Sa talai atu e Alema ma ona uso le upu a le Atua i le au sa Sorama, o e sa i ai i se tulaga o le liliuese. Ona o o latou tofotofoga, sa saunia ai se vaega o sa Sorama e talia le upu. O aoaoga a Alema ma Amoleka e faatatau i tapuaiga a tagata taitasi ma tagata toatele sa ta’ua ai nisi o mataupu silisili ona taua o le talalelei a Iesu Keriso: o le mana o le Togiola, salamo, faatuatua, o le upu a le Atua, ma le taua o le tatalo. I le faaopoopoga i a latou molimau, sa taulai atu ai Alema ma Amoleka i molimau ma savali a perofeta e toatolu anamua. O mataupu ma aoaoga faavae o loo i ai i totonu ua fausia ai se molimau malosi ia Iesu Keriso.
O se manatu totonugalemu o leAlema 32 o le faatuatua i le upu a le Atua. Sa matauina e Alema e faapea afai e totoina le upu a le Atua i le eleele lelei o le loto, o le a amata ona fefete ma tupu. E ala i le tofotofoina o le upu, po o le faafaileleina e ala i le usiusitai, o le upu a le Atua o le a aumaia ai fua e sili ona taua, e sili ona suamalie i mea uma ua suamalie, ua sili ona paepae i mea uma ua paepae, ma ua sili ona mama i mea uma ua mama. O le teenaina o le afioga a le Atua o le a le maua ai se fua faapena.
E faapefea ona faafaileleina lo tatou faatuatua i le upu ina ia mafai ai ona tatou aai ai pea i lenei fua? Sa aoao mai ia Peresitene Iosefa Filitia Samita (1876–1972) e faapea, “Afai tatou te mananao e maua se faatuatua ola ma usiusitai, e tatau ona tatou mataalia i le faatinoina o tiute uma o ni tagata o lenei Ekalesia” (Doctrines of Salvation, comp. Bruce R. McConkie, 3 vols. [1954–56], 2:311).
Sa faapena foi ona aoao mai e Elder Joseph B. Wirthlin (1917–2008) o le Korama a Aposetolo e Toasefululua o le mea lava lea: “E i ai le faatuatua pe a tuufaatasia le matuai mautinoa i se mea e le mafai ona tatou vaai atu i ai ma galuega e matua ogatusa lelei ma le finagalo o lo tatou Tama Faalelagi. A aunoa ma ia mea e tolu— muamua, matuai mautinoa, lona lua, galuega; ma lona tolu, ia matuai usitai— a aunoa ma ia vaega e tolu o lona uiga e na o ni mea faafoliga mea uma ua ia te i tatou, o se faatuatua vaivai ma le le aoga” (i le Conference Report, Oke. 2002, 89; po o le Liahona, Nov. 2002, 83).
Sa faamamafa mai e Elder Jeffrey R. Holland o le Korama a Aposetolo e Toasefululua le taua o le suesueina o le Alema 32–34 i se manino atoa uma:
“I le aoaoga matagofie [o le Alema 32], sa ave ai e Alema le tagata faitau mai se faamatalaga lautele o le faatuatua i le upu a le Atua e pei o le fatu i se lauga ua taulai atu i le faatuatua ia Keriso o le upu a le Atua, ua tuputupu ae i se laau e fua mai ai ni fua, o se laau e tutusa lelei ona fua ma fua o le laau lea na muai vaaia e Liae o le alofa o Keriso. … O Keriso o le areto o le ola, o le vaiola, o le vine moni. O Keriso o le fatu, o le laau, ma o le fua o le ola e faavavau.
“Ae o le Laau o le Ola moni lava ma le autu e tusa ai ma faamaumauga i totonu o lenei lauga ua leiloa, pe atonu ua matuai faaitiitia lona taua, pe afai e le tulitatao e le tagata faitau agai i isi mataupu e lua e sosoo ai o le Tusi a Mamona” (Christ and the New Covenant [1997], 169).
Alema 32:8–16. “Amuia i Latou o e Lotomaulalo i Latou Lava”
Na iloa e Alema le sauniaina o tagata matitiva o sa Sorama ina ia aoaoina i le talalelei. O lo latou teenaina e tagata mauoa o sa Sorama sa saofaga i lo latou tulaga maualalo.
Sa aoao mai e Epikopo Richard C. Edgley o le Au Epikopo Pulefaamalumalu e faapea o le lotomaulalo ma le usiusitai o uiga mama ia e faatagaina ai se tasi e maua faamanuiaga o le talalelei: O le toatele o i tatou e ola pe faigaluega foi i se siosiomaga e masani ona le malamalama ai i le lotomaulalo ma faapea ai o se vaivaiga. E le tele ni faalapotopotoga po o ni sosaiete o loo aofia ai le lotomaulalo i faamatalaga o mea e faatauaina po o se uiga moomia i la latou pulega. Ae peitai afai tatou te aoao e uiga i galuega a le Atua, o le mana o se agaga lotomaulalo ma le usiusitai e matuai iloga lava. I le malo o le Atua, o le lauiloa e amata i le lotomaulalo ma le usiusitai. O lenei paaga o uiga faaleatua o uluai laasaga taua ia e tatalaina ai le faitotoa i faamanuiaga a le Atua ma le mana o le perisitua. E le afaina po o ai i tatou ae po o le a foi le maualuluga o o tatou faailoga e i ai. O le lotomaulalo ma le usiusitai i le Alii, e o faatasi ma se lotofaafetai, o lo tatou malosi ma lo tatou faamoemoega lea” (i le Conference Report, Oke. 2003, 104; po o le Liahona, Nov. 2003, 98).
O le lotomaulalo ua lava lona taua i le silafaga a le Alii lea e oo ai i nisi taimi Na te fesoasoani ia i tatou ia lotomaulalo. Alema 32:8–16 o loo talanoa mai i auala e lua ia lotomaulalo ai. O le fuaiupu 13 o loo faamatala ai i latou o e “faamaualalo toai”; o fuaiupu 14 ma le 16 o lo o talanoa mai e uiga i isi e faamaualalo i latou lava “ona o le upu.”
