e Elder Bruce R. McConkie (1915–85) o le Korama a Aposetolo e Toasefululua nisi auala lea e faaalia mai ai ma o le a faaalia ai le mana o le Tusi a Mamona: “O le a la le mana o le Tusi a Mamona? O le a ia folafolaina mai le talalelei e faavavau; o le a ia faapotopotoina Isaraelu; o le a ia fausiaina le Ierusalema Fou; o le a ia sauniaina se nuu mo le Afio Mai Faalua; o le a ia aumaia le Meleniuma—o le a ia faia se vaega taua i mea uma nei lea e seāseā soona faamatalaina lona taua ma lona mana”(The Millennial Messiah[1982], 171).
Sa faamatala mai e Peresitene Boyd K. Packer, o le Korama a Aposetolo e Toasefululua, o le aoao atu e uiga i le agasala i le mau faamatalaga, e ono save’u ai le fiailoa o se tasi e tofotofo i le agasala:
“Ua faatalitonuina au o le lua o mea sese tetele, o le aoao atu lea o mea e tele e uiga i se mataupu ma le aoao atu i le taimi sese. …
“Ou te iloa e sili atu ma le tasi se mea na tupu na taitaiina ai se talavou e tofotofoina atoa ma le faaseseina o le le ola mama ona o se manatu na muai fatu mai i lana epikopo i se faatalanoaga.
“O i latou o loo aoao atu, ma ou te faasino i taitai, i faiaoga, ma matua, ia mafaufau i lenei savali. Ia mafaufau i se tama ma se tina ua tuua le fale mo se taimi. Ina ua la ulufafo atu i le faitotoa ua la fai atu i le la fanau ia o le a nonofo na o i latou a o la toesea ai, ‘Le fanau e, ia amio lelei. Po o le a lava a outou mea e fai a o ma o ese atu, ia aua ne’i avea le nofoa i le kapoti e teu ai meaai, ma aua le a’e i le fata lona fa ma aveese mai pusa masi ma aapa atu ma aumai le taga pi ma tuu se fatu pi i totonu o o outou isu, ua outou iloa?
O nisi o i tatou ua faapena le faavalevalea. O le malie o le ata o le malie ua iloagofie, pe a e mafaufau muamua lava i se mea e tupu pe a o ese atu ou matua. E mautinoa lava e mafai ona tatou atamamai atu nai lo lena. E tatau ona iloa e tagata talavou mai lava i le amataga, o le ola mama o se mataupu paia” (Teach Ye Diligently [1975], 256–57).
O A Faamanuiaga e Maua mai le Aoao i Lo Tatou “Talavou e Tausi i Poloaiga a le Atua”?
Sa faamatala mai e Peresitene Ezra Taft Benson le mana lea e sau mai le aoaoina e tausi poloaiga i le popofou o le olaga a o talavou lava: “Tuu mai ia te au se tama talavou ua tausia o ia i le ola mama ma auai ma le faamaoni i sauniga uma o le Ekalesia. Tuu mai ia te au se tama talavou ua ia faalautele lona perisitua ma ia maua le taui o le Tiute i le Atua ma o se Aeto i le Sikauti. Tuu mai ia te au se tama talavou ua faauu mai i le seminare ma ua i ai se molimau malosi o le Tusi a Mamona. Tuu mai ia te au se tama talavou faapena, ona ou tuu atu lea ia te outou se tama talavou o lē e mafai ona ia faia vavega mo le Alii i le misiona ma lona olaga atoa” (i le Conference Report, Ape. 1986, 59; po o le Liahona, Iul. 1986, 38).
O loo tuuina mai i tusitusiga paia nai faataitaga o le valaauina e le Alii o i latou o e o loo talavou lava e avea ma Ona taitai: O Iosefa Samita sa 14 tausaga le matua (tagai Talafaasolopito o —Iosefa Samita 2:7); O Mamona sa 15 tausaga le matua (tagai Mamona 1:15); o Samuelu o le Feagaiga Tuai a o “tamaitiiti” lava sa valaauina ai e le Alii (1 Samuelu 3:1–10).
