Inisitituti
Mataupu 21: Mosaea 18–24

Mataupu 21

Mosaea 18–24

Folasaga

O tagata na mulimuli atu ia Alema i le vao na faamaualaloina i latou lava e ala i le talitonu i le afioga a le Atua, salamo, ma taliaina le feagaiga o le papatisoga. E ui lava i lea, sa ave faatagataotaua i latou e sa Lamana mo se taimi umi. I le vaitaimi lava lea e tasi o le talafaasolopito, sa faaauau ai ona nonofo tagata o Limae i lalo o le puleaga a sa Lamana. Na iu lava ina lotomaualalo i latou ina ua le mafai ona latou faasaolotoina i latou lava e ala i lo latou lava malosi ma na laveaiina e le Atua. Sa tau fai oo uma le nuu o Alema ma le nuu o Limae i le aafiaga o le saisaitia ma le sauaina, ma na oo uma foi nei vaega i aafiaga o le faamanuiaina i le faasaolotoina e le aao o le Alii. Vaavaai mo ni auala ua tuuina mai ai e le Alii le faaolataga mai faigata o le olaga nei e ala i le faamalosia ma fesoasoani mai ia i tatou i o tatou puapuaga. O le faatusatusaga ma le eseesega o vaega e lua, e mafai ai ona tatou aoaoina ni mataupu faavae e fesoasoani i le taulimaina o o tatou luitau.

Faamatalaga

Mosaea 18:8. Avea ai ma Nuu o le Alii e ala i le Papatisoga

  • Na otootoina e Elder Jeffrey R. Holland o le Korama a Aposetolo e Toasefululua ia mea e ao ona faia e i latou o e taliaina le papatisoga:

    “Na amata ona papatisoina e Alema i latou uma o e na mananao e osia se feagaiga ma Keriso. Na ia tau atu ia te i latou e ‘auauna i le [Atua] ma tausi ana poloaiga, ina ia mafai ona ia sasaa mai lona Agaga ina ia tele’ i luga o i latou. O nei au soo fou o le a latou faaalia foi lo latou faatuatua e ala i le:

    “O mai i le lafu a le Atua.

    “Ta’ua o lona nuu.

    “Fesui i a latou avega.

    “Faanoanoa faatasi ma e faanoanoa.

    “Faamafanafana i e ua tatau i ai le faamafanafanaga.

    “Tutu e avea ma molimau a le Atua i taimi uma, ma mea uma, ma nofoaga uma.

    “Osia le feagaiga ma ia auauna atu ia te ia ma tausi i ana poloaiga.

    “O le tautinoga lenei a Alema i le Vai o Mamona o loo tumau pea ona avea ma faamatalaga faaletusi paia ua sili ona atoatoa ua faamaumauina, o le mea e ao ona tautino i ai se tagata fou faatoa papatiso e faia ma avea ai [o ia]” (Christ and the New Covenant [1997], 106).

    Na faamatalaina e Elder Joseph B. Wirthlin (1917–2008) o le Korama a Aposetolo e Toasefululua faamanuiaga o le taliaina o feagaiga o le papatisoga: “Ou te matauina i lou olaga atoa pe afai e malamalama atoatoa tagata i faamanuiaga ma le mana o a latou feagaiga o le papatisoga, pe i le avea ai ma tagata fou faatoa liliu mai po o tagata o le Ekalesia ua autausaga ona auai, e oo mai le olioli sili i o latou olaga ma faataunuuina o latou tiute i le malo ma le naunau e faasosoloina atu” (“Alma the Elder: A Role Model for Today,” i le Heroes from the Book of Mormon [1995], 84).

Mosaea 18:9. “Tutu e Avea ma Molimau i Taimi Uma”

  • Na tautino mai e Elder M. Russell Ballard o le Korama a Aposetolo e Toasefululua, o a tatou feagaiga o le papatisoga e manaomia ai le amiotonu e tusa lava po o a faigata o tulaga e i ai: “Ina ua tatou osifeagaiga i le vai o le papatisoga e ‘tutu atu o ni molimau a le Atua i taimi uma ma mea uma’, e le na o sauniga anapogi ma molimau e faatatau i ai. Atonu e le faigofie pea, pe taliaina foi e tagata lautele le tutu atu mo le upumoni ma le amiotonu, peitai o le mea sao lava lea e ao ona faia—taimi uma” (i le Conference Report, Oke. 1997, 51; po o le Liahona, Ian. 1998, 43).