Sa faamatalaina foi e Elder Carlos E. Asay (1926–99) o le Au Fitugafulu nei vaega e lua: “O le toatele o i tatou e foliga mai e maua i le ‘taamilosaga faa-sa Nifae. E i ai se vaega e aoaoina gofie ai i tatou; o lo tatou lotomaualalo e mafai ai ona tatou tuputupu ae ma fiafia ai faaleagaga. Ona oo lea i isi taimi e amata ai ona tatou lagonaina le faasausili ma le faafefeteina i le faamaualuga. … O le a matua lelei atu pe afai tatou te manatua pea lo tatou Atua ma la tatou tapuaiga ma talepe le taamilosaga lea e ala i tapuaiga faifai pea ma ola amiotonu. O le a matua lelei atu pe afai e faamaualaloina i tatou e le upu a le Alii ma lava le malosi faaleagaga e manatua ai lo tatou Atua i soo se tulaga tatou te oo i ai.” (Family Pecan Trees: Planting a Legacy of Faith at Home [1992], 193–94). Mo faamatalaga faaopoopo ma se ata o loo faamatala ai le taamilosaga o le faamaualuga, faasino i le“O Le Taamilosaga o le Amiotonu ma le Amioleaga” i le lisi o mea faaopoopo (itulau 438).
Sa faamatala e Peresitene Ezra Taft Benson (1899–1994) auala e mafai ai ona tatou faamaualaloina ai tatou lava ma aloese mai ai i tofotofoga ia e i ai taimi e sau faatasi ai ma le lotomaualalo toai:
“E mafai ona tatou filifili e faamaualaloina i tatou lava e ala i le faatoilaloina o le feitagai ma o tatou uso ma tuafafine, manatu ia i latou e pei foi o i tatou, ma siitia i latou ia maualuga pe maualuga atu nai lo le mea o tatou i ai (tagai MFF 38:24; 81:5; 84:106).
“E mafai ona tatou filifili e faamaualaloina i tatou lava e ala i le faamagaloina o i latou e faatiga mai ia i tatou (tagai 3 Nifae 13:11, 14; MFF 64:10).
“E mafai ona tatou filifili e faamaualaloina i tatou lava e ala i le tuuina atu o auaunaga lē manatu faapito (tagai Mosaea 2:16–17).
“E mafai ona tatou filifili e faamaualaloina i tatou lava e ala i le o i misiona ma talai atu le afioga lea e mafai ai ona faalotomaualalo ai isi (tagai Alema 4:19; 31:5; 48:20).
“E mafai ona tatou faamaualaloina i tatou lava e ala i le ulu soo atu i le malumalu.
“E mafai ona tatou filifili e faamaualaloina i tatou lava e ala i le tautau atu ma lafoaia a tatou agasala ma toe fanaufouina i la le Atua (tagai MFF 58:43; Mosaea 27:25–26; Alema 5:7–14, 49).
“E mafai ona tatou filifili e faamaualaloina i tatou lava e ala i le alofa atu i le Atua, tuuina atu o o tatou loto i Lona finagalo, ma faamuamua o Ia i o tatou olaga (tagai 3 Nifae 11:11; 13:33; Moronae 10:32)” (i le Conference Report, Ape. 1989, 6; po o le Liahona, Iul. 1989, 6–7).
Alema 32:17–18. O Le Faatuatua e le Fausia i luga o Faailoga
Sa saunoa mai Elder Dallin H. Oaks o le Korama a Aposetolo e Toasefululua e uiga i mea matautia e o mai faatasi ma le sailiga o ni faailoga mo le faatuatua:
“O le faaalia o se faailoga e mafai ona galue agai i le faafanoga o i latou ua i ai le malamalama o lena mea. Ua latou misia le avanoa e atiina ae ai le faatuatua, ma tausalaina ai i latou i faasalaga ogaoga matuia mo le teenaina o le amiotonu nai lo i latou o loo faagasolo pea le atiina ae faaleagaga, i le ala masani o le atiina ae o le faatuatua.
“O loo i ai foi isi ‘faafanoga’ ia i latou o e saili i faailoga e aunoa ma le atiina ae muamua o le faatuatua lea e manaomia e le Atua e avea o se faamuamua.
“E tasi le faafanoga lea ua taitaiseseina. Sa lapataiina e le Atua ia Isaraelu anamua e uiga i le mulimuli atu i perofeta pepelo e tuuina mai ia faailoga ma mea ofoofogia ma ia saili ai e taitai ese atu i latou e tapuai i atua ese. }Teut. 13:1–3 Sa aoaoina e le Faaola ona au aposetolo e faapea o aso amuli “o le a tutu mai i ia aso ni Keriso pepelo, ma ni perofeta pepelo, ma o le a latou faaali mai foi ni faailoga matautia ma le ofoofogia, i le malosi sili, o le a latou faaseseina ai, pe a mafai, e ua filifilia, e ua filifilia e tusa ma le feagaiga. JST Matt. 24:23; tagai foi Mat. 24:24; Mareko 13:22.) …
“… I o tatou aso, e le faaaogaina e le Atua ia vavega po o faailoga o se auala e aoao ai pe faatalitonuina ai ē le talitonu. O se taunuuga, e le tatau ona tatou fesili atu mo ni faailoga mo lenei faamoemoega, ma e tatau ona tatou matuai masalomia i latou e fai mai ua ia te i latou faamaoniga faaleagaga o na mea.” (The Lord’s Way [1991], 85–86).
Sa fesoasoani mai ia Peresitene Boyd K. Packer, o le Presitene o le Korama a Aposetolo e Toasefululua, ia tatou malamalama atili i le uiga o le faatuatua:
“O le faatuatua, e tatau ona i ai i le totonugalemu o se mea lea e le o iloaina. O le faatuatua, e tatau ona alu lava i tala atu o lena mea aua o loo i ai se faamaoniga mautu. O le faatuatua, ma ina ia faatuatua, e tatau ona alu atu i le au leiloloa. O le faatuatua, ma ina ia faatuatua, e tatau ona faalagolago se tasi i lona faatuatua nai lo lona lava malamalama ma le molimau. Afai o mea uma e tatau ona iloaina, afai o mea uma e tatau ona faamalamalamaina, afai o mea uma e tatau ona faamaoniaina, ona leai lea o se manaomia mo le faatuatua. O le mea moni, e leai la se avanoa mo le faatuatua. …
“E lua ituaiga o faatuatua. O se tasi o i laua e masani i le galue i olaga o agaga uma. O se ituaiga o faatuatua e afua mai i aafiaga; e aumaia ia i tatou le faamautinoaga o le a malama mai se aso fou, o le a oo mai le tautotogo, o le a i ai foi le tuputupu ae. O le ituaiga o faatuatua lea e fesootai ma i tatou ma le mautinoa o lena mea ua fuafuaina e tupu. …
“E i ai le isi ituaiga o faatuatua, e mauagata lava. O le ituaiga o faatuatua lea emafua ai ona tutupu ia mea. O le ituaiga o faatuatua lea e agavaa ma sauniaina ma e le faigofie ona maua, ma ia aumaia ni mea ia i se isi itu e le mafai ona tupu. O le ituaiga o faatuatua lea e uunaia ia tagata. O le ituaiga o faatuatua lea e i ai isi taimi e aveesea ai ni mea. … E sau mai le tuputupu ae malie. O se mana ofoofogia, ma e silisiliese foi, o se mana e moni ma e le vaaia e pei o le eletise. Ua faatonutonu ma faaalatonuina, e i ai ona aafiaga maoae. …
“I se lalolagi ua faatumulia i le le talitonu ma le masalosalo, o le faaupuga ‘a vaai i ai ua talitonu’ ua faalauiloa ai le amio, ‘Ia e faaali mai, ma o le a ou talitonu ai.’ Matou te mananao muamua i faamaoniga uma ma molimau uma lava. E foliga mai e faigata ona faia ia mea i le faatuatua.