Sa molimau mai ia Peresitene Iosefa F. Samita i le sootaga i le va o le tausia o poloaiga a o talavou le olaga ma le mulimuli ane ai valaauina e auauna i le Alii: “Atonu e mafai ona e vaavaai solo i le aso, ma o ai taitai ua i ai i tagata ae o i latou o e na tuuto ma le maelega tele i latou lava a o talavou i le faatuatua? Ma e mafai ona e muai iloaina i latou o le a avea ma taitai e ala i le matauina o tama o loo faaalia le faaaloalo ma le mama ma o loo naunautai i galuega lelei uma. O le a le filifilia e le Alii ia tagata mai soo se vasega o lona nuu. … O le auala faafeagai, o le faatalitali e auauna i le Alii pe a uma ona faia mea leaga a o talavou, e tauvalea. E i ai lava se mea e misi i le tagata sa alu le taimi o lona talavou i le amioleaga ma le agasala, ma toe liliu atu ai i le amiotonu mulimuli ane. … E i ai faanoanoaga ma tiga i le tuai ai ona salamo i le olaga mai le valea ma agasala o le talavou, ae o lo o i ai faailoga ma taui silisili i le auauna ai i le Alii i aso o le malosi o le talavou o le tagata” (Gospel Doctrine, 5th ed. [1939], 335).
I le tele o tausaga e faamatala mai ai e nisi o le Pulega Aoao ia auala eseese e faaauau ai e le Alii ona taitaia i tatou i la tatou malaga o le olaga, e pei o le Liahona.
Sa faatusatusa e Elder W. Rolfe Kerr o le Fitugafulu afioga a Keriso i le Liahona: “Uso e ma tuafafine, o lea ua tatou iloa, e mafai ona avea afioga a Keriso ma Liahona mo i tatou taitoatasi, e faasino mai ia i tatou le ala. Aua nei tatou faapaie ona o le faigofie o le ala. Ia tatou tuuina ifo ma le faatuatua ia afioga a Keriso i totonu o o tatou mafaufau ma loto, e pei ona tusia i tusitusiga paia ma e pei foi ona fofogaina mai e perofeta soifua, tagatavaai ma talifaaaliga. Ia tatou faatuatua ma maelega i le fiafia ai i afioga a Keriso, aua o afioga a Keriso o le a avea ma o tatou Liahona faaleagaga, latou te tau mai ia i tatou mea uma e tatau ona tatou faia” (i le Conference Report, Ape. 2004, 38; po o le Liahona, Me 2004, 37 ).
Sa faatusatusa e Peresitene Thomas S. Monson le Liahona i se faamanuiaga faapeteriaka o se tagata: “O le Alii lava lea e tasi na tuuina atu se Liahona mo Liae ua tuuina mai mo oe ma au i aso nei se meaalofa taua tele ma le mauagata e aumai ai le taitaiga i o tatou olaga. … O le meaalofa lea ou te faasino i ai ua ta’ua o se faamanuiaga faapeteriaka” (Live the Good Life [1988], 36).
Sa faatusatusa e Peresitene Spencer W. Kimball le Liahona i le malamalama o Keriso, po o lo tatou lotofuatiaifo:
“Pe e te le fia manao e maua lea ituaiga o polo … ?
“… Ua tuuina mai e le Alii i … tagata uma, se lotofuatiaifo lea e ta’u atu ai ia te ia i taimi uma e amata ai ona alu i le ala sese. …
“… Ua tuuina atu i tamaiti uma lea mea” (i le Conference Report, Oke. 1976, 117; po o le Ensign, Nov. 1976, 79).