Mosaea 18:10. “Ua Outou Osia se Feagaiga ma Ia”

  • Na faamalamalama mai e Sister Bonnie D. Parkin, o se peresitene aoao o le Aualofa, le ala e avea ai le Tama Faalelagi ma o tatou faiaoga a o tatou faia ma tausia feagaiga: “O feagaiga—po o folafolaga mausali i lo tatou va ma le Tama Faalelagi—e taua mo lo tatou atinaega e faavavau. O lea laasaga ma lea laasaga, Na te aoaoina ai i tatou ina ia avea e faapei o Ia e ala i le valaauina o i tatou e auai i le faatinoga o Lana galuega. O le papatisoga tatou te osifeagaiga ai e alolofa ia te Ia ma o tatou loto atoa, ma alolofa foi i o tatou uso ma tuagane e pei ona tatou alolofa ia i tatou lava. O totonu o le malumalu tatou te toe osifeagaiga ai foi e usiusitai, ia le manatu faapito, faamaoni, faamamalu, ma agaalofa. Ua tatou osifeagaiga e ositaulaga ma faapaiaina a tatou mea uma. O le agaigai i luma e ala i le pule o le perisitua, o lo tatou tausia o a tatou feagaiga e aumaia ai faamanuiaga e faatutumu ai a tatou ipu seia taumasuasua. E faafia ona e manatunatu o au fegaiga e le na o le olaga nei e aafia ai, ae fesootai atu ai oe i le Lagi? O le osia o feagaiga o se faailoga o se loto naunautai; o le tausia o feagaiga o le faailoga lea o se loto faamaoni” (“Ma le Paia o le Loto,” Liahona, Nov. 2002, 103).

Mosaea 18:10. Mauaina o Lona Agaga

  • Na saunoa Elder Robert D. Hales o le Korama a Aposetolo e Toasefululua, o le i ai o le Agaga Paia e uunaia ai a tatou amio ma faamalolosia ai a tatou molimau:

    “O le Agaga Paia tatou te maua ai le malosi ma le lototele e taitaia ai o tatou olaga i ala o le malo o le Atua, ma o le punavai foi o a tatou molimau i le Tama ma le Alo. …

    “O le filifili ia i ai i Lona malo, tatou te vavaeese—ae le o le faaesea o i—tatou lava ia mai le lalolagi. O le a fai lelei o tatou laei, o le a mama o tatou mafaufauga, ma mama foi la tatou gagana. O tifaga ma televise tatou te matamata ai, o musika tatou te faalogologo ai, o tusi, o mekasini, ma nusipepa tatou te faitauina e faagaeetia. O le a tatou filifilia ni uo e faamalosiauina a tatou sini o le faavavau, ma o le a tatou faia ma le agalelei i isi. O le a tatou aloese mai mea faatama’i o le ola le mama, taaloga faitupe, tapaa, ava oona, ma fualaau faasaina. O a tatou gaoioiga i le Aso Sa o le a atagia mai ai le poloaiga a le Atua ia manatua le aso Sapati ia faapaiaina. O le a tatou mulimuli i le faataitaiga a Iesu Keriso i le ala tatou te taulimaina ai isi. O le a tatou ola ina ia agavaa e ulufale atu i le maota o le Alii” (i le Conference Report, Oke. 2000, 6–7; po o le Liahona, Ian. 2001, 9).

Mosaea 18:12–18. Na Umia e Alema le Perisitua

  • Na faamalamalama mai e Peresitene Iosefa Filitia Samita (1876–1972) na i ai ia Alema le pule e papatiso ai:

    “Atonu e mafai ona tatou faapea na umia e Alema le perisitua a o lei faapopoleina o ia, ma isi, e le Tupu o Noa. Pe o le mea lava lena pe leai foi, e leai lava se eseesega aua o loo ta’u patino mai i le Tusi a Mosaea na ia te ia le pule [tagai i le Mosaea 18:13].