“O afea o le a tatou iloa ai o mea faaleagaga e galueaiina i le isi auala e —faapea o le talitonu o le vaai i ai? O talitonuga faaleagaga e tupu ai le malamalama faaleagaga. Afai tatou te talitonu i mea e le o vaaia ae e ui i lea e moni, ia ua tatou maua le faatuatua” (“What Is Faith?” in Faith [1983],
Sa faamatalaina e Elder Neal A. Maxwell (1926–2004) o le Korama a Aposetolo e Toasefululua le sootaga i le va o le faamoemoe, faatuatua, ma le malamalama ma faamalamalama mai le auala latou te i ai i se sootaga malosi tele ma le loloto: “Ua fesootai pea le faatuatua ma le faamoemoe, ma atonu e le mailoa i taimi uma lo la eseesega tonu, ma lo la faasologa. E ui e le o se malamalama atoatoa foi, ae o taunuuga faaolaina o le faamoemoe, ‘e mautinoa’ e moni ( Eteru 12:4; tagai foi Roma 8:24; Eperu 11:1; Alema 32:21)” (i le Conference Report, Oke. 1994, 45; po o le Liahona, Ian. 1995, 41).
O le faatuatua o tamaiti laiti e masani lava ona taitai atu i malamalamaaga paia. Sa faamatala mai e Elder Neal A. Maxwell le auala e mafai ai ona avea a latou faataitaiga e aoao ai ē matutua:
“E masani fanau ona ua’i atu o latou ‘manatu ma faamoemoega o o [latou] loto i le Matai. O ia fanau, e ui ina e lei tagata matutua, ae tutumu i le faatuatua! E laiti tele mo ni valaauga aloaia o le Ekalesia, ae ui o lea, ‘ua valaauina i latou e auauna atu’ o ni faataitaiga, aemaise lava pe a ua faamanuiaina i ni ‘matua lelei’(1 Ni. 1:1).
“E pei lava ona faamautinoa mai e tusitusiga paia, ‘a o nisi aso ua foaiina i tamaiti o upu’ (Alema 32:23). Mo se faataitaiga, sa faaali atu e Iesu toetu ni mea i tamaiti sa Nifae, o e na aoaoina ia tagata matutua ma o latou matua i ‘mea tetele’ nai lo mea na aoao atu e Iesu (3 Ni. 26:14).
“O se faamanuiaga ia te au lo’u faamauina o ni fanau fai faaletulafono ia Nan ma Dan Barker, ua nonofo nei i Arizona. I se vaitaimi ua mavae, ina ua faatoa tolu tausaga o Nate, na ia faapea atu ai: ‘Mama, o loo i ai se isi teineitiiti e tatau ona sau i lo tatou aiga. O ia o se teineitiiti e uliuli lona lauulu ma ona mata, ma e mamao lava se mea e nofo ai.’
“Sa fai atu le tina poto, ‘Na faapefea ona e iloa lena mea?’
“‘Sa tau mai e Iesu i le falealuga.’
“Sa fai atu le tina, ‘E leai so tatou falealuga,’ ae na vave ona ia mate’ia le taua o le mea na talanoaina. Ina ua mavae atugaluga ma tatalo e tele, sa i ai le aiga o Barker i se potu o faamauga i le Malumalu o Sate Leki i le tautoulu o le 1995, sa faamauina ai se teineitiiti lanu uliuli lona lauulu ma ona mata mai Kazakhstan ia i latou, mo le olaga nei ma le faavavau. O fanau musuia latou te tauina atu lava i matua ‘mea tetele ma le ofoofogia’ (3 Nifae 26:14)” (i le Conference Report, Ape. 1996, 95–96; po o le Liahona, Iul. 1996, 82).
Alema 32:27–37. O le Faata’ita’ia o le Afioga a le Atua e Aumaia ai le Liua
Sa aoao mai e Elder M. Russell Ballard o le Korama a Aposetolo e Toasefululua e faapea o le naunautaiga e faatino le faataitaiga a Alema e taitai atu ai i le liua:
“Ua tatou iloa o tagata e auai i le Ekalesia ma tagata e le auai e foliga mai ua matuai liua lava i le talalelei a Iesu Keriso pe a latou malilie e faataitai i le upu (tagai i le Alema 32:27). O le uiga uma lava lenei o le mafaufau ma le loto lea e aofai ai ma le manao ina ia iloa le upu moni ma se naunautaiga ina ia galue e tusa ai ma lena manao. Mo i latou o loo sailiilia le Ekalesia, o lea faiga e faigofie lava e pei o le lotomalie e faitauina le Tusi a Mamona, o le tatalo e uiga i ai, ma ia saili ma le faamaoni ina ia iloa pe o se perofeta a le Alii ia Iosefa Samita.
“O le liua moni e oo mai e ala i le mana o le Agaga. Pe a pa’i mai le agaga i le loto, ona suia ai lea o le loto. Pe a lagonaina e tagata taitoatasi, e le gata i tagata o le Ekalesia ae o tagata sailiili, le galue o le Agaga ia i latou pe a latou vaaia foi se faamaoniga o le alofa ma le alofa mutimutivale o le Alii i o latou olaga, o le a faamalamalamaina i latou ma faamalosia faaleagaga ma o le a faateleina lo latou faatuatua ia te Ia. O nei aafiaga faatasi ma le Agaga e oo mai lava pe a naunau se tagata e tofotofoina le upu. O le auala lea tatou te lagonaina ai le moni o le talalelei” (i le Conference Report, Oke. 2000, 97; po o leLiahona, Ian. 2001, 75 ).