Sa faatusatusaina e Elder David A. Bednar le Liahona i le meaalofa o le Agaga Paia:
“A o taitasi i tatou ma fetaomi atu i luma i le ala o le ola, tatou te maua le taitaiga mai le Agaga Paia e faapei foi ona taitaiina Liae e ala i le Liahona. …
“E patino ona galue le Agaga Paia i o tatou olaga e faapei foi ona faia e le Liahona mo Liae ma lona aiga, e tusa ai ma lo tatou faatuatua ma le filiga ma le usiusitai. …
“Ma o ‘nai mea iti ma le faatauvaa’(Alema 37:6), e saunia ai e le Agaga Paia mo i tatou auala e mafai ai ona tatou maua le malamalama faateleina e uiga i ala o le Alii. …
“E mafai ona avea le Agaga o le Alii ma o tatou taiala ma o le a faamanuiaina i tatou i le faasinoala, faatonuga, ma le puipuiga faaleagaga i la tatou malaga i le olaga nei” (i le Conference Report, Ape. 2006, 31; po o le Liahona, Me 2006, 30–31).
O se faagutu o le mea lea e faaaoga i le ulu o le solofanua. E aofia ai ni fusipau ma se fasiuamea e tuu i le gutu o le solofanua, e mafai ai ona pulea e le tagata tietie le solofanua.
Sa faamalamalama mai e Elder Bruce C. Hafen o le Fitugafulu ma lona faletua o Marie e faapea o se faagutu sa faamoemoeina e taitai ai, ae le faatamaia ai manao ma tuinanau: “Pe atamai ea le faafitia e se tagata o ia lava ona o se mea ua sese i o tatou tuinanau, pe ona o se mea ua sao i o tatou tuinanau? Sa aoao e Alema lona atalii: ‘Ia e taofi ou tuinanau uma, ina ia faatumuina oe i le alofa.’ (Alema 38:12; faaopoopo le faamamafa.) Na te lei fai mai e tafiesea pe solipala ou tuinanau, ae ia taofi i latou—galueaiina, faatonutonu, ma faataulai i latou. Aisea? Aua o le lotopulea e mafai ona maua se alofa loloto ma le sili atu” (The Belonging Heart [1994], 302).
Alema 39. O Le Tulafono o le Legaviā po o le Ola Mama
“Aua lava nei e faia ni sootaga feusuai ae e te lei faaipoipo, ma ia e faamaoni atoatoa i lou toalua pe a uma ona oulua faaipoipo. E mafai ona faaosoosoina oe e Satani ina ia faia se ’alofaga faapea, e taliaina ni sootaga vavalalata feusuai a o lei faaipoipo pe afai ua ulu le alofa o le tasi i le isi. E le sa’o lena mea. I le silafaga a le Atua, e matua inosia tele agasala feusuai, aua e faaleagaina ai le mama atoatoa o le mana o le Atua na tuuina mai ia te i tatou e foafoa ai le ola. …
“A o lei faaipoipoina, ia aua lava nei faia se mea e faaosofia ai lagona malolosi ia e na o totonu o le faaipoipoga e tatau ona faaalia ai. Aua lava nei e auai i le faatinoina o ni feakisiga e faaosofia ai lagona malolosi, aua nei e taoto i luga o se isi tagata, pe tago i vaega lilo, po o itutino sa o se isi tagata, pe o fai ni ofu pe leai foi. Ia aua lava nei faatagaina se tasi e faia na mea ia te oe. Aua nei faaosofia na lagona i lou tino.
“O aganuu e talia ai tafaoga faamasani ma aumoega, ia taulimaina ma le faaaloalo i taimi uma le tagata e te tafao faamasani i ai, ia aua lava nei avea o se mea e te faaaogaina mo ou manaoga faatuinanau. Ia o i ni nofoaga saogalemu e faigofie ai ona e pulea ou lagona faaletino. Aua nei e auai i ni talanoaga po o ni gaoioiga e faaosofia ai lagona feusuai.
“O gaoioiga po o faiga faatauatane ma faatauafafine, o se agasla matuia. Afai e te iloa o loo e tauivi ma lagona faatosina i lo outou lava itupa [tane i le tane po o le mafine foi i le mafine], ia e saili se fautuaga mai ou matua ma le epikopo. O le a latou fesoasoani ia te oe.
