Inisitituti
Mataupu 24: Alema 5– 7

Mataupu 24

Alema 5–7

Folasaga

Sa faamatuu ese e Alema le nofoa faamasino ina ia mafai ai ona alu atu i le “nuu lea o Nifae … ia faaosoina i latou e manatua mea e tatau ona latou faia, … ua aoai atu ia te i latou i le molimau paia” (Alema 4:19). O talafaamaumau o ana galuega i tagata o Saraemila ma tagata o Kiteona ua mafai ai ona tatou mafaufau ai i tatou lava i o tatou tulaga faaleagaga i luma o le Alii. A o e suesue i nei mataupu, ia mafaufau pe faapefea ona fesoasoani fesili a Alema, o fautuaga, ma molimau ia te oe e manatuaina lou tiute i le Atua ma ou uso a tagata. Ia tagai mo mea e aumaia ai le toefanauina faaleagaga ma mo mea o le a fesoasoani ia te oe e mulimuli ai i faataitaiga o uiga sili o le Faaola.

Faamatalaga

Alema 5:7“O Filifili o Seoli”

  • Sa faamalamalamaina e Alema ia “filifili o seoli” o le faatoilaloina lea e le fili ma tuua ai i tatou lava i se tulaga lamatia mo le faafanoga e faavavau (tagai Alema 12:6, 11).

Alema 5:12–14. O Se “Suiga Tele i Lou Loto”

  • Sa faamatalaina e Peresitene Marion G. Romney (1897–1988) o le Au Peresitene Sili le liua—iloaina o se liliu tele o le loto—o se faagasologa o le suiga e aofia ai ma aafia ai vaaiga uma i le olaga o se tasi: “O le veape liliu o lona uiga ‘o le liliu mai i se tasi talitonuga po o se mataupu i le isi,’ [ma] liuaina o ‘se suiga faaleagaga ma le mama ma auai i se suiga o talitonuga ma le faamautinoaga.’ E pei lava ona faaaogaina i tusitusiga, o le liua manaomiaina i se tulaga lautele ua le na o se taliaina o Iesu ma ana aoaoga, ae o se faatuatua naunautai foi ia te Ia ma Lana talalelei, o se faatuatua lea e galueaiina se liua, o se suiga moni i le malamalama o se tasi i le uiga o le olaga ma i le lotonuu o se tasi i le Atua— i mea e fiafia i ai, i mafaufauga, ma le amio. Atonu o le liua e mafai ona ausia i ni laasaga, e le mafai e se tasi ona liua moni lava i le lagona atoa o le upu sei vagana ma seiloga lava o ia o se tagata fou i lona loto” (i le Conference Report, Oke. 1975, 107–8; po o le Liahona, Fep. 1976, 71).

  • Sa faasoa mai e Peresitene Ezra Taft Benson (1899–1994) nisi uiga o i latou sa iloaina se suiga tele o le loto:

    “Afai ua e filifili e mulimuli ia Keriso, ua e filifili ina ia suia oe. …

    “E galue le Alii mai totonu i fafo. E galue le lalolagi mai fafo i totonu. E aveese e le lalolagi ia tagata mai tulaga eleelea. E aveese e Keriso ia tulaga eleelea mai tagata, ona latou aveesea lea o i latou lava mai tulaga eleelea. E suia e le lalolagi ia tagata e ala i le suia o le tulaga o loo siomia ai i latou. E suia e Keriso ia tagata, ona latou suia lea o tulaga o loo siomia ai i latou. E sui e le lalolagi amioga faaletagata, ae e mafai e Keriso ona suia uiga faaletagata. …

    “Ioe, e suia e Keriso tagata, ma o tagata ua suia e mafai ona suia le lalolagi.

    “O tagata e suia mo Keriso o le a taitaiina e Keriso. O le a latou fesili e pei o Paulo, ‘Le Alii e, se a le mea e te finagalo i ai ou te faia?’ (Galuega 9:6). Fai mai Peteru, o le a latou ‘mulimuli atu i ona tulaga aao’ (1 Peteru 2:21). Sa fai mai Ioane o le a latou ‘savavali, e faapei ona savali o ia’ (1 Ioane 2:6).

