Alema 23–29

Folasaga

Sa manino le faailoa mai e Aneti-Nifae-Liae le suiga malosi tele e oo mai i luga o tagata taitoatasi o ē taliaina le talalelei ma osifeagaiga e mulimuli ia Iesu Keriso. Sa latou tuuina mai se faataitaiga o le liua atoatoa loloto lea e sau mai se taumafaiga faamaoni e faataitai i le Faaola i vaaiga uma o le olaga. E faatasi ai ma le au Sa Lamana ua liliu mai, o atalii o Mosaea ma Alema sa faaali foi le mana faaleagaga lea e sau mai le manao faifai pea e salamo, ia tausia feagaiga, ma ia auauna i le Alii e ala i galuega faafaifeautalai ma le ola amiotonu. A o e suesueina leAlema 23–29, ia tagai mo faatinoga maoti ma uiga ia o le a fesoasoani ai ia te oe e faalolotoina le malosi o lou liua patino lava ia. Ia tagai foi i faamatalaga e tele o le olioli ma le faafiafiaina lea e sau ona o se taunuuga o le punouai i le faasoaina atu o le talalelei i isi.

Faamatalaga

Alema 23:1–5. “Ia Leai se Faalavelave i le Afioga a le Atua”

Sa aveeseina e le tupu o Sa Lamana ia tapu ia sa taofia ai le talalelei mai le aoaoina i lona nuu, ma o atu ai loa faifeautalai ma talai atu i le laueleele atoa. Sa faatusatusa mai e Peresitene Thomas S. Monson se mea foi faapea na tupu a o ia faamatalaina ia tulaga na lagolagoina le faaiuga a le Malo Temokalasi o Siamani (German Democratic Republic) lea na faatagaina ai faifeautalai e talai i lena laueleele ina ua mavae tausaga e tele o le tapu o gaoioiga a le Ekalesia:

“O la matou sini faamoemoeina, o le sailia lea o se faatagaga e tatala ai le faitotoa mo galuega faafaifeautalai. Sa feiloai muamua la matou aumalaga o Elder Russell M. Nelson, Elder Hans B. Ringger, ma au, faapea ai ma taitai o le Ekalesia i le Malo Temokalasi o Siamani o Peresitene Frank Apel ma Peresitene Manfred Schutze, ma le Failautusi o le Malo mo Mataupu Tau Lotu, o Kurt Löffler, i se taumafataga matagofie lava e tali ai i matou. Sa ia saunoa mai ia i matou e faapea, ‘Matou te fia fesoasoani atu ia te outou. Ua luasefulu nei tausaga o matou matauina outou ma o outou tagata. Ua matou iloa ua outou ola e tusa ma mea ua outou aoaoina: o ni alii ma ni tamaitai faamaoni.’

“Sa auai i le faapaiaga o le falesa [nofoaga autu] o le siteki i Dresden ma le falesa i Zwickau taitai o le malo ma o latou faletua. A o pepese le Au Paia i upu, ‘Ia tu Ieova i lo tatou va se’ia tatou toe feiloai’}‘Auf Wiedersehen, Auf Wiedersehen’—sa matou manatua o ia, le Alii o le Filemu, o le na maliu faalavaau i le satauro i Kalevario. Sa ou mafaufau i lo tatou Alii ma le Faaola, i lona savalia o le ala tiga, le ala o loimata maligi, le ala o le amiotonu. Sa oo ina oo mai i lou mafaufau lana folafolaga ootia: ‘Ou te tuuina atu ia te outou le manuia; o lou manuia ou te avatu ia te outou; ou te le avatu ia te outou e faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27).

“Ona matou toe foi atu lea i Perelini mo se fonotaga taua ma le ao o le malo, le susuga i le Taitaifono o Erich Honecker.

“… Sa oo ina avatu i matou i ofisa o sui sinia faitaulia o le malo.

“I tala atu o le faitotoa matagofie e ulufale atu ai i le fale, sa faafeiloai ai i matou e le Taitaifono o Honecker. Sa matou tuu atu ia te ia se faatagata ua faaigoaina O Le Laa Muamua, o se faatusa o se tina o loo fesoasoani atu i lana tama e fai lana laa muamua agai i lona tama. Sa fiafia lava o ia i le meaalofa. Ona ia ave lea o i matou i lona ofisa na o ia ma tagata na te valaaulia e ave i ai. O iina sa faanonofo ai i matou faataamilo i se laulau lapotopoto tele lava. O isi sa i ai i le laulau o le Taitaifono o Honecker ma ana au ofisa lagolago o le malo.

“Ona saunoa mai lea o Taitaifono Honecker e faapea, ‘Ua matou iloa e talitonu tagata o le tou Ekalesia i le galue; ua outou faamaonia lena mea. Ua matou iloa o outou o ni tagatanuu lelei o soo se atunuu o loo outou i ai; ua matou matauina lena mea. Ua tuu atu ia te outou le avanoa. Ia faailoa mai ō outou manaoga.’