E i ai taimi o lagona e tuputupu ae, o le faateleina o le loto, o le faamalamalamaina o le mafaufau, ma le amataga o lagona suamalie mai le Agaga lea o lo o tautalagia i le Alema 32:28e faigata ona faamatalaina i upu. Ae ui i lea, po o le a lava le faigata ona faamatalaina e le aveesea ai le moni o le lagona.
Sa faasoa mai e Peresitene Boyd K. Packer, o le Peresitene o le Korama a Aposetolo e Toasefululua, se aafiaga lea na faamatalaina ai le faigata o le faamatalaina i upu. Sa ia tuuina atu lana molimau i se tagata e le talitonu i le Atua o loo i ai se Atua. Sa fai mai le tagata lea e le mafai ona ia iloa se mea faapea. Sa faatusatusa e Peresitene Packer lana molimau ma le malamalama i le iloaina o le tofo o le masima (tagai faamatalaga mo le Alema 30:15–16 i le itulau 214; tagai foi “The Candle of the Lord,” Ensign, Jan. 1983, 51–52).
Alema 32:28–30. “Tuuina Atu se Mea, e Totoina ai se Fatu” ma Amata ona Tupu
O le faatuatua ua faateleina i le afioga a le Atua o se tasi lea o fua lea e sau mai fatu o le faatuatua sa totoina i le eleele lelei o se loto agamalū. Sa faamatalaina e Peresitene James E. Faust (1920–2007) o le Au Peresitene Sili mea e manaomia ona muai ave i ai le faamuamua mo le faatuatua ma le malamalama e tuputupu ae ai ma le matua: “E tatau ona tatou saunia a tatou lava eleele o le faatuatua. I le faia ai o lenei mea e manaomia ona tatou suaina le eleele e ala i le tatalo ma le lotomaualalo i aso taitasi, e talosagaina ai le malosi ma le faamagaloga. E tatau ona tatou faamaluina le eleele e ala i le faatoilaloina o lo tatou faamaualuga. E tatau ona tatou sauniaina le eleele e ala i le tausiaina o poloaiga i le mea e gata mai ai lo tatou mafai. E tatau ona tatou faamaoni i le Alii i le totogiina o a tatou sefuluai ma isi a tatou taulaga. E moomia ona tatou agavaa ma mafai ona aumaia mana sili o le perisitua e faamanuia ai i tatou lava, o o tatou aiga, ma isi o loo i ai i la tatou vaavaaiga. E leai se nofoaga sili ona lelei atu mo o tatou fatu faaleagaga o le faatuatua ia faafaileleina nai lo o nofoaga paia o loo i totonu o tatou malumalu ma o tatou aiga” (i le Conference Report, Oke. 1999, 61; po o le Liahona, Ian. 2000, 57).
Ata
Ata tusi o le fatu ua avea ma laau
O le fatu ua totoina o le faatuatua e le faafuasei ona tupu. Sa faamatala mai e Peresitene Boyd K. Packer le taua o le onosai a o faatalitali ai mo le ola a’e o le fatu:
“O le mea ua ou iloa, e le faafuasei ona oo mai se molimau ia i tatou. Ae e tuputupu ae e pei ona fai mai ai Alema, e mai se fatu o le faatuatua. …
“Aua e te toatamai pe afai sa e faitauina ma toe faitauina ae le maua lava se molimau mamana. Atonu o le a e pei o soo ua ta’ua i le Tusi a Mamona o e na tumu i le mana o le Atua i le mamalu tele ‘ma ua latou le iloa ai’3 Nifae 9:20
“Ia fai le mea sili e te mafaia. Mafaufau i le fuaiupu lenei: ‘Ia pule foi ina ia faia nei mea uma i le poto ma le auaua’i lelei; aua e le tatau ona momo’e vave le tagata ia silia le malosi ua ia te ia. Ma lea foi, e tatau ona filiga o ia ina ia maua ai le taui; o lea, e tatau ai ona ia faia mea uma ma le auaua’i lelei’(Mosaea 4:27)” (i le Conference Report, Ape. 2005, 7; po o le Liahona, Me 2005, 8).
Sa faaaoga e Alema le mataupu o le tofo e faamatala ai le tuputupu ae o le molimau. Sa faaaoga foi e le Perofeta o Iosefa Samita (1805–44) le tofo e aoao ai e uiga i le iloagofie o mataupu faavae moni: “O mataupu faavae lelei nei. E tofo lelei. E mafai ona outofo i aoaoga faavae o le ola e faavavau, ma e faapena foi ia te outou. … Ou te iloa pe a ou tau atu ia te outou nei upu o le ola e faavavau e pei ona tuuina mai ia te au, ua outou tofo i ai, ma ou te iloa ua outou talitonu i ai. E te fai mai e suamalie le hani, ma e faapena foi ia te au. E mafai foi ona ou tofo i le agaga o le ola e faavavau. Ou te iloa e lelei; ma pe a ou tauina atu ia te outou nei mea e pei ona tuuina mai ia te au e auala mai i musumusuga a le Agaga Paia, ua noatia ai outou e taliaina i latou iasuamalie, ma olioli ai pea lava pea” (History of the Church, 6:312; faaopoopo le faatusilima).
Sa saunoa mai Sister Janette Hales Beckham o le sa avea muamua ma peresitene aoao o Tamaitai Talavou e uiga i lagona e fesootai ma le faitauina o tusitusiga paia: O le aoao ia iloagofie aoaoaga a le Agaga o se vaega taua lea e fesoasoani ai i le faatuatua ina ia faatinoina. O la’u tama teine o Karen, na ia faasoa mai lona aafiaga. Fai mai a ia, ‘A o ou teineitiiti, sa amata ona ou faitauina le Tusi a Mamona mo le uluai taimi. Ina ua mavae le tele o aso o faitau, na ou tau atu ai i se tasi o po i le 1 Nifae 3:7. … Ou te le iloaina o se fuaiupu lauiloa, ae a o ou faitauina lena fuaiupu, sa matua faagaeetiaina lava au. Na faagaeetiaina au ona o le a fesoasoani le Tama Faalelagi ia i tatou e tausia Ana poloaiga, ae o le tulaga loloto lava o le faagaeetia o se lagona. Sa ou vaaia ou matua o makaina fuaiupu i a la tusitusiga paia i penitala mumu. O lea sa ou tu ai i luga ma sue faatapito ai le fale atoa seia oo ina ou mauaina se penitala mumu, ma faatasi ai ma se lagona tele o le mamalu ma le taua, na ou makaina lena fuaiupu i la’u lava Tusi a Mamona.’ Sa faaauau pea le tala a Karen: ‘I le tele o tausaga pe a ou faitauina tusitusiga paia, e saga faamanatu mai pea lava pea lena aafiaga—o le faitauina o se fuaiupu ma maua ai le lagona loloto o le faagaeetia. Na oo mai le taimi na ou iloaina ai o lena lagona, o faalogoga o le Agaga Paia”’ (i le Conference Report, Oke. 1997, 104; po o le Liahona, Ian. 1998, 89).