    “Ma le mea mulimuli, o tagata e taitaiina e Keriso o le a faamumuina e Keriso. E otootoina atu le saunoaga a Peresitene Harold B. Lee, sa latou tuu le afi i isi ona o loo mumu la latou lava afi. (Tagai Stand Ye in Holy Places [Salt Lake City: Deseret Book Co., 1974], itu. 192.)

    “O o latou loto e tusa lea ma Lona finagalo. (Tagai i leIoane 5:30.)

    “Latou te faia pea lava o mea e fiafia i ai le Alii. (Tagai i le Ioane 8:29.)

    “E le gata o le a latou oti mo le Alii, ae o le mea e sili atu le taua latou te mananao e ola mo Ia.

    “E te ulu atu i o latou fale, ma o ata i luga o o latou puipui, o tusi i luga o o latou fatatusi, o musika e faalogoina, o a latou upu ma gaoioiga ua faaalia mai ai o i latou o ni Kerisiano.

    “Latou te laulaututu e fai ma molimau a le Atua i aso uma, ma mea uma, atoa ma nuu uma.(Tagai Mosaea 18:9.)

    “E i ai Keriso i o latou mafaufau, a o latou vaai atu ia te Ia i manatunatuga uma (Tagai MFF 6:36.)

    “E i ai Keriso i o latou loto a o tuuina lo latou alofa ia te Ia e faavavau.(Tagai Alema 37:36).

    “E toetoe lava o vaiaso uma latou te taumamafa ai i le faamanatuga ma toe faafouina molimau i lo latou Tama Faavavau ua latou loto e tauave i o latou luga le suafa o Lona Alo, manatua pea o Ia, ma tausi i Ana poloaiga. (Tagai Moronae 4:3.)”(i le Conference Report, Oke. 1985, 4 –6; po o leLiahona, Ian. 1986, 2–3).

Alema 5:14“Fanauina i la le Atua”

  • Sa faamatalaina e Elder Russel M. Nelson o le Korama a Aposetolo e Toasefululua le auala e taitai atu ai le liua i le toe fanaufouina:

    “O le liuaina o lona uiga ‘o le liliu mai.’ O le liuaina o se liliuesemai lea i ala o le lalolagi ia, ma tumau ai i, ala o le Alii. O le liuaina e aofia ai le salamo ma le usiusitai. O le liuaina e aumaia ai se liliu tele o le loto [tagai Mosaea 5:2; Alema 5:12–14]. O lea, o se tagata moni ua liuaina ua ‘toe fanauina,’ [tagai Ioane 3:3–7; Mosaea 27:24–26] ua ola i se olaga toefuataiina [tagai Roma 6:3–4].

    “I le avea ai ma tagata moni ua liuaina, ua uunaia i tatou e faia le mea ua finagalo le Alii tatou te faia [tagai Mosaea 5:2–5] ma avea ma tagata ua Ia finagalo tatou te avea ai [tagai 3 Nifae 27:21, 27]” (i le Conference Report, Oke. 2005, 90; po o le Ensign, Nov. 2005, 87).

  • Sa saunoa mai le Perofeta o Iosefa Samita (1805–44) e faapea “o le toe fanaufouina, e sau mai le Agaga o le Atua e auala mai i sauniga” (History of the Church, 3:392).

    Sa faamatalaina e Elder Bruce R. McConkie (1915–85) o le Korama a Aposetolo e Toasefululua o se vavega moni lava le toe fanaufouina: “Atonu o le vavega silisili lava … o le faamaloloina o le agaga ua gasegase ona o le agasala ina ia mafai ai e i latou ua gasegase faaleagaga ma tauaso ma logonoa faaleagaga ona toe faasinasinaina ma faamamaina ma avea ma suli o le faaolataga. Atonu o le vavega silisili o vavega uma lea e tupu i le olaga o tagata taitoatasi ua toe fanaufouina; o lē ua mauaina le mana faapaiaina o le Agaga Paia o le Atua i lona olaga; o lē ua faamuina le agasala ma leaga mai lona agaga e pei lava sa susunuina e le afi; ua toe soifua faaleagaga” (The Mortal Messiah, Book 4 [1981], 3:269).

