O le a le mea e tupu i tagata pe a oti? Alema 40–42 o loo taulai atu i le apoapoaiga a Alema i lona atalii lotomaaa o Korianetona, o le na i ai se fesili faapea. I lona tali atu, sa aoao atu ai Alema e uiga i le lalolagi o agaga, o le faamasinoga, o le Toetu, o le tulafono o le toefuataiga, ma le faasalaga o e agasala. A o faaiu e Alema ana aoaoga ia Korianetona, sa ia taliina ai fesili e uiga i le mea e oo i ai le olaga pe a aunoa ma le salamo, agasala, tulafono, ma faasalaga. O tali a Alema i lona atalii ua fesoasoani tatou te malamalama ai i le fuafuaga o le fiafia ma le faamasinoga tonu ma le alofa tunoa o le Atua ma le ala e aafia ai lo tatou alualu i luma e faavavau.
Faamatalaga
Alema 40:4–10. “E Tusa le Faavavau ma le Aso e Tasi i le Atua”
Ina ua uma ona molimau atu ia Korianetona i le moni o le Toetu, sa faailoa atu e Alema le le mautinoa o le taimi o le Toetu e pei ona faatatau i tagata uma. O ia popolega e lei afaina lea ia Alema, aua na ia fai mai “e tusa le faavavau ma le aso e tasi i le Atua” (Alema 40:8). Sa faailoa mai e le Perofeta o Iosefa Samita (1805–44) ona o le Atua ua “faaali ai mea uma, o mea tuai, o mea o i ai nei, ma mea lumanai ma o i ai pea lava pea i luma o le Alii.” (MFF 130:7).
Sa faamalamalama mai e Elder Neal A. Maxwell (1926–2004) o le Korama a Aposetolo e Toasefululua le auala o loo faia ai mea i le ala a le Atua:
“Sa galue le Atua i le faaolataga a o le i taitai ona amataina ia aso o le olaga faaletino i luga o lenei lalolagi—ma o le a i ai pea o Ia i le galuega e tusa lava pe le toe i ai ni aso o le olaga faaletino (tagai i leMFF 88:110; Alema 40:8). …
“Ona o le alofa tunoa, o mea uma o le a faia i le ala a le [Atua] lava ia,’ ae le o ō tatou ala (MFF 104:16). O faamoemoega la o le Atua, o Lona onosai, o Lona mana, ma Lona alofa tele, lea na i ai i le galuega ae le i taitai i ai ni aso, o le a i ai foi i le galuega e tusa lava pe le toe i ai ni aso (tagai MFF 84:100; Alema 40:8).
“O nei upumoni ma isi o loo aofia i mea na ta’ua e Paulo ‘o mea loloto a le Atua’ (1 Korinito 2:10)” (A Wonderful Flood of Light [1990], 50, 58–59).
Sa saunoa mai foi le Perofeta o Iosefa Samita e faapea “na mafaufau loloto le Ieova sili i le aotelega o mea uma e tutupu e fesootai ma le lalolagi, e faatatau i le ata o le faaolataga, a o lei taavale mai i lona tulaga, pe a o lei taitai foi ‘pepese faatasi fetu o le taeao’ mo le fiafia; o le taimi tuanai, o le taimi nei, o le taimi lumanai na i ai ma ua i ai, faatasi ma ia, e tasi le ‘nei’ faavavau” (History of the Church, 4:597).
Alema 40:11. O Agaga o Tagata Uma “Ua Aveina Atu i Latou e Nonofo i le Maota o le Atua, o Le Na Foai Mai le Ola ia te i Latou”
Afai o le oti tatou te ulufale atu ai i le lalolagi o agaga, e le o le afioga tonu lea o le Atua, e faapefea la ona tatou malamalama i upu a Alema?
