Inisitituti
Mataupu 22: Mosaea 25–29

Mataupu 22

Mosaea 25–29

Folasaga

E toatele le “tupulaga faia’e” na teenaina le molimau a o latou tamā ma taitaiina nisi o tagata o le Ekalesia e “faia agasala e tele” (tagai i le Mosaea 26:1, 6). O se taunuuga, na saili atu ai Alema i le taitaiga a le Alii mo le ala e taulima ai tagata o le Ekalesia o e na solia tulafono a le Atua. Na tatalo foi o ia ina ia mafai ona “aumaia i le malamalama o le upu moni” (tagai i le Mosaea 27:14) lona lava atalii. O tali i ia talosaga e lua ua tuuina mai ai ni aoaoga aoga mo i tatou i aso nei. Ua tatou iloa le ala e ao i taitai perisitua ona apoapoai atu ai ia i latou o e solia agasala matuia ma fesoasoani atu ia i latou i laasaga o le salamo. Ua tatou iloa foi le tatau i tagata uma ona “fanaufouina i le Atua” i le tala ia Alema le Itiiti ma atalii e toafa a Mosaea. E ala i au suesuega, ia mafaufau pe mafai faapefea e le taliaina o le Togiola a Iesu Keriso ona oo atu i le salamo, liua atoa, ma se manao e galue mo le faaolataga o isi.

Faamatalaga

Mosaea 25–29. Mosaea2

Mosaea 25:5–11. O Le Mana o Tusitusiga Paia

  • I le Mosaea 25:5–11, Na “poloai” atu Mosaea ia faitauina atu tusitusiga paia i lona nuu. O le lisi o loo i lalo ua faaalia ai aafiaga na faia e tusitusiga paia i tagata:

    1. Ata
      Mana o tusitusiga paia

      Jerry Thompson, © IRI

      Na “tutumu i latou i le ofo ma le taufaiofo” (fuaiupu 7).

    2. Na “faatumuina i latou i le olioli tele” (fuaiupu 8).

    3. Na latou lagonaina le “faanoanoa” ona o le toatele na fasia (fuaiupu 9).

    4. Na latou iloaina le “agalelei e le aunoa o le Atua” (fuaiupu e 10).

    5. Na latou lagonaina le tatau ona “avae le faafetai i le Atua” (fuaiupu e 10).

    6. O agasala a isi “na faatumuina ai [i latou] i le tiga ma le atuatuvale” (fuaiupu e 11).

Mosaea 26:1–4. O Le Tupulaga Faiae

  • Na faamamafaina mai e Peresitene Henry B. Eyring o le Au Peresitene Sili, le tatau ona aoaoina o le autalavou a le Ekalesia ia talitonu i le Atua: “E leai se tiute i le malo e sili atu lona taua nai lo le faatupuina o le faatuatua i le autalavou. O tamaiti taitasi i tupulaga taitasi e filifilia le faatuatua po o le le talitonu. O le faatuatua e le o se tofi; ae o se filifiliga. O i latou na talitonu i le Tupu o Peniamina na iloaina lena mea. O le toatele o a latou fanau na mulimuli ane filifili le le talitonu. Ua tuuina mai i tusitusiga paia o le mafuaaga, ‘aua ua le mafafai i latou ona valaau i le Alii lo latou Atua’ (Mosaea 26:4)” (“Inquire of the Lord” [saunoaga i se afiafi ma Elder Neal A. Maxwell, Fep. 2, 2001], 1, www.ldsces.org).

  • I le saunoa atu i le autalavou a le Ekalesia, na faamalamalama ai e Elder Jeffrey R. Holland o le Korama a Aposetolo e Toasefululua, le mafuaaga e fautua ai e tagata matutua o le Ekalesia i latou e laiti ifo ia i latou: “O le tele o mea tatou te faia i lenei Ekalesia e faasino atu ia te outou, o i latou o loo ta’ua i le Tusi a Mamona ‘o le tupulaga faia’e’ (Mosaea 26:1; Alema 5:49). O i matou, o e ua uma ona uia lena vaega o le ala o le olaga ua outou savalia nei, ua taumafai e aoao atu ia te outou se mea sa matou aoaoina. Matou te valaau atu ni upu faalaeiau. Matou te taumafai e lapatai atu e uiga i ni mailei po o ni faigata o i le ala. I tulaga e mafai ai, matou te taumafai e savavali faatasi ma outou ma faalatalata mai outou i o matou tafatafa” (i le Conference Report, Ape. 1995, 52; po o le Liahona, Iulai 1995, 43).

Mosaea 26:8–12. Aisea Na Musu ai le Tupu o Mosaea e Faamasino Tagata o le Ekalesia?