  • Mo malamalamaaga faaopoopo i le toe fanaufouina i la le Atua, tagai i le faamatalaga mo Mosaea 5:2 (itulau 144) ma le Mosaea 27:25 (itulau 166).

Alema 5:14, 19. “O Foliga o le Atua ua Vaneina i o Outou Mata”

  • A o auauna ai o se fesoasoani i le Korama a Aposetolo e Toasefululua, sa matauina ai e Elder Theodore M. Burton (1907–89) i latou o ē mulimuli i le Tama Faalelagi ua foliga lava e faapei o Ia: “Afai tatou te talia moni lava le Atua i o tatou olaga ma ola e tusa ma Ana poloaiga, o le a galueaiina e le Atua se liliu tele i o tatou foliga vaaia ma o le a tatou amata ai ona foliga e faapei o lo tatou Tama Faalelagi, Le e ana le faatusa ua faia ai i tatou. Pe le o le foliga vaaia ea lenei tatou te iloaina pe a tatou feiloai ma alii ma tamaitai o e o loo taumafai e ola latalata i le Alii?” (i le Conference Report, Oke. 1973, 151; po o le Liahona, Ian. 1974, 114).

  • Sa toe faamatalaina e Peresitene James E. Faust (1920–2007) o le Au Peresitene Sili se aafiaga na faasoa mai ai se paaga a le Ekalesia o lē sa saunoa e faatatau i le malamalama mai i foliga o tamaiti aoga o le Au Paia o Aso e Gata Ai:

    “Na ou toe manatuaina talu ai nei se fonotaga iloga i Ierusalema pe a ma le 17 tausaga ua mavae. Sa faatatau lea i le lisiina o le fanua lea na fausia mulimuli ane ai le Nofoaga Autu o le Iunivesite o Polika Iaga i Ierusalema mo Suesuega i Sasae Lata Mai. A o lei mafai ona sainia lenei lisi, sa taufai malilie faatasi uma taitai o le faigamalo a Isaraelu ma Peresitene Ezra Taft Benson ma Elder Jeffrey R. Holland, a o avea ai o ia ma peresitene o le Iunivesite o Polika Iaga i lena taimi, e fai ma sui o le Ekalesia ma le iunivesite e aua ne’i faia ni talaiga i totonu o Isaraelu.

    Ata
    O Le Nofoaga Autu o le BYU i Ierusalema mo Suesuega i Sasae Lata Mai

    “Atonu o le a outou faapea pe aisea na matou malilie ai e le faia ni talaiga. Sa manaomia ona matou faia lena mea ina ia mafai ai ona mauaina le pemita e fau ai lena fale mataina lea ua tu i le aai logologoa o Ierusalema. I lo matou iloa i ai, sa tausia lava ma le mamalu ma le atoatoa e le Ekalesia ma le BYU lena tautinoga e aua nei faia ni talaiga. Ina ua maea ona sainia le lisi, sa saunoa mai ma le atamai se tasi o a matou uo, “Oi, matou te iloa o le a outou le talai, ae o le a le tou mea o le a fai i le malamalama o loo i o latou mata?’ Sa faatatau o ia iā tatou tamaiti aoga sa aooga i totonu o Isaraelu” (i le Conference Report, Oke. 2005, 19; po o le Liahona, Nov. 2005, 20).

Alema 5:21–22. “Ofu … Te’a ma le Leaga Uma”

  • O le faasinoga i “ofu” i le Alema 5:22 o se faatusa o lo tatou tulaga faaleagaga i luma o le Alii. Sa faailoa mai e Elder Lynn A. Mickelsen o le Au Fitugafulu le tulaga tutusa o le va o le faamamaina tatou te maua e ala i le Togiola ma le faamamaina o le tagamea palapala: “E i ai se tulaga e ogatusa ai le faasinasina o o tatou ofu i le toto o le Tamai Mamoe, ma le taina o a tatou lava ie palapala. E ala mai i Lana taulaga togiola o le a faamamaina ai o tatou ofu. O le mau faasino i ofu e faatusa i o tatou tagata atoatoa. E afua ona manaomia mo le faamamaina pe a oo ina tatou eleelea ona o agasala. O le faamasinoga ma le faamagaloga o le pule faitalia lea a le Faaola, aua e na o Ia e mafai ona faamagaloina ma fufulueseina a tatou agasala [tagai Alema 5:21–27; MFF 64:10]” (i le Conference Report, Oke. 2003, 9; po o le Liahona, Nov. 2003, 11).