Sa faamalamalama mai e Peresitene Iosefa Filitia Samita (1876–1972) e faapea e le o le uiga tonu lea o le tala a Alema e toe aveina atu i tatou i le afioaga o le Atua: “O nei upu a Alema [40:11] e pei ona ou malamalama i ai, e le o faamoemoe e faailoa ai le manatu o agaga uma e toe foi atu i le afioaga o le Atua mo se tofiga i se nofoaga o le filemu po o se nofoaga o le faasalaga ma i ona luma e maua lo latou faasalaga taitoatasi. ‘Aveina atu i le maota o le Atua’ [faatusatusa Failauga 12:7] o le uiga faigofie lava o lo latou olaga faaletino ua faamutaina, ma ua latou toe foi atu i le lalolagi o agaga, lea ua tofiaina ai i latou i se nofoaga e tusa ma a latou galuega faatasi ai ma e amiotonu pe faatasi ai ma e amioleaga, o iina e faatalitali ai i le toetutu. ‘Toe foi atu i le Atua’ o se fuaitau lea e i ai se mea e tutusa ai i le tele o isi tulaga lauiloa. Mo se faataitaiga: o se alii sa faaaluina se taimi atofaina i se misiona i fafo atu. Pe a faamaloloina o ia ma toe foi atu i le Iunaite Setete, atonu na te fai mai, ‘Ua matagofie lava le toe foi mai i le aiga’; ia ae o lona aiga atonu o se mea o Iuta po o Idaho po o se isi vaega o Sisifo” (Answers to Gospel Questions, comp. Joseph Fielding Smith Jr., 5 vols. [1957–66], 2:85).
Sa faamalamalama mai e Peresitene George Q. Cannon (1827–1901) o le Au Peresitene Sili e faapea “e le o faamoemoe Alema e faailoa ai le manatu e faapea e aveina atu faavave i latou i le afioaga patino o le Atua. Sa ia faaaogaina ma le manino le fuaitau i se lagona talafeagai” (Gospel Truth: Discourses and Writings of President George Q. Cannon, sel. Jerreld L. Newquist [1987], 58).
Alema 40:11–15. O Le Mea e Nofo ai le Agaga i le Va o le Oti ma le Toetu Mai
O le faamaninoga o loo mulimuli mai e fesoasoani ia i tatou e malamalama ai i le tulaga o tino agaga pe a oti ma a o lumanai lo latou toetutu: “Pe a oti le tino faaletino, e faaauau pea ona ola le agaga. I le lalolagi o agaga, o agaga o ē amiotonu ‘e nonofo i le mea e fiafia ai, ua ta’ua o le parataiso, o le mea lea e mapu ai, o le mea e filemu ai, latou te malolo ai i o latou tiga uma, ma le popole uma, ma le faanoanoa’(Alema 40:12). O se nofoaga ua taua o le falepuipui o agaga ua atofaina mo ‘i latou o e na oti i le solitulafono, e aunoa ma se malamalama i le upumoni, pe ona o agasala, na latou teena ai perofeta’(MFF 138:32). O agaga i le falepuipui o loo ‘aoaoina i le faatuatua i le Atua, le salamo mai agasala, le faia o papatisoga sui mo e ua oti mo le faamagaloina o agasala, le mea foai fua o le Agaga i le faaee atu o lima, ma isi mataupu faavae uma o le talalelei sa tatau ona latou iloa’(MFF 138:33–34 ). Afai latou te taliaina mataupu faavae o le talalelei, salamo i a latou agasala, ma talia sauniga na faia mo i latou i malumalu, o le a taliaina i latou i le parataiso” (Faamaoni i le Faatuatua: O Se Tusitaiala o le Talalelei [2004], 122–123).