E pei lava ona tautala atu ia Alema i tagata matitiva o sa Sorama, sa ia talosagaina i latou ina ia iloagofie le moni o ana savali mo i latou lava. E le mafai e se tasi tagata ona aoaoina se aoaoga faavae o le talalelei mo le isi. Sa faamalamalama mai e Elder Neal A. Maxwell e faapea o i tatou taitoatasi e mafai ona iloaina le faamautinoaga o upumoni paia:
“Sa faamatala e Alema le tuputupu ae o le faatuatua ma le auala e mafai ai ona avea le faatuatua ma malamalamaaga faatasi ai ma aafiaga o faalogoga ma le faautautaga poto o le tagata talitonu. A maea ona faateleina le malamalama o le tagata talitonu ma faalauteleina lona mafaufau, sa fesili ai Alema, ‘O lea, e le moni ea lenei? E moni, sa ia fai mai ai, aua e ‘iloagofie, o le mea lea tou te iloa ai ua lelei.’ (Alema 32:35.)
“O le moni o mataupu faavae paia taitasi e iloagofie lava e i tatou i se faatulagaga o le faamaoniga ma faamautinoaga lea e faamaonia ai la tatou tala, ‘Ou te iloa!’” (O Mea E Pei Ona I Ai Lava[1978], 10).
Sa faaaogaina e Elder Bruce C. Hafen o le Fitugafulu, le faataoto a Alema i le faatoaga, e faailoa ai vaaiga e lua o le faafaileleina lea e aumaia faamanuiaga o le talalelei i o tatou olaga: “E lua auala tatou te tuputupu ae ai—o le aveeseina lea o mea leaga e oo mai ai le faanoanoa i o tatou olaga ma le atiina ae lea o mea lelei e aumai ai le fiafia i o tatou olaga. O le alofa tunoa o le Faaola e faamanuiaina ai vaega uma e lua—pe afai e fai la tatou vaega. O le mea muamua ma ia faifai soo, e tatau ona tatou veleeseina vao o le agasala ma filifiliga leaga. E lē lava le na o le moa o le vao. Ia matuai vele ese atoa ma aa, ia salamo atoatoa ina ia faamalieina ai tulaga manaomia o le alofa tunoa. Ae o le faamagaloina ua na o se vaega o lo tatou alualu i luma.Tatou te le o totogiina na o se aitalafu.O lo tatou faamoemoega ia avea ma ni tagata selesitila. A uma loa ona tatou faamamaina o tatou loto, ua tatau loa ona tatou faaauau pea ona toto, vele, ma tausia faalelei ia fatu o uiga auau mama faalelagi. A o tatou alualu i luma i le galulue malolosi ma le lotopulea ina ia ausia Ana meaalofa, ‘o le alofa e faaalia, [“Ua Susulu Mai Nei o Le La,” Viiga, nu.140], e pei o le faamoemoe ma le agamalu. E oo lava i se laau o le ola e mafai ona ola i totonu o togalaau o o tatou loto, e fua mai ai fua e sili ona suamalie e faamamaina ai a tatou avega uma ‘e ala i le olioli mai lona Alo’ [Alema 33:23 ]. Ma a fuga mai fugalaau o le alofa mama i totonu o i tatou, o le a tatou alolofa atu i isi i le mana o le alofa o Keriso lava ia [tagai Moronae 7:48]” (i le Conference Report, Ape. 2004, 100–101; po o le Liahona, Me 2004, 97 98).
Sa aoao mai e Peresitene Dieter F. Uchtdorf o le Au Peresitene Sili ia tagata o le Ekalesia i le auala e avea ai ma se soo o Keriso:
“O le ala filemu lea o le soo o Iesu Keriso.
“E ui o lea, e le o se tali faatopetope po o se vaifofo i se aso se tasi.
“Sa tusi mai talu ai nei sa’u uo, ma faamatalatala mai ai e faapea, sa faigata lava ia te ia ona tausia ia malosi ma olaola lana molimau. Sa fesili mai o ia mo se fautuaga.
“Sa ou toe tusi atu ia te ia ma fautua atu i ai ma le alofa ni nai mea patino e mafai ona ia faia, ina ia faaogatusa ai lona olaga ma aoaoga o le talalelei toefuataiina. Sa ou ofo, ina ua toe tusi mai i se vaiaso mulimuli ane. O le aano o lana tusi e faapea: ‘Sa ou taumafaia le mea sa e fautuaina mai. E le’i aoga. O le a se isi au fautuaga?’
“Uso e ma tuafafine, e tatau ona tatou tumau ai. Tatou te le maua le ola e faavavau i se tuuga saoasaoa puupuu— o se tautuuga lenei o le onosai. E tatau ona tatou faaaogaina ma toe faaaoga nei mataupu faavae paia o le talalelei. O lea aso ma lea aso e manaomia lo tatou faia e avea ma se vaega masani o lo tatou olaga.
“Ua tele taimi tatou te fetagofi atu ai i le talalelei e pei o se faifaatoaga e tago tuu se fatu i le eleele i le taeao, ae faamoemoe e maua le sana ua matua i le afiafi. Ina ua faatusatusa e Alema le upu a le Atua i se fatu, sa ia faamatala mai e oo lava ina tupu mai se laau e fua mai se fatu, o le taunuuga lena o lo tatou ‘faatuatua, ma [lo tatou] filifiligā, ma lo outou faato’ato’a, ma lo outou onosai’[Alema 32:43]. E moni e i ai nisi faamanuiaga e vave mai: o le taimi lava e uma ai ona toto le fatu i o tatou loto, ona amata loa lea ona maena ae ma tatupu ma ola, ma o iina tatou te iloa ai e lelei le fatu. O le taimi lava tatou te tutu ai i luga o le ala ia avea ma soo, e amata ai foi ona tatou maua faamanuiaga e vaaia ma faamanuiaga e le vaaia mai le Atua.
“Peitai, e le mafai ona tatou maua le atoaga o na faamanuiaga pe afai tatou te ‘tuu tiai le laau ma le manatua e tausi i ai’ [f. 38].