Alema 5. Ua “Toeseina le Faamaualuga”

  • Mo malamalamaaga i le autu o le faamaualuga, tagai i le faamatalaga mo Helamana 3:33–34, 36; 4:12 (itulau 264) ma mo Helamana 12:5–6 (itulau 278) .

Alema 5:29. Ua “Tuueseina le Lotoleaga/Mataua”

  • Sa aoao mai Elder Jeffrey R. Holland o le Korama a Aposetolo e Toasefululua e faapea o le mataua, e fanau mai i faatosinaga faalelalolagi, e tu atu e tetee i le alofa atoatoa o le Atua:

    “O loo faapea mai o le lotoleaga o le agasala lea e tasi e le saunia se tasi e ta’uta’u atu, ae o le auala o loo mafai ona faasalalau atu ma le faanaunauga lena mea o loo fautuaina mai i le alagaupu anamua faa-Tenimaka, “Ana faapea o le lotoleaga o se fiva, semanu ua mamai uma le lalolagi.” … O nisi ua foliga mai ua tutupu lapopoa i la tatou vaai, ua tatou manatu ai e tatau la ona tutupu laiti i tatou. Ia, o le mea e leaga ai, ua tatou amio ai lava faapea i nisi taimi.

    “E faapefea ona tupu lenei mea, aemaise lava pe a tatou moomoo tele ia aua ne’i tupu? Ou te manatu o se tasi o mafuaaga ona o aso uma tatou te vaaia ai faatosinaga eseese o loo tau mai ia i tatou e le o lava mea ua tatou maua. O se tasi po o se mea foi o loo tauina mai pea ia i tatou e tatau ona tatou aulelei atili atu, pe mauoa atili atu, ia sili atu ona viia pe sili atu ona taliaina nai lo lo tatou vaai ia i tatou lava o ni tagata. Ua tau mai ia i tatou e le o lava a tatou mea totino pe e le o lava foi ona tatou o i nofoaga faafiafia. Ua osofaia pea i tatou i feau ua i luga o le fuafaatautau o mea a le lalolagi ua fuatiaina ai i tatou i le paleni ma iloa ai lo tatou mananao pea i mea ia faalelalolagi [tagaiTanielu 5:27]. …

    “Ae e le faapea le auala e galue ai le Atua. …

    “… Ou te molimau atu e leai se tasi o i tatou e tau le faapelepeleina pe tau le alofagia e le Atua nai lo isi. Ou te molimau atu e alofa o Ia ia i tatou—,o e le atoatoa, o e popole, o e manatu ua na o i latou lava, ma tagata uma lava. Na te le fuaina a tatou taleni po o o tatou foliga; Na te le fuaina a tatou galuega po o mea ua tatou maua. Na te faamalo mai i tagatauma e taufetuli, ma tauvalaau mai o le taufetuliga e tetee atu i le agasala, ae le o lefaatautava o le tasi i le isi. Ou te iloa afai o le a tatou faamaoni, o le a i ai se ofu talaloa atoatoa o le amiotonu o loo faatalitali mai i tagata uma [tagai Isaia 61:10; 2 Nifae 4:33; 9:14], ‘o ofutalaloa … na taina … ma faasinasinaina i le toto o le tamai mamoe’ [Faaaliga 7:14]. Ia tatou fefaamalosiai le tasi i le isi i ā tatou taumafaiga e manumalo ai i lena taui” (i le Conference Report, Ape. 2002, 72, 74; po o le Liahona, Iul. 2002, 71–72).