Ata
O le faaaliga na vaaia e Iosefa Samita o le malo selesitila
Na fesoasoani mai Peresitene Polika Iaga (1801–77) ia tatou malamalama atili i le eseesega o le nofoaga o le lalolagi o agaga ma le afioaga o le Atua: “Afai o le a e oti, o fea e te alu i ai? I le lalolagi o agaga. Pe e te alu i le fatafata o Aperaamo? Leai, e le latalata i se mea iina ae i le lalolagi o agaga. O fea o i ai le lalolagi o agaga? O loo iinei lava. Pe o faatasi agaga lelei ma agaga leaga” Ioe, o lea lava. Pe nonofo uma faatasi i le malo e tasi? Ioe, o lea lava. Pe latou te o i le la? Leai. Pe latou te o i tala atu o tuaoi o le lalolagi ua faatulagaina? Leai, latou te le o. E aumai i latou i luga o lenei lalolagi” ( Discourses of Brigham Young, sel. John A. Widtsoe [1954], 376).
Sa saunoa Alema e uiga i le Uluai Toetu e fesootai i le taimi faalelalolagi. O le a muamua ona toetu mai Iesu Keriso, sosoo ai ma e amiotonu o e na ola ma oti mai le amataga o aso mo lo tatou lalolagi faaletino e oo lava i le taimi o le toetu o Keriso (tagai Alema 40:16, 20; MFF 133:54–55). O le toetu lea na ta’ua e Alema o le Uluai Toetu.
Sa faamalamalama mai e Peresitene Iosefa Filitia Samita le Uluai Toetu e aofia ai taimi eseese ma mea na tutupu ai:
“E ui lava sa i ai se toetutu lautele o e amiotonu i le taimi o le toetu mai o Keriso ai e ua oti, e masani lava mo tatou le talanoa i le toetutu o e amiotonu i le Afio Mai Faalua o Keriso o le uluai toetu lena. O le uluai toetu lena ia i tatou, aua e laitiiti lava so tatou manatu po o se popolega i lena mea ua tuanai. Sa folafola mai e le Alii e faapea i le taimi o lona Afio Mai Faalua o le a tatalaina ai tuugamau, ma o ē amiotonu o le a ō mai e nofotupu faatasi ma ia i le lalolagi mo se afe o tausaga. …
“I le taimi o le afio mai [faalua] o Keriso, ‘O i latou na momoe i o latou tuugamau o le a o mai, aua o le a tatalaina o latou tuugamau; ma aveina ae i latou e fetaiai ia te ia i le tutotonu o le lagi—E ō Keriso i latou o faapolopolo o ē muai o ifo ma ia, atoa ma i latou o i le lalolagi ma i ō latou tuugamau, o e aveina ae muamua e faafetaiai ia te ia; ma fai foi nei mea uma le leo ilia o le pu a le agelu a le Atua. [MFF 88:97–98]. O i latou ia o i latou lava ua tusia o latou igoa i le lagi, i le mea e faamasinoina tagata uma e le Atua ma Keriso. O i latou ia o tagata amiotonu ua faaatoatoaina ia Iesu le puluvaga o le feagaiga fou, o le na faia lenei togiola atoatoa i le faamaligiina o lona lava toto’[MFF 76:68–69].
“E mulimuli mai i lenei mea maoae e tupu, ma pe a uma ona fetaiai le Alii ma e amiotonu ma o mai i le lalolagi, ona oo mai ai lea o le isi toetu. Atonu e mafai ona mafaufau i lenei toetu o se vaega o le uluai toetu, e ui lava e mulimuli oo mai. I lenei toetutu o le a o mai ai i latou i le faatulagaga terasitila, o ē e le o agavaa e fetaiai ma ia, ae o e ua agavaa e o mai e olioli i le nofotupu o le meleniuma” (Doctrines of Salvation, comp. Bruce R. McConkie, 3 vols. [1954–56], 2:295–97).