“O le iloa e lelei le fatu ua le lava lena. E tatau ona tatou ‘tausi i ai ma le faaeteete tele, ia mau aa’ [f. 37]. O iina o le a mafai ai ona tatou tofo i le fua ‘e sili ona suamalie, ma … ua sili ona mama i mea uma ua mama’ ma ‘aai ai foi i lenei fua seia maoona lava i [tatou], ina ia le fia aai i [tatou] pe [tatou] te fia inu’[f. 42].
“O le avea ma se soo, o se faigamalaga. Tatou te manaomia ia lesona aupito sili o le faigamalaga e atiina ae ai o tatou uiga ma faamama ai o tatou loto. O le savavali ma le onosai i le ala e avea ai ma soo, tatou te faaalia ai ia i tatou lava le malosi o lo tatou faatuatua, ma lo tatou naunau e talia le finagalo o le Atua, ae le o o tatou loto.
“E le taitai ona lava le tautala e uiga ia Iesu Keriso pe folafola atu faapea o i tatou o Ona soo. E le lava le siosiomia o i tatou lava i faatusa o la tatou tapuaiga. O le avea ma soo e le maua i le matamata e pei o se taaloga. E le mafai ona tatou faamoemoe e maua faamanuiaga o le faatuatua i le tutu i tua o le malae e leai se mea e fai, pe faapea e mafai ona tatou maua faamanuiaga o le soifua maloloina i le nofonofo i luga o se sofa ma matamata i taaloga i luga o le televise ma avatu ia fautuaga i le au taaalo. Ae o nisi tagata, o le avea ma ‘soo matamata’ ua sili atu lena pe ua avea foi lava ma ala autu e tapuai ai.
“O la tatou tapuaiga e le o se tapuaiga e maua mai i olaga o nisi tagata. E le mafai ona tatou mauaina faamanuiaga o le talalelei i le na ona matau o mea lelei e fai e isi. E manaomia lo tatou o ese mai autafa o le malae ma faatino mea tatou te folafola atu. …“… O le taimi lenei e opomau ai le talalelei a Iesu Keriso, ia avea ma ona soo, ma savavali i Lona ala” (“O Le Ala o le Soo, Liahona, Me 2009, 76–77).
Sa faaaogaina soo lava e Alema ia tusitusiga paia e tautalagia ai ia mataupu faavae sese ia sa aoaoina e sa Sorama. Na muamua ona ia taulimaina le talitonuga sese e faapea ua na o luga lava o le Rameutoma e mafai ona e tatalo ai. I le faaaogaina o tusitusiga paia sa ia faamalamalamaina e mafai ona latou tatalo ma tapuai i le Atua i soo se mea lava; i o latou “togavao,” i o latou “fanua,” i o latou “fale,” ma e faapea foi i o latou “afeafe” (tagai Alema 33:2–11). Ona tautalagia lea e Alema le mea moni e faapea ua molimau mai ia perofeta uma i le afio mai o se Keriso (tagai Alema 33:14–22; tagai foi Iakopo 7:11).
Sa faamalamalama mai e Peresitene Henry B. Eyring o le Au Peresitene Sili le uiga o le i ai i se aga o le tatalo e le aunoa:
“Pe a poloaiina i tatou e le Atua ina ia tatou tatalo, Na te faaaogaina ia upu e pei o le ‘tatalo e le mavae’ ma le ‘tatalo soo’ ma le ‘tatalo malosi.’
“O na poloaiga e le manaomia ai le faaaogaina o ni upu se tele. O le mea moni lava, na tau mai e le Faaola ia i tatou faapea e le manaomia ona tatou tautu i upu pe a tatou tatalo. O le maelega i le tatalo lea e manaomia e le Atua e le faaaogaina ai ni upu teuteu po o ni tatalo uumi. …
“E faatoa mafai ona tosina atu o tatou loto i le Atua pe a faatumulia i le alofa mo Ia ma faatuatua i Lona agalelei” (i le Conference Report, Oke. 2001, 17; po o le Liahona, Ian. 2002, 17 18).
Alema 33:19–23. O se Faatusa o Keriso Na Siitia i Luga i le Vao
Ona o le muimui o Isaraelu anamua i le vao, sa auina mai ai e le Alii ni gata uogo e faamaualaloina ai i latou ua faaonaina faaleagaga. E toatele ia tagata na fano ai, ma o tagata na salamo na liliu atu i lo latou perofeta ma aioi atu ia te ia e faatoga atu i le Alii e aveese ia gata. Sa tau atu e le Atua ia Mose e fai se gata apamemea ma tuu i luga o se laau. Sa folafola atu e le Alii o i latou uma o e vaavaai atu i le gata ua siitia i luga o le a faamaloloina (tagai Numera 21:4–9 ).
O le gata apamemea o se faatusa. Sa faamalamalama mai e Elder Dallin H. Oaks o se faatusa o se “foliga po o se faamanatu o se isi mea” (i le Conference Report, Oke. 1992, 51; po o Ensign, Liahona Nov. 1992, 37).
Sa aoao mai e Iesu Keriso o le faatusa sa siitia i luga i le vao na molimau ai ia te Ia: “ E pei ona siitia i luga e Mose o le gata i le vao, e ao ina faapena ona siitia i luga le Atalii o le tagata: ina ia le fano se tasi e faatuatua ia te ia, a ia maua le ola e faavavau” (Ioane 3:14–15 ). Ona o lo latou loto maaa ma le le talitonu, e toatele tagata Isaraelu na teenaina le avanoa lelei o se auala faigofie o le faamalologa (tagai 1 Nifae 17:41). Sa valaaulia e Alema ia tagata uma ina ia “amata ona talitonu i le Alo o le Atua, e afio mai o ia e togiola ona tagata, ma … togiolaina ai a latou agasala” (Alema 33:22; tagai foi Helamana 8:14–15). Sa folafola atu e Alema o le tausia o lenei molimau o le a mama ai avega a se tasi ma taitai atu ai i le ola e faavavau (tagai Alema 33:23).
Alema 34:9–12. O Le Togiola a Iesu Keriso e Le I’u ma e Faavavau
Sa faauigaina e Elder Bruce R. McConkie (1915–85) o le Korama a Aposetolo e Toasefululua le aotelega o le taulaga le i’u ma le faavavau a le Alii: “Pe a saunoa ia perofeta e uiga i se togiola e le i’u, o la latou faatatauga lava lena. O lona aafiaga e aofia ai tagata uma, o le lalolagi lava ia ma ituaiga o ola o i ai i luga o le fogaeleele, ma oo atu ai i vanimonimo ma le atulaulau e le iu o le faavavau” (Mormon Doctrine, 2nd ed. [1966], 64; tagai foi Mose 7:30).