  • Ina ua uma ona tuuina atu e le Tupu o Mosaea (i le avea ai ma tupu ma perofeta) ia Alema le pule e faavaeina ai ekalesia i laueleele atoa, na pei o se tulaga masani ia Alema ona auina atu tagata le usiusitai o le Ekalesia ia Mosaea ina ia faamasinoina. Peitai, na faamatuu atu e le tupu ia Alema le pule o le perisitua, e faailoa ai o Alema sa nafa ma le taulimaina o i latou na solia tulafono a le Ekalesia. Na tumau lava ia Mosaea le faamasinoina o i latou na solia tulafono a le nuu.

Mosaea 26:20. “E te Maua ai le Ola Faavavau”

  • Na folafola mai e le Alii o le a maua e Alema “le ola faavavau” (Mosaea 26:20). Na tuuina mai e le Perofeta o Iosefa Samita (1805–44) le faagasologa e maua ai e se tasi lenei folafolaga: “A uma ona maua e se tagata le faatuatua ia Keriso, salamo i ana agasala, ma ua papatisoina mo le faamagaloina o ana agasala ma maua le Agaga Paia, (e ala i le faaee atu o lima), … ona ia faaauau ai pea lea ona faamaualalo i luma o le Atua, e fiaai ma fiainu i le amiotonu, ma ola i afioga uma a le Atua, ma e le pine ae fetalai atu le Alii ia te ia, Atalii e, o le a faaeaina oe. Pe a faamaonia o ia e le Alii, ma iloa e naunau le tagata e auauna atu ia te Ia i faigata uma, ona maua lea e le tagata lona valaauga ma faamautinoa lona filifilia, o le a ia maua le avanoa e maua ai le isi Faamafanafanaga, lea sa folafola atu e le Alii i le Au Paia, e pei ona tusia i le molimau a Ioane” (History of the Church, 3:380).

Mosaea 26:24–28. Iloaina o le Alii

  • Na faamalamalama mai e Elder Joseph B. Wirthlin (1917–2008) o le Korama a Aposetolo e Toasefululua, le ala e mafai ai ona tatou iloa le Alii: “E mafai ona tatou filifili e iloa le Alii e ala i le faitauina o tusitusiga paia i aso taitasi; e ala i le fesootai ma ia i tatalo faatauanau a le itiiti ifo o taeao ma po, ma i taimi o tofotofoga, o itula taitasi po o le sili atu foi, pe a manaomia; ma e ala i le tausia o ana poloaiga. Manatua, ‘O le mea foi lea tatou te iloa ai ua tatou iloa o ia, pe afai tatou te tausi i ana poloaiga. O se faapea, ua ou iloa o ia, a e le tausi e ia i ana poloaiga, o le pepelo lava lea, e le o i totonu ia te ia le upu moni. A o le tausi i lana afioga, e moni, ua atoatoa le alofa i le Atua i totonu ia te ia: o le mea lea ua tatou iloa ai o i totonu ia te ia i tatou.’ (1 Ioane 2:3–5.)” (Finding Peace in Our Lives [1995], 74).

Mosaea 26:29–30. Ta’uta’u Atu o Agasala

  • E tatau ona ta’uta’u atu agasala, o se vaega o laasaga o le salamo. Na folafola mai e le Alii, “Tou te iloa faapea se ua salamo i ana agasala—faauta, na te ta’uta’u atu ma lafoaia” (MFF 58:43 ). I le Faamaoni i le Faatuatua: O Se Tusitaiala o le Talalelei (2004), tatou te faitau ai i faamatalaga o loo i ai:

    “Ta’uta’u Atu. ‘O lē ua ufiufi lana solitulafono, e le manuia o ia: a o lē ua faaali ma lafoaiina e alofagia o ia’ (Faataoto 28:13). E taua i le faamagaloga se naunau e faaali atoa atu i lou Tama Faalelagi mea uma na e faia. Tootuli i Ona luma i le tatalo faamaualalo, ma faailoa atu au agasala. Ta’uta’u atu lou māasiasi ma le lagona tausalaina, ona faatoga atu lea mo se fesoasoani.

    “O agasala matuia, e pei o le solia o le tulafono o le legavia, e mafai ona faaletonu ai lou avea ma se tagata o le Ekalesia. O lea la, e moomia ai lou ta’uta’u o nei agasala ia i laua uma o le Alii ma Lona sui vaaia i le Ekalesia. E faia lenei tulaga i lalo o le vaaiga a lou epikopo po o le peresitene o le paranesi ma atonu foi ma lou peresitene o le siteki po o le misiona, o e o loo avea ma leoleo [mamoe] ma faamasino i le Ekalesia. E ui ua na o le Alii e mafai ona faamagaloina a tatou agasala, ae e i ai se sao taua o nei taitai perisitua i laasaga o le salamo. O le a latou tausisia le le faalauaiteleina o agasala e te ta’uta’u atu ma fesoasoani ia te oe a o e i ai i laasaga o le salamo. Ia e faamaoni a’ia’i ia i latou. Afai e te ta’uta’u atu na o ni nai [agasala], i le tauina atu o ni sese laiti, o le a le mafai ona e foiaina se agasala e sili atu le matuia e le faailoaina atu. O le vave o lou amataina o lenei laasaga, o le vave foi lea ona e maua o le toafilemu ma le olioli lea e oo mai faatasi ma le vavega o le faamagaloina” ([2004], 134).