Sa tuuina mai e Elder Bruce R. McConkie (1915–85) o le Korama a Aposetolo e Toasefululua le faamalamalamaga o loo mulimuli mai e faatatau i le Uluai Toetutu, lea foi e faasino i ai o le Toetutu o e Amiotonu ma o le Toetu o le Ola: “O i latou o e o mai i le taeao o lenei toetutu e toetutu mai i tino selesitila ma o le a maua se mamalu selesitila; o i latou ia o e faapolopolo o Keriso. O i latou o e o mai i le aoauli o lenei toetutu e toetutu mai i tino terasitila ma o lea o le a maua ai lena malo; ua faamatalaina i latou o ē ua au faatasi ma Keriso i lenei oo mai. O i latou uma ua toetutu e oo mai i lenei taimi ua maua o latou tino selesitila; o le toetutu mai o tagata terasitilia e le amataina sei iloga e uma le Afio Mai Faalua. (MFF 76:50–80 ; 88:95–99.)” (Doctrinal New Testament Commentary, 3 vols. [1971–73], 1:196).
Sa ta’ua e Elder Dallin H. Oaks o le Korama a Aposetolo e Toasefululua le toafimalie e maua i le iloa, o le a faaleleia ni faaletonu i le Toetu.
“E maeu le toafimalie o se lagona i le iloa lea, o i latou uma sa i ai ni tulaga faaletonu i le olaga talu ona fananau mai, po o ni manuaga, o faamai, po o le faaletonu ona o le tulaga faanatura o le soifua ua afu, o le a toetutu mai i se ‘tino e tatau ai ma le atoatoa’ …
“O le mautinoa o le toetu tatou te maua ai le malosi ma le faamoemoe e onosaia ai luitau o le olaga tatou te feagai, ma i latou tatou te alolofa i ai, o mea e pei o tulaga le atoatoa faaletino, o le mafaufau po o lagona ia tatou te o mai ma i tatou ina ua fananau mai, pe oo mai foi i le gasologa o le olaga. Ona o le toetu, ua tatou iloa ai o nei faaletonu faaletino, ua na o se taimi le tumau!”( i le Conference Report Ape. 2000, 16–17; po o leLiahona, Iulai 2000, 18).
E i ai se saunoaga a Iosefa F. Samita (1838–1918) o loo mulimuli mai e fesootai i le le atoatoa o le tino i le Toetu: “O le a aveesea tulaga faaletonu ma lē atoatoa; o le a leai ni faaletonu, o le a maua e alii ma tamaitai le atoatoa o o latou agaga, o le atoatoaga na fuafuaina e le Atua i le amataga. O lona faamoemoega lea ina ia avea alii ma tamaitai, o lana fanau, e avea ma suli o le Atua, ma suli faatasi ma Iesu Keriso, ia atoatoa, e le gata i la le tino ae faapea foi i la le agaga, e ala i le usiusitai i poloaiga na ia saunia ai le ala e oo mai ai le atoatoa i ana fanau uma” (Gospel Doctrine, 5th ed. [1939], 23).
Alema 40:26. “E oo Mai le Oti Matautia i ē Amioleaga”
E fesoasoani le faamatalaga lenei tatou te malamalama ai i le mea o loo faasino i ai lenei “oti matautia”: O nisi taimi e talanoa mai tusitusiga paia i le faaolataga mai le oti faalua. O le oti faalua o le oti faaleagaga mulimuli—ua vavaeeseina mai le amiotonu ma lē maua ai se nofoaga i soo se malo lava o le mamalu (tagai Alema 12:32; MFF 88:24). E le oo mai lea oti faalua seia oo i le Faamasinoga Mulimuli, ma o le a oo mai i nai tagata toaitiiti (tagai MFF 76:31–37). E toeitiiti lava o tagata uma e ola i luga o lenei fogaeleele e mautinoa le faaolaina mai le oti faalua (tagaiMFF 76:40 –45)” (Faamaoni i le Faatuatua, 56).
E pei lava o nisi tagata i nei aso, atonu o tau mafaufau Korianetona pe aisea ua taua ai lava le ola amiotonu pe afai ua maua uma e tagata ia faamanuiaga o le toetu. O loo talanoa le Alema 41 i nei popolega.