“O tagata e aafia fua ona o faiga fai faamalosi po o le tosoteine, mataifale po o le toe ui o matua i fanau, po o isi faiga feusuai faatautala, e le tausalaina i le agasala. Afai na e aafia fua i se tasi o nei solitulafono, ia e iloa e taumamaina oe ma e alofa le Atua ia te oe. Ia vave sailia se fautuaga mai le epikopo, ina ia mafai ona ia fesoasoani atu ma taialaina oe i le faagasologa o le faamalologa o lagona” (Mo Le Malosi o le Autalavou: Faataunuuina o Lo Tatou Tiute i le Atua [2001], 27–28).
Sa saunoa Elder Jeffrey R. Holland i le aafiaga faataumaoi o agasala o feusuaiga ma le taua o le faasaoina o lou mama seia oo ina e faaipoipo: “I tulaga o le alofa molitino faaletagata e tatau ona e faatali! E tatau ona e faatali se’i mafai ona tuuina atu ia te oe mea uma, ma e le mafai ona e tuuina atu mea uma se’i vagana ua e faaipoipoina faaletulafono. O le tuuina atu o se mea e lei faatulafonoina e le o se mea a oe e tuuina atu (manatua, ‘e le āiā foi outou ia te outou’ [1 Korinito 6:19]) ma le tuuina atu na o se vaega o oe, lea e le mafai ona mulimuli mai ai ma le tuuina atu o lou tagata atoa, o le tulaga matautia lea o le faaleagaina o lagona. Afai e te faananau pea ona sailia le faamalieina faaletino e aunoa ma le faamaoniga mai le lagi, ua e uia le ala matautia e afaina ai lagona faaleagaga lea e mafai ona e faaleagaina uma ai lou manao i fesootaiga faaletino ma lou malosi e tuu atu ai se naunautaiga atoatoa i se tasi ua e alofa moni i ai i le lumanai. E mafai ona e oo atu i lena taimi moni o le alofa faauuina, o le tuufaatasiga moni, ae ua e iloaina ma le faanoanoa ua leai lou tulaga mama po o lou taupou sa tatau ona faasaoina, ma na o le alofa tunoa o le Atua e mafai ona toe faaleleia ai mea laiti ua toesea o le mama na e faatalale i ai. I le aso o lau faaipoipoga o le meaalofa silisili e mafai ona e tuuina atu i lau soa e faavavau o lou tagata sili lea ona mama ma agavaa foi mo se mama e tauia mai ai” (i le Conference Report, Oke. 1998, 100; po o leLiahona, Ian. 1999, 76– 77).
Sa faamatala e Peresitene Boyd K. Packer le sootaga i le va o le mana o le foafoaga ma le ata o le faaolataga:
“O le mana o le foafoaga —pe tatou te faapea foi o le foafoaina o le ola— ua le na o se vaega na tupu fua o le ata: e taua tele i le ata. A aunoa ma lea mana e le mafai ona faaauau le fuafuaga. O le faaaogaina sese o lea mana e faalavelaveina ai le fuafuaga.
“Atonu o le tele o le fiafia lea o le a oo mai ia te oe i lenei olaga o le a faalagolago lea i le auala e te faaaogaina ai lenei mana paia o le foafoaga” (i le Conference Report, Ape. 1972, 136–37; po o le Ensign, Iul. 1972, 111).
Alema 39:5. E Sosoo atu i le Fasioti Tagata le Matuia
Sa faamalamalama mai e Elder Jeffrey R. Holland le fesootaiga i le va o le taua o se agaga ma le Togiola, ua fesoasoani ai ia i tatou e malamalama ai i le pogai e matuia tele ai le agasala o feusuaiga:
“I le faaaogaina o le tino o le isi tagata—o lona uiga o le faaaogaina foi lea o lona agaga— ua faaleagaina e ia le Togiola a Keriso lea na laveaiina ai lena agaga ma maua ai le meaalofa o le ola e faavavau. Ma afai e ulagia e se tasi le Atalii o le Amiotonu, ua laa atu o ia i le malo o le afi, e vevela ma aasa atu nai lo le la i le aoauli. E le mafai ona e faia lena tulaga ma e le mu ai.