Mosaea 26:32–36. “Ua Tineia o Latou Igoa”

  • O le “tineia” i le Mosaea 26:36e faatatau i le aveesea o le igoa [mai faamaumauga o le Ekalesia]. A soli e se tagata o le Ekalesia se agasala matuia, e tatau i auauna a le Alii ona uia laasaga e fesoasoani ai i le tagata agasala i le salamo. O nisi taimi o lenei tulaga e aofia ai aoaiga aloaia po o le le aloaia o le Ekalesia. Na faamalamalama mai e Elder Dallin H. Oaks o le Korama a Aposetolo e Toasefululua.

    “O aoaiga a le Ekalesia e uunaia ai tagata o le Ekalesia e tausia poloaiga a le Atua. O lona i ai … e faamamafaina ai le ogaoga ma faamanino ai le uiga o poloaiga a le Atua. E matuai taua lenei i se lalolagi ua le mataofiofia. …

    “O le leoleo mamoe o loo i ai se tiutetauave o le puipui o le lafu. … O lena tiutetauave e ono manaomia ai lona taofia [o le tagata agasala] mai le faaaumea a le Au Paia pe iu foi ina motusia ai lona avea ma se tasi o le lafu. E pei ona aoao mai Iesu: ‘A e afai na te le salamo, e le faitauina o ia faatasi ma lo’u nuu, ina ia le faaumatia e ia lo’u nuu, aua faauta, ua ou iloa a’u mamoe, ma ua faitaulia i latou.’ (3 Ni. 18:31; tagai foi i le Mosaea 26:34–36.)’’ (The Lord’s Way [1991], 216, 227).

  • Na faailoa mai Peresitene James E. Faust (1920–2007) o le Au Peresitene Sili, solitulafono e tatau ona fai ai aoaiga faaleEkalesia:

    “O le aoaiga a le Ekalesia, e le faatapulaaina na o agasala o feusuaiga, a e aofia ai foi isi amioga e pei o le fasioti tagata, faapau pepe, talepe fale, gaoi, auala taufaavalea ma isi amioga le faamaoni uma, ma le solia ma le loto i ai o tulafono ma aiaiga a le Ekalesia, fautuaina po o le faia o autaunonofo, liliuese, po o se isi lava amioga e le faaKerisiano, e aofia ai le tetee po o le ulagia o e ua faauuina e le Alii, ua le tusa ai ma tulafono a le Alii ma le faatulagaga a le Ekalesia. …

    “O gaoioiga nei e aofia i le liliuese i le Ekalesia, pe a fai e tagata o le Ekalesia ‘(1) ni amioga e fai soo ma le iloa lelei, faalauaitele, ma le loto i ai o faasalalauga e tetee ai i le Ekalesia, po o ona taitai; (2) faaauau pea ona aoao atu aoaoga e le o ni aoaoga faavae a le Ekalesia, ina ua uma ona faasa’oina e o latou epikopo po o le taitai e i luga atu; po o le a (3) faaauau pea ona mulimuli i aoaoga a vaega a tagata faatuiese (e pei o i latou o loo fautuaina pea le faia o autaunonofo) ae ua uma ona faasa’oina e o latou epikopo po o taitai e i luga atu’ (Tusitaulima o Faatonuga a le Ekalesia [1989], p. 10-3)” (i le Conference Report, Oke. 1993, 52–53; po o le Liahona, Ian. 1994, 44–45).

  • I le 1985 na tuuina mai ai e le Au Peresitene Sili se valaaulia mo tagata uma ia foi mai, lea na faamanatu mai ai ia i tatou lo tatou tiute ia i latou “ua tineia” o latou igoa:

    “Ua tatou iloa nisi o i latou o e ua le toaaga mai, o isi o e ua faitio ma ua matele i le saili masei, ma i latou o e ua taofia pe tineia igoa ona o solitulafono matuia.