Mo fanau a le Tama Faalelagi, o le taunuuga o le tulafono o le toefuataiga e faalagolago i lo latou faatuatua i le Tausiga o Ana poloaiga. O lea na faamalamalama atu ai e Alema ia Korianetona e aua le faapea “e toe faatuina ai le agasala i le fiafia” (Alema 41:10). E uiga tutusa foi ma le tulafono o le seleselega: o mea tatou te luluina, o mea lava ia tatou te seleseleina (tagai Kalatia 6:7; MFF 130:20–21). Sa faamalosiau atu Alema i lona atalii e “fai mea lelei e le aunoa” ina ia mafai ai ona “toe tauia ai oe i le lelei. Aua o le mea e te auina atu e toe foi mai lea ia te oe, ma toefuataiina” (Alema 41:14–15).
Sa aoao atu foi e Alema lona atalii i le tulafono o le toefuataiga lea e saunia ai mo se toe faaleleiga atoatoa o le tino i le toetutu: “E toe tuuina atu le agaga i le tino … ; ioe, e leai lava se lauulu e tasi e leiloa” (Alema 40:23). E ui i lea, o le tikeri o le mamalu o le tino toetu e faalagolago lea i le tulaga o le faamaoni o tagata taitoatasi (tagai MFF 88:28–32 ).
O le fautuaga o loo mulimuli mai e toe faamalosia ai le taua o le sailia o le fiafia e ala i le ola i tulaga faatonuina o le talalelei:
E toatele tagata ua latou taumafai e saili le fiafia ma le faamalieina i gaoioiga e le tusa ai ma poloaiga a le Atua. O le le amanaiaina o le fuafuaga a le Atua mo i latou, ua latou teena ai le punavai o le fiafia moni. Ua latou gauai atu i le tiapolo, o lē ‘saili ina ia malaia tagata uma e pei o ia lava’(2 Nifae 2:27). E le pine ae latou iloa le moni o le lapataiga a Alema i lona atalii o Korianetona: ‘O le amioleaga e le o le fiafia lea’ (Alema 41:10). …
“A o e saili ia e fiafia, ia manatua ua na o le pau lava le ala i le fiafia moni o le ola ai i le talalelei. O le a e maua le fiafia faavavau filemu a o e taumafai e tausi poloaiga, tatalo mo le malosi, salamo i au agasala, auai i gaoioiga lelei, ma tuuina atu auaunaga aoga. O le a e iloa ai e maua le fiafia i totonu o tuaoi ua uma ona faatulagaina e se Tama alofa o i le Lagi. (Faamaoni i le Faatuatua, 70).
Sa faamalamalama mai e Elder L. Tom Perry o le Korama a Aposetolo e Toasefululua le faamoemoega o le olaga faataitai ua ta’ua o le olaga faaletino: “O le faamoemoega autu o le olaga i le lalolagi, ia mafai e o tatou agaga ia sa ola a o le’i i ai le lalolagi, ona tuu faatasia ma o tatou tino mo se vaitaimi o avanoa maoae i le olaga faaletino. O le tuu faatasia o ia mea e lua ua tatou maua ai le avanoa e tuputupu ae ai, atiina ae ma matutua ai faalemafaufau, lea e na o le tuufaatasia lava o le agaga ma le tino e mafai ai e i tatou. E oo o tatou tino i se vaitaimi faapitoa e tofotofoina ai, lea e ta’u o se vaitaimi faataitai o lo tatou olaga. O le taimi lea e aoao ma tofotofoina ai ia faamaonia atu ai i tatou lava ia agavaa mo avanoa e faavavau. O se vaega atoa lea o le fuafuaga paia a lo tatou Tama mo Ana fanau” (i le Conference Report, Ape. 1989, 16; po o le Liahona, Iul. 1989, 16–17).