Alema 5:46–47. “O Le Agaga o Faaaliga”

  • Na vaai Alema i se agelu, ae peitai sa ia molimau mai i le Alema 5:46–47 e faapea o le anapogi ma le tatalo lea na mafai ai ona ia iloaina, e lei vaai i se agelu. Sa faamalamalama mai e Peresitene Heber J. Grant (1856–1945) e faapea: “E toatele tagata e fai mai: ‘Pe ana mafai ona tau lava ina ou vaai i se agelu, pe ana mafai ona tau lava ina ou faalogo atu o folafola mai e se agelu se mea, o le a ou mafai ona faatuatua i aso uma o lou olaga!’ E lei i ai ni aafiaga i nei alii [o Lamana ma Lemuelu] e lei auauna i le Alii, ma o le a leai lava se aafiaga i nei aso” (in Conference Report, Apr. 1924, 159).

    Sa faamalamalama mai e Peresitene Iosefa Filitia Samita (1876–1972) le pogai e mafai ai ona mamana atu le Agaga Paia nai lo se asiasiaga a se agelu: “O Keriso … sa folafola mai o faamautinoaga e ono mafai ona tatou maua … mai se asiasiga a se agelu, o se tagata moni toetu, o le a le tuua ai le lagona … e pei ona tatou maua e ala mai i se faamautinoaga a le Agaga Paia. O asiasiga patino e ono mou atu i le gasologa o taimi, ae o lenei taitaiga a le Agaga Paia e faafouina ma e faaauau pea, i lea aso ma lea aso, i lea tausaga ma lea tausaga, pe afai tatou te ola agavaa mo le Agaga Paia” (Doctrines of Salvation, comp. Bruce R. McConkie, 3 vols. [1954–56], 1:44).

  • O le agaga o faaaliga o se fesootaiga mai le Atua i le tagata e ala i le mana o le Agaga Paia i le mafaufau ma le loto (tagai MFF 8:2). Sa faamatala e Elder Richard G. Scott o le Korama a Aposetolo e Toasefululua le auala e iloa ai fesootaiga mai le Agaga Paia:

    “O se lagona i lemafaufau e maoti tele.

    O upu auiliili e mafai ona faalogoina pe lagonaina ma tusia e pei lava sa faalau mai ia faatonuga.

    “O se fesootaiga i leloto o se lagona e sili atu le taatele. E masani ona amata le Alii e ala] i le tuuina mai o lagona. Pe a i ai se iloatino o lo latou taua ma ua usitaia, e maua ai e le tasi le gafatia sili atu e mauaina ai faatonuga auiliili atu i lemafaufau. O se lagona i le loto, pe a mulimulitaia, e faamautuina e ala i faatonuga maoti sili atu i le mafaufau” (“Helping Others to Be Spiritually Led” [Church Educational System symposium on the Doctrine and Covenants, Aok. 11, 1998], 3–4.

Alema 5:53–54. “O Mea e le Aoga o le Lalolagi”156}

  • O le lē aogā ua faauigaina o le “gaogao; leai se aoga; leai se tino, tau po o se taua . … Mitamita ma le manatu faasausili o se tasi i mea na ia ausia.” (Noah Webster’s First Edition of an American Dictionary of the English Language, 1828 [1967]).

  • Sa fautuaina e Elder Dallin H. Oaks o le Korama a Aposetolo e Toasefululua le Au Paia o Aso e Gata ai ia aloese mai le oo atu i le faaalu o taimi i mea le aoga o le lalolagi: “Sa aoao mai e Iesu ‘e le ola se tasi i le tele o ana mea ua ia te ia’ (Luka 12:15). O le mea la lea, e le tatau ai ona tatou tolo’a’i mo i tatou lava o ‘oa i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu, ma gaoi ai’(Mataio 6:19). A tuu i se isi faaupuga, o oa o o tatou loto—o o tatou faamuamua—e le tatau o ni mea ua ta’ua e tusitusiga paia o ‘oa [ma] … mea le aoga a lenei lalolagi’ (Alema 39:14). O ‘mea le aoga a [le] lalolagi’ e aofia ai le tuufaatasia o na uiga faalelalolagi e fa o meatotino, faamaualuga, lauiloa, ma le malosi. O nei mea uma ua faamanatu mai e tusitusiga paia, ‘e le mafai ona e alu ma ia mea’ (Alema 39:14). E ao ona tatou sailia ituaiga o oa ua folafola mai e tusitusiga paia i e faamaoni: ‘o oa sili o le malamalama e oo lava i oa natia’ (MFF 89:19)” (i le Conference Report, Ape. 2001, 109; po o le Liahona, Iul. 2001, 101).