    “Mo i latou uma na tatou te aapa atu i ai i le alofa. Tatou te naunau e faamagalo i le agaga o Ia o le na fetalai mai: ‘O a’u, le Alii, e faamagalo atu i e ou te loto ia faamagaloina, a’o outou e ao ina outou faamagaloina atu i tagata uma.’ (MFF 64:10)

    “Matou te uunaia tagata o le Ekalesia ia faamagalo i latou o e na sese ia i latou. Ia i latou o e ua le toe toaaga mai ma e ua vaavaai masei, matou te faapea atu, ‘Foi mai. Foi mai ma taumamafa i le laoai a le Alii, ma toe tofo i fua suamalie ma le faamalieina o le i ai faatasi ma le au paia.’

    “Matou te mautinoa e toatele ua leva ona toe fia foi mai, ae ua lagona le matamuli e fai lena mea. Matou te faamautinoa atu o le a outou maua ni lima e faaloaloa atu e taliaina outou ma ni lima naunautai e fesoasoani ia te outou” (Ezra Taft Benson, Gordon B. Hinckley, and Thomas S. Monson, “An Invitation to Come Back,” Church News, Tes. 22, 1985, 3).

Mosaea 27:14. O Se Agelu na Auina mai i le Atua

  • O se tasi o matafaioi e faataunuuina e se agelu o le valaau atu lea i e amiolega e salamo (tagai i le Moronae 7:29, 31). Ia matau e le i sau le agelu ia Alema ma atalii e toafa o Mosaea ona o lo latou amiotonu ae “ina ia talia talosaga a na auauna, e tusa ma lo latou faatuatua” (Mosaea 27:14).

  • O le galuega a agelu e tatau ona ogatasi ma le finagalo o le Atua ma e le o taimi uma e tupu ai e tusa ma le taimi faatulagaina a lē na talosagaina. E faatatau i se tagata sa tatalo mo se asiasiga a agelu, na saunoa mai ai Peresitene Uilifoti Uitilafi (1807–98):

    “Na ou tau atu ia te ia afai e afe tausaga o tatalo i le Atua o Isaraelu mo lena meaalofa, o le a le tuuina mai, sei vagana e i ai se mafuaaga a le Alii e auina mai ai se agelu ia te ia. Na ou tau atu ia te ia, sa lei tuuina mai pe o le a tuuina mai e le Alii se agelu i soo se tasi e tau ina faamalieina ai le manao o lea tagata e vaai i se agelu. Afai e auina mai e le Alii se agelu i se tasi, Na te auina mai e faatino se galuega e le mafai ona faatinoina i le na o le galuega a se agelu. Na ou tau atu ia te ia o ou manatu na. Na auina mai e le Alii ni agelu i tagata mai le foafoaga o le lalolagi, i taimi eseese, ae i taimi uma sa aumai ai ma se savali po o se mea e faatino lea e le mafai ona faatinoina e aunoa ma lena. Na ou tau atu ia te ia taimi eseese na faaali mai ai agelu i tagata. E moni lava, na ou faatatau atu i le asiasi mai o le agelu ia Iosefa Samita. Na faapea mai Ioane le Talifaaaliga, o aso amuli o le a lele se agelu i le taulotoaiga o le lagi, ua ia te ia le Talalelei e faavavau e folafola atu i e nonofo i le lalolagi. O le mafuaaga na manaomia ai ona faia e le agelu lenei galuega, ona sa lei i ai le Talalelei i le lalolagi. Na aveesea le Talalelei ma le Perisitua mai le lalolagi. O lea na toefuatai mai ai e le Atua.

    “O lenei, sa masani ona ou fai atu, ma ou te fia fai atu ia te outou, o le Agaga Paia o le mea lea e manaomia e soo se tagata o le Atua. E sili atu le taua o le i ai i se tagata o lena meaalofa nai lo lona mauaina o le faaali mai o se agelu, sei vagana ua manaomia ona aoao o ia e se agelu i se mea e le i aoaoina ai o ia” (“The Administration of Angels,” in Brian H. Stuy, comp. Collected Discourses, 5 vol. [1987–92], 5:233).

Mosaea 27:22–23. Auaunaga ia i Latou O e Ua Se Ese

  • O se tasi o tiute autu e manaomia mai e le Atua ia i latou o e Na te valaauina e auauna atu, o le fesoasoani lea ia i latou o e ua se ese e foi mai i le lafu. A o avea ai o se Fitugafulu, na faasoa mai e Elder Theodore M. Burton (1907–89) ona lagona i lenei galuega paia: “Na fesiligia a’u e se tasi, ‘Pe le o se mea lofituina le tatau ona toe iloiloina o agasala ma solitulafono a tagata na aofia i tulaga faapena?’ E lofituina pe afai ou te suea agasala ma solitulafono. Peitai o loo matou galulue ma tagata ua salamo. O i latou ia o atalii ma afafine o le Atua o e ua faia ni mea sese—o nisi o ia mea sese e matua matuia lava. Peitai e le o i latou o ni tagata agasala. Sa agasala i latou i taimi ua mavae ae ua iloa e ala i aafiaga tiga le faanoanoa o taunuuga ona o le le usiusitai i tulafono a le Atua. O lenei ua le o toe avea i latou ma ni tagata agasala. O i latou o fanau ua salamo a le Atua ma ua fia foi mai ia te Ia ma o loo taumafai e faia faapea. Sa latou faia ni mea sese ma ua latou totogi le tau o ia sese. Ua latou sailia nei le malamalama, alofa, ma le taliaina” (i le Conference Report, Oke. 1985, 80–81; po o le Liahona, Ian. 1986, 50).