Ata
Faatalitali i le laina i le Malumalu o Freiberg Siamani

“Sa ou faapea atu, ‘Taitaifono Honecker, i le faapaiaga ma le faletatala mo le Malumalu i Freiberg, e 89,890 tagata o lo outou atunuu sa tutu i laina, o nisi taimi e fa itula, i nisi taimi i le timu, ina ia mafai ona latou vaai i se Maota o le Atua. I le aai o Leipzig, i le faapaiaga o le falesa o le siteki iina, e 12,000 tagata sa auai i le faletatala. I le aai o Dresden e 29,000 tagata na asiasi atu i ai; a o le aai o Zwickau e 5,300. O vaiaso taitasi o le tausaga e 1,500 i le 1,800 tagata e asiasi atu i le lotoa o le malumalu i le aai o Freiberg. Ua latou fia iloa mea ua matou talitonu i ai. Matou te fia ta’u atu ia i latou matou te talitonu i le faamamaluina ma le usiusitai ma le lagolagoina o tulafono o le atunuu. Matou te fia faamatala atu lo matou naunau e fia maua ni aiga malolosi. Ua na o se lua lea o o matou talitonuga. E le mafai ona matou talia fesili a tagata, ma e le mafai ona matou faamatala atu o matou lagona, ona e leai ni a matou faifeautalai iinei e pei o isi atunuu. O alii ma tamaitai talavou matou te mananao e o mai i lo outou atunuu o ni faifeautalai o le a fiafia i lo outou atunuu ma alolofa i o outou tagata. Ae sili atu i lena, o le a latou tuua se uunaiga tamalii i o outou tagata. Matou te fia vaai foi i tama ma teine talavou mai lo outou atunuu o e ua auai i la matou Ekalesia, ua auauna atu i le tele o atunuu, e pei o Amerika, o Kanata, ma le tele o isi atunuu. O le a latou foi mai ua saunia lelei e tauaveina tiute faaletaitai i lo outou atunuu.’

“Ona saunoa lea o Taitaifono Honecker pe tusa ma le tolusefulu minute, ma faamatala mai ona faamoemoega ma ona manatu ma auiliili mai le alualu i luma o lona atunuu. Ina ua maea, sa ia silasila mai ma le fofoga fiafia ma saunoa mai ia te au ma le matou aumalaga, ua faapea mai, ‘Matou te iloa outou. Matou te faatuatuaina outou. Ua matou galulue faatasi ma outou. Ua taliaina la outou talosaga mo faifeautalai.’

“Na pei e lele ese atu lou agaga mai le potu. Ua maea le fono. Ina ua matou tuua ofisa matagofie o le malo, sa liliu mai Elder Russell Nelson ia te au ma faapea mai, “Silasila foi i le ati mai o le susulu o le la i lenei potu. E pei lava ua fetalai mai lo tatou Tama Faalelagi, “Ua ou fiafia.”’

“Ua mavae atu le pogisa uliuli o le po. Ua gafoa mai le malamalama susulu o le ao. O le a avatu nei le talalelei a Iesu Keriso i le miliona ma miliona o tagata o lena atunuu. O le a talia a latou fesili e uiga i le Ekalesia, ma o le a agai i luma le Malo o le Atua.

“A o ou toe mafaufau i ia mea na tutupu, sa liliu ou mafaufauga i fetalaiga a le Matai e faapea, ‘E leai se mea e faia e tagata e tausuai ai le Atua, pe faatupuina ai lona toasa i nisi, tau lava o e le tautino atu e i ai lana pule i mea uma’ (MFF 59:21). Ou te tautino atu le i ai o le aao o le Atua e faatatau i mea na tutupu faavavega e uiga i le Ekalesia i le Malo Temokalasi o Siamani (i le Conference Report, Ape. 1989, 68–69; po o leLiahona, Iul. 1989, 68–69).

Alema 23:6. Ua Liua i le Atua ma ua Le Toe Liliu Ese Lava

E maoae lava ona e leai ma se tasi o Aneti-Nifae-Liae na toe alu ese ma le Ekalesia pe na toe vaivai (tagai Alema 27:27). Sa faamamafa soo mai lava e Peresitene Gordon B. Hinckley (1910–2008) le taua o le faatumauina o tagata fou liliu mai. Sa ia saunoa mai e leai ma se uiga e faia ai galuega faafaifeautalai sei iloga e tumau le malosi o na tagata liliu mai:

Ata
Ua tanumia e Aneti-Nifae-Liae ia pelu

Del Parson, © 1982 IRI

“O le faateleina o le galuega faafaifeautalai i le lalolagi atoa, ua tatau ai ona faapena le faateleina o le taumafaiga ina ia maua e uso liliu mai taitoatasi le lagona lelei i lana uarota po o le paranesi. E lava tagata o le a o mai i le Ekalesia i lenei tausaga e faatuina ai nisi siteki talafeagai fou e silia ma le 100. O le mea e faanoanoa ai, i lenei saoasaoa o le liliu mai, o loo tatou tuulafoaia nisi o uso fou. Ou te faamoemoe, o le a faia se taumafaiga tele i le Ekalesia atoa, i le lalolagi atoa, ina ia faatumauina uso uma ua liliu mai i le Ekalesia.

“O se mataupu tuga lenei. E leai se uiga o galuega faafaifeautalai, sei vagana ua tatou taofi mau i fua o a tatou taumafaiga. E tatau ona le tuu mavaevaeina ia mea e lua” (i le Conference Report, Oke. 1997, 69–70; po o le Liahona, Ian. 1998, 62).