Sa faamalau taitasi e Elder Russell M. Nelson o le Korama a Aposetolo e Toasefululua nisi o auala e le i’u ai le Togiola a Iesu Keriso:
“O Lana Togiola e le i’u —e leai sona iuga [tagai 2 Nifae 9:7; 25:16; Alema 34:10, 12, 14]. E le i’u foi ina ia mafai ona faaolaina tagata ola uma mai le oti e le uma. E le i’u pe a fuafua i Lona puapuagatia tele. Sa le’i i’u ina ia taofia ai le uluai faiga sa ositaulagaina ai manu. E le i’u i se tulaga— na faia i le taimi e tasi mo tagata uma[tagai Eperu 10:10]. Ma sa faalautele atu le alofa mutimutivale o le Togiola e le gata i tagata e le mafaitaulia, ae faapena foi i le lalolagi e le mafaitaulia na foafoaina e Ia [tagai MFF 76:24; Mose 1:33]. E le i’u i le tulaga e le oo i ai se fua faatatau po o se malamalama o le tagata soifua.
“E na o Iesu lava e mafai ona ofoina atu lea ituaiga togiola e le i’u talu ai ona sa soifua mai o Ia i se tina faitino, ma se Tama e tino ola pea. Talu ai lena tofi tulaga ese, o Iesu o se Tamalii e le i’u” (i le Conference Report, Oke. 1996, 46; po o le Liahona, Ian. 1997, 39 40).
Alema 34:14. “Ua Faasino atu Mataitusi Uma Lava i Lena Taulaga Sili e Faaiu ai Taulaga”
Sa folafola atu e Amoleka e faapea o le uiga atoa lava o le tulafono a Mose o le faasino atu lea o tagata i le “taulaga sili e faaiu a’i taulaga” a Iesu Keriso lea e mulimuli mai i Ketesemane ma Kolokota. O taulaga e osi i manu, o tausamiga ma faamanatuga, ma isi sauniga o aso uma sa tumu i faatusa e tele ma ata lafoia, e faasino ai le fanauga a Isaraelu ia Keriso. E tutusa foi ma le faamanatuga e faamanatu mai ai ia i tatou i aso nei le misiona togiola a Iesu Keriso. E faapena foi, ia Paseka anamua o se faamanatuga faaletausaga o le aumaia e le Alii o Isaraelu mai le nofo pologa ai i Aikupito. O le aso i le Eseta o se faamanatuga faaletausaga lea e ala i le Togiola ma le Toetu o le Alii ua mafai ai ona faaolaina i tatou mai le nofopologa faaleagaga.
A o avea o se tasi o Fitugafulu, sa saunoa ai Elder Robert E. Wells e uiga i le faatuatua lea e manaomia ai le aumaia o suiga i o tatou olaga e lavatia ai e auai i le Togiola a Iesu Keriso:
“‘Pe o le a tonu lava le tele o le faatuatua ou te manaomiaina mo le togiola a Keriso e aoga mo au?’ I se isi faaupuga, o le a le tele o le faatuatua ou te manaomia e maua ai le faaolataga? I le tusi a Alema … tatou te maua ai le tali. Sa aoao atu e le perofeta o Amoleka lenei mataupu faavae faigofie ae silisiliese: ‘O le Alo o le Atua, … e faaoo mai ai i tagata le ala latou te faatuatua ai e oo i le salamo ’ (Alema 34:14–15; faaopoopo le faamamafa).
“Faamolemole ia matau na upu e [tolu]: faatuatua e oo i le salamo. O le tali lena. E faafa ona ia faaaogaina i fuaiupu e tolu ia le faamatalaga lena [tagai i le Alema 34:15–17]. …
“O le tuufaatasiga la o le faatuatua ia Keriso faaopoopo i ai ma lefaatuatua e oo i le salamo e matuai taua tele. O lena mataupu o se tasi o malamalamaaga sili ua tatou maua i le taua o le faatuatua faigofie ma le manino —faatuatua e manaomia e salamo ai. O le lava o le faatuatua maoae e aveesea ai mauga e le o manaomia; o le lava o le faatuatua e tautala ai i gagana po o le faamalolo ai o e mamai e le o manaomia; ua na o le pau le mea tatou te manaomiaina o le lava o le faatuatua e iloa ai ua tatou agasala ma ia salamo ai ia tatou agasala, ia lagona le salamo mo agasala, ma le manao e le toe faia se agasala ae ia faafiafiaina ai Keriso le Alii. Ona o le vavega silisili o vavega uma, o le Togiola, lea ua faasaoina ai i tatou e Keriso mai lo tatou faasalaga tatau, ua taunuu nei mo i tatou” (“The Liahona Triad,” in Bruce A. Van Orden and Brent L. Top, eds., Doctrines of the Book of Mormon: The 1991 Sperry Symposium [1992], 6–7).
Alema 34:15–16. “E Mafai e le Alofa ona Faamalieina Iuga o le Faasmasinoga”
E lua itu o le faamasinoga:
O le usiusitai i tulafono e taunuu ai i faamanuiaga ia e aumaia ai le olioli (tagai MFF 130:20 –21).
O le le usiusitai i tulafono e taunuu ai i faasalaga ia e aumaia ai le faanoanoa (tagai Alema 42:22).
E lua auala e faamalieina ai le faamasinoga tonu:
Aua lava nei solia le tulafono
Afai e te solia le tulafono, ia totogi le sala.
Faafitauli: E le tauamiotonuina foi le tino i le tulafono (tagai 2 Nifae 2:5 ); aua ua agasala tagata uma lava (tagai Roma 3:23). O lea, e tatau ona totogi le tau.
E lua ia aafiaga o le agasala:
Ona o le tulafono faaletino ua vavaeeseina ai i tatou—ua solia le faamasinoga tonu (tagai Alema 42:14).
Ona o le tulafono faaleagaga ua fano ai tatou—“e le mafai foi ona sao le mea eleelea i le malo o le Atua” (1 Nifae 15:34).
O Iesu sa “avae o ia e ia lava e fai ma taulaga ona o agasala, e faaatoatoa ai iuga o le tulafono” (2 Nifae 2:7).
Sa muai faatulagaina e Keriso le tulafono o le alofa tunoa, ae pe faapefea?
Sa Ia tausia ma le atoatoa le tulafono ma sa leai ma se agasala. Sa tauamiotonuina o ia e le tulafono.
I le togalaau i Ketesemane ma i luga o le satauro, sa puapuagatia ai o Ia ma totogi le tau mo le sala e foliga mai o Ia ua tausalaina i agasala uma ua faia.