    Ata
    O Alema o loo [faia] papatisoga i le vai o Mamona

    “Afai na ia te ia le pule e papatiso ai o le faamautinoaga lena na papatisoina o ia. O lea, ina ua papatisoina e Alema o ia lava faatasi ai ma Helama e le o se tulaga lena o le papatisoina e Alema o ia lava, ae ua na o se faailoga i le Alii o lona lotomaualalo ma le salamo atoa” (Answers to Gospel Questions, comp. Joseph Fielding Smith Jr., 5 vol. [1957–66], 3:203).

Mosaea 18:21. “Ua Fusia Faatasi Loto i le Lotogatasi ma le Fealofani”

  • Na fautua mai le Alii e ala i faaaliga i nei ona po, “Ia tasi; ma afai e le tasi outou e le a a’u outou” (MFF 38:27). Na saunoa Peresitene Henry B. Eyring o le Au Peresitene Sili, i feeseeseaiga ua masani ai i lo tatou lalolagi agasala, ma le ala e aumai ai le lotogatasi i le tausiga o poloaiga:

    “Ona o le Pau ua manino mai ai o le ola i le lotogatasi o le a le faigofie. …

    “… Tatou te manaomia le faamoemoe ina ia mafai ona tatou maua le lotogatasi i lenei olaga ma agavaa ai e maua lena lotogatasi i le faavavau i le lalolagi a sau. …

    “Afai tatou te fia maua le lotogatasi, o loo i ai poloaiga e ao ona tatou tausia e uiga i o tatou lagona. E ao ona tatou faamagalo atu ma ia le toe ita i e na faatiga mai ia i tatou” (i le Conference Report, Ape. 1998, 85–86, 88; po o le Liahona, Iulai 1998, 78, 79).

  • Na oo mai le lotogatasi ma le alofa ina ua toe tautino atu e le nuu o Alema i latou lava e ola i poloaiga a le Atua. A o auauna atu o se Fitugafulu, na faamatalaina e Elder C. Max Caldwell lenei faateleina o le alofa o se tulaga e manaomia ona atiina ae:

    “O le alofa e le uma o Iesu e pei ona faaalia i lona soifua auauna atu, taulagaina, ma le tuuina atu e fai ma sui mo isi. E le mafai ona tatou faatupuina le alofa faaKeriso vagana ua tatou faia i le ala na faasino mai e le Matai. …

    “O le alofa moni e le na o se aoaoga po o se mataupu faavae, pe ua na o se upu foi e faamatalaina ai amioga po o uiga. A o se mea e tatau ona atiina ae i le loto ma faatino ina ia malamalama ai. O le a avea i tatou ma tagata e i ai le alofa moni pe a avea ma se vaega o o tatou natura. O tagata e i ai le alofa moni e i ai lo latou alofa mo le Faaola, ua latou maua foi lona alofa, ma alolofa atu foi i isi e pei ona Ia faia” (i le Conference Report, Oke. 1992, 40; po o le Liahona, Ian. 1993, 37).

Mosaea 18:23 “Tausi le Aso Sapati, ma Faapaiaina Ai”

  • “Ona o le aso Sapati o se aso paia, e tatau ai ona faaavanoaina mo na o gaoioiga mama ma paia. … Afai o le a na ona tatou nofonofo e leai se mea e faia i le Sapati, ua tatou le tausia lava le aso ia paia” (Faamaoni i le Faatuatua: O Se Tusitaiala o le Talalelei [2004], 152).