Alema 23:17. O Le A Le Uiga o le Igoa o Aneti-Nifae-Liae ?

O le igoa o Aneti-Nifae-Liae e mafai ona faailoa ai le tuufaatasia o tagata o Nifae ma i latou o e na mulimuili atu ia te ia faatasi ai ma isi fanau a Liae: “O le igoa ‘Aneti’ o le ‘Aneti-Nifae-Liae’ atonu o se faatusa o le upu Aikupito o lenty ‘o ia, o le tasi o le.’ O lea, nai lo le i ai o se lagona ‘tetee,’ e i ai le uiga ‘o le tasi o le aiga o Nifae ma Liae’” (Stephen D. Ricks, “Anti-Nephi-Lehi,” in Dennis L. Largey, ed., Book of Mormon Reference Companion [2003], 67).

Alema 24:10. Aveeseina le Tausalaina e ala i le Togiola

Sa molimau mai Peresitene Boyd K. Packer, o le Peresitene o le Korama a Aposetolo e Toasefululua, e mafai ona tatou faaaogaina le Togiola a Iesu Keriso e aveesea ai lo tatou tausalaina:

“E i ai se mafuaaga, tatou te manatu ai o le Togiola a Keriso e faatatau lea i le na o le mutaaga o le olaga faaletino ina ia faaolaina ai mai le Pau, mai le oti faaleagaga. E sili atu nai lo lena. O se mana e i ai pea e valaau atu i aso uma o le olaga. Pe a tatou tigaina pe atuatuavale pe puapuagtia ona o le tausalaina po o le mafatia i le tiga, e mafai ona Ia faamaloloina i tatou. E ui tatou te le o malamalama atoatoa i le auala na faia ai le Togiola a Keriso, ae mafai ona tatou iloaina ‘o le manuia o le Atua, e silisili i mea uma e manatu i ai’[Filipi 4:7]. …

“Tatou te faia uma lava mea sese. O nisi taimi tatou te faatiga ai ia i tatou lava ma matuai faamanualia ai isi i ni auala tatou te le mafaia ona toe fonofono ai. Tatou te faaleagaina ni mea e le mafai ona tatou toe faaleleia. O iina la i lo tatou lava natura, tatou te lagonaina ai le tausalaina ma le faalumaina ma le mafatia lea e le mafaia e i tatou lava ona togafiti. O iina la o le a fesoasoani mai ai loa le mana o le Togiola.

“Na fetalai le Alii, “Aua faauta, o au le Atua, na puapuagatia i nei mea mo tagata uma ina ia latou le puapuagatia pe afai latou te salamo’[MFF 19:16]. …

“O le Togiola e i ai ona faatinoga taua, ma faaletagata i aso uma lava; ia faaaoga i lou olaga. E mafai ona faamalosia i le amata i se tatalo. E le faapea o le a e saoloto ai mai faafitauli ma mea sese mulimuli ane ae e mafai ona aveesea ai le tausalaina e ala i le salamo ma maua ai le filemu” (i le Conference Report, Ape. 2001, 28–29; po o le Liahona, Iul. 2001, 26–27 ).

Alema 24:11. “Aua ua Gata Mai Mea ua Mafaia e i Tatou” i le Salamo

Sa faia e Aneti-Nifae-Liae “aua ua gata mai mea ua mafaia e i latou … i le salamo” (Alema 24:11). I le 2 Nifae 25:23 sa faamanino mai ai e Nifae: “Aua ua matou iloa e faaolaina i tatou i le alofa tunoa pe a uma ona faia mea uma tatou te mafaia.” Mai le tupu o Aneti-Nifae-Liae ua tatou aoao ai o se vaega o mea uma e mafai ona tatou faia o le “salamo i a tatou agasala uma lava.”

Alma 24:17–19. Tanumia Maulalō o a Matou Auupega

I le tanumiaina maulalo o a latou auupega i le eleele, sa folafola atu ai e Aneti-Nifae-Liae i le Alii o le a latou le toe faaaogaina lava. O loo faamauina i tusitusiga paia, “ua mausali i latou ma ua sili ia te i latou le onosai e oo i le oti ai le fai agasala” (Alema 24:19). O a latou faatinoga sa faaalia ai le lafoaia atoa o agasala ina ua salamo faamaoni.

Sa aoao mai e Peresitene Spencer W. Kimball (1895–1985) e faapea o le lafoaia o agasala e masani lava ona manaomia ai le suia o lo tatou ituaiga o olaga: “I le lafoaiina o agasala e le mafai ai e se tasi ona tau lava o le moomoo mo ni tulaga e sili atu. E tatau ona ia faia mea lelei. Atonu e manaomia ai ona ia ita i ofu ua pisipisia ma inoino i le agasala. E tatau ona ia mautinoa e le gata ua ia lafoaia le agasala ae ua ia suia foi ia tulaga o lo o siosiomia ai le agasala. E tatau ona ia aloese mai nofoaga ma tulaga ia na tupu ai le agasala, aua o nei mea o loo mafai ona toe fofoa mai ai foi [le agasala]. E tatau foi ona ia lafoaia tagata ia na aafia faatasi i le agasala. Atonu e le mafai ona ia ita i tagata ia na aafia ae e tatau ona ia aloese mai ia i latou ma mea uma lava na fesootai ma le agasala. … E tatau ona ia aveesea soo se mea ia e ono mafai ona toe save’u ai mafaufauga ua tuanai” (O Le Vavega o le Faamagalo Atu [1969], 171–72).