A o avea o se tasi o Fitugafulu, na faaopoopo mai ai Elder Ronald E. Poelman e faapea o le olaga faaletino o se taimi lea e aoao ai i mea tuu faafeagai ma filifili ai i le va o na mea: “O le ata o le faaolataga na tuuina mai ma talia e i tatou i o tatou muai olaga e aofia ai ma se vaitaimi e faataitai ai i le lalolagi, lea tatou te oo ai i mea tuu faafeagai, faia ai filifiliga, aoao ai iuga e oo i ai ma saunia ai e toe foi atu i le afioaga o le Atua. O le oo i mea faigata o se vaega taua lea o le faasologa. I lo tatou iloa o nei mea uma, na filifili ai i tatou e o mai i le olaga faaletino. (tagai 2 Nifae 2:11–16.)” (i le Conference Report, Ape. 1989, 29; po o le Liahona, Iul. 1989, 28 29).
Sa faamaea le saunoaga a Elder William R. Bradford o le Fitugafulu o le faamoemoega o le olaga faaletino o le avea lea e pei o lo tatou Tama o i le Lagi: “O lenei olaga o se olaga faataitai. O se meaalofa ofoofogia o taimi lea e mafai ona tatou aoao ai ina ia avea e pei o lo tatou Tama Faalelagi e ala i le mulimuli i aoaoga a Lona Alo, o Iesu Keriso. O le ala o loo Ia taitaiina atu ai i tatou e le o se ala gaogaosa. O se ala faigofie ma le sa’o ma ua faamalamalamaina e le Agaga” (i le Conference Report, Ape. 1992, 40; po o le Liahona, Iul. 1992, 35).
Alema 42:11–31. O Tulafono o le Faamasinoga Tonu ma le Alofa Tunoa
Sa faamalamalama mai e Peresitene Boyd K. Packer, o le Peresitene o le Korama a Aposetolo e Toasefululua, e faapea o le taulaga a le Faaola ua mafai ai ona tatou maua le alofa tunoa e aunoa ma le solia o le tulafono o le faamasinoga tonu:
“O loo ola i tatou taitoatasi i se ituaiga o aitalafu faaleagaga. E i ai se aso o le a tapunia ai lea aitalafu, ma manaomia ai le totogiina atoa. Ae ui i lea, atonu tatou te vaai faatauvaa i ai i le taimi nei, ae a oo mai lena aso ma o le a faataunuuina, o le a tatou fetilotilofai ma le naunau mo se tasi ma soo se isi lava e fesoasoani mai ia te i tatou.
“Ma e tusa ai ma le tulafono e faavavau, e le mafai ona faaalia le alofa tunoa vagana ua i ai se tasi o le ua i ai le naunau ma e mafai ona ia tauaveina a tatou aitalafu ma totogi le tau, ma faia se fuafuaga mo lo tatou togiolaina.
“Vagana ua i ai se puluvaga, vagana ua i ai sa tatou uo, ma le tulaga atoatoa o le faamasinoga tonu, o le a leai se alofa i o tatou luga. O le tulaga atoatoa mo le faaleleia o la tatou soligatulafono, e tusa lava pe itiiti, po o le a le tele, o le a faamalosia mai ia i tatou le totogi e oo i ona o’oo’oga.
“Ae ia iloa le mea lenei: O Upumoni, o upumoni paia, o loo folafola mai ai o loo i ai se Puluvaga.
Ata
O le fua o loo faaali mai ai le faamasinoga tonu
Faamasinoga Tonu
“‘Aua e toatasi le Atua, e toatasi foi le puluvaga i le Atua ma tagata, o le tagata o Keriso Iesu lea.’ (1 Tim. 2:5.)
“E mafai e ala mai ia te Ia ona matua faailoa mai le alofa mutimutivale ia i tatou taitoatasi e aunoa ma le solia ai o le tulafono e faavavau o le faamasinoga tonu.