Mosaea 27:25. Toe Fanauina

  • Na tuuina mai e Peresitene Ezra Taft Benson (1899–1994) se faamanatu taua a o tatou saili e toe fanauina ma avea e faapei o le Faaola o Iesu Keriso:

    “E tatau ona tatou faaeteete a o tatou saili ia avea atili i tatou e faapei o le Atua, ina ia aua nei o tatou atuatuvale ma le maua ai le faamoemoe. O le avea e faapei o Keriso o se taumafaiga e faia i le olaga atoa, ma e masani ona aafia ai le tuputupu ae ma le suia lena e oo mai lemu ma faifai malie. Ua tusia i tusitusiga paia ni tala maoae e uiga i tagata o e na matua liua o latou olaga, i lena lava taimi e pei o: Alema le Itiiti, o Paulo i le ala i Tamaseko, o Enosa na tatalo seia oo i le leva o le po, o le Tupu o Lamonae. O ia faataitaiga ofoofogia o le mana e liua ai, e oo lava i e ua i ai i le loloto o le agasala, e maua le talitonu mautinoa e mafai e le Togiola ona aapa atu i e ua matua atuatuvale lava.

    “A e ao lava ona tatou faaeteete a o tatou talanoaina nei faataitaiga ofoofogia. E ui e moni ma mamana, peitai, o ni aafiaga uiga ese ia ma le masani ai, ae le o se ala masani e tupu mai ai le liua. Aua o Paulo uma, o Enosa uma, ma Tupu Lamonae uma lava, e selau ma selau afe tagata ua latou iloa o le laasaga o le salamo, e sili atu le atamai ma e faifai malie. O lea aso ma lea aso e latou te faalatalata atu ai i le Alii, ma lo latou le iloa moni o loo atiina ae e i latou se olaga faapei o le Atua. Ua ola filemu i latou i ni olaga lelei, ma auauna atu atoa ma le maelega. Ua pei i latou o sa Lamana, o e na fetalai ai le Alii ‘sa papatisoina i le afi ma le Agaga Paia, a ua latou le iloa. ’ ( 3 {enb}Ni. 9:20; ua faaopoopo le faatusilima.)” (“O Se Liua Maoae o le Loto,” Liahona, Mat. 1990, 7).

  • Mo faamatalaga faaopoopo i le mataupu o le toe fanauina ma le mauaina o se liua tele o le loto, tagai i le faamatalaga mo le Mosaea 5:2 (tagai i le itulau e 144), Alema 5:12–14 (tagai i le itulau e 178), ma le Alema 36:17–21 (tagai i le itulau e 234).

  • Na talanoaina e Elder Dallin H. Oaks le uiga o le toe fanauina:

    “O le fesili pe ua faaolaina se tasi, o nisi taimi e faaupuina ai e faapea pe ua ‘toe fanauina.’ O le ‘toe fanauina’ o se fuaitau masani i le Tusi Paia ma le Tusi a Mamona. E pei ona ta’ua i luga, na aoao atu Iesu, vagana ua ‘toe fanauina’ (Ioane 3:3) se tasi i le vai ma le Agaga, e le mafai ona sao atu o ia i le malo o le Atua (tagai i le Ioane 3:5). O le Tusi a Mamona o loo i ai aoaoga e tele e uiga i le tatau ona ‘toe fanauina’ po o le ‘fanau i la le Atua’ (Mosaea 27:25; tagai foi i le fuaiupu 24–26; Alema 36:24, 26; Mose 6:59). E pei ona tatou malamalama i nei mau, o la tatou tali pe ua toe fanauina i tatou pe leai, ua manino lava le ‘ioe.’ Na toe fanauina i tatou ina ua tatou ulu atu i se feagaiga ma lo tatou Faaola e ala i le fanauina i le vai ma le Agaga ma le tauaveina i o tatou luga o le suafa o Iesu Keriso. E mafai ona tatou faafouina lena toe fanauina i Sapati taitasi pe a tatou aai ma feinu i le faamanatuga.