O le faatuai ma le femoumouai e mafai ona aafia ai a tatou taumafaiga e toe foi atu i lo tatou Tama Faalelagi. Sa aoao mai e Peresitene Iosefa Filitia Samita e faapea, “O le faatuatuai, e mafai ona faatatau i aoaoga faavae o le Talalelei, o le faomea lea o le ola e faavavau —o le olaga lea i le afioaga o le Tama ma le Alo” (The Way to Perfection [1970], 202).
Alema 34:34–35. O Lena Lava Agaga o Le a Toe Foi Mai ia i Tatou
Sa faamanino mai e Amoleka e faapea o i tatou, o na o a tatou filifiliga i aso taitasi, ua tatou tuuina atu i tatou lava i pulega po o aafiaga a le o le Agaga o le Alii ia po o le agaga o le tiapolo. Sa tuuina mai e Peresitene Harold B. Lee (1899–1973) le faamalamalamaga lea o lo o mulimuli mai o le Alema 34:35: “Mo i latou e feoti i o latou tulaga o le agasala, e lei salamo, ua faapea mai ia tusitusiga paia e faamaufaailogaina i latou e le tiapolo e fai mona (tagai Alema 34:35), o lona uiga seia oo ina latou totogia le tau atoa uma lava mo mea sa latou faia, e le mafai ona faaolaina i latou mai lana puleaga. Afai e faatoilaloina i latou i mea leaga uma a Satani e manaomia ai le faamalieina o le faamasinoga tonu, ona aumai lea o i latou mai le puleaga a Satani ma tofia i latou i se na nofoaga i le lalolagi selesitila, terasitila, po o le telesitila o lo tatou Tama e tauia e o latou olaga i luga o lenei fogaeleele” (The Teachings of Harold B. Lee, ed. Clyde J. Williams [1996], 59).
Sa faamamafa mai e Elder Melvin J. Ballard (1873–1939) o le Korama a Aposetolo e Toasefululua le taua o le salamo i le taimi o le olaga faaletino:
“O lenei olaga o le taimi lea mo tagata e salamo ai. Ia aua lava ne’i i ai se isi o i tatou e mafaufau e alu ifo i le tuugamau a o le’i faatoilaloina ia mea leaga uma o le tino ona aveesea lea i le tuugamau o a tatou agasala uma ma mea leaga uma. O le a i ai pea ma i tatou. O le a i ai pea i le agaga pe a tuueseeseina mai le tino.
“… [O le olaga faaletino] o le taimi lea e sili atu ona gauaigofie ma fetuuna’i lelei ai tagata” (The Three Degrees of Glory: A Discourse [Sept. 22, 1922], 11–12).
(Alema 35). O Taua a Sa Nifae ma Sa Lamana o lo o Faamaumauina i le Alema 43–62
I le faasologa o taimi ma mea na tutupu, o lo o mulimuli ai le Alema 43 i leAlema 35. “O Alema, ua tigaina ona o le amioletonu a lona nuu, ioe, ona o taua ma le faamaligiina o le toto,” sa faapotopoto ona atalii “taitoatasi” e tau atu i ai “mea e uiga i le amiotonu” (Alema 35:15–16). Sa maoti lava le faamauina e Mamona o lona maofa i upu a Alema i ona atalii o Helamana, Sepulona, ma Korianetona—a o lei toe foi atu i “tala o taua a sa Nifae ma sa Lamana” (Alema 43:3; ia faatusatusa ia aso o lo o i lalo o itulau o le Alema 35 ma le Alema 43).
O le Alema 35 o lo o faamatala ai le afuaga lea na taitai atu i taua a sa Lamana ma sa Nifae, o lo o aofia ai mataupu 43–62. O misa ma taua na mulimuli mai atonu e mafai ona otootoina mai i le Alema 35:
O le “vaega o alii sili o sa Sorama … ua ita i latou ona o le upu, aua ua faaumatia ai lo latou piopio [faitaulaga pepelo]” (fuaiupu 3).
O tagata sa Sorama na liua, ia sa “tafi ese ai le nuu; ua toatele foi i latou” (fuaiupu 6 ), ua o atu ma nonofo i le nuu o Seasona (nuu o Amona). O i na fafagaina ai i latou, faalavalava, ma tuuina atu fanua e fai mo latou tofi, ma faamalieina ai o latou manaoga uma (tagai fuaiupu 9). I lo latou nuu muamua, sa vaai ai tagata ia i latou o ni tagata matitiva, leaga, ma inosia (tagai Alema 32:2–3).
O le agalelei o le nuu o Seasona i le taliaina o tagata fou liliu mai na feita ai sa Sorama (tagai Alema 35:8).O le faipule sili o sa Sorama ua “mapugatamai foi faamatau e tele ia te i latou” (fuaiupu 9). “A ua le matatau le nuu o Amona” (fuaiupu 9), ma ua faatuputeleina ai le ita o sa Sorama ma lo latou faipule.
O sa Sorama e lei liua “ua amata ona latou feoai ma sa Lamana ma faaosoina i latou e ita foi” i le nuu o Amona, o i latou o tagata liliu o sa Lamana (fuaiupu 10; tagai foi Alema 43:6–7).
O mea na tutupu o lo o faamaumauina i le Alema 35 ua faaalia ai le mafuaaga na amata ai le taua umi a sa Nifae ma sa Lamana ia sa faamaumauina i leAlema 43–62. Sa faaosoina e Satani le ita i loto o sa Sorama (tagai2 Nifae 28:20). Ona, latou faaosoina ai lea o sa Lamana ma isi tagata tetee ia sa Nifae e ita ma sii ai le taua e faagasatau ia i latou o tagata lelei.
Manatu e Mafaufau Loloto i ai
O a auala e mafai ai e le loto o se tagata ona “tumu ma faalatalata atu i le tatalo” e le aunoa i le Alii? Alema 34: 27
Aisea ua na o Iesu Keriso e mafai ona faia se togiola e le mafuatia?
Aisea e faatuai ai ona salamo ia tagata i nisi taimi? O le a le malaia e oo i ai mai lenei faatuai?
Galuega Fautuaina
Ia fai se otootoga auilili o aoaoga a Alema i le atinaega o le faatuatua mai le Alema 32. Ia faaali pe faapefea ona tausia le faatuatua mai le faamoemoe e faaatoatoa ai le malamalama ma pe o le a le matafaioi o le upu a le Atua o lo o faatinoina i lenei faagasologa.
I le faaaogaina o aoaoga e uiga i le tatalo i le Alema 33–34, ia faailoa ia auala patino e mafai ai e au tatalo ona fua atili.