    Na saunoa Elder L. Tom Perry o le Korama a Aposetolo e Toasefululua i le ala e avea ai le Sapati ma taimi faapitoa mo aiga e faatasitasi ai ma iloiloina isi gaoioiga e 10 mai le tele o gaoioiga e aoga mo le aso Sapati: “O le taimi lea e ao ona tatou auai uma faatasi atu ai i a tatou sauniga e masani ai, e suesue ai i le soifuaga ma aoaoga a le Faaola ma perofeta. ‘O isi gaoioiga e talafeagai ai o le Aso Sa e aofia ai le (1) tusia o api o talaaga o le olaga o le tagata lava ia ma le aiga, (2) faia o fonotaga faaleaiga, (3) faavaeina ma le faamautuina o faalapotopotoga faaleaiga mo le aiga lava ia ma le aiga potopoto, (4) faatalanoaga faaletagata i le va o matua ma fanau, (5) tusi atu i aiga ma faifeautalai, (6) gafa, (7) asiasi atu i aiga ma i latou o e o loo mama’i pe ua nofo toatasi, (8) galuega faafaifeautalai, (9) faitauina atu o tala i fanau, ma le (10) usuina o viiga o le Ekalesia.’ [“Suggestions for Individual and Family Sabbath-Day Activities,” Ensign, Mar. 1980, 76]” (i le Conference Report, Ape. 2003, 44; po o le Liahona, Me 2003, 42).

  • Na aoao mai e Elder Mark E. Petersen (1900–1984) o le Korama a Aposetolo e Toasefululua, o lo tatou tausia o le aso Sapati ua atagia ai lo tatou talisapaia o le Togiola a Iesu Keriso:

    “O se faailoga e iloa ai le loloto o lo tatou liua i le tausia o le Sapati.

    “O lo tatou tausia ma le le tausia o le Sapati o se fuafaatatau mautinoa lea o o tatou uiga faaalia i le Alii lava ia ma lona puapuagatia i Ketesemane, o lona maliu i luga o le satauro, ma lona toetu mai le oti. O se faailoga e iloa ai pe o i tatou o ni Kerisiano i amioga uma, pe o lo tatou liua e matuai papau lava, ma o le faamanatuina o lana taulaga togiola e matuai laitiiti lava pe leai foi se taua ia i tatou” (i le Conference Report, Ape. 1975, 72; po o le Liahona, Oketopa 2004, 22).

    Ata
    O le aiga o loo suesue tusitusiga paia
    Ata
    O le aiga o loo suesue i le talalelei

Mosaea 18:28. “Ia Latou Foai Atu a Latou Mea Ma Le Loto Malie”

  • Na fautuaina i tatou e Peresitene Marion G. Romney (1897–1988) o le Au Peresitene Sili, ia atiina ae le alofa mama e ala i le tuuina atu atoa o i tatou lava i le galuega a le Alii: “Atonu e fesili nisi e faapea, ‘E faapefea ona ou maua ia lagona amiotonu i le foai atu? E faapefea ona ou faatoilaloina lagona o le musu e foai atu? E mafai faapefea ona ou maua le “alofa mama o Keriso?”’ Ou te fai atu ia i latou na: Ola ma le faamaoni i poloaiga uma, tuuina atu outou lava, tausi o outou aiga, auauna atu i tofiga o le ekalesia, fai le galuega faafaifeautalai, totogi sefuluai ma taulaga, suesue i tusitusiga paia—ma e mafai ona alu pea le lisi. A o outou tuuina atu outou lava i lenei galuega, o le a pai mai le Alii ma faamaluluina lou loto” (i le Conference Report, Oke. 1981, 131–32; po o le Liahona, Ian. 1982, 180).

Mosaea 19–24. Faatusatusaga o le Nuu o Limae i le Nuu o Alema

  • O le taimi muamua na alu atu ai le perofeta o Apinati i le nuu amioleaga o le Tupu o Noa, na ia tau atu ia i latou afai latou te le salamo o le a oo ina latou nofopologa (tagai i le Mosaea 11:21). Ina ua poloaiina e le Alii ia Apinati e toe foi atu ia i latou i le isi lua tausaga mulimuli ane, sa lei salamo lava i latou (tagai i le Mosaea 12:1). O lea, e tusa ai ma le afioga a le Alii, sa leai se ‘alofaga o i latou uma mai le nofopologa. Ma le isi, o le taimi lona lua na talai atu ai Apinati ia i latou, sa sili atu ona malosi o le lapataiga a le Alii i le nuu o le Tupu o Noa. I le faaopoopo atu i le aumaia i le nofopologa, e toatele o le a fasiotia. O isi o le a aafia i oge ma faamai, ma afai latou te le salamo lava, o le a faaumatia i latou (tagai i le Mosaea 12:2–8).