Alema 24:22–27. O Faataitaiga a E Amiotonu na Mafua ai ona Liua le Toatele

Sa saunoa mai Elder L. Tom Perry o le Korama a Aposetolo e Toasefululua e faapea o a tatou taumafaiga e tausia a tatou feagaiga e ono taitai atu ai i le liua o isi:

“Sa faatonuina e le tupu o Aneti-Nifae-Liae lona nuu e tanumia maulalo a latou auupega i le eleele ina ia le toe faaosoosoina i latou e faaaoga pe a toe o mai o latou uso Sa Lamana e si’itaua mai. Sa mulimuli ia tagata i le faatonuga a lo latou tupu, ua latou faia lea mea ‘o se molimau i le Atua, atoa ma tagata, latou te le toe faaaogaina le auupega i le faamaligiina o le toto o tagata’ (Alema 24:18). Ina ua osofai mai sa Lamana, sa o atu ia Aneti-Nifae-Liae ‘e faafetaiai i latou, ma ua latou faapau fao’ i le eleele i o latou luma (Alema 24:21). Na fasiotia e Sa Lamana le toaafe ma le toalima o tagata Aneti-Nifae-Liae a o le i taofia le fasiotiga. Aisea na taofia ai le fasiotiga, ma po o a foi ona taunuuga? Mai le faamaumauga i le Alema ua tatou aoao ai i tali i nei fesili: …

“‘O lenei, ina ua iloa lenei mea e Sa Lamana ua tuu lo latou fasi o i latou; a ua toatele o i latou ua momomo o latou loto … , aua ua latou salamo i le mea ua latou faia. …

“‘… Ua oo ina sili ona toatele e na faatasia ma le nuu o le Atua i lena aso ai le aofai o e na fasia; o tagata amiotonu i latou uma na fasia, o le mea lea e le taumate ai na faaolaina i latou.’ (Alema 24:24–26) …

“Talu ai o le savali o lea tala e le o tauanauina ai ia aua le auai i taua o le lalolagi, a ua tatou aoao ai e ala i le le toe taui ma sui atu i leaga mai i isi e mafai ona i ai so tatou aafiaga loloto ia i latou. O le mea moni lava, e mafai ona tatou suia o latou loto pe a tatou mulimuli i faataitaiga a Keriso ma liliu atu le isi alafau. O a tatou faataitaiga o ni soo o le filemu o Keriso e musuia ai isi e mulimuli ia te ia” (Living with Enthusiasm [1996], 127–28).

Alema 24:30. Aluese mai le Faavaeluatai

O se tagata ua pau ese mai le Ekalesia ina ua mavae ona avea ai ma se tagata auai ua iloatino lava le avea ma e “sili ona leaga nai lo le taimi latou te lei iloaina ai nei mea” (Alema 24:30). Sa faamalamalama mai e le Perofeta o Iosefa Samita lenei tulaga i se talanoaga ma se tasi o tagata o le Ekalesia. Sa tau atu e uso Isaac Behunin i se tasi taimi i le Perofeta o Iosefa Samita e faapea, “‘Afai ou te tuua lenei Ekalesia o le a ou le faia e pei ona faia e na tagata: Ou te alu i se nofoaga tuufua e le i faalogoina ai lava se tala e uiga i le faa-Mamona, ou te faamautu ai, ma o le a le iloaina lava e se isi ou te iloaina se mea e tasi e uiga i ai.’

“Na tali atu le Tagatavaai sili i le taimi lava lena: ‘Uso Behunin, e te le iloa le mea e te faia. E leai se masalosalo na faapena foi ona manatu nei alii e pei o oe. Ae e te le i auai i lenei Ekalesia na e tu faavaeluatai. Ina ua talaiina le talalelei, na taoto i ou luma le lelei ma le leaga. Sa mafai ona e filifili le tasi po o le isi. E lua matai e faafeagai na valaauliaina oe e auauna atu ia te i la’ua. Ina ua e auai i lenei Ekalesia na e ioe ai e auauna i le Atua. Ina ua e faia lena mea, na e tuua ai le mea na e tu ai i le va o le lelei ma le leaga, ma e le mafai lava ona e toe foi atu i ai. A e tuueseina le Matai ua uma ona e ioe e te auauna i ai, o le a e faia e ala i le faaosoosoga a le tiapolo, ma o le a e mulimuli i ana faatonuga ma avea oe ma ana auauna’” (Aoaoga a Peresitene o le Ekalesia: Iosefa Samita [2007], 346).

Alema 25:1–12. Faataunuuina Valoaga

Alema 25:1–12 o loo faamaumauina ai le faataunuuina o le valoaga a Apinati e faatatau i faitaulaga amioleaga a le Tupu o Noa (tagai Mosaea 17:15–20). Ia matau le auala na tusia ai e Mamona mo le tagata faitau le faataunuuina o valoaga a Apinati. Ia mafaufau i le taunuuga o i latou o e teenaina ia perofeta, e pei o Apinati, ma faapea mai ua agasala le perofeta. O faaaliga o ona po nei o loo i ai foi se lapataiga ia i latou o e “sii ae o latou mulivae e faasagatau i a’u auauna ua faauuina” (tagai MFF121:16–22).