  • Sa tusia foi e Elder Jeffrey R. Holland e faapea o le tuinanau i mea le aoga o foliga vaaia faaletino e matautia i le faaleagaga: “O lenei soona vaai ifo i le tagata lava ia ma taulai atu i mea faaletino ua faateleina atu nai lo le faavalevalea lautele; e faatafunaina ai faaleagaga ma e mafua ai le tele o le le fiafia o loo feagai ma tamaitai talavou. Ma afai ua popole tele le au matutua i foliga vaaia—o le tuuina i totonu o le tino ma le tipi ese ma toe sui ma toe suia mea uma e mafai ona toe sui—o na uunaiga ma popolega o le a mautinoa lava le sosolo atu i fanau. I se tasi tulaga ua avea lea faafitauli ma mea o loo ta’ua i le Tusi a Mamona o ‘masalosaloga le aoga’ [1 Nifae 12:18]. Ma o le lalolagi faalepopole ua matuai le taofiofia lava tuinanau ma masalosaloga. O le a manaomia moni ai lava e se tasi se pusa tele o vali ma teuga e faatautava ai ma le aulelei o loo atagia i faasalalauga eseese o loo siomia ai i tatou” (i le Conference Report, Oke. 2005, 30–31; po o leLiahona,Nov. 2005, 30).

Alema 5:57.“O Ese ia Outou ai e Amioleaga … ma Ia Tuueseina Outou”

  • Sa talanoaina e Elder David R. Stone o le Fitugafulu ia auala sa faaaogaina ai metotia i le fausiaina o le Malumalu o Manhattan Niu Ioka sa aumaia ai se faataitaiga o le auala e aveesea ai se tasi mai i faatosinaga o le lalolagi:

    “Ua toatele naua tagata o le lalolagi ua foliga ia Papelonia o anamua e ala i le savavali i o latou lava ala, ma mulimuli atu i se atua ‘o lona faatusa lea e i foliga o le lalolagi’ [MFF 1:16 ].

    “O se tasi o luitau sili lava o le a tatou feagai ai o le mafai lea ona ola i lena lalolagi ae i se isi itu, ia le avea ai ma se tasi o lena lalolagi. E tatau ona tatou fausiaina Siona i le totonugalemu o Papelonia. …

    “O lo’u aofia ai i le fausiaina o le Malumalu o Manhattan, na ou maua ai le avanoa ou te i ai i totonu o le malumalu i le tele o taimi a o lei faapaiaina. E manaia le nofonofo ai i totonu o le potu selesitila, ma i ai iina i le filemu atoatoa, e aunoa ma se pao e tasi e lagona atu mai auala pisi o Niu Ioka. E faapefea ona matuai filemu ma faaaloalo ia totonu o lena malumalu, ae ua na o ni iata le mamao mai le vevesi ma le pisi o le taulaga tele?

    “O le tali na i ai i le mamanuina o le malumalu. Na fausia le malumalu i totonu o puipui o se fale na i ai lava, ma o puipui pito i totonu o le malumalu na sosoo laiti. O le auala lena na faatapulaa ai e le malumalu (Siona) ia aafiaga o Papelonia, po o le lalolagi i fafo.

    “Atonu o loo i ai se lesona iina mo i tatou. E mafai ona tatou fausia se Siona moni ia i tatou lava, e ala i le faatapulaaina o le mamao e mafai ai e Papelonia ona faatosinaina i o tatou olaga. …

    “Po o fea lava tatou te i ai, po o fea foi le nuu tatou te nonofo ai, e mafai ona tatou fausia la tatou lava Siona e ala i mataupu faavae o le malo selesitila, ma taumafai pea ina ia avea ma e loto mama. …

    “E le tatau ona avea i tatou o ni papeti i lima o tu ma aga o atunuu ma taimi. E mafai ona tatou lototetele ma e mafai ona [tatou] savavali i ala o le Alii, ma mulimuli i Ona tulaga aao” (i le Conference Report, Ape. 2006, 94–97; po o le Liahona, Me 2006, 91–93).