“Faamolemole, aua nei fai atu: ‘O ai e tiga ai? Aisea ua le maua ai sina saolotoga? E mafai ona ou agasala nei ae salamo mulimuli.’ Faamolemole aua le faavalevalea, ma agaleaga. E le mafai ona outou ‘toe faasatauroina Keriso’ e aunoa ma le faasalaina [tagai Eperu 6:6]. ‘Sosola ese mai le faitaaga’[1 Korinito 6:18], o le augani mai lea a Paulo, ma sosola ese mai ‘soo se mea faapena’ [MFF 59:6 ; faaopoopo le faatusilima], o le faaopoopo mai lea a le Mataupu Faavae ma Feagaiga. Aisea? O le mafuaaga lava e tasi, talu ai ona o puapuaga e le mafaatusalia e le gata i le tino ae o le agaga na onosaia e le Faaola o le lalolagi ina iamafai ai ona tatou sosola ese. O loo tatou nofo aitalafu ai ia te Ia mo lena mea. Ioe, ua tatou nofo aitalafu ia te Ia i mea uma mo lena mea. ‘E le aia outou ia te outou, ‘o le tala lea a Paulo. ‘Aua [ua] faatauina outou i le tau: o lenei ia outou vivii atu i le Atua i o outou tino ma o outou agaga, o mea a le Atua ia’ [1 Korinito 6:19–20; faaopoopo le faatusilima]. O le solitulafono i feusuaiga, e pagatia ai le agaga — o le tino ma le agaga” (i le Conference Report, Oke. 1998, 99–100; po o le Liahona, Ian. 1999, 91).
Sa tuuina mai e le Perofeta o Iosefa Samita (1805–44) se malamalama sili atu e uiga i le agasala e le mafaamagaloina: “O agasala uma e mafai ona faamagaloina, sei vagana ai le agasala o le upuleaga i le Agaga Paia; aua o le a faaolaina uma e Iesu sei vagana ai atalii o le malaia. O le a le mea e tatau ona fai e le tagata e soli ai le agasala e le mafaamagaloina? E tatau ona ia taliaina le Agaga Paia, ia talaia lagi ia te ia, ma iloa le Atua, ona ia agasala loa lea ia te Ia. A upuleaga se tagata i le Agaga Paia, e leai se salamo mo ia. E tatau ona ia fai mai e le o susulu mai le la ia te ia a o loo ia vaai atu i ai; e tatau ona ia faafitia Iesu Keriso ina ua mavae ai ona matala lagi ia te ia, ma ia faafitia le ata o le faaolataga ma ona mata o loo matala atu i lona moni; ma e mai i lena taimi e amata ai ona avea o ia ma fili. O le tulaga lea i le tele o le liliuese i le Ekalesia a Iesu Keriso o le Au Paia o Aso e Gata Ai” (History of the Church, 6:314).
Alema 39:9. “Aua Nei Toe Usiusitai i Tuinanauga o Ou Mata”
E faatatau faapefea le “aua le toe usiusitai i tuinanauga o ou mata” ia i tatou? I le lalolagi i nei aso ma le televave o le tekinolosi, e tele ia auala ua tuuina mai ai e Satani ia faaosoosoga. E toatele perofeta i tausaga ua mavae na lapataiina i tatou e uiga i le matautia o ponokalafi i ona mau foliga.
Sa faamatala mai e Elder Dallin H. Oaks o le Korama a Aposetolo e Toasefululua le matautia o le faatagaina o le tiapolo i o tatou mafaufau: “Sa faamamafa mai e lo tatou Faaola le taua o le mama mai feusuaiga ina ua ia aoao mai faapea e agasala le tagata e vaai atu i se fafine ina ia manao i ai [tagai Mataio 5:28]. … Ua siosiomia i tatou e faalauiloaga i faamatalaga o sootaga faasaina o faalefeusuaiga, i tusiata ma mekasini ma televise, tifaga ma komepiuta. Mo lo oe lava lelei, ia aloese mai ai. O tala ma ata faaponokalafi e faaosofia lagona e sili atu le leaga nai lo meaai ua leaga. Ua i ai puipuiga a le tino e puipuia ai o ia mai meaai le lelei. I nai tuusaunoaga matautia o meaai leaga o le a e ma’i ai ae e leai se manu’a tumau. Pe a faatusatusa, o se tagata e fiafia i tala eleelea po o ata ma tusi faaponokalafi pe faaosofia lagona, e faamaumauina uma i lenei vaega ofoofogia ua tatou ta’ua o se fai’ai. E le toe luai maia i fafo e le fai’ai le leaga. E uma loa ona faamaumau, ona tumau ai lea o le puleaina e le manatua, e feemoemoai mai ona foliga feeseeseai i lou mafaufau ma aveesea mai ai oe mai mea lelei o le olaga” (“Things They’re Saying,” New Era, Fep. 1974, 18).