    Ina ua maea le asiasiga lona lua a Apinati, sa faapea ona vaeluaina le nuu. Na talitonu Alema ia Apinati, ma na faalogo se vaega o tagata ia Alema, na salamo, ma avea o ni tagata amiotonu. Peitai, o le toatele o tagata—i lalo o le puleaga a le Tupu o Noa ona sosoo ai lea ma lona atalii o Limae—sa le i salamo seia oo i se taimi umi mulimuli ane. E ui lava na iu ina nofopologa ia vaega uma e lua ona sa latou le salamo ina ua mavae le lapataiga muamua a le Alii, manatu i eseesega nei i le va o mea na tutupu i le vaega a Alema, o e na salamo i lo latou lava lotofuatiaifo, ma le vaega a Limae, o e na faamalosia e salamo.

    Periota o Taimi

    Nuu o Limae

    Nuu o Alema

    O le asiasiga lona lua a Apinati

    Na teena ma fasiotia Apinati e le nuu o Noa (Mosaea 17).

    Na faaauau pea lo latou amioleaga.

    Na talitonu Alema ia Apinati (Mosaea 17:2–4).

    Na faamalosia Alema e sola ese.

    Taunuuga o le asiasiga lona lua a Apinati

    Na faaauau ona amioleaga tagata o Noa-Limae (Mosaea 19:2–20).

    Sa vaeluaina i latou (fuaiupu 2).

    Na latou fefinauai (fuaiupu 3).

    Na osofaia i latou e sa Lamana (fuaiupu 6–7).

    Na fasiotia le Tupu o Noa e ona lava tagata (fuaiupu 20).

    Na aveina faatagataotaua tagata i sa Lamana ma sa latou totogi atu le 50 pasene o saofaga ia sa Lamana (fuaiupu 15).

    Sa talitonu se vaega toaitiiti ia Alema (Mosaea 18:3–21).

    Na latou o atu e faalogologo i le talaiga a Alema (fuaiupu 4).

    Na aoaoina i latou e salamo ma ia faatuatua (fuaiupu 7).

    Na latou osifeagaiga ma le Atua (fuaiupu 8–11).

    Na latou sao mai i taumafaiga a le Tupu o Noa ia faaumatia i latou (fuaiupu 33–34).

    Lua tausaga mai le taimi na maliu ai Apinati (Mosaea 19:29)

    Na onosaia e le nuu o Limae le nofo pologa (Mosaea 19:22–20:22).

    Na latou onosaia le nofo pologa ma le 50 pasene o saofaga (19:22).

    Na osofaia e sa Lamana (20:7).

    Na latou tau e tetee atu i ai (20:8–11).

    Na latou talia le nofo pologa (20:22).

    Na manuia le nuu o Alema (Mosaea 23:2–5).

    Na faamalolosia i latou e le Alii (fuaiupu 2).

    Na latou fauina se aai (fuaiupu 5).

    O se vaitaimi na sosoo ai ma le lua tausaga (Mosaea 19:29)

    Na faateteleina le leaga o le tulaga o le nofo pologa (Mosaea 21:3–6).

    Ua fepo e sa Lamana i o latou alafau ma ua pule ia te i latou (fuaiupu 3).

    Na faaee atu e sa Lamana avega mamafa i le nuu o Limae ma tutuli i latou e pei o meaola (fuaiupu 3).

    Ua muimui tagata ona o o latou puapuaga (fuaiupu 6).

    Na faatolu ona sii taua atu le nuu o Limae ina ia faasaoina i latou ae na faiaina i ia taimi uma. E toatele na fasiotia ma sa matuai tele le faanoanoa (fuaiupu 7–12).

    Na faaauau pea ona filemu ma manuia le nuu o Alema (Mosaea 23:19–20).

    Na latou ola i le amiotonu (fuaiupu 14–15).