Alema 5:57–58; 6:3. “Ua Tineia Igoa”

  • Mo se talanoaga o igoa ua tineia, ia faasino i le faamatalaga mo le Mosaea 26:32–36 (itulau 164) ma le Moronae 6:7 (itulau 387).

Alema 7:10. Ua soifua mai Iesu i Ierusalema

  • Sa faamalamalama mai e Peresitene Iosefa Filitia Samita le nofoaga na soifua mai ai le Faaola e pei ona tautino mai e Alema:

    “E leai se faafitauli po o se feteenaiga i le Tusi a Mamona ma soo se upumoni ua faamaumauina i le Tusi Paia. A faitauina ma le totoa le mea na fai mai ai Alema o le a faaali mai ai e lei i ai sona faamoemoega e folafola mai ai o Iesu o le a soifua maii Ierusalema. Sa iloa lelei e Alema. E faapena foi Iosefa Samita ma i latou sa galulue faatasi ma ia i le aumaia o le Tusi a Mamona. Ana faapea e fai mai Alema, ‘e soifua mai i Ierusalema, le nuu o tatou tama,’ o le a faia ai se eseesega atoa i le lalolagi. Ia ona tatou faapea lea na ia faia se mea sese. E le i faia e Alema se mea sese, ma o le mea na ia fai mai ai e moni.

    “O Dr. Hugh Nibley, i ana mataupu o suesuega mo le perisitua mo le 1957, An Approach to the Book of Mormon (O Se Vaaiga i le Tusi a Mamona), i le Lesona 8, itulau 85, sa ia fai mai ai le mea lenei i lea mataupu:

    “‘… O se tasi o mataupu e masani lava ona osofaia ai le Tusi a Mamona o le faamatalaga i le Alema 7:10 e faapea o le Faaola o le a soifua mai i “Ierusalema o le nuu o o tatou tama.” O i, o Ierusalema e le o le aai “i totonu o le nuu o o tatou tama,” o le laueleele. Sa soifua mai Keriso i se nuu pe a ma le ono maila mai le aai o Ierusalema, e le o le aai, ae o le nofoaga lea ua tatou iloa nei sa faailogaina e tagata anamua latou “o le nuu o Ierusalema”’” (Answers to Gospel Questions, comp. Joseph Fielding Smith Jr., 5 vols. [1957–66], 1:174).

  • O Ierusalema ma Peteleema sa faaigoaina uma lava o le aai o Tavita, lea sa mafua ai ni nai fenumiaiga. I le Luka e 2:11 o loo faatatau ia Peteleema o le aai o Tavita. Ae i le 2 Samuelu 5:6–8; 2 Tupu 14:20; 1 Nofoaiga a Tupu 11:4–8 o lo o faatatau uma lava ia Ierusalema o le aai oTavita.

Alema 7:11–12 O o Tatou Tiga, Mafatiaga, Faaosoosoga, Ma’i, ma Vaivaiga

  • Sa tusia e Elder Neal A. Maxwell (1926–2004) o le Korama a Aposetolo e Toasefululua ia aafiaga o le Faaola i mafatiaga o le olaga faaletino ma faatasi ai ma a tatou agasala taitasi: Na te silafia atoa, o aafiaga patino, aua e le gata ina Ia puapuagatia i tiga, mafatiaga, ma faaosoosoga o ituaiga uma i Lona soifuaga faaletino, ae sa Ia tauave i Ona luga a tatou agasala faapea foi ma o tatou tiga, ma’i, ma vaivaiga. (Tagai Alema 7:11–12.) Na Ia silafia lelei, e le na o se vaega ae o le atoaga, ‘i la le tino,’ le puapuagatia o tagata uma. Sa Ia tauaveina o tatou vaivai a o lei o tatou tauaveina i latou. Sa Ia silafia lelei atoa le auala e tausi a’i i tatou. Tatou te le mafai ona tauina atu ia te ia tiga, faaosoosoga, po o mafatiaga: Sa Ia aoaoina i ‘la le tino,’ ma na faamaeaina ai Lana galuega!” (We Will Prove Them Herewith [1982], 46).