Sa faamatala e Ezra Taft Benson nai auala e taumafai ai Satani e tuu mai ponokalafi i o tatou mafaufau:
“Ia mafaufau ma le toto’a i upu a le perofeta o Alema i lona atalii faalogogata o Korianetona, ‘Lafoai au agasala ma aua le toe usiusitai i tuinanauga o ou mata’ (Alema 39:9).
“‘O tuinanauga o ou mata.’ I o tatou aso, o le a le uiga o lena faamatalaga?
“O ata tifaga, polokalama a le televise, ma ata vitio e taufaaosooso ma lē mama.
“O Mekasini ma tusi e mataga ma faaponokalafi.
Matou te fautuaina outou, alii talavou, ia aua lava nei faaleagaina o outou mafaufau i ia mea faataumaoi, aua o le mafaufau lea e oo atu i ai nei mea eleelea o le a le toe tutusa lava pe a oo atu i ai. Ia aua lava nei matamata i ata ua faavasegaina i le R po o vitio leaga po o le auai foi i soo se faafiafiaga e le mama, faatuinanau, pe faaponokalafi. Aua le faalogologo i musika e faataumaoi” (i le Conference Report, Ape. 1986, 58; po o le Liahona, Me 1986, 45).
Sa faaopoopo mai e Peresitene Gordon B. Hinckley (1910–2008) lana molimau i le leaga o ponokalafi:
“O ponokalafi ua lomia ma tusiata ua mamanuina e faafiafia ai i tatou ma faatosina i tatou i mea ia o le a aumai ai na o le salamo. E faatosina i ana faasalalauga. E galue i uiga o loo i totonu o i tatou uma, o uiga ia na tuuina e le Atua i totonu o i tatou mo ona faamoemoega sili. O ponokalafi o se mea faigaluega a le tiapolo e mimilo ai na uiga i taunuuga faasaina. E masani lava o le tele o taimi e aafia ai tamaitai talavou lalelei ma alii talavou aulelei. O le faamoemoga o ona fausaga ia maua ai tupe a i latou e faia ia mea. O le taunuuga o lona faaaogaina e faaseseina ai mafaufau ma faafiafiaina ai le tuinanau o i latou ua pauu atu i ana mailei. E aumai ai le piliona o tupe ia i latou o loo faia ia mea. E taitai atu ai i le lototiga ma mafatiaga ma le faanoanoa i latou e faananau i ai.
“O loo maua i mekasini ia e mafai ona faatauina mai le tele o faleoloa, i faletifaga ia e faaali ai ata tifaga ua faailogaina i le R- ma le X mo tagata matutua, ma luga o a tatou televise i o tatou aiga”(Teachings of Gordon B. Hinckley [1997], 460).
O le fuaitau “ia e faafiti ia te oe,” e pei ona faaaoga i le Alema 39:9, e le o masani ai i tatou i le asō. Ae peitai, i le lomifefiloi a le Webster i le 1828, o loo i ai faauigaga aoga o loo tuuina atu i lalo e fesootai ma le apoapoaiga a Alema i lona atalii: “Ia tafi ese, ia faaleaogaina, ia faasagatau i ai, ia tuu, ia taofia” (Noah Webster’s First Edition of an American Dictionary of the English Language, 1828 [1967]). O nei taga uma e faatatau lelei i mea e tatau ona fai e se tasi e aloese mai ai i agasala o le ola mama, o le autu lea sa aoao atu e Alema i lona atalii o Korianetona. Tagai foi i vaefaamatalaga mo Alema 39:9b, lea e faasino i mautauloto a le tagata lava ia o loo i le Topical Guide (itulau 461)).