    “Ua faamautinoa e le Au Paia o Aso e Gata Ai o i latou ua toe fanauina i lenei ala ua fanauina faaleagaga o ni atalii ma afafine o Iesu Keriso (tagai i le Mosaea 5:7; 15:9–13; 27:25). E ui i lea, ina ia iloa le tulaga faamoemoeina o lenei toe fanauina, e ao ona tausia pea a tatou feagaiga ma tumau e oo i le iuga. I le taimi nei, e ala i le alofa tunoa o le Atua, ua toe fanauina ai i tatou o ni tagata fou ma ni matua fou faaleagaga ma le faamoemoega i se tofi mamalu” (i le Conference Report, Ape. 1998, 77; po o le Liahona, Iulai 1998, 70).

Mosaea 27:28. E O’o Mai Faamanuiaga Pe a Mavae Puapuaga e Tele

  • E ui lava ina sa feseai Alema le Itiiti i le tele o puapuaga, o le taunuuga o lona salamo na tulaga ese ma sili atu le fiafia (tagai i le Alema 36:21). O le a fesoasoani le siata o loo i lalo e faamalamalama le aafiaga o le salamo a Alema:

    I le Taimi Muamua

    I le Taimi Mulimuli Ane

    “Faaletino ma le pau,” e ao ina “lafoaiina” (Mosaea 27:25–27; Alema 36:11)

    Togiolaina e le Atua, “ua fanauina a’u i la le Agaga” (Mosaea 27:24–25; Alema 36:23)

    “Feseai i puapuaga e tele” (Mosaea 27:28)

    Se’ia mai “ai le mu e faavavau” (Mosaea 27:28)

    I le “au oona ma noanoaga o le amioletonu” (Mosaea 27:29)

    “Togiolaina mai le au oona ma noanoaga o le amioletonu” (Mosaea 27:29)

    “I le vanu pouliuli lava” (Mosaea 27:29)

    Vaaia “le malamalama ofoofogia o le Atua” (Mosaea 27:29)

    “Puapuaga i le faasala faavavau” (Mosaea 27:29)

    “Ua le toe tigaina” [lona] agaga (Mosaea 27:29)

    “Atuatuvale i le manatu” i ana agasala e tele (Alema 36:17)

    Ua le toe “atuatuvale i le manatu” i ana agasala (Alema 36:19)

    Lagona le matuitui ma le ogaoga o le tiga (Alema 36:20–21)

    Lagona le olioli ma le fiafia tele (Alema 36:20–21)

    Na tigaina le agaga i le mata’u i le i ai i le afioaga o le Atua (Alema 36:14–15)

    Na tinou le agaga i le fia i ai i le afioaga o le Atua (Alema 36:22)

    Aumaia mai le Book of Mormon Gospel Doctrine Teacher’s Manual (1999), 92.

  • Na faamalamalama mai e Elder Jeffrey R. Holland, e tatau ona tatou iloa o le tau o le agasala e maualuga ma e ui ina faigata le salamo, ae e maoae atu le aoga o taunuuga nai lo le tau:

    “Ua tatou iloa o le salamo o se laasaga e tiga tele. O lana lava tautinoga na faapea mai ai Alema, na ia feseai ‘i puapuaga e tele, salamo foi e tali oo i le oti,’ ma na ia i ai i se ‘mu e faavavau. … sa ou i ai i le vanu aupito pouliuli,’ sa ia fai mai ai. ‘Na puapuagatia lo’u agaga i le faasala faavavau’ (Mosaea 27:28–29). …

    “Mo ao ma po e tolu na foliga mai e le uma na ia ‘tigaina ai i tiga o le agaga’ (Alema 36:16), i le tiga na matuai pei e moni lea na matua vaivai ai faaletino ma atuatuvale ai faaleagaga i le mea na foliga mai o lona iuga lava lea. E le tatau i se tagata ona manatu e faapea, o le meaalofa o le faamagaloga e maua atoatoa e aunoa ma se taumafaiga tele a le tagata o le a faamagaloina. E leai se tagata faavalevalea e naunau pe manao e agasala, ma le mafaufau e faigofie ona maua le faamagaloga.

    “O le manaomia ona salamo e aofia ai le pagatia ma le faanoanoa. Soo se tasi lava e ese sona mafaufau i ai, e le i faitau i le olaga o Alema le itiiti, pe sa taumafai lava foi o ia e salamo. I le laasaga o le salamo, e tuuina mai ia i tatou na o sina tofo i le puapuagatia tatou te oo i ai pe afai tatou te le fulitua i le tiapolo. O lena tiga, e ui lava ua na o sina taimi mo le tagata salamo, o le ipu e sili ona oona o ipu uma. E le tatau ona faavalevalea se alii po o se tamaitai ma mafaufau e mafai ona tofotofo i ai, e tusa lava pe mo se taimi puupuu, e aunoa ma se taunuuga. …