Alema 25:17. O Le Alii ua “Faamaonia foi Lana Afioga ia te i Latou i Pito Uma”

O se tasi o lesona maoae ua alia’e mai i lenei vaega o le tusi a Alema e faapea e tausia lava e le Atua Ana folafolaga. Sa tau atu e le Alii i le Tupu o Mosaea e toatele o le a talitonu i aoaoga a ona atalii ma o le a ia faasaoina i latou ai lima o sa Lamana” (Mosaea 28:7). Mo le faataunuuina o nei folafolaga, tagai Alema 17:4, 35–39; 19:22–23; 26:1–4. Ua na o se tasi lenei o faataitaiga e tele faatusitusiga paia lea e faamamafa ai le mataupu faavae moni e faapea ua noatia le Atua pe a tatou faia mea ua Ia fai mai ai (tagai MFF82:10).

Alema 26:5–7. O A Fusisaito?

O le upu fusisaito o lona uiga o le tele o ausaito ma fatu saito ua fusi faatasi. O le ta’uaina e Amona o fusisaito i leAlema 26:5 o loo faatatau i tagata liliu mai ua aumai i totonu o le Ekalesia e faifeautalai faamaoni o e galulue malosi i a latou selesaito.

Alema 26:11–14

O a faamaoniga ua e maua o le olioli o Amona sa i le mana ma le alofa tunoa o le Faaola, nai lo le mitamita ia te ia lava?

Alema 26:15–16.“Po o ai Se e Mafai ona Soona Mitamita i le Atua?”

E pei lava foi ona lagona e Amona le mitamita i le Alii ma vivii i Ona viiga, e tatau foi ona faapena i tatou. Sa aoao i tatou e Sister Sheri L. Dew a o auauna ai o se fesoasoani i le Au Peresitene Aoao o le Aualofa, e faatatau i le matafaioi o loo faia e Iesu Keriso i o tatou olaga i aso taitasi:

“Pe mafai ea ona fiafia pe a faigata le olaga? Pe mafai ea ona lagonaina le filemu i le lotolotoi o le le mautinoa, ma le faamoemoe i taimi o le le mautonu? Pe mafai ea ona suia, tuuese a tatou masani tuai ma toe faafouina? Pe mafai ea ona nofo faamaoni ma mama i se lalolagi ua le o toe faatauaina amio mama na e iloa ai ni soo o Keriso?

“Ioe. O le tali o le ioe, ona o Iesu Keriso, o Lana Togiola ua faamautinoa mai ai e le manaomia ona tatou tauave toatasi avega o le ola faletino. …

“I le gasologa mai o tausaga, na ou fetaiai ai ma uunaiga ma le lototiga ia semanu e nutipalaina ai au pe ana ou le faalagolago atu i le punavai o le poto ma le malosi lea e sili atu nai lo au lava. E lei faagaloina lava pe tuulafoaiina au e le Alii, ma ua ou iloa ai lava e au o Iesu o le Keriso ma o Lana Ekalesia lenei. Faatasi ma Amona ou te folafola atu, ‘[Aua] po o ai ea se mafai ona soona mitamita i le Alii? Ioe, po o ai ea e mafai ona soona vivii i lona mana tele ma lona alofa tele … ? Faauta, … ou te le mafai ona fai atu se vaega itiiti o le fiafia ua ia te au’ (Alema 26:16). Ou te tautino atu i lenei tauafiafi o le augatupulaga o le atoatoaga o taimi, lea o loo galue faasoloatoa ai Lusifelo e faatuta’ia la tatou faigamalaga i lo tatou aiga, ma tuuese i tatou mai le mana togiola o le Faaola, na pau le tali mosoo se tasio i tatou o Iesu Keriso” (i le Conference Report, Apr. 1999, 85–86; po o le Ensign, May 1999, 67).

Alema 26:27. Faapalepale e Oo atu ai i le Manuia

O le manuia sa mauaina e atalii o Mosaea i sa Lamana ua sili atu nai lo le mea sa latou faamoemoeina (tagai Alema 26:30–31). Ina ua amata la latou misiona, sa folafola atu e le Alii, “Ou te faia outou ma auupega i o’u lima e faaoo mai ai le faaolaina o agaga e toatele” (Alema 17:11). I lenei folafolaga sa latou “loto tetele ai e o atu i sa Lamana, e talai atu le afioga a le Atua” (Alema 17:12). E le i otometi ona oo mai le manuia i a latou taumafaiga, e ui lava sa folafolaina mai e le Alii. I le taimi atoa o le 14 tausaga o la latou misiona, sa latou aafia ai i “puapuaga uiga eseese uma” (Alema 26:30). O faamaumauga sa faailoa atili mai ai o latou loto sa “mafatia, ma o le a [latou] toe foi atu” (Alema 26:27). Ae, i le faalagolago ai i folafolaga a le Alii, sa faaauau ai pea a latou taumafaiga. Ia, e pei lava ona ia faia pea, sa faamamaluina e le Alii Lana folafolaga ma tauia lo latou faapalepale.

