« ការស្វែងរកការណែនាំខាងវិញ្ញាណ » លីអាហូណា ខែ កញ្ញា ឆ្នាំ ២០២២ ។
សម្រាប់មាតាបិតា
ការស្វែងរកការណែនាំខាងវិញ្ញាណ
គោរពជូនមាតាបិតា
នៅក្នុងទស្សនាវដ្តីច្បាប់នេះ មានពួកអ្នកមានសិទ្ធិអំណាចទូទៅចំនួនបីរូបចែកចាយការបង្រៀន និងបទពិសោធន៍ផ្ទាល់ខ្លួន និងបទពិសោធន៍ពីក្រុមគ្រួសារ ស្តីពីរបៀបដើម្បីប្រឹងប្រែង និងស្វែងរក ហើយធ្វើតាមការណែនាំខាងវិញ្ញាណ ។
ការពិភាក្សាអំពីដំណឹងល្អ
ការពឹងផ្អែកទៅលើទីបន្ទាល់របស់យើង
នៅ ទំព័រ ៤ អែលឌើរ រ៉ូណល អេ រ៉ាសបាន ចែកចាយដំណើររឿងមួយចេញមកពីប្រវត្តិគ្រួសាររបស់លោកដើម្បីបង្រៀនគោលការណ៏មួយដែលថា ព្រះអង្គសង្រ្គោះរបស់យើងមិនដែលបោះបង់ចោលយើងឡើយ ។ សូមអានអត្ថបទរបស់លោក ហើយពិភាក្សាអំពីរបៀបដែលពួកបរិសុទ្ធសម័យមុនពឹងផ្អែកទៅលើទីបន្ទាល់របស់ពួកគេអំពីព្រះយេស៊ូវគ្រីស្ទ និងផែនការនៃសេចក្តីសង្រ្គោះរបស់ព្រះវរបិតាសួគ៌ ។
ការប្រឹក្សាជាមួយនឹងព្រះអម្ចាស់
នៅ ទំព័រ ៣០ អែលឌើរ ផាតទ្រីស៊ីអូ អិម ជីហ្វហ្វ្រា ពិពណ៌នាពីរបៀបដែលលោក ក្នុងនាមជាអ្នកប្រែចិត្តជឿចូលសាសនាចក្រវ័យជំទង់ម្នាក់ បានសម្រេចចិត្តទៅបម្រើបេសកកម្ម និងស្វែងរកការអប់រំនៅមហាវិទ្យាល័យ ។ បន្ទាប់មក លោកបានចែកចាយចម្លើយរបស់លោកទៅនឹងសំណួរថា តើបងប្អូនធ្វើយ៉ាងណា នៅពេលដែលវិវរណៈផ្ទាល់ខ្លួនផ្ទុយទៅនឹងភាពជាក់ស្តែងនោះ ?
ការទទួលការណែនាំពីព្រះវិញ្ញាណ
តើយើងអាចទទួលបានអត្ថប្រយោជន៍យ៉ាងពេញលេញមកពីអំណោយទាននៃព្រះវិញ្ញាណបរិសុទ្ធនៅក្នុងជីវិតរបស់យើងយ៉ាងដូចម្តេច ? អែលឌើរ ហូសេ អេ តិក្សសៃរ៉ា បានស្វែងយល់អំពីប្រធានបទនេះនៅលើ ទំព័រ ៤០ ។ សូមអានអត្ថបទរបស់លោក ហើយពិភាក្សាអំពីរបៀបដើម្បីទទួលបានការណែនាំពីព្រះវិញ្ញាណឲ្យបានកាន់តែសន្ធឹកសន្ធាប់ឡើងថែមទៀត ។
ចូរមកតាមខ្ញុំ ការកម្សាន្តសប្បាយប្រចាំគ្រួសារ
សូមពិចារណាមាគ៌ានេះ
-
សូមដាក់រូបភាពរបស់ព្រះអង្គសង្រ្គោះនៅម្ខាងនៃទីធ្លាធំមួយ ឬនៅបន្ទប់មួយ ។
-
សូមឈរនៅម្ខាងទៀតនៃបន្ទប់នោះ ។ សូមប្តូរវេនគ្នាបិទភ្នែកសមាជិកគ្រួសារម្នាក់ម្តងៗ ដោយបង្វិលពួកគេជុំវិញ ហើយបន្ទាប់មកចាំមើលថាតើពួកគេអាចដើរទៅរករូបភាពព្រះយេស៊ូវគ្រីស្ទដោយគ្មានជំនួយអ្វីបានដែរឬទេ ។
-
សូមអាន សុភាសិត ៤:២៦–២៧ ។
ការពិភាក្សា ៖ តើមានជំនួយប្រភេទណាខ្លះដែលបានផ្តល់ឲ្យយើងនៅក្នុងជីវិតនេះ ដើម្បីរក្សាយើងឲ្យដើរនៅលើផ្លូវដែលនាំទៅរកព្រះយេស៊ូវគ្រីស្ទ ? សម្រាប់ការពិភាក្សាបន្ថែមទៀត សូមមើល សុភាសិត ៣:៥–៦ ។ តើសកម្មភាពអ្វីខ្លះដែលយើងត្រូវធ្វើដើម្បីទុកចិត្តលើព្រះអម្ចាស់ឲ្យអស់ពីដួងចិត្តរបស់យើង ?