    Sa manuia tele i latou (fuaiupu 19–20).

    Faaauau ai pea i lena vaitaimi ina ua mavae le lua tausaga muamua

    Na salamo le nuu o Limae ma liliu atu i le Alii (Mosaea 21:7–14, 25–26).

    Sa faamalosia i latou ia lotomaulalo (fuaiupu 13–14).

    Na latou talia lo latou nofo pologa ma le sauaina (fuaiupu 13).

    Na latou tagi malosi atu ai i le Atua (fuaiupu 14).

    Na latou auina atu ni tagata e saili mai se fesoasoani i Saraemila (fuaiupu 25–26).

    Na faaauau pea ona filemu ma manuia le nuu o Alema.

    Na faaauau ai pea ina ua maea le lua tausaga muamua

    Na iu lava ina laveai i latou e le Alii mai le nofo pologa ia sa Lamana (Mosaea 21:15–22:16).

    Ua faatelegese ona faafofoga le Alii ia i latou, ae na Ia faamaluluina loto o o latou fili, lea na faamāmāina ai a latou avega (21:15).

    Sa lei laveaiina i latou i le taimi muamua (21:15).

    Na auauai ona latou manuia (21:16).

    Sa latou fesoasoani atu i isi (21:17).

    Sa latou osifeagaiga e auauna atu i le Atua (21:31).

    Na latou avatu uaina i leoleo a sa Lamana, ma ua momoe ai (22:7, 10).

    Ua latou sosola (22:11).

    Na faaauau pea le filemu ma le manuia o le nuu o Alema.

    c. 120–121 TLM. (Mosaea 22; 24, otootoga o mataupu )

    Taunuu le nuu o Limae i le laueleele o Saraemila (Mosaea 22:13).

    Na tuliloa atu e se au tau a sa Lamana le nuu o Limae (fuaiupu 15–16).

    Na oo le nuu o Alema i le nofo pologa ma le laveaiga mai le Alii (Mosaea 23–24).

    Na tau atu le au tau a Lamana lea na auina atu e tuliloa le nuu o Limae i tagata o Alema i le nuu o Helama (Mosaea 23:25).

    Na aveina atu le nuu o Alema e nofo pologa (Mosaea 24:8–10).

    Na tumau lo latou faatuatua ma le onosai (fuaiupu 10–16).

    Na faamama e le Alii a latou avega ma faamalolosia i latou (fuaiupu 14–15).

    Na laveaiina i latou e le Alii mai le nofo pologa ma aveina atu i le laueleele o Saraemila (fuaiupu 20).

  • Na faamalolosia le nuu o Limae ia latou manatua le Alii ao i ai i lo latou nofo pologa ia sa Lamana. Na malilie le nuu o Alema e salamo ina ua mavae le lapataiga lona lua a Apinati. O lea la, na faateleina ma faaumiumi ai ona puapuagatia le vaega a Limae. I ni nai tausaga mulimuli ane, na faamalamalama mai e Alema le Itiiti se mataupu faavae e fesoasoani tatou te malamalama ai i le eseesega o taunuuga na aafia ai nei vaega e lua: O nisi “ua faamaualalo toai … pe a faamaualaloina toai le tagata, e saili e ia le salamo” (Alema 32:13), ma “amuia i latou o e faamaualaloina i latou lava, a o lei faamaulaloina toai i latou” (fuaiupu 16).

Mosaea 21:13–14. O Le Lotomaualalo e Faamalosia ai lo Tatou Faalagolago atu i le Alii

  • Ina ua mavae le taumafaiga lona tolu e o ese mai lo latou nofo pologa, na iu loa ina liliu atu le vaega a Limae i le Atua i le lotomaualalo ma le tatalo ma saili mo se laveai mai Lona aao. O o latou aafiaga na faamalosia ai i latou e saili i le Alii ae aua le faalagolago i le malosi o le tagata (tagai i le Alema 32:13–16; tagai foi i le 2 Nifae 4:34).