Ata
O loo aoao atu e Arona ia tagata

Jerry Thompson, © IRI

Alema 26:27–30. O Le Moni o le Galuega Faafaifeautalai

Sa faasoa mai e Elder F. Burton Howard o le Fitugafulu lona faitauina o le Alema 26a o avea ma se faifeautalai talavou lea sa i ai se aafiaga i lana molimau o le moni o le Tusi a Mamona:

“Sa ou toe faitauina le mataupu e luasefuluono o le Alema ma le tala i le misiona a Amona. Sa ou faitauina leotele, e pei ona ou faia i nisi o taimi, a o ou taumafai e tuu au lava ia i le tulaga o tagata o loo i totonu o le tusi, a o tau mafaufau peiseai o loo ou fai atu pe o faalogo i upu, o loo ou i ai iina. Sa ou toe iloiloina le lipoti, ma, i le manino e le mafai ona faamatalaina ma o le a faigata ona malamalama i ai se tasi e le i oo i ai, sa fetalai mai le Agaga i lou agaga, ua faapea mai, Pe sa e matauina? O mea uma lava sa tutupu ia Amona ua tutupu ia te oe?

“O se suifeifiloi atoa lava o lagona. O se tulaga faateia; o se manatu e le i oo mai muamua ia te au. Sa faavave ona ou toe faitauina le tala. Ioe, sa i ai taimi pe a mafatia lou loto ma ou mafaufau ai e toe foi i le fale. O au foi sa ou alu i se nuu ese e aoao atu le talalelei i sa Lamana. Sa ou alu atu foi ia te i latou, sa tigaina i faigata, sa moe i luga o le fola, sa onosaia le malulu, sa alu e aunoa se ‘ai. Sa ou malaga foi mai lea fale i lea fale, tuitui i faitotoa mo masina i se taimi e aunoa ma le valaauliaina i totonu, sa faalagolago lava i le alofa tunoa o le Atua.

“Sa i ai isi taimi na matou ulufale ai i fale ma talanoa i tagata. Sa matou aoao atu i latou i luga o le ala ma luga o mauga. Sa matou talai atu foi i isi lotu. Ou te manatua le taimi na tuufeanu ai ia te au. Ou te manatua le taimi na ou ulufale atu ai ma isi faifeautalai e toatolu, i le faatafafa autu o le aai e le i oo muamua i ai ni faifeautalai, a o avea au ma se taitai itu ua tofiaina e le peresitene o le misiona e tatala se aai fou. Sa matou o atu i le paka, usu se pese, ma sa potopoto mai ai tagata.

“Ia o lo’u tiute la o se taitai itu, ia talai atu. Sa ou tu i luga o se nofoa maa ma tautala atu i tagata. Sa ou faamatalaina le tala o le toefuataiga o le talalelei, o le tama o Iosefa Samita na alu i le vao ma le afio ifo o le Tama ma le Alo ia te ia. Ou te manatua lelei se vaega o tamaiti talavou, i le tauafiafi, sa latou tau’aia i matou i maa. Ou te manatua le popole ina nei lavevea pe faamanualia e i latou e le fia faalogo i le savali.

“Ou te manatua le taimi sa ou i ai i le falepuipui a o tālia se faaiuga a le pulega o leoleo mo ou aia faaletulafono e avea ai o se faifeautalai i se tasi o atunuu. E lei lava sou taimi sa faaaluina i le falepuipui e faatusatusa ia Amona, ae ou te manatua pea le lagona sa ou oo i ai ina ua tapunia le faitotoa ma ua ou mamao ese mai ma le aiga, tuuatoatasi, ma ua na o le alofa tunoa o le Alii e faalagolago i ai mo le faasaoina. Ou te manatuaina le onosaia ai o nei mea faatasi ai ma le faamoemoe ‘atonu ua mafai ona avea ai i tatou ma ala e faaolaina ai se agaga’(Alema 26:30).

“Ma i lena aso a o ou faitau, sa toe molimau mai ai le Agaga ia te au, ma ua tumau ai ia upu ia te au e oo mai lava i le asō: E leai ma se isi ua na o se faifeautalai e mafai ona tusia lenei tala. E lei mafai ona silafia e Iosefa Samita pe faapei i le avea ai ma se faifeautalai i sa Lamana, aua e leai ma se tasi sa ia silafiaina sa faia se mea faapea muamua ” (“Ammon: Reflections on Faith and Testimony,” in Heroes from the Book of Mormon [1995], 124–25).

Alema 27:21–24. Faamagalo Atu i o Tatou Fili

E lei leva tele na valaau atu ai Alema i tagata o Saraemila ina ia suia o latou loto (tagaiAlema 5:6, 12–14, 26). Sa ia folafola atu foi o le Alii “ua valaau o ia i tagata uma” (Alema 5:33). E tutusa foi ma se valaaulia a le Alii e ala mai ia Nifae, e faapea o le Atua “e le faafiti i se tasi e sau ia te Ia, o tagata uli ma tagata papae, o ē pologa ma ē saoloto, o tane atoa ma fafine; … e tutusa tagata uma i le Atua” (2 Nifae 26:33). Sa talisapaia e tagata o Saraemila le savali a Alema, ma ina ua manaomia ona faamagalo atu i o latou fili, sa latou tuuina atu le laueleele ma puipuiga i tagata o Amona.