    “Ua tatou iloa a atoatoa le salamo, ua tatou toe fanauina ma tuu ese e faavavau le tagata sa tatou i ai. Ia te a’u, e leai se aoaoga o le anoano o aoaoga o loo aoaoina mai ai le salamo, e sili atu ona loloto nai lo le fautuaga mataina e faapea ‘e ui lava e mafai ona aveese se fao mai se pou, o le a faavavau lava ona i ai le pu i lena pou.’ Ua tatou iloa o le salamo (o le aveesea o lena fao, pe afai e te mafaia) e mafai ona avea o se galuega umi, tiga ma le faigata. O le mea e faanoanoa ai, o nisi o le a le i ai se naunauga e faia ai. Ua tatou iloa foi o loo i ai ni nai agasala e le mafai ona salamoina. A e o agasala o loo mafai ona salamoina, ma o loo faia ma le faamaoni ma le atoatoa ona tulaga manaomia, e le o toe i ai se ‘pu i le pou’ ona o le mafuaaga mautinoa e le o le pou lava lea e tasi. O se pou fou. E mafai ona tatou toe amata, i le mama atoa, ma se naunauga fou ma se auala fou o le olaga” (However Long and Hard the Road [1985], 83–84).

Mosaea 28:3. “Ia Talaiina Atu Le Olataga i Tagata Uma”

  • Na faamatalaina e Peresitene Howard W. Hunter (1907–95) le mafuaaga e avea ai le manao e faasoa atu le talalelei o se taunuuga masani o le liua o le tagata lava ia.

    “O loo i ai le faataitaiga o atalii e toafa o Mosaea—o Amona, Arona, Ominea, ma Himinae—o e na mauaina se faamagaloga o a latou agasala e ala i le Togiola ona galulue lea mo le tele o tausaga i sa Lamana ina ia aumaia i latou ia Keriso. Ua tauina mai i faamaumauga na le mafai ona latou tuu le agaga o se tagata e toatasi ia fano (tagai i le Mosaea 28:3). …

    “O se faailoaga maoae o le liua patino o se tagata o le manao lea e faasoa atu le talalelei i isi. O le mafuaaga lenei na tuuina mai ai e le Alii se tiute i tagata taitoatasi o le Ekalesia ina ia avea ma faifeautalai” (The Teachings of Howard W. Hunter, ed. Clyde J. Williams [1997], 249).

  • Na fautuaina mai e Elder M. Russell Ballard o le Korama a Aposetolo e Toasefululua se auala lelei e tasi e mafai e tagata o le Ekalesia ona faasoa atu ai le talalelei i le aso: “O le ki i le faamanuiaina o le galuega talai ma tagata o le au paia, o le faatinoina lea o le faatuatua. O se tasi auala e faaali atu ai lou faatuatua i le Alii ma Ana folafolaga o le faatulagaina lea ma le agaga tatalo o se aso e sauniuni ai se tasi e feiloai ma faifeautalai. Na ou mauaina le tele o tusi mai tagata lotu o e na faatinoina lo latou faatuatua i lenei auala faigofie. E ui lava e lei i ai se tasi i mafaufau o aiga o e e mafai ona latou faasoa atu i ai le talalelei, ae sa latou faatuina lava se aso, tatalo, ona talanoa atu lea i ni tagata se toatele. O le Alii o le Leoleo Mamoe Lelei ma Na te silafia Ana mamoe o e ua saunia e faalogo i Lona siufofoga. O le a Ia taitaiina i tatou a o tatou sailia Lana fesoasoani paia i le faasoaina atu o Lana talalelei” (i le Conference Report, Ape. 2006, 89; po o le Liahona, Me 2006, 86).

    Ata
    O faifeautalai o loo talanoa atu i se alii

Mosaea 28:11–20. O Famaumauga a sa Iareto ma Maa a le Tagatavaai

  • Na talanoaina e Peresitene Iosefa Filitia Samita (1876–1972) le faaaogaina e Mosaea o [maa] faamatala gagana i le faaliliuina o faamaumauga a sa Iareto:

    “Ua aumaia e le nuu o Limae a latou tusi ia Mosaea, ‘… ua togitogia i papatusi auro,’ [Mosaea 21:27] o tusi ia na faaliliuina e Mosaea e ala i le fesoasoani a ‘maa na e lua ua faamauina i li’o e lua.’ …

    “Na mauaina faatasi e Iosefa Samita le ‘ufifatafata’ ma papatusi o le Tusi a Mamona, o le Urima ma le Tumema, lea na natia e Moronae ina ia faalauiloa mai i aso amuli, o ni meafaigaluega e mafai ona faaliliuina ai faamaumauga anamua, o ia Urima ma le Tumema na tuuina atu i le uso o Iareto [tagai i le MFF 17:1]” (Answers to Gospel Questions, comp. Joseph Fielding Smith Jr., 5 volu. [1957–66], 1:161–62).