“O lenei upumoni o le faavae autu lea o aoaoga faa-Kerisiano. …
Ata
O fua o loo faaalia ai le faamasinoga tonu ma le alofa mutimutivale
Faamasinoga Tonu
Alofa Mutimutivale
“O le maua o le alofa mutimutivale e le otometi. E maua le alofa mutimutivale e ala i le osigafeagaiga ma Ia. O aiaiga la a Ia, o Ana aiaiga alofa, lea e aofia ai o se tulaga tatau le papatisoga o le faatofuina mo le faamagaloina o agasala.
“E mafai ona puipuia fanau uma a tagata i le tulafono o le faamasinoga tonu, ma o le taimi lava foi lea e mafai ai e i tatou taitoatasi ona maua ia faamanuiaga o le togiolaina ma le faamagaloina o le alofa mutimutivale” (mai le Conference Report, Apr. 1977, 80; po o le Liahona, Oketopa 1977, 56–57).
Sa faasoa mai e Elder Neal A. Maxwell lenei malamalamaaga: O le amiotonu ma le alofa mutimutivale o le Atua, semanu e iloagofie i le faamasinoga mulimuli pe a leai ni faitioga, e aofia ai ma i latou na fesiligia le amiotonu ma le alofa mutimutivale o le Atua ma mea sa tuuina atu i ai i la le tino (tagai 2 Nifae 9:14–15; Alema 5:15–19; 12:3 –14 ; 42:23–26, 30)” (i le Conference Report, Ape. 2000, 92; po o le Liahona, Iulai 2000, 88).
Sa faamalamalama mai e Peresitene Boyd K. Packer le taua e mafai ona maua e le tiga o le lotofuatiaifo:
“O lo’u faamoemoega le faafilemuina o le tiga o i latou o e o loo mafatia mai lagona lē manuia o le tausalaina. Ua pei a’u o le fomai o le a amataina le togafitiga i le faapea atu, ‘Ia, atonu e tiga laitiiti. …’
“Atonu ua tofu tofo i tatou i le tiga o le lotofuatiaifo e mulimuli mai i a tatou mea sese.
“Fai mai Ioane, ‘Afai tatou te faapea, e leai sa tatou agasala, ua sese i tatou ia i tatou, e le o i totonu ia te i tatou le upu moni’[1 Ioane 1:8]. Ona ia faapea mai lea ma le malosi atu: ‘Pe afai tatou te faapea, tatou te le’i agasala, ua tatou fai ai [le Alii] ma pepelo, e le o i totonu ia te i tatou lana afioga’[1 Ioane 1:10].
“O i tatou uma lava i nisi taimi, ma nisi o i tatou i le tele o taimi, e mafatia i le tiga o le lotofuatiaifo mo mea sese na tatou faia po o mea e le’i faia. O lena lagona o le tausalaina e mo le agaga pei o le tiga i le tino faaletino. …
“Tatou te faia uma lava mea sese. O nisi taimi tatou te faatiga ai ia i tatou lava ma matuai faamanualia isi i ni auala tatou te le mafaia ona toe fonofono. Tatou te faaleagaina ni mea e le mafai e i tatou lava ona toe faaleleia. O iina la i lo tatou lava natura e lagonaina ai le tausalaina ma le faalumaina ma le mafatia, lea e le mafaia e i tatou lava ona togafitia. O iina la o le a fesoasoani mai ai loa le mana faamalolo o le Togiola.
“Na fetalai le Alii, ‘Aua, faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo [MFF 19:16]” (i le Conference Report, Ape. 2001, 27–28; po o leLiahona, Iul. 2001, 26–27).