Sa apoapoai mai ia Peresitene Howard W. Hunter (1907–95) ia i tatou taitoatasi ina ia faapena foi ona faamagalo atu i o tatou fili:

“Ia manatunatu, mo se fataitaiga, o lenei aoaoga mai ia Keriso i ona soo. Sa ia fetalai ai, ‘Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e inoino mai ia te outou, ia outou tatalo foi mo e ua tuuai fua mai ma faasaua mai ia te outou’(Mataio 5:44).

“Ia manatu i se mea e faia e lenei lava lapataiga i lou tuaoi ma lo’u tuaoi, i nuu o loo nonofo ai oe ma lau fanau, i malo ua maua ai so tatou aiga sili i le lalolagi. Ua ou iloa ua tau mai i lenei mataupu se lui taua lava, ae moni o se lui e sili atu ona ioe i ai, nai lo tiute matautia ua tuuina mai ia i tatou e taua, ma le mativa, ma le tiga ua faafeagai pea ma le lalolagi. …

“Ua maua e i tatou uma lava se avanoa taua e faia ai uiga faa-Kerisiano, ma e tatau ona tatou taumafai e fai i avanoa uma lava e maua. Mo se faataitaiga, e mafai e i tatou uma ona loto faamagalo atu teisi” (i le Conference Report, Oke. 1992, 22–23; po o le Liahona, Ian. 1993, 21 22).

Alema 28:1–12. E Mulimuli mai le Faamoemoe i le Oti o E Amiotonu

Sa faasoa mai e Elder Robert D. Hales o le Korama a Aposetolo e Toasefululua le aafiaga lenei sa ia oo i ai ma se taitai perisitua amiotonu sa maliu i se ma’i ua ui:

“Sa oo ina talia e la’u uo le fuaitau ‘Ia faia lou finagalo’ a o ia feagai ma ona lava tofotofoga ma mafatiaga tiga. I le avea ai ma se uso faamaoni o le Ekalesia, ua feagai nei o ia ma ni atugaluga mamafa. Sa faapitoa lava ona ootia ana fesili, ‘Pe ua ou faia ea mea uma e manaomia ona ou faia ou te tumau faamaoni ai e oo i le iuga?’ ‘Faamata e faapefea le oti?’ ‘Pe o le a saunia ea lo’u aiga e tutu i le faatuatua ma faalagolago le tagata ia te ia lava pe a ou mavae atu?’

“Sa ma maua le avanoa e talanoaina ai nei fesili uma e tolu. Ua tali manino mai i le mataupu sa aoao mai e le Faaola ia i tatou. Sa ma talanoaina lona faaaluina o lona olaga e taumafai ai ia faamaoni, ia fai le mea e finagalo mai ai le Atua ia te ia, ia faamaoni i ana fegalegaleaiga ma isi, ma ia tausia ma alofa i lona aiga. Pe le o le uiga ea lena o le tumau e oo i le iuga? Sa ma talanoa e uiga i se mea e tupu i le taimi lena pe a mavae le oti, o se mea sa aoao mai e le Atua ia i tatou e uiga i le lalolagi o agaga. O se nofoaga lea o le parataiso ma le fiafia mo i latou sa ola i ni olaga amiotonu. E le o se mea e fefe i ai.

“Ina ua uma le ma talanoaga sa ia faapotopoto mai lana ava ma le aiga lautele— o lana fanau ma fanau a lana fanau— e toe aoao ia i latou le mataupu o le Togiola o le a toetutu mai tagata uma. Sa oo ina malamalama tagata uma e pei ona fetalai mai le Alii, a o i ai le faanoanoa i se taimi le tumau o le a tete’a ai, e leai se faanoanoa ia i latou o e ua oti i le Alii (tagai Faaaliga 14:13; MFF 42:46). I lona faamanuiaga na folafola atu ai ia te ia se faamafanafanaga ma se faamautinoaga o le a lelei mea uma, o le a le maua e ia se tiga, o le a maua e ia se taimi faaopoopo e saunia ai lona aiga mo lona alu ese atu, ma o le a iloa foi e ia le taimi e alu ese atu ai. Sa faamatala mai e lona aiga ia te au i le po na sosoo ai ma lona maliu, sa ia fai mai ai o le a alu o ia i le aso e sosoo ai. Sa maliu filemu o ia i le aoauli na sosoo ai, ma sa i ai lona aiga uma i ona tafatafa. O le filemu lenei ma se faamafanafanaga e oo mai ia i tatou pe a tatou malamalama i le fuafuaga o le talalelei, ma iloa e faavavau aiga.

“Pe a faatusatusa atu nei mea na tutupu ma se mea na tupu ia te au a o ou talavou ina ua faatoa luasefulu ou tausaga. A o ou i ai i le Ea Fosi, sa pa’u ai se vaalele a se pailate e i la’u vaega i se taimi o se misiona a’oa’o ma maliu ai. Sa tofia au e faafeao la’u soa ua maliu i lana malaga mulimuli i lona aiga e falelauasi ai i Brooklyn. Sa ou maua le faamamaluga ou te tu ai i tafatafa o lona aiga i le taimi o le sauniga faaleaiga ma le taimi o ona toe sauniga, ma fai ma sui o lo tatou malo i le tuuina atu o le fu’a i lana ava faanoanoa, i tafatafa o le tuugamau. O ona toe sauniga sa pogisa ma faanoanoa. Sa lei ta’ua sona lelei po o ni mea foi na ia ausiaina. E lei ta’ua foi lava lona igoa. I le faaiuga o le toe sauniga, na faliu mai ai lana ava ia te au ma fesili mai, ‘Bob, o le a moni lava se mea o le a tupu ia Don?