Mosaea 29:26–27. O Le Tulaga Lamatia o le Toatele ua Filifilia “ Le Mea Ua Le Tonu”

  • Na lapatai mai Elder Neal A. Maxwell (1926–2004) o le Korama a Aposetolo e Toasefululua, e le tatau ona tatou le amanaiaina le amioleaga i le lalolagi, aua o loo faatalitali le faatafunaga mo malo e filifilia le amioletonu:

    “Pe a talanoa i amioga a tagata, ina ua amata ona taulamua le filifiliga o se vaega sa toaitiiti o le nuu ua sili atu le toatele, ona o’o mai ai lea o le faamasinoga a le Atua ma taunuuga o le manatu faapito valea (tagai i le Mosaea 29:26–27).

    “O le soloitua o aga-i-fanua e saoasaoa tele pe a le manatu se vaega o tagata mafaufau papa’u i uiga taua lautele sa latou fetufaai ai. O lenei faiga e faafaigofieina e le le manatu popole po o le manatu faapito, a o taitai ifo ai tagata ma le faaeteete i seoli (tagai i le 2 Nifae 28:21). Atonu o le a le auai isi i lenei soloitua, nai lo lena, latou te faatafaese, ma sa latou taumafai i se tasi taimi e taofiofi mai, aua o la latou aia tatau lea. …

    “Ua ia te i tatou se matafaioi e mata’itu ai faailoga o le toilalo o tagata. …

    “Aua o le mea e tupu i le solomuli o aganuu, o le a faamasinoina moni ai taitai ma i latou e mulimuli i ai. E moni, i aso ua mavae, e faigofie ona faitioina taitai leaga, peitai e le tatau ona i ai se ‘alofaga o amioga a tagata e mulimuli i ai, ne’i o latou faia ni sisio e uiga i le tulaga soloitua, e faapea sa na ona latou mulimuli lava i faatonuga, ae o le taitai sa na ona faatonu atu i tagata! E ui i lea, e anoanoai mea ua faamoemoeina mai i tagata o se atunuu faatemokarasi, lea e tutusa lava le tulaga afaina o tagata taitoatasi ma taitai” (i le Conference Report, Ape. 1999, 28–30; po o le Liahona, Iulai 1999, 27–28).

  • Na saunoa foi Peresitene Boyd K. Packer e uiga i le faaletonu ua agai i ai le faapalepale:

    “O le uiga mama o le faapalepale ua faaseseina lona uiga ma siitia i se tulaga ua matua iloga e faapea ai ua tutusa ma sili atu foi lona faatauaina nai lo le ola mama. O se mea manaia le faapalepale, e oo lava i le faamagaloina o amioga a se tagata. Ae e sili atu le manaia o le fai faatasi o tulafono ma faatulafonoina ina ia puipuia ai amioga le mama e faapea ona faavaivaia, ma oo lava ina faatamaia ai le aiga.

    “O loo i ai se mailei matautia pe a faafefeteina le faapalepale ina ia puipui ai aia tatau a i latou o o latou amioga ua lamatia ai le aiga ma faamanualia ai le aia tatau o le toatele o tagata. Ua matautia tele lo tatou latalata atu i tulaga na faamatalaina e le perofeta o Mosaea [i le Mosaea 29:26–27]” (“Children of God,” BYU Women’s Conference, Me 5, 2006, 6).

Mosaea 29:41–44. O Le Nofoaiga a Faamasino

  • O le suiga o le faigamalo na faatulagaina e le Tupu o Mosaea sa matuai taua lava ma mai lava i lena taimi seia oo i le soifua mai o Keriso (tagai i le 3 Nifae 2:8) na tusitusia ai e sa Nifae o latou taimi e faatatau i le amataga o le nofoaiga a faamasino. O le taimi muamua sa tusitusia e sa Nifae le taimi mai le tausaga na tuua ai e Liae ia Ierusalema.

Manatu e Mafaufau Loloto i ai

  • O le a le mea e te manatu ua faaosofia ai i latou o e ua liua atoatoa e faasoa atu ai le talalelei i isi?

  • Aisea e te manatu ai e taua ona tausia faamaumauga i o tatou aiga ma i le Ekalesia?

Galuega Fautuaina

  • Ia e ofo atu e aoao atu se lesona o le afiafi faaleaiga e uiga i le liua o Alema le Itiiti ma atalii o Mosaea i le Mosaea 27–28. Ia tuuina atu se lui ia i latou o loo e aoaoina e faaaoga mataupu faavae na faatinoina e Alema ma atalii o Mosaea o loo maua i le Mosaea 27:32–36; 28:3.

  • Fai se tusiga faapitoa i lau lava api o talaaga e faamatala ai se “suiga i le loto” na e oo i ai i le atiina ae o lau molimau.