I le Alema 39:11–12, sa faamatala ai e Alema ia Korianetona, lona atalii lotomaaa, le mea moni e faapea o a tatou faataitaiga le lelei e mafai ona taitaieseina ai isi mai le talalelei.
Sa lapatai mai ia Peresitene Iosefa Filitia Samita (1876–1972) i le matuia o le taitaieseina o tagata mai le upumoni:
“Ou te manatu o le solitulafono silisili i lenei lalolagi atoa o le taitaieseina lea o alii ma tamaitai, o fanau a le Atua, mai aoaoga faavae moni. Ua tatou vaaia i le lalolagi i le asō ia filosofia o ituaiga eseese, ua naunau e faatamaia le faatuatua, le faatuatua i le Atua, le faatuatua i aoaoga faavae o le talalelei. Se mea ina a matautia.
“Ua fetalai mai le Alii afai tatou te galulue i o tatou aso uma ina ia aumaia tau lava o se agaga se tasi, faauta i le tele o lo tatou olioli faatasi ma ia; i le isi itu faauta i le tele o lo tatou faanoanoa ma lo tatou malaia pe afai o a tatou amioga ua tatou taitaiese ai se agaga e tasi mai lenei upumoni.
“O le na te faatauasoina se agaga se tasi, o le na te faasalalauina ia mea sese, o le na te faatamaiaina, e ala i ana aoaoga, ia upumoni paia, upumoni ia e taitai atu se tagata i le malo o le Atua ma lona atoaga, faauta i le tele o lona malaia ma lona faasalaga i le faavavau. Aua o le faatamaiaina o se agaga o le faatamaiaina lea o se mea silisili na foafoaina”(Doctrines of Salvation, comp. Bruce R. McConkie, 3 vols. [1954–56], 1:314).
“Afai ua e faia se solitulafono feusuai, ia amata nei loa le faagasologa o le salamo, ina ia mafai ai ona e maua le filemu i le loto, ma maua ai le mafutaga atoatoa ma le Agaga. Saili atu i le faamagaloga a le Alii. Talanoa i lou epikopo. O le a fesoasoani o ia ia te oe ina ia e maua le faamagaloga e tatau ona maua e i latou o e salamo ma le faamaoni.(Mo Le Malosi o le Autalavou, 28).
Sa faamalamalama mai e Elder Richard G. Scott le mea e tatau ona e faia ina ia e “liliu atu ai i le Alii” ma faamagaloina ai agasala matuia, e pei o le ola le mama: “Ou te fia talanoa atu mo sina taimi i soo se tasi na toilalo i ni faaosoosoga matuia. Faamolemole ia tuu nei loa. E mafai ona e taofia i se fesoasoani mai ni matua malamalama, epikopo, po o le peresitene o le siteki. O soligatulafono matuia e pei o le ola le mama e manaomia ai se fesoasoani a se tasi o loo umia ki o le aia tatau, e pei o se epikopo po o se peresitene o le siteki, ina ia galueaiina ma le filemu le faagasologa o vaega o le salamo, ina ia mautinoa ua maea ma atoatoa lona faataunuuina. Aua e te faia se mea sese ona o lou fia talitonu, ua e salamoina se soligatulafono matuia sa e tauina atu. O se laasaga taua lena, ae le o mea uma na o loo manaomia. Pe ua e manatu ona e le i fesili atu se tasi ia te oe i vaega taua uma o le soligatulafono, ma e le manaomia lou ta’ua o ia mea. E tatau ona e mautinoa ua malamalama le epikopo po o le peresitene o le siteki i na auiliiliga uma ina ia mafai ona ia fesoasoani ia te oe i le auala sao o le faagasologa o le salamo mo se faamagaloga atoatoa” (i le Conference Report, Oke. 1998, 89; po o le Liahona, Ian. 1999, 69–81).