    Na aoao mai Peresitene Ezra Taft Benson (1899–1994) o le lotomaualalo e faamalosia ai lo tatou faalagolago atu i le Alii: “E moni lava, o le lotomaualalo, e le o se faailoga lea o le palaai. O le lotomaulalo e le faapea o le matamuli. E mafai e se tagata ona lotomaualalo, malosi, ma lototoa. O le Perofeta o Iosefa o se faataitaiga lelei [o le lotomaulalo]. O le lotomaualalo o le faailoaina atu lea o lo tatou faalagolago i se mana e sili atu” (The Teachings of Ezra Taft Benson [1988], 369).

Mosaea 21:15. “Ua Faafofoga le Alii Ia Latou Tagi”

  • E ui lava ina sa faato ifo e le toatele o tagata o le nuu o Limae ia faigata i o latou lava luga, ae sa alofa ma tali mai le Alii i a latou tatalo. Na faamatalaina e le Perofeta o Iosefa Samita (1805–44) le alofa tunoa o le Alii i le tali mai i faanoanoaga na lagonaina e le Perofeta o se taunuuga o ana mea sese: “Ua ou toe manatua mea na tutupu i lou olaga, ma tuua ai au e faavauvau ma loimata maligi o le faanoanoa i au mea sese i le faatagaina o le fili o lo’u agaga e pulea au e pei ona sa ia faia i taimi ua tea. Peitai ua alofa tele mai le Atua ma ua ia faamagaloina au agasala, ma ou te fiafia ona sa ia auina mai le Faamafanafanaga i le toatele o e talitonu ma faamaualalo i latou lava i ona luma” (The Personal Writings of Joseph Smith, comp. Dean C. Jessee [1984], 238; ia laugatasia ia faailoga, sipelaga, ma mataitusi tetele).

Mosaea 23:21. “Na te Tofotofoina Lo Latou Onosai ma Lo Latou Faatuatua”

  • E ui lava ina salamo ma faatuatua tagata na mulimuli ia Alema, ae na faatagaina e le Alii ia tigaina i latou mo se taimi le tumau ia sa Lamana, ina ia faataunuuina ai le valoaga a Apinati (tagai i le Mosaea 12:1–5) ma avea o se tofotofoga o lo latou onosai ma le faatuatua. Na aoao mai Elder Orson F. Whitney (1855–1931) o le Korama a Aposetolo e Toasefululua, o mea uma tatou te oo i ai e aoao mai ai ni lesona aoga: “E leai se tiga tatou te mafatia ai, e leai se tofotofoga tatou te oo i ai e maumau. E fesoasoani tatou te aoao ai, i le atiina ae o uiga e pei o le onosai, faatuatua, lototoa ma le lotomaualalo. O mea uma tatou te puapuagatia ai ma mea uma tatou te onosaia, aemaise lava pe a tatou onosaia ma le faapalepale, e faatupuina ai o tatou uiga patino, faamamaina ai o tatou loto, faalautele ai o tatou agaga, ma avea ai i tatou o ni tagata e sili atu le agamalu ma alofa mama, ma agavaa atili e valaauina o fanau a le Atua … ma e ala mai i faanoanoaga ma mafatiaga, galuega mamafa ma tofotofoga, tatou te maua ai le aoaoina lea na tatou o mai iinei e maua ma faapea ona avea atili ai i tatou e pei o lo tatou Tama ma Tina oi le lagi” (sii mai i le Spencer W. Kimball, Faith Precedes the Miracle [1972], 98).

    Ata
    O le nuu o Alema o loo faia galuega faakamuta

    Jerry Thompson, © IRI

Mosaea 23–24. O Le Talafaasolopito o le Nuu o Alema

  • O mataupu e 23–24 o le Mosaea o se vaaiga i mea sa tutupu (tagai i le faamatalaga mo le Mosaea 9–22 i le itulau 149). O le talafaasolopito a Alema, mai le taimi na tuliesea ai i latou i le vao e tagata o le Tupu o Noa seia latou taunuu i Saraemila, na faaopoopoina i faamaumauga. O lenei vaaiga puupuu i mea sa tutupu ua aofia ai le tusa ma le 20 tausaga. A maea ona faitau e se tagata faitau mataupu e 23–24, ua toe foi uma atu tagata o Senifa ma tagata o Alema i Saraemila ma le Tupu o Mosaea (tagai i le siata “Toe tepa i mea na tutupu mai le Ominae e oo atu i le Mosaea” i le faaopoopoga, itulau 437).