Na saunoa Peresitene Spencer W. Kimball (1895–1985) i le taua o se lotofuatiaifo a’ia’i: “Faauta i le matagofie ona e tatau i le Atua ona faamanuiaina i tatou i lenei malamalama ua avea ma taiala malosi tatou te ta’ua o le lotofuatiaifo! Fai mai se tasi tagata ‘o le lotofuatiaifo, o se malosi faaselesitila ua tuuina e le Atua i totonu o tagata uma mo le faamoemoega o le faasaoina o lona agaga.’ E moni o le mea lea e faapupulaina ai le agaga i le iloa o le agasala, e uunaia ai le tagata ia tonu lona mafaufau e suia lona olaga, tausalaina o ia i le solitulafono e aunoa ma lona faaufiufi o le mea sese, naunau e faafeagai ma mea moni, faafetaiaia o mea ua aliali mai ma totogi le faasalaga— a lē ia te ia lenei mafaufau, e lei salamo. O le salamo, o se ala lea, o le lafoaia o le mea sese na fai, o se amataga, ma e faigata i se tasi ona amata lana laasaga po o le ala i le salamo, vagana ua faagaoioia le lotofuatiaifo e uunaia ai o ia e faataunuu lea tulaga, a i ai pea le ‘alofaga ma le faaufiufi ua le o i ai o ia i le ala o le faamagaloga. O le uiga lea o le tala a Alema i lona atalii o Korianetona ‘o lea ua na o e salamo faamaoni e faaolaina ai.’ (Al. 42:24.)” (O Le Vavega o le Faamagalo Atu [1969], 153).
Sa tuuina mai e Peresitene Gordon B. Hinckley (1910–2008) le molimau lea o loo mulimuli mai i le maoae o le taulaga togiola lea ua mafai ai ona Toetutu:
Ata
Faasatauroga o Keriso
Paul Gustave Dore
“O le faatinoga maoae o Lona alofa na oo mai i Lona maliu ina ua Ia tuuina atu Lona soifua e taulagaina mo tagata uma. O lena Togiola, sa faataunuuina i tiga e le mafaamatalaina, ua avea ma mea aupito sili na tupu o le talafaasolopito, o se faatinoga o le alofa tunoa lea e lei tuuina atu ai e tagata se mea e tasi ae ua aumaia ai le faamautinoaga o le Toetu i tagata uma sa soifua pe o le a soifua mai i le fogaeleele.
“E leai lava se isi mea i le talafaasolopito o le tagata e faatusa i ai. E leai se isi mea ua tupu e mafai ona faatusalia i ai. O le matua leai o se manatu faapito faatasi ai ma le alofa le faatuaoia mo tagata uma, na avea ai ma se aga e le mafaatusalia o le alofa mutimutivale mo le lalolagi.
“O le Toetu i lena uluai taeao o le Eseta na oo mai ai le tautinoga manumalo o le tino ola pea. Na tautino moni mai e Paulo, ‘Aua e faapei ona oti uma ia Atamu, e faapena foi ona faaolaina uma ia Keriso’ (1 Korinito 15:22). E le gata na Ia tuuina mai le faamanuiaga o le Toetu i tagata uma, ae ua tatalaina foi le ala i le ola e faavavau ia i latou o e tausia Ana aoaoga ma poloaiga” (i le Conference Report, Oke. 1999, 92; po o le Liahona, Ian. 2000, 87).
Manatu e Mafaufau Loloto i ai
Aisea e le mafai ai lava ona oo atu le amioleaga i le fiafia? Aisea i nisi taimi e foliga mai ai o loo fiafia tagata amioleaga?
O le a se mea e tatau ona tatou faia e faaaoga ai le Togiola a le Faaola ia i tatou?
E faapefea ona faaaoga ia te oe le faamasinoga tonu?
E faapefea ona aoga ia te oe le tulafono o le alofa tunoa?
Galuega Fautuaina
Ia saunia ma pe a mafai e tuuina atu se tautalaga puupuu e uiga i le lalolagi o agaga e faaaoga ai ni taiala se lua pe sili atu mai le Alema 40–42.
O le a le mea na aoao atu e Alema i lona atalii o Korianetona e uiga i le toetu?
Ia tusi se faauigaga puupuu po o se faamalamalamaga mo mea taitasi ia: o le tulafono o le toefuataiga, le tulafono o le faamasinoga tonu, le tulafono o le alofa tunoa.