Alema 7:12“Tausi a’i Lona Nuu”

  • A o ia aoao atu e uiga i le upu tausi, sa tau mai ai e Elder Jeffrey R. Holland: “[Tausi] e faaaoga soo lava i totonu o tusitusiga paia e faamatala ai le popole o Keriso mo tatou ma le taulai ia i tatou. O le uiga moni lava o le ‘o le sulu i ai.’ E maeu le maoae o le auala e faamatalaina ai taumafaiga faanatinati a le Faaola mo i tatou. E tusa lava po o le a lona valaau mai ia i tatou e o mai ia te ia ma mulimuli atu ia te ia, e le o faavaivai lava o Ia e faataalise mai e fesoasoani ia i tatou” (“Come unto Me” [CES fireside for young adults, Mat. 2, 1997], 7, www.ldsces.org).

Alema 7:22–24.Tiutetauave o le Perisitua Mekisateko

  • O leAlema 7:22–24 o loo aofia ai faatonuga i le au perisitua ma se lisi o uiga lelei e tatau ona latou maua e galulue ai ma le tatau i le perisitua. O lenei faatonuga e tali tutusa ma le faatonuga ua tuuina atu i le au perisitua i le Mataupu Faavae ma Feagaiga 121:41–4. O nei fuaiupu i le Alema 7 ma le Mataupu Faavae ma Feagaiga 121 e fesoasoani ai ia i latou ua umiaina le perisitua e iloa ai le auala e galulue ai e faateleina lo latou mana i le perisitua.

    Sa faamalamalama mai e Peresitene Boyd K. Packer, o le Peresitene o le Korama a Aposetolo e Toasefululua le taua o le ola amiotonu o se e umiaina le perisitua:

    “Ua matuai taua lava le perisitua i le Alii. E faaeteete tele o Ia i le auala e faaeeina atu ai, ma po o ai foi o loo faaee atua. E le faia lava faalilolilo.

    “Ua uma ona ou tau atu ia te outou le auala e tuu atu ai le pule ia te outou. O le mana tou te mauaina, o le a faalagolago i le mea tou te faia i lenei meaalofa paia e le vaaia.

    “O lau pule e oo mai e ala i lou faauuga; a o lou mana e oo mai e ala i le usiusitai ma le tauaogaina” (i le Conference Report, Oke. 1981, 47; po o le Liahona, Ian. 1982, 60).

Alema 7:23–24“Ia Le Gaoiā i Mea Uma”

  • Sa saunoa mai Elder Russell M. Nelson e faatatau i le saogalemu e aumai e le lē gaoiā:

    “O le le gaoia e faamanatu maia le faautauta ma le ola pulea. E faamanatu mai i se tasi ia feagaiga ua osia. …

    “Ua le aunoa pea ona aoao mai tusitusiga paia e ao ona tatou ‘le gaoiā i mea uma’ (1 Korinito 9:25; Alema 7:23; 38:10; MFF 12:8 ). E mafai e le le gaoiā ona puipuia i tatou taitoatasi mai iuga o le soona fai” (i le Conference Report, Oke. 1991, 81; po o le Liahona, Ian. 1992, 70).

Manatu e Mafaufau Loloto i ai

  • E oo lava ina ua uma ona vaaia se agelu, sa tatau lava ia Alema ona salamo, faatinoina le faatuatua ia Iesu Keriso, ma tuuina atu taumafaiga sili e maua ai lana molimau. E faapefea ona faamatala e le Alema 5:45–48 le faagasologa na maua ai e Alema le malamalama “o le Alo, e toatasi na fanaua o le Tama”?

  • O a ni mea e tutusa ai ma ni eseesega e te iloaina i le talaiga a Alema i le nuu o Saraemila ma le nuu o Kiteona?

  • Ua faapefea ona faalolotoina lou malamalama ma le talisapaiaina o le Togiola a o e suesue ai i le Alema 7:11–13?

Galuega Fautuaina

  • Na fesiligia e Alema le silia ma le 40 fesili i le mataupu e 5. Ia faitau fesili na fesiligia e Alema, ma filifili se tasi o na fesili e taliina e ala i le tusiaina o se palakalafa e aofia ai lou malamalamaaga, lagona, po o ni manatu e uiga i le autu o le fesili.

  • Ia toe suesue ma iloa le uiga o soo se amio sili o loo lisiina i le Alema 7:23 atonu e te le o masani i ai.