Mosaea 24:13–15. “Ua Latou Gauai ma le Loto Fiafia ma le Onosai i le Finagalo Atoa o le Atua”

  • Afai tatou te faalagolago atoa atu i le Atua, ona mafai lea e Ia ona ave o tatou tapulaa ma o tatou vaivaiga ma faalautele e avea o ni malosiaga aoga mo Ana faamoemoega paia. Na faamalosiau mai Elder Richard G. Scott o le Korama a Aposetolo e Toasefululua, ia tatou faalagolago atu ma le fiafia i le Alii pe a tatou feagai ma luitau o lenei olaga:

    “O faafitauli po o tofotofoga i o tatou olaga, e tatau ona manatunatu i ai i se vaaiga o aoaoga faavae mai tusitusiga paia. A leai, o le a faigofie ona latou punitia la tatou vaai, taofia lo tatou malosi, ma faoa mai ia i tatou lo tatou fiafia ma le matagofie o loo faamoemoe le Alii tatou te maua i lenei lalolagi. O nisi tagata e pei lava o ni maa e tauai atu i totonu o se sami o faafitauli. Latou te malelemo ai lava. Ia [tatou] pei o se tapuni opeopea. Pe a lofia i se faafitauli, e tauivi ina ia saoloto ia manu ae e toe galue ma le fiafia. …

    “O loo tulimatai mai le Alii i lou tuputupu ae patino ma lou alualu i luma. O lena alualu i luma e faatelevaveina pe a e faatagaina ma le fiafia o Ia e taitaia oe i aafiaga uma e te tuputupu ae ai lua te fetaiai, e tusa pe o le taimi muamua e te fiafia i ai pe leai foi. Afai e te faatuatua i le Alii, pe a e naunau e tuu atu lou loto ma lou mafaufau e faaogatotonu i Lona finagalo, pe a e ole atu ina ia taitaiina oe e le Agaga e faia Lona finagalo, ua faamautinoaina atu ia te oe le fiafia sili i le ala ma le atamai e sili ona faamalieina mai lenei aafiaga i le olaga nei. Afai e te masalosalo i mea uma ua fai atu e te faia, po o lou teenaina foi o luitau uma e faalelelei, ua e faafaigataina foi mo le Alii ona faamanuia ia te oe [tagai i le 1 Nifae 3:7]” (i le Conference Report, Ape. 1996, 32–33; po o le Liahona, Iulai 1996, 28–29).

Manatu e Mafaufau Loloto i ai

  • Mafaufau i feagaiga o le papatisoga o loo tusia i le Mosaea 18:8–10. O le a se mea e mafai ona e faia i lenei vaiaso e te ola atoatoa ai i au feagaiga?

  • O a ni auala ua faamalosia ai lou faatuatua ona o tofotofoga?

  • E mafai faapefea ona fesoasoani le faataitaiga a Alema ma e na mulimuli ia te ia e te faatuatuaina ai le Togiola ma le mana o le Faaola?

Galuega Fautuaina

  • Sue se mau mo vaega taitasi o lo tatou togiolaina e ala i le Togiola a le Faaola e pei ona faamatalaina i le Mosaea 18:2, e aofia ai Lona mana, puapuaga, maliu, toetu, ma le afio a’e i le lagi. Atonu e te manao e tusi au mau e faatatau atu i ai i le itu avanoa o au tusitusiga paia i talaane o le Mosaea 18:2.

  • Suesue ma fai se aotelega o feagaiga o le papatisoga e pei ona faamatalaina e Alema i le Mosaea 18:8–10.

  • Ia telefoni atu, asiasi, pe tusi se tusi i se taitai perisitua, faiaoga, po o se faufautua o le Ekalesia na faafaileleina oe “i mea e uiga i le amiotonu” (Mosaea 23:18) ma faaali atu lou agaga faafetai ma lau molimau ia te ia.