Sa aoao mai e Elder Jeffrey R. Holland o le a i ai le Alii ma oe ma faamalosia oe a o e salamo i le ala tonu: “Ua tuuina atu ia te outou le filemu ma le faafouina o le salamo o loo avanoa e ala i le taulaga togiola a le Alii o Iesu Keriso. I tulaga ogaoga faapea, e le faigofie ona amata le ala o le salamo pe uia foi e aunoa ma le tiga. Ae o le a oulua savalia faatasi ma le Faaola o le lalolagi lena laasaga taua. O le a ia faamalosia oe pe a e tautevateva. O le a avea ma ou sulu pe a foliga mai e pogisa. O le a ia uuina lou lima ma avea ma ou faamoemoega ua leai. O lona alofa tunoa ma le mutimutivale, faatasi ai ma mana uma o le faamamaina ma le faamaloloina, ua tuusaoloto atu ia i latou uma o e mananao ma le faamaoni e faataunuuina atoatoa le faamagaloga ma o le a uia laasaga e tau atu i ai” (i le Conference Report, Oke. 1998, 101–2; po o leLiahona, Ian. 1999, 93).
Alema 39:17–19. Na Muai Iloaina le Ata o le Faaolataga a o lei Foafoaina le Lalolagi
O nisi tapuaiga ua iloa se isi ituaiga olaga pe a mavae le olaga faaletino; peitai, e toaitiiti ua i ai se talitonuga i se olaga e muamua atu i le olaga faitiino. Sa faamalamalama mai e le Perofeta o Iosefa Samita le mea na silafia e le Alii a o lumanai le foafoaga: “O le Ieova Sili sa mafaufau loloto i mea uma na tutupu e fesootai ma le lalolagi, e uiga i le ata o le faaolataga, a o lei oo mai i le olaga … ; o le tuanai, o le taimi nei, ma le lumanai sa i ai ma o loo i ai, faatasi ma Ia, e tasi le faavavau i le ‘taimi nei;’ sa silafia e Ia le pau o Atamu, le amioleaga o tagata a o lei oo mai le lolo, le loloto o le amioleaga o le a fesootai ma le aiga o tagata … ; sa malamalama lelei o Ia i le pau o Atamu ma lana togiola; sa silafia e Ia le ata o le faaolataga ma faailoa mai; sa silafia e Ia le tulaga o atunuu uma ma o latou taunuuga; … sa silafia e Ia le tulaga o e ola ma e maliliu, ma lava saunia mea e sili atu nai lo mea e manaomia mo lo latou faaolataga” (History of the Church, 4:597).
Manatu e Mafaufau Loloto i ai
Ina ua faatalitonuina Alema i le moni o le Atua ma le talalelei, o le taimi lava lea na amata ai ona ia mafatia i faanoanoaga tele mo ana agasala ua te’a. Aisea na tupu ai lena mea? E faatatau faapefea lena mea ia i tatou i le aso?
Sa faamamafa atu e Alema le taua o tusitusiga paia i lona atalii o Helamana. O loo faamamafa mai pea foi e perofeta i ona po nei lena mea e tasi ia i tatou. Pe o e olioli i faamanuiaga o le suesueina o tusitusiga paia i aso taitasi? O a auala o loo faamanuiaina ai e tusitusiga paia ia olaga o i latou o loo taumamafa ai pea e le aunoa? E faapefea ona e atiina ae pe faamalosia lou maoi o le suesueina o tusitusiga paia patino?
O a mea e mafai ona tatou aoaoina mai le faataitaiga a Sepulona lea o le a fesoasoani ia i tatou e tumau ai i le malosi i taimi lelei ma taimi leaga?
Galuega Fautuaina
O aoaoga faavae o aafiaga o le salamo ma le faamagaloga o Alema e tutusa lava mo tatou i le asō e ui lava ina eseese tulaga. Ia tusi se itulau atoa e otootoina ai nisi o mataupu faavae o loo aofia ai ma pe faapefea ona faaaogaina ia i tatou i le taimi nei.
Sa tau atu e Alema ia Korianetona o agasala o feusuaiga e sosoo atu i le fasioti tagata lona matuia. Ia tusi se fuafuaga maoti o laasaga e mafai ona e uia e malu puipuia ai lou mama.