“O iina sa mafai ai ona ou tuuina atu ia te ia le mataupu suamalie o le Toetu, ma le mea moni lea, afai e papatisoina ma faamauina i le malumalu i le taimi nei ma le faavavau atoa, o le a mafai ona toe faatasi i laua e faavavau. Ona faapea mai lea o le alii faifeau sa tu i ona tafatafa, ‘O se mataupu pito silisili lena ona matagofie ua ou faalogo i ai’” (i le Conference Report, Oke. 1996, 88–89; po o le Liahona, Ian. 1997,77 78).

Alema 29:4–5. E Tuuina Atu e le Atua i Tagata e Tusa ma o Latou Manao

Sa aoao mai e Elder Neal A. Maxwell (1926–2004) o le Korama a Aposetolo e Toasefululua e faapea o o tatou manaoga e aafia ai lo tatou atinaega faaletagata ma mulimuli ane ua aafia ai o tatou faamanuiaga e faavavau:

“O manaoga … e mafai ona avea ma ni taunuuga moni, e tusa lava pe i ai ni faanaunauga mama, tatou te le mananao moni lava i taunuuga o o tatou manao. …

“O le mea lea, o mea tatou te naunau lava e mananao i ai, i le aluga o taimi, o mea ia o le a le pine ae avea ai i tatou ma o mea foi ia o le a tatou mauaina i le faavavau. …

“E manaomia le maua pea o manaoga amiotonu, sa saunoa mai ai Peresitene Polika Iaga, o le mea lea, aua, ‘o alii ma tamaitai , o ē naunau e maua se nofoaga i le malo selesitila, o le a iloa e tatau ona latou tau i aso uma’ (i le Journal of Discourses, 11:14). O le mea lea, o fitafita Kerisiano moni lava e sili atu nai lo na o ni tagata tau o le faaiuga o le vaiaso. …

“… Ia manatua, uso e ma tuafafine, o o tatou lava manaoga e iloa ai le tele ma le faatosinaga o faaososooga eseese. Ua tatou faatulagaina a tatou fua e faatatau i faaosoosoga.

“O lea,’ o le aoaoina ma le taulimaina o o tatou manao ua manino lava le manaomia ai ona malamalama i upumoni o le talalelei, e ui ina tele isi mea ua aofia ai. Ua faamaonia mai e Peresitene Polika Iaga e faapea, ‘Ua faamaonia e toatele ua malamalama i le upumoni ae e le o ola ai i latou lava i ia upumoni; o lona uiga, po o le a lava le moni ma le matagofie o upumoni, e tatau lava ona e avea le faanaunauga o le tagata ma faafetaui ma tulafono a le Atua’(i le Journal of Discourses, 7:55). …

“… O lea, sa folafola mai e Peresitene Iosefa F. Samita, e faapea ‘o aoaoga la o o tatou manaoga, o se mea ua sili ona taua mo lo tatou fiafia i le soifuaga’ (Gospel Doctrine, 5th ed. [1939], 297). O ia aoaoga e mafai ona taitai atu ai i le faapaiaina seia oo lava, sa saunoa ai Peresitene Polika Iaga, ‘ina tutupu mai i manaoga paia ia galuega vaaia paia’ (in Journal of Discourses, 6:170). Ua na o le aoaoina lava ma le taulimaina o o tatou manao e mafai ai ona avea ma a tatou au ae le o ni o tatou fili !” (i le Conference Report, Oke. 1996, 26–28; po o le Liahona, Ian. 1997, 23–24).

Manatu e Mafaufau Loloto i ai

E mafai faapefea e le faataitaiga a tagata Aneti-Nifae-Liae ona fesoasoani ia te oe e faateleina lou malosi o lou lava liua?
E pei lava ona tanumia e Aneti-Nifae-Liae a latou auupega i se feagagiga ma le Atua (tagai Alema 24:17–18), o a au mea o fai i se tulaga fai soo e faaali atu ai i le Alii ua faapena foi ona e liua atoatoa?
Sa faapefea e taumafaiga faafaifeautalai a Alema i sa Nifae (tagai Alema 4–15) ona sauniaina o ia e talia ia sa Lamana ua liliu mai ia sa aoaoina e atalii o Mosaea?

Galuega Fautuaina

E pei lava ona tanumia e sa Lamana a latou auupega o le taua ina ia le mafai ai ona latou toe faaaogaina, e tatau foi ona tatou toeseina mai ia i tatou le agasala po o vaivaiga ia e taofia ai i tatou mai le o mai i le Atua. Ia faailoa se agasala po o vaivaiga i lou olaga lea e te manao e aveese. Ia otootoina se fuafuaga e fesoasoani ai ia te oe e faatoilaloina ai, ma faatino lau fuafuaga.
Ia faitau le Alema 26 ma le 28, ia vaai mo mafuaaga na olioli ai Alema ma Amona. Ia lisiina ia mafuaaga ma filifili se tasi pe sili atu e avea o se vaega atoa